2 Crónicas

6 Te Salomón jich la yal: «Te Jehová yaloj te ya xnain ta yolil pimil tokal. 2 Pero juʼix kuʼun spasel te ana te kʼax tʼujbil te banti ya xjuʼ ya xnainat ta sbajtelkʼinal».

3 Tey-abi la sut sba te ajwalil ta stojol spisil te lum Israel te tey tekʼajtik-ae sok jajch yakʼbey bendición. 4 Jich la yal: «Akʼa yichʼ albeyel yutsil skʼoplal te Jehová te Dios yuʼun Israel, jaʼ te machʼa la skʼotes ta pasel te bin jamal la yalbey te David te jtate: 5 ‹Jaʼto te bin kʼajkʼalil la jlokʼes tal ta skʼinal Egipto te lum kuʼun, maʼyuk jtsaoj junuk mukʼul lum yuʼun te lum Israel swenta ya yichʼ pasel jun na yuʼun tey ya x-ayin-a te jbiile. Jaʼnix jich maʼyuk jtsaoj jtul winik-a yuʼun ya x-och ta jwolwanej ta lum Israel kuʼun. 6 Pero, ta ora ini jaʼ la jtsa te Jerusalén swenta tey ya x-ayin-a te jbiile, sok jaʼ la jtsa te David yuʼun jaʼ ya swentainbon te lum Israel kuʼun›. 7 Te David te jtat jaʼ lokʼ ta yoʼtan spasel jun na ta swenta sbiil te Jehová te Dios yuʼun Israel. 8 Pero, te Jehová jich la yalbey te David te jtate: ‹Lokʼ ta awoʼtan spasel jun na ta swenta te jbiile, kʼax lek te jich la skʼan te awoʼtane. 9 Pero, ma jaʼukat ya apas te nae. Te anichʼan te yato x-ayine* jaʼme te machʼa ya spasbon jun na ta swenta te jbiile›. 10 Te Jehová la skʼotes ta pasel te bin jamal la yale, melel joʼon la jelolin jilel te David te jtate, joʼon nakalon ta mukʼul naktajibal yuʼun Israel, jich te bitʼil la yal ta jamal te Jehová. Jaʼnix jich juʼix kuʼun spasel te na ta swenta sbiil te Jehová te Dios yuʼun Israel, 11 tey la kakʼ-a te skaxaul chapbilkʼop te banti ay te chapbilkʼop te la spas te Jehová sok te lum Israel».

12 Jich yuʼun, te Salomón la stejkʼan sba ta stojol te skajtajib chikʼbil majtanil yuʼun te Jehová sok tey ayik spisil-a te lum Israel, tey-abi la stoy moel te skʼabe. 13 (Te Salomón la spas skajtajib te banti ya xtejkʼaj te pasbil ta cobre sok la yakʼ ta yolil amakʼ. Te skajtajib te la spase ay joʼeb xujkʼubil* snajtil, joʼeb xujkʼubil sjamalul sok oxeb xujkʼubil* stoyolil; tey la stejkʼan sba-a). La skejan sba ta stojol spisil te lum Israel sok la stoy moel skʼab ta chʼulchan 14 sok jich la yal: «Kajwal, Jehová, Dios yuʼun Israel. Maʼyuk yan Dios ta chʼulchan sok ta balumilal jich bitʼil te jaʼate. Te jaʼate ya akʼotes ta pasel te chapbilkʼop ya apas sok ya awakʼbey yil te kʼuxul oʼtanil te ma x-ijkitaywan te j-abatetik awuʼun te spisil yoʼtanik ya stʼunik te beetik awuʼune. 15 La akʼotesix ta pasel te bin jamal la awalbey te David te j-abat awuʼun, jaʼ te jtate. Ta ora ini la akʼotesix ta pasel te bin jaʼatnix jamal la awale. 16 Jich yuʼun, Kajwal, Jehová, Dios yuʼun Israel, kʼotesa ta pasel te bin jamal la awalbey te David te j-abat awuʼun, jaʼ te jtat, te kʼalal jich la awalbeye: ‹Teme ya stsajtay* sbaik ta swenta te bin ya spas ta skuxlejalik te anichʼnab jich te bitʼil ya yal te ley sok jich te bitʼil la apas te jaʼate, spisilme-ora ya x-ayin jtul atsʼumbal te ya xnajkaj ta mukʼul naktajibal yuʼun Israel›. 17 Jaʼ yuʼun, Kajwal, Jehová, Dios yuʼun Israel, akʼa kʼotuk ta pasel awuʼun te bin la awalbey ta jamal te David te j-abat awuʼun.

18 »Pero, ¿yuʼun-nixbal ya xjuʼ ya xnain-a te Dios ta balumilal sok te ants winiketike? Manchukme kʼax mukʼ sjamalul te chʼulchan, ma xjuʼ ya xnainat tey-a. ¡¿Jaʼuktobalix-a te na ini te la jpase?! 19 Jich yuʼun aʼiybon awaʼiy te jkʼop sok aʼiybon awaʼiy te wokol ya jkʼanbat ta atojole. Kajwal, Jehová, Dios kuʼun, aʼiybon awaʼiy te koltayel ya jkʼanbat ta atojol sok aʼiybon awaʼiy te oración kuʼun te yakon ta spasel ta atojol. 20 Ta kʼajkʼal ajkʼabal akʼa asit ta stojol te na ini —jaʼ te banti la awalbey skʼoplal te tey ya x-ayin-a te abiil— swenta ya awaʼiybey skʼop te j-abat awuʼun ini te kʼalal ya xtal skʼoponat ta lugar ini. 21 Aʼiybeya awaʼiy te koltayel ya skʼanbat te j-abat awuʼun ini sok te koltayel ya skʼanbat te lum Israel te kʼalal ya skʼoponat ta lugar ini. Aʼiybonkotik te jkʼoptik kʼalalto ta chʼulchan, jaʼ te banti nainemate. Aʼiybonkotik te jkʼoptik sok pasbonkotik perdón.

22 »Teme ay machʼa ya sta smul ta stojol yan winik sok te ay bin ya sujot ta yalel ta jamal* —manchukme ya xjuʼ ya sta swokol yuʼun— sok te jich ya xtal ta stojol te skajtajib chikʼbil majtanil awuʼun liʼ ta na ini, 23 aʼiybeya awaʼiy te skʼop kʼalalto ta chʼulchan sok koltaya. Ichʼa ta kʼop te j-abatetik awuʼun: akʼbeya stoj smul te machʼa chopole* sok akʼa kʼotuk ta stojol te castigo ta swenta te bin chopol spasoje; jaʼat xa awal te maʼyuk smul te machʼa toj yoʼtan sok akʼbeya smajtan ta swenta te bin lek spasoje.

24 »Teme ya yichʼ tsalel yuʼun te skontratak te lum Israel awuʼun ta skaj smulik ta atojol, pero teme ya sujtik tal ta atojol, teme ya yalbeyik yutsil skʼoplal te abiil, teme ya skʼoponat sok teme ya yalbat wokol liʼ ta na ini, 25 aʼiybeya awaʼiy te skʼopik kʼalalto ta chʼulchan sok pasbeya perdón te smul te lum Israel awuʼun sok ikʼa sujtel tal ta kʼinal te banti la awakʼtiklanbey soknix te la awakʼbey te antiguo smeʼ statike.

26 »Te kʼalal ya xmajk te chʼulchan sok te maba ya yakʼ tal jaʼal ta skaj te staoj smulik ta atojole, pero teme ya skʼoponat ta lugar ini, teme ya yalbeyik yutsil skʼoplal te abiil sok teme ya yijkitayik ta spasel te bintik chopol* ta skaj te la apejkʼanbey skʼoplalik, 27 aʼiybeya awaʼiy te skʼopik kʼalalto ta chʼulchan sok pasbeya perdón te smul te j-abatetik awuʼun, jaʼ te lum Israel —melel jaʼat ya anojptes ta swenta te lekil be ya skʼan ya stʼunik baele—, sok akʼa tal jaʼal ta stojol te lumkʼinal te la awakʼbey te lum awuʼune.

28 »Teme ay ya xtal wiʼnal ta kʼinal, tulan chamel,* tulan kʼixin ikʼ, teme ay ya xtaot ta chamel te awal tsʼunubil, ya xtal bayal kʼulubetik o ay ya yichʼik joytayel yuʼun te skontratakik ta mukʼul lum kuʼunkotik, o ya xchiknaj yantik wokolil o chamel, 29 chikan bin-a te ya awichʼ kʼanbeyel ta oración, chikan bin koltayel ya skʼanbat jtul ants winik o spisil te lum Israel awuʼun te ya stoy moel skʼab ta na ini (melel ta jujuntul ya snaʼ bin-a te swokol sok te bin kʼux ya yaʼiye), 30 aʼiybeya awaʼiy te skʼopik kʼalalto ta chʼulchan, jaʼ te banti nainemate, sok pastiklanbeya perdón. Jichme xa awakʼbey smajtan ta jujuntul ta swenta te bin spasojik, melel jaʼat ya anaʼ te bin ay ta yoʼtanik (jaʼatnax atukel ya anaʼ te bin ay ta yoʼtan te ants winiketike), 31 swenta jich ya xiʼat* te kʼalal ya stʼunik te beetik awuʼun te jayeb kʼajkʼal kuxulik ta kʼinal te la awakʼbey te antiguo jmeʼ jtatike.

32 »Jaʼnix jich, te jyanlum te ma jaʼuk slumal te lum Israel awuʼun sok te kʼax namal* te banti ya xtal ta swenta smukʼul te abiil, te yip te akʼab sok te awuʼel, soknix te ya skʼoponat ta na ini, 33 aʼiybeya awaʼiy te skʼop kʼalalto ta chʼulchan, jaʼ te banti nainemat sok akʼbeya te bin ya skʼanbat te jyanlume, swenta jich ya snaʼbat abiil spisil te lumetik ta balumilal, swenta ya xiʼat —jich te bitʼil ya spas te lum Israel awuʼun— sok te ya snaʼik te liʼ ay te abiil ta na ini te joʼon la jpase.

34 »Teme ya xbajt yakʼbey guerra te skontratak te lum awuʼun chikan te bin beil ya atikun bael sok teme ya skʼoponatik ta stojol te mukʼul lum ini te jaʼatnix atsaoj sok ta stojol te na te joʼon la jpas ta swenta te abiile, 35 aʼiybeya awaʼiy te skʼopik kʼalalto ta chʼulchan sok te koltayel ya skʼanik ta atojol soknix ilawil te lekuk ya yichʼik chajpanele.

36 »Teme la sta smulik ta atojol (melel maʼyuk machʼa ma sta smul) sok te ya x-ilinat ta stojolik te jich ya awakʼ ta skʼab te skontratak sok te ya x-ikʼotik bael ta chukel ta yan lum, chikan teme namal* o nopol,* 37 sok teme la sujtes yoʼtanik tey ta kʼinal te banti la yichʼik chukel bael sok sujtik tal ta atojol soknix teme la skʼanik koltayel ta atojol ta kʼinal te banti chukulik te jich ya yalik ‹Jtaoj jmulkotik sok jpasojkotik te bin ma leke›, 38 teme ya sujtik tal ta atojol sok spisil yoʼtanik sok spisil skuxlejalik ta kʼinal te banti ikʼotik bael, jaʼ te banti chukulik, sok ya skʼoponat tal ta stojol te kʼinal te la awakʼbey te antiguo smeʼ statik sok ta stojol te mukʼul lum te jaʼatnix atsaoj soknix ta stojol te na te joʼon la jpas ta swenta te abiile, 39 aʼiybeya awaʼiy te skʼopik kʼalalto ta chʼulchan, jaʼ te banti nainemat, sok aʼiya awaʼiy te koltayel ya skʼanik ta atojol soknix ilawil te lekuk ya yichʼik chajpanele, pasbeya perdón te lum awuʼun te la sta smul ta atojole.

40 »Jich yuʼun, Kajwal, Dios kuʼun, jamalukme asit sok jamalukme achikin ta yaʼiyel te oración te ya yichʼ pasel ta lugar ini. 41 Kajwal, Jehová Dios, laʼ, kuxa awoʼtan ta lugar ini, jaʼat sok te skaxaul chapbilkʼop te ya yakʼ ta ilel te ay awuʼel. Kajwal, Jehová Dios, slapojukik te skʼuʼik yuʼun kolel te sacerdoteetik awuʼun sok te tseʼeluk yoʼtanik te machʼatik jun yoʼtanik ta atojol ta swenta te slekil awoʼtane. 42 Kajwal, Jehová Dios, ma xa apʼaj te machʼa tsabil awuʼune. Julukme ta awoʼtan te la awakʼbey yil te skʼuxul awoʼtan te ma x-ijkitaywan te David te j-abat awuʼune».