Josué

3 Te Josué buen sab jajch, lokʼ bael ta Sitim sok spisil te israeletik, kʼotik ta mukʼul jaʼ Jordán. Tey kʼax ajkʼabal yuʼunik-a te kʼalal mato solemik kʼaxel-ae.

2 Oxeb kʼajkʼal ta patil, te machʼatik yichʼoj mukʼ yaʼtelik kʼaxik ta campamento 3 sok jich la yalbeyik ta mantal te lume: «Jaʼnax teme ya awilik te levitaetik, te jaʼik sacerdoteetik, te skʼechojikix-a te skaxaul chapbilkʼop yuʼun te Jehová te Dios awuʼunike, lokʼanik bael te banti ayexe sok tʼunaik bael. 4 Pero yame skʼan te jteb ma sta 2 mil xujkʼubil* snamalil* ya awakʼ abaik ta stojol, mame xnoptsajex-xan* bael swenta jich ya anaʼik banti beil ya atʼunik bael, melel maʼyuk bin-ora awilojik te bee».

5 Jaʼ yuʼun, te Josué jich la yalbey te lum: «Chʼultesa abaik, melel te pajele bayalme ta chajp aʼteliletik ya xbajt spas ta awolilik te Jehová».

6 Ta patil, te Josué jich la yaltiklanbey te sacerdoteetik: «Kʼechaik jajchel te skaxaul chapbilkʼop sok nailajanik bael ta stojol te lume. Jich la skʼechik jajchel te skaxaul chapbilkʼop sok nailajik bael ta stojol te lume.

7 Te Jehová jich la yalbey te Josué: «Ta kʼajkʼal ini ya xjajch jmukʼubtesbat akʼoplal ta stojol spisil te lum Israel swenta jich ya snaʼik te ya jokinat jich bitʼil la jokin te Moisés. 8 Jichme xa apas ta mantal te sacerdoteetik te ya skʼechik bael te skaxaul chapbilkʼop: ‹Te kʼalal ya xkʼoex ta stiʼil te mukʼul jaʼ Jordán, teyme tekʼel ya xjilex-a›».

9 Te Josué jich la yalbey te israeletik: «Laʼik sok chʼama awaʼiyik te bin ya yal te Jehová te Dios awuʼunike». 10 Jich la yal te Josué: «Jichme ya anaʼik te ay jun Dios te kuxul ta awolilik te ya xbajt stentiklan lokʼel ta jkʼaxel ta atojolik te cananeoetik, hititaetik, heveoetik, perizitaetik, guirgaseoetik, amorreoetik sok te jebuseoetik. 11 ¡Ilawilik! Te skaxaul chapbilkʼop yuʼun te Yajwal swolol te balumilal jaʼme nail ya x-och bael awuʼunik ta mukʼul jaʼ Jordán. 12 Jich yuʼun tsaaik tal 12 ta tul winiketik, jujuntul ta jujunchajp stsʼumbal Israel, 13 jaʼnax te kʼalal ya stekʼik ochel te mukʼul jaʼ Jordán te sacerdoteetik te skʼechojik te skaxaul chapbilkʼop yuʼun te Jehová —te Yajwal swolol te balumilal—, te yaʼlel te mukʼul jaʼ Jordán te yak ta koel tal ta ajkʼole* yame stejkʼan sba moel jich te bin-utʼil tsʼajkʼ.

14 Jich yuʼun, te kʼalal lokʼik bael te banti spasojik-a te scampamentoik yuʼun ya xkʼaxikix bael ta mukʼul jaʼ Jordán, te sacerdoteetik te skʼechojik te skaxaul chapbilkʼop jaʼ nailajik bael ta stojol te lume. 15 Jaʼnax te kʼalal kʼotik ta stiʼil te mukʼul jaʼ Jordán sok te kʼalal la yotses yokik tey-a te sacerdoteetik te skʼechojik skaxaul chapbilkʼop (ta yorail te kʼajoj spisil-ora ya xnoj te mukʼul jaʼ Jordán jaʼto kʼalal ta stiʼil), 16 kom ta beel te jaʼ te ya xtal ta ajkʼole.* Namalto* la stejkʼan sba moel te jaʼ jich te bin-utʼil tsʼajkʼ, ta lum Adán te nopol* yiloj sba sok te mukʼul lum Zaretán, yan te jaʼ te yak ta koel bael ta mar yuʼun Arabá, jaʼ te mar Salado,* takij stukel. Kom ta beel te jaʼe, jich kʼax bael ta yan jejch te lum Israel, kʼotik ta stojol Jericó. 17 Te kʼalal tekʼelik ta yolil te mukʼul jaʼ Jordán te sacerdoteetik te skʼechojik te skaxaul chapbilkʼop yuʼun te Jehová, takin-a te lume. Jich yuʼun, te kʼalal kʼaxik bael spisil te lum Israel, takin te sbeike jaʼto te kʼalal kʼaxik spisilik ta jejch Jordán.