LECCIÓN 51

Lekuk ya yil Jehová te bitʼil ya xkʼopojotik

Partitura

Kʼalal la spasotik te Jehová, la yakʼbotik jun mukʼul majtanil: jaʼ te ya xkʼopojotike. Jaʼ yuʼun, te Jehová kʼax mukʼ skʼoplal ya yil te yakuk jnaʼtik stuuntesel ta lek te majtanil-abi (kʼopona Santiago 1:26). Jich yuʼun, ¿bin-utʼil ya kakʼbeytik stseʼelil yoʼtan te Jehová ta swenta te bin ya kaltike?

1. ¿Bin-utʼil ya xjuʼ ya jtuuntestik ta lek te jmajtantike?

Te Biblia jich ya yal: «Talel cʼaxel me xamucʼubtesbe aba qʼuinal awaʼiyic soc talel cʼaxel me xawaʼbe aba yip awoʼtanic» (1 Tesalonicenses 5:11). ¿Aybal machʼa ya skʼan smukʼul yoʼtan ya awil? ¿Aybal bin ya xjuʼ ya apas ta stojol? Akʼbeya snaʼ te bayal skʼoplal ta awoʼtane. Yaniwan xjuʼ ya awalbey te bintik lek ya spase. ¿Yabal xtal ta awoʼtan junuk texto te ya yakʼ mukʼul oʼtanil? Ay bayal textoetik. Ayukme ta awoʼtan te ay skʼoplal ya xkʼot ta yoʼtanik te bin-utʼil ya xkʼopojat sok te bin ya awale. Jaʼ yuʼun, pasa tulan te lekuk sok lamaluk awoʼtan ya xkʼopojate (Proverbios 15:1).

2. ¿Bintik ma skʼan ya xlokʼ ta ketik?

Te Biblia jich ya yal: «Ma me xlocʼ bohlcʼop ta awehic» (kʼopona Efesios 4:29). Jaʼ yuʼun ma lek te ya kaltik bolkʼop sok te bin ya x-ejchentesbot yoʼtan yuʼun te yantike. Jaʼnix jich maba ya jpukbeytik skʼoplal yantik sok maba ya xleawanotik ta kʼop (kʼopona Proverbios 16:28).

3. ¿Bin ya skoltayotik yuʼun lek te bin ya kaltike?

Te bin ya kaltik ya yakʼ ta naʼel te bin ya jnoptik sok te bin yaʼiyel ya kaʼiy jbatik (Lucas 6:45). Jaʼ yuʼun ya skʼan ya jkʼaytes jbatik ta snopel te bin stojil, te bin maʼyuk yabakul, te bin lek skʼoplal sok te bin ya x-albot yutsil skʼoplale (Filipenses 4:8). Yuʼun ya xjuʼ kuʼuntik spasel-abi, ya skʼan ya jtsatik ta lek te bin ya jkʼasestik kʼajkʼal-a sok te ya jle lekil kamigotaktik (Proverbios 13:20). Jaʼnix jich ya skʼan te nail ya jnoptik te bin ya kaltike. Nopa awaʼiy bin-utʼil ya xjuʼ ya x-utsʼinot o ya xjuʼ ya xkoltayot te yantik te bin ya awale. Te Biblia jich ya yal: «Ay machʼa te hich ya xʼehchenteswan te bin utʼil espada te scʼopique, yan te scʼop te machʼa pʼij yoʼtan ya xpoxtaywan stuquel» (Proverbios 12:18).

JNOPTIKXAN TA LEK

Kiltik bin-utʼil ya kakʼbeytik stseʼelil yoʼtan te Jehová sok ya kakʼbeytik smukʼul yoʼtan te yantik ta swenta te bin ya kaltike.

4. Tsajtayame te bin ya awale

Jpisiltik ay bin kalojtik te patil ma lek la kaʼiy jbatik yuʼune (Santiago 3:2). Kʼoponaik Gálatas 5:22, 23 sok albeyaik skʼoplal ini:

Swenta ya anaʼ stsajtayel te bin ya awale, ¿bin talelil ya akʼanbey te yakuk yakʼbat te Jehová? ¿Bin-utʼil ya skoltayat te taleliletik-abi?

Kʼoponaik 1 Corintios 15:33 sok albeyaik skʼoplal ini:

¿Yabal xjuʼ ya yutsʼin te bitʼil ya xkʼopojat te awamigotak sok te bin ya akʼases kʼajkʼal-ae? ¿Bin-utʼil?

Dibujoetik te banti ya xchiknaj te bintik ya spas jtul winik te ya yakʼ te tulan ya skʼopon te yiname: 1. Yak ta yaʼiyel música te maba lek. 2. Yak ta yilel box ta televisión sok jtul yamigo. — ¿Bintik ya xjuʼ ya skoltayat swenta lek ya xkʼopojat?

Dibujoetik te ya yakʼ ta ilel te bin ya spas jtul winik swenta sok yutsil yoʼtan ya skʼoponix-a te yiname: 1. Yak ta skʼoponel te sBiblia. 2. Yak ta kʼop ta congregación sok ants winiketik te lek stalelike. — ¿Bintik ya xjuʼ ya skoltayat swenta lek ya xkʼopojat?

Kʼoponaik Eclesiastés 3:1, 7 sok albeyaik skʼoplal ini:

¿Bin-ora ma skʼan ya xkʼopojotik o bin-ora ya skʼan ya jmaliytik te ya xkʼopojotike?

5. Albeya lek skʼoplal te yantike

¿Bin ya skoltayotik yuʼun ma x-ejchenteswan te bin ya kaltike? Ilawilik te VIDEO sok albeyaik skʼoplal ini:

VIDEO: Akʼa kaltik «lequil cʼop» (4:07)

¿Bin yuʼun te hermano ya skʼan ya sjeltay-a te bitʼil ya xkʼopoj ta stojol te yantike?
¿Bin-utʼil la spas?

Kʼoponaik Eclesiastés 7:16 sok albeyaik skʼoplal ini:

¿Bin ya skʼan ya xjul ta koʼtantik kʼalal ay bin ma stojiluk ya jkʼan ya kaltik ta stojol te yantike?

Kʼoponaik Eclesiastés 7:21, 22 sok albeyaik skʼoplal ini:

¿Yabal xjuʼ ya skoltayat te versiculoetik ini yuʼun ma x-ilinat teme ay bin ma lek ya yalik ta atojole? ¿Bin yuʼun?

6. Kʼopona sok slekil awoʼtan te afamilia

Te Jehová ya skʼan te yakuk jkʼopontik sok yutsil koʼtantik sok slekil koʼtantik te jfamiliatike. Ilawilik te VIDEO sok albeyaik skʼoplal ini:

VIDEO: Te kʼuxul oʼtanil sok te ichʼaw ta mukʼ jun-nax ya yakʼ te familiae (3:03)

¿Bin ya skoltayat yuʼun ya akʼopon sok slekil awoʼtan te afamiliae?

Kʼoponaik Efesios 4:31, 32 sok albeyaik skʼoplal ini:

¿Bin-utʼil ya skʼan ya xkʼopojotik yuʼun lek ya yaʼiy sba te jfamiliatike?

Te Jehová la yal ta jamal te kʼux ta yoʼtan te sNichʼane. Kʼoponaik Mateo 17:5 sok albeyaik skʼoplal ini:

¿Bin-utʼil ya xjuʼ ya anopbey stalel te Jehová te kʼalal ya akʼopon te afamiliae?

Jtul nanil yak ta yalbeyel lek skʼoplal te achʼix yuʼune. — Lea bin-ora ya xjuʼ ya awutsilkʼoptay te yantike.

AY MACHʼATIK JICH YA YALIK: «Ya kal ta jamal te bin ya jnope. Ma jwentauk teme lek o ma lek ya yaʼiy te yantike».

¿Jichbal ya awal-euk te jaʼate? ¿Bin yuʼun?

¿BINTIK LA JNOPTIK?

Te bin ya kaltik ya xjuʼ ya skoltay o ya yutsʼin te yantike. Jich yuʼun, nail ya skʼan ya jnoptik te bin ya kaltik, bin-ora ya kaltik sok bin-utʼil ya kaltik.