Proverbios
12 Te machʼa kʼux ta yoʼtan te tojobtesel yuʼunme kʼux ta yoʼtan te bin ay ta naʼel,
pero te machʼa ya spʼaj te tsitsel* yuʼunme maʼyuk spʼijil yoʼtan.
2 Te machʼa lek yoʼtan lek ya x-ilot yuʼun te Jehová,
pero te machʼa ay bintik chopol* ya schapbey skʼoplal ya yichʼ pʼajel yuʼun te Diose.
3 Te bin chopol* ya yichʼ pasel ma xyakʼ te ay bin lek ya xlokʼ yuʼun-a te ants winik,
pero te machʼa toj yoʼtan maʼyuk bin-ora ya yichʼ bulel lokʼel stukel.
4 Te lekil inamil jaʼ corona ta sjol te smamalal,
pero te inamil te kʼexlaltik sba te bin ya spas jich kʼoem te bin-utʼil chamel te ya skʼaʼtesbey sbakel te smamalal.
5 Te spensar te machʼatik toj yoʼtanik toj stukel,
pero te tojobtesel ya yakʼik te machʼatik chopolik* ya xloʼlaywan.
6 Te bin ya yalik te machʼatik chopolik* jich kʼoem te bin-utʼil te machʼatik ya snakʼ sbaik yuʼun ya xmilawanik,*
pero te skʼop te machʼatik toj yoʼtanik ya yakʼ kolel stukel.
7 Kʼalal ya yichʼik lajinel te machʼatik chopolik* teyme tupʼ skʼoplalik-abi,
pero te sna te machʼatik toj yoʼtanik maba ya xjin stukel.
8 Ya yichʼ albeyel yutsil skʼoplal te machʼa ya snaʼ stsajtayel* te bitʼil ya xkʼopoj,
pero te machʼatik ma toj yoʼtanik yame yichʼik pʼajel.
9 Jaʼ lekxan te ma mukʼuk jkʼoplaltik, pero te aytonix jtuluk j-abat kuʼuntik,
ma jaʼuk te mukʼnax jkʼoplaltik ya kaʼiy jbatik, pero te maʼyuk jweʼeltik* yuʼune.
10 Te machʼa toj yoʼtan ya skanantay te alakʼil chambalametik* yuʼun,
pero te machʼa chopol* ya skuy te yak ta yakʼel ta ilel skʼuxul yoʼtan, pero ay schopolil yoʼtan.
11 Te machʼa ya x-aʼtej ta skʼinal aynanixme sweʼel-a,
pero te machʼa ya snuts te biluketik te maʼyuk skʼoplal yuʼun maʼyuk spʼijil yoʼtan.
12 Te machʼa chopol* ay sbikʼtal yoʼtan ta stojol te chopol winiketik te ay bin juʼem yuʼunik stsakel,
pero te slojpʼ o yisim* te machʼa toj yoʼtan ya sitin stukel.
13 Te machʼa chopol* ya sta swokol yuʼun te bintik chopol ya yal,
pero te machʼa toj yoʼtan ya xkol lokʼel ta wokolil.
14 Ta swenta te sit te bintik ya yal te ants winik, yame smulanbey yutsilal te bintik lek
sok ya yichʼ majtantesel yuʼun te yaʼtel skʼab.
15 Te machʼa ma snaʼ kʼinal ya skuy te lek ay te sbe,
pero te machʼa ay spʼijil yoʼtan ya schʼuun te tojobtesel.
16 Te machʼa ma snaʼ kʼinal oranax* ya yakʼ ta ilel te yilinba,
pero te machʼa ay spʼijil yoʼtan ma xyichʼ ta wenta te bolkʼoptayel.
17 Te testigo te jun yoʼtan jaʼ ya yal te bin smelelil,*
pero te lotil testigo jaʼnax ya yal lotil kʼopetik.
18 Te kʼalal maba nopbil ta lek te bin ya yichʼ alel, jich ya xkʼot te bin-utʼil espada te ya xlajinwan,
pero te bin ya yal te machʼatik ay spʼijil yoʼtanik ya xpoxtaywan stukel.
19 Te machʼa smelelil ya xkʼopoj yame xjalaj ta sbajtelkʼinal,
pero te machʼa ya spas lot jtsʼin-nax* ya xjalaj stukel.
20 Ay loʼlaywanej ta yoʼtanik te machʼatik ya schapik spasel te bin chopol,*
pero te machʼatik ay bintik ya spasik* yuʼun ya x-ayin lamalkʼinal tseʼel yoʼtanik.
21 Maba ya sta swokol te machʼa toj yoʼtan,
pero te machʼa chopol* yame sta bayal swokol.
22 Te Jehová ya yilay te machʼatik ya spasik lot,
pero tseʼel yoʼtan ta stojol te machʼatik jun yoʼtanik.
23 Te machʼa ay spʼijil yoʼtan ma xyal te bin ya snaʼ,
pero te machʼa ma snaʼ kʼinal jaʼ ya yal te bintik ya yal te machʼa ma snaʼ kʼinal.
24 Te skʼab te machʼa tulan ya x-aʼtej yame xkʼot ta wentainwanej,
pero te machʼa chʼaj skʼab yame x-akʼbot spas tulan aʼtelil.
25 Te pichʼil oʼtanil ya slajinbey yoʼtan te ants winik,*
pero te lekil kʼopetik ya x-akʼbot yip yoʼtan yuʼun.
26 Te machʼa toj yoʼtan ya sle te lekil akiltik,
pero te be te stʼunojik te machʼatik chopolik* ya xjowijtesotik bael yuʼun.
27 Te chʼajil ants winik ma skʼan ya xbajt ta nutsojel,
pero te smulanel aʼtel jich kʼoem te bin-utʼil kʼulejalil.
28 Te be yuʼun te bin stojil ta pasel ya x-ikʼawan bael ta kuxlejalil;
maʼyuk lajel ta sbelal.