Eclesiastés
11 Akʼa bael ta jaʼ te apan, bayal kʼajkʼal ta patil yame ata yan buelta. 2 Te bintik ay awuʼun akʼbeya juktul o waxaktul, melel maba ya anaʼ bin wokolil ya xkʼot ta pasel ta balumilal.
3 Teme ay bayal yaʼlel skuchoj te tokal, yame smal koel ta balumilal; teme jpejt* teʼ ya xbuch* bael ta stojol sur o ta stojol norte, te banti ya xbuch bael, teynix ya xjil-a.
4 Te machʼa jaʼnax ya yil te ikʼ maba ya yaʼiy tsʼunbajel sok te machʼa jaʼnax ya yil te tokal maba ya stsobey sit te awal tsʼunubil.
5 Jich te bin-utʼil maba ya anaʼ te bin-utʼil ya xchʼi* sbakel te alal ta schʼujt te snan,* jaʼnix jich maba ya anaʼ te aʼtelil yuʼun te smelelil Dios, te machʼa ya spas spisil te bintik aye.
6 Ta sab tsʼunbeya sbakʼ te atsʼunube, mame xa awakʼbey skux yoʼtan te akʼab jaʼto kʼalal ta xmal kʼajkʼal, melel ma xa anaʼ te banti lek ya xchʼi, teme jaʼ ini o jaʼ te yane, o teme schebal lek ya xchʼi.
7 Xkuxetnax te sakal kʼinal sok lek ya yaʼiy jsitik te kʼalal ya yil te kʼajkʼale. 8 Teme jtul winik bayal jaʼbil ya xkuxin, akʼa smulanbey yutsilal spisil. Pero ayuk ta yoʼtan te ya xjuʼ te bayal kʼajkʼal te ay yijkʼal kʼinal; tojolnax spisil te bin ya xtal ta patile.
9 Jchʼiel, mulanbeya yutsilal te bitʼil jchʼielat-toe, tseʼeluk awoʼtan yuʼun te bitʼil jchʼielat-toe. Pasa te bin ya smulan te awoʼtan sok baan te banti ya yikʼat bael te asite. Pero ayukme ta awoʼtan te ya yichʼat ta kʼop te smelelil Dios yuʼun spisil-abi. 10 Jaʼ yuʼun lokʼesa ta awoʼtan te mel-oʼtan sok namal* xa awakʼ te bintik ya yutsʼin* te abakʼetal, melel te bitʼil jchʼielat-toe sok te yip te abakʼetale, jkʼaxelnax ay.