Apocalipsis
15 La kil yan seña ta chʼulchan te mukʼ sok te kʼax jelawen yutsile: juktul chʼul-abatetik te yichʼojik jukchajp wokoliletik. Te wokoliletik ini jaʼme slajibal, melel tey laj-a te yilinba te Diose.
2 Jaʼnix jich ay bin la kil te jich yilel te bin-ut’il mar yuʼun cristal te kapal sok kʼajkʼ, sok la kil te machʼatik la stsalik te chambalam te xiʼbantik sba, te slokʼomba sok te número yuʼun te sbiile. Tekʼajtik ta stsʼeel te mar yuʼun cristal; stsaktiklanojik te arpaetik yuʼun te Diose. 3 Yakik ta skʼayojtayel te skʼayoj te Moisés, te j-abat yuʼun te Diose, sok te skʼayoj te Jkolel* Tuminchij, jich yakik ta kʼayoj:
«Mukʼ sok kʼax jelawen yutsil te yaʼtel akʼab Jehová* Dios, jaʼat te Machʼa spisil ya xjuʼ awuʼune. Stojil sok smelelil te beetik awuʼun, Ajwalil te sbajtelkʼinal ayate. 4 ¿Machʼa-a te maba ya xiʼat,* Jehová?* ¿Machʼa-a te maba ya yalbey yutsil skʼoplal te abiile? Melel jaʼatnax te jun awoʼtan. Yame xtal ta atojol spisil te nacionetik sok yame yichʼtiklanat ta mukʼ, melel la yichʼix akʼel ta naʼel te tojil mantaliletik awuʼune».
5 Ta patil la kil te jam te chʼul awilal yuʼun te nailpakʼ yuʼun te Testigo Kʼop te ay ta chʼulchan, 6 sok ta chʼul awilal lokʼik tal te juktul chʼul-abatetik te yichʼojik jukchajp wokoliletik. Slapojik lino-pakʼ te maʼyuk yabakul* sok te xlemetnaxe, sok ay schujkil schʼujtik te pasbilik ta oro te chukul kʼalalto ta yoʼtanik. 7 Ay jtul ta schantulul te querubinetik* la yakʼbey te juktul chʼul-abatetik jukeb tazaetik te pasbilik ta oro te nojelik ta yilinba te Diose, jaʼ te machʼa kuxul ta sbajtelkʼinal. 8 Noj ta chʼail te chʼul awilal ta swenta te yutsilal te Dios sok ta swenta te yuʼele. Maʼyuk machʼa ya xjuʼ ya x-och tey-a jaʼto teme tsʼakaj te jukchajp wokoliletik te ay ta skʼabik te chʼul-abatetike.