Génesis
11 Ta swolol balumilal jun-nax skʼop te ants winiketike. 2 Te kʼalal lokʼik bael ta stojol te banti ya xlokʼ tal kʼajkʼal, la yilik te spamlej ta skʼinal Sinar, tey nainik-a. 3 Jich la yalbey sbaik: «¡Konik! Jpastik ladrillo sok jchikʼtik ta kʼajkʼ». Jich yuʼun la stuuntesik ladrilloetik ma jaʼuk te tonetik sok la stuuntesik xuchʼ yuʼun ya slapʼik-a te ladrilloetike. 4 Sok jich la yalik: «¡Konik! Jpastik mukʼul lum sok toyol tsʼajkʼ te ya xkʼot kʼalalto ta chʼulchan. Jich mukʼ jkʼoplaltik ya xkʼootik sok jich maba ya xpujkotik ta swolol balumilal».
5 Te Jehová ko tal ta yilel te mukʼul lum sok te toyol tsʼajkʼ te jajch spasik te ants winiketike. 6 Jich la yal te Jehová: «Ilawil te bin jajch spasik ta swenta te jun-nax slumalik sok te jun-nax skʼopike, ta ora ini maʼyuk bin ya xjuʼ ya xkomotik yuʼun ya spasik te bin ya skʼan yoʼtanike. 7 ¡Konik! Koukotik bael tey-a sok jelbeytik te skʼopik yuʼun ma xyaʼiybey sba skʼopik-a». 8 Teyto-abi, te Jehová la spuktiklan bael te ants winiketik ta swolol balumilal, jich kʼunkʼun kejchajik ta spasel te mukʼul lume. 9 Jaʼ yuʼun Babel* sbiil kʼot te mukʼul lume, melel te Jehová tey la sjelbey skʼop spisil te ants winiketik, sok teynix te Jehová la spuktiklan bael te ants winiketik ta swolol balumilal.
10 Jaʼ jich ay te stsʼumbal te Sem.
Kʼalal 100 yaʼbilal-a te Sem —te kʼaxemix cheb jaʼbil-a te Pulemale*—, ayin* te snichʼan jaʼ te Arpaksad. 11 Te kʼalal ayinemix-a* te Arpaksad, kuxinxan 500 jaʼbil te Sem. Ayin yantik keremetik sok achʼixetik yuʼun.
12 Kʼalal 35 yaʼbilal-a te Arpaksad, ayin* te snichʼan jaʼ te Selá. 13 Te kʼalal ayinemix-a* te Selá, kuxinxan 403 jaʼbil te Arpaksad. Ayin yantik keremetik sok achʼixetik yuʼun.
14 Kʼalal 30 yaʼbilal-a te Selá, ayin* te snichʼan jaʼ te Éber. 15 Te kʼalal ayinemix-a* te Éber, kuxinxan 403 jaʼbil te Selá. Ayin yantik keremetik sok achʼixetik yuʼun.
16 Kʼalal 34 yaʼbilal-a te Éber, ayin* te snichʼan jaʼ te Péleg. 17 Te kʼalal ayinemix-a* te Péleg, kuxinxan 430 jaʼbil te Éber. Ayin yantik keremetik sok achʼixetik yuʼun.
18 Kʼalal 30 yaʼbilal-a te Péleg, ayin* te snichʼan jaʼ te Reú. 19 Te kʼalal ayinemix-a* te Reú, kuxinxan 209 jaʼbil te Péleg. Ayin yantik keremetik sok achʼixetik yuʼun.
20 Kʼalal 32 yaʼbilal-a te Reú, ayin* te snichʼan jaʼ te Serug. 21 Te kʼalal ayinemix-a* te Serug, kuxinxan 207 jaʼbil te Reú. Ayin yantik keremetik sok achʼixetik yuʼun.
22 Kʼalal 30 yaʼbilal-a te Serug, ayin* snichʼan jaʼ te Nacor. 23 Te kʼalal ayinemix-a* te Nacor, kuxinxan 200 jaʼbil te Serug. Ayin yantik keremetik sok achʼixetik yuʼun.
24 Kʼalal 29 yaʼbilal-a te Nacor, ayin* snichʼan jaʼ te Taré. 25 Te kʼalal ayinemix-a* te Taré, kuxinxan 119 jaʼbil te Nacor. Ayin yantik keremetik sok achʼixetik yuʼun.
26 Kʼalal 70 yaʼbilal-a te Taré, ayin* snichʼnab jaʼik te Abrán, Nacor sok te Harán.
27 Jaʼ jich ay te stsʼumbal te Taré.
Te snichʼnab Taré jaʼik te Abrán, Nacor sok te Harán. Te snichʼan te Harán jaʼ te Lot. 28 Te kʼalal kuxulto-a te Taré te jaʼ te tatile, laj te Harán ta Ur ta skʼinal te caldeoetik, teynix te banti ayine.* 29 Te Abrán sok te Nacor la sta yinamik. Te yinam te Abrán, Sarái sbiil. Te yinam te Nacor, Milcá sbiil te jaʼ yantsil nichʼan Harán. Te yantsil nichʼnab te Harán jaʼ te Milcá sok te Iscá. 30 Pero, te Sarái maba ya x-alaj; maʼyuk jtuluk yal.
31 Te Taré la yijkitay jilel te Ur te skʼinal te caldeoetik sok la yikʼ bael te Abrán te jaʼ snichʼan, te Lot te jaʼ smam —te snichʼan Harán— sok la yikʼ bael te yalib te jaʼ te Sarái te yinam Abrán. Jokinotik bael yuʼun ta skʼinal Canaán, kʼalal kʼotik ta Harán, tey nainik-a. 32 Ta spisil kuxin 205 jaʼbil te Taré. Ta patil laj ta Harán.