Eclesiastés

9 Jaʼ yuʼun la jnopbey skʼoplal ta lek spisil-abi, jich la jta ta ilel: te machʼa toj yoʼtan sok te machʼa ay spʼijil yoʼtan, jich bitʼil spisil te bin ya spasik, ay ta skʼab te smelelil Diose. Te ants winiketik jkʼaxel ma snaʼik te bitʼil ay skʼoplal te kʼuxul oʼtanil sok te pʼajel te nail ayin ta stojolike. 2 Pajal te bin ya xkʼot ta pasel ta stojolik: te machʼa toj yoʼtan sok te machʼa chopol yoʼtan,* te machʼa lek yoʼtan, te machʼa lek skʼoplal sok te machʼa boloben skʼoplal, te machʼatik ya yakʼ milbil majtaniletik sok te machʼatik maba ya yakʼ milbil majtaniletik. Te machʼa lek yoʼtan pajal sok te jmulawil; te machʼa ay bin jamal ya yal pajal sok te machʼa ya stsajtay sba* te kʼalal ay bin jamal ya yal. 3 Ay bin ya xkʼot ta pasel ta balumilal te mel-oʼtantik sba: jich bitʼil pajal te bin ya xkʼot ta lokʼel ta spisilik, te ants winiketik nojel ta yoʼtanik te bin chopol;* sok maʼyuk bin ay swentail ta yoʼtanik te jayeb kʼajkʼal kuxulik ta kʼinal, ta patil... ¡ya xlajik!

4 Machʼauk-a te kuxul ayto bin ya smaliy, jaʼ lekxan jkojt tsʼiʼ te kuxul te bin-utʼil jkojt león-choj te lajeme. 5 Melel te machʼatik kuxulik ya snaʼik te ya xlajik, yan stukel te machʼatik lajemik, maʼyuk bin ya snaʼik ta jkʼaxel sok maʼyuk bin ya staikix, melel ya yichʼik chʼayel ta oʼtanil. 6 Jaʼnix jich chʼayix te skʼuxul yoʼtanik, te pʼajaw sok te sbikʼtal yoʼtanik, sok maba ya yakʼ sbaik ta swenta te bin ya yichʼ pasel ta balumilal.

7 Baan ta weʼel sok stseʼelil awoʼtan sok uchʼa te vino awuʼun sok yutsil awoʼtan, melel te smelelil Dios tseʼelix yoʼtan ta swenta te awaʼtele. 8 Spisilukme-ora sakuk* te akʼuʼ apakʼ ya alape, sok spisilukme-ora ya awakʼbey aceite te ajole. 9 Mulanbeya yutsilal te akuxlejal sok te awinam te kʼux ta awoʼtan te jayeb kʼajkʼal komnax* te akuxlejal yakʼojbat te Dios ta balumilal, tojolnax te jayeb kʼajkʼal kuxulate. Melel jaʼ te parte te ataoj ta akuxlejal ta swenta te tulan aʼtejemat ta balumilal. 10 Spisil te bin ya xjuʼ ya apas, pasa sok spisil awip, melel maʼyuk aʼtel, maʼyuk bin ya yichʼ chapel, maʼyuk bin ya yichʼ naʼel sok maʼyuk pʼijil oʼtanil ta Mukenal,* ta lugar te banti ya xbaat.

11 Ay bin yan kiloj ta balumilal: te machʼatik mero ya xjuʼ yuʼunik animal, ma spisiluk-ora ya xjuʼ yuʼunik tsalaw, te machʼatik ay yipik ma spisiluk-ora ya xjuʼ yuʼunik tsalaw ta guerra, te machʼatik pʼij yoʼtanik ma spisiluk-ora ay sweʼelik, te machʼatik ay spʼijilik ma spisiluk-ora ay skʼulejalik sok ma spisiluk-ora lek ya xkʼotik ta lokʼel te machʼatik ay bin ya snaʼik, melel spisil te ants winiketik ay bin ya xjuʼ ya xkʼot ta stojolik ta biluk-ora te ma smaliyojik-ae. 12 Melel te ants winik ma snaʼ te bin-ora ya xkʼot yorail, jich te bin-utʼil te chayetik te ya yichʼik tsakel ta stsakojibal te ya xlajinwan sok jich te bin-utʼil te jaʼmal mutetik te ya yichʼik tsakel ta pejtsʼ, te yal snichʼnab te ants winiketik ya yichʼik tsakel ta yorail wokol te repentenax ya xkʼot ta stojolik.

13 Jaʼnix jich chamnax koʼtan* yuʼun te ay bin la kil ta balumilal ta swenta te pʼijil oʼtanil. 14 Ay chʼin lum te maʼyuk bayal yajwalul. La yichʼ kontrainel yuʼun jtul ajwalil te ay bayal yip; ta sjoyobal te chʼin lum la spas smajkilik te chajpnax ta ilel ta swenta yakʼel guerra. 15 Ay jtul pobre winik tey-a, pero te ay spʼijil yoʼtan. Ta swenta te spʼijil yoʼtan la skoltay te lum. Pero, ta patil maʼyuk machʼa la snaʼ te pobre winik-abi. 16 Jich la kal ta jtojol: «Jaʼ lekxan te ay spʼijil koʼtantik te bin-utʼil ay kiptike, manchukme jich-abi ya yichʼ pʼajel te spʼijil yoʼtan te pobre sok maba ya yichʼ ichʼbeyel ta wenta te skʼope».

17 Jaʼ lekxan te ya kaʼiybeytik te slamalil skʼop te machʼa pʼij yoʼtan te bin-utʼil te yaw te machʼa ya xwentainwan ta yolil te machʼatik ma snaʼik kʼinal.

18 Te pʼijil oʼtanil jaʼ lekxan te bin-utʼil te aʼtejibaletik yuʼun guerra, pero jtulnax jmulawil ya xjuʼ ya sjin bayal bintik lek.