Te tajimal ta swenta takʼin

¿Chopolbal te tajimal ta swenta takʼin?

TE BIN YA YAL TE ANTS WINIKETIK.

Bayal ta tul ants winiketik ya schʼuunik te tajimal ta swenta takʼin ma xyutsʼin te yantik teme ya schʼuunik te ley. Te gobierno schajpanoj te tajimal ta swenta takʼin yuʼun ya skoltay te ants winiketik.

TE BIN YA YAL TE BIBLIA.

Te Biblia maba jamal ya yal ta swenta te tajimal takʼin. Pero ya yakʼbotik tojobtesel te ya skoltayotik ta snaʼel te bin yilel ya yil te Dios.

Te swentail te tajimal ini jaʼ stael bayal takʼin ta skaj yantik, jaʼ ini maba pajal sok te bin la yal te Jesús: «Tsahtaya me abahic yuʼun spisil bicʼtal-oʼtanil» (Lucas 12:15). Ta smelelil, te ants winiketik ya xtajinik ta swenta sbikʼtal yoʼtanik. Manchukme ay maba ya spasik ganar, te industria yuʼun te tajimal ya yal te bayal ta millón ya staik. Te bitʼil te ants winiketik ya skʼanik te ya xkʼulejubikxan ya xbajtik ta tajimal ta snail te tajimal takʼin. Jaʼ ini maba ya skoltay te ants winiketik ta spʼajel te bikʼtal oʼtanil, yanax x-otsesbotik ta yoʼtanik te oranax ya xjuʼ ya staik te takʼin.

Te swenta te tajimal ini jaʼnax ya x-utsʼinwan, melel jaʼ ya yichʼbey te stakʼin te yantik ants winiketik te ya schʼayik ta tajimale. Te Biblia jich ya stijbotik koʼtantik: «Ma me ayuc machʼa te stuquel nax ya sle yutsil slequil, acʼa slehbe yutsil slequil te yantique» (1 Corintios 10:24). Jun te bin ya yal te Lajuneb Mantaliletik jaʼ: «Mame xbicʼtaj awoʼtan yuʼun te [...] biluc ay yuʼun te apat-axuhc» (Éxodo 20:17). Kʼalal jtul jtajimal ya skʼan ya spas ganar, ya smaliy te yantik te yakuk schʼay te stakʼinik yuʼun jaʼ ya yichʼik jilel-a.

Te Biblia ya sjultes ta koʼtantik te manchuk jaʼuk ya jnoptik te jaʼ te suerte te ya yakʼ jkʼulejaltik. Te Ium Israel ta namey, ayin chaʼoxtul te ma la yakʼ schʼuunel yoʼtanik ta stojol Dios sok te jajch yichʼik ta mukʼ te «dios yuʼun te Buena Suerte». ¿Bin yilel la yil te Diose? Jich la yal: «Ha la apasic te bin chopol ta jtojol soc la atsahic te bin ma jmulan» (Isaías 65:11, 12).

Ta chaʼoxpam lumetik te takʼin ya stsobik ta tajimale, jaʼ ya stojik-a te programaetik te ya yakʼik koltayele, jich bitʼil te programaetik yuʼun pʼijubteswanej sok te ya xmoxan takʼin. Chikan te bin-utʼil ya stuuntesik te takʼine, maba ya xjelon te banti taleme, melel ya sjach te bikʼtal oʼtanil, te mukʼ skʼoplal ya yaʼiy sbaik sok te machʼatik ay bin ya staik, manchukme maʼyuk bin ya yakʼik stukelik.

«Mame xbicʼtaj awoʼtan yuʼun te [...] biluc ay yuʼun te apat-axuhc» (Éxodo 20:17).

¿Bin-utʼil ya x-utsʼinot te ants winiketike?

TE BIN YA YAL TE BIBLIA.

Te Biblia jich ya sjultes ta koʼtantik: «Yan te machʼatic ya scʼan ya xcʼuhlejubic ya xyahlic ta sujel soc ta yaquil, soc ta banti bayel bintic chopol te ya scʼan yoʼtanic soc te ya xjinawan, te ya yacʼ ochuc ta jinel soc ta chʼayel te winiquetique» (1 Timoteo 6:9). Te tajimal jaʼ te ban ya xjajch talel te bikʼtal oʼtanil. Te sKʼop te Dios ya yalbotik ta jamal te ya skʼan ya jpʼajtik te bikʼtal oʼtanile (Efesios 5:3).

Te tajimal ini ya yakʼ ta ilel te oranax ta tael takʼin, melel jaʼ ya yakʼ te kʼuxuk ta koʼtantik te takʼin. Te Biblia ya yal te kʼuxul oʼtanil-abi jaʼ «te slohpʼ spisil te bintic chopole». Te skʼanel bayal takʼin ya yuʼuntaybotik te jkuxlejaltik, ya xjuʼ ya stsakotik ta chamel sok ya yutsʼinbotik te schʼuunel koʼtantik ta stojol te Dios. Te Biblia ya yal te machʼatik ochemik ta pejtsʼ yuʼun te sbikʼsitayel takʼin «haʼic nix la yaʼbe sba bayel swocolic yuʼun» (1 Timoteo 6:10).

Te bikʼtal oʼtanil ya yakʼ mel-oʼtan, ya spojbey stseʼelil yoʼtan te ants winiketik sok maʼyuk stakʼin ya xjilik yuʼun. Te Eclesiastés 5:10 ya yal: «Te machʼa cʼux ta yoʼtan te taqʼuine, mayuc bin ora ya yal te ticʼ a; te machʼa cʼux ta yoʼtan te cʼulejalil, mayuc bin ora ya yal te tiqʼuix a».

Bayal ta millón ants winiketik te ikʼbot yoʼtanik yuʼun te tajimal ta swenta takʼin, ta ora ini chukajtik ya yaʼiy sbaik. Jich bitʼil ta Estados Unidos bayal ta millón baem yoʼtanik ta tajimal.

Te Proverbios 20:21 ya yal te machʼatik ay sbikʼtal yoʼtanik ya xjuʼ te ya xkʼulejubik, pero maba ya yichʼik te bendición yuʼun te Dios. Jaʼnix jich te machʼa ya xbajt yoʼtan ta tajimal ya xjuʼ ya yotses sba ta betil, ya sjin sba, ya schʼay te yamigotak, te yaʼtel sok te sfamiliae. Stʼunel te consejoetik ta Biblia ya skanantayotik ta swenta te tajimal.

«Yan te machʼatic ya scʼan ya xcʼuhlejubic ya xyahlic ta sujel soc ta yaquil, soc ta banti bayel bintic chopol te ya scʼan yoʼtanic soc te ya xjinawan, te ya yacʼ ochuc ta jinel soc ta chʼayel te winiquetique» (1 Timoteo 6:9).