Te machʼa ay bin ya yakʼ ya yichʼ bendision

TA BAYAL tal jaʼbil kʼax tulan skʼoplal te yakʼel milbil majtʼanil ta yichʼel ta mukʼ te Jehová. Te israeletik la yakʼik chambalametik ta chikʼbil majtʼanil, ta ora ini te j-abatetik yuʼun Dios ya yalbeyik «yutsil scʼoblal te Diose, te ha milbil mahtanil» kʼoem. Jaʼukmeto ay yan majtʼanil te ya xjuʼ ya kakʼtik te jaʼnix jich tseʼel yoʼtan Dios yuʼun (Hebreos 13:15, 16). Te machʼatik ya yakʼike tseʼel yoʼtanik yuʼun sok ya staik bendision, jich bitʼil ya yakʼ ta ilel te ejemploetik te ya kiltike.

Te Ana jaʼ jtul israel-ants te jun yoʼtan abatin ta stojol Dios te yoʼtan ya sta yal, melel ma xjuʼ x-alaj. Ta jun buelta te kʼalal la skʼopon te Jehová la yalbey ta jamal te ya yakʼbey te yal «te jayeb cʼahcʼal cuxul» teme ya stae (1 Samuel 1:10, 11). Ta patil bael la sta yal te Ana te Samuel la yakʼbey sbiil. Te kʼalal jil schuʼ yuʼun, la yikʼ bael ta nailpakʼ templo yuʼun ya yakʼ ta abatinel ta stojol Jehová jich bitʼil yaloj ta jamale. Te Ana akʼbot bendision yuʼun te Jehová ta swenta te ay bin la yakʼbeye. Ayin joʼtulxan yalatak, kʼot ta j-alwanej te Samuel sok jaʼnix jich la stsʼibay-euk te Bibliae (1 Samuel 2:21).

Jichnix bitʼil te Ana sok te Samuel, te j-abatotik yuʼun Dios ta ora ini ya xjuʼ ya kakʼ jkuxlejaltik ta abatinel ta stojol te Jpaswanej kuʼuntike. Te Jesús la yal ta jamal te ya kichʼtik akʼbeyel bayal bendision teme ya jlajin jbatik ta stojol te Jehová (Marcos 10:28-30).

Te Dorcas jaʼ jtul j-abat yuʼun Dios ta sbabial siglo te kʼax naʼbil sba yuʼun te «yatʼelinej spasel lequil atʼelil soc la sqʼuebanbey meʼbaetic te sbiluque», jaʼ-abi ya skʼan ya yal te la slajin sba ta stojol yantik. Mel-oʼtantik sba te «tsajcʼ ta chamel te Dorcase, soc laj», bayal la smel yoʼtanik yuʼun te hermanoetik ta kongregasion. Kʼalal la yaʼiyik stojol te tey nopol ay-a te jpuk-kʼop Pedro, la yalbeyik wokol te bajtʼuk yil ta oranaxe. ¡Nopanax awaʼiy te stseʼelil yoʼtanik kʼalal jul te Pedro sok la schaʼkuxajtes te Dorcase! Jaʼme sbabial buelta te ya yalbey skʼoplal te Biblia te chaʼkuxajteswan jtul jpuk-kʼop (Hechos 9:36-41, XCD). Te Dios maʼyuk bin-ora chʼay ta yoʼtan te bin la spas te Dorcas ta stojol yantik (Hebreos 6:10). Te bin la spas ta skuxlejal la yichʼ tsʼibayel ta Biblia, jich ta ora ini ya xjuʼ ya jkʼayinbeytik te slekil talele.

Te jpuk-kʼop Pablo jaʼnix jich lekil ejemplo ta jtojoltik, melel la slokʼes stiempo ta stojol yantik sok ay bintik la spas ta stojolik. Jich la stsʼibaybey bael te hermanoetik yuʼun Corinto: «Ha yuʼun te hoʼone tseʼel coʼtan ya jlajin bin ay cuʼun, soc ya jlajin jba ta acuentahic» (2 Corintios 12:15). Te Pablo la sta ta ilel ta swenta te bin la spas te ya jta stseʼelil koʼtantik kʼalal ay bin ya jpastik ta stojol te yantike, jaʼnix jich te ay bin mukʼxan skʼoplal ya jtatik, jaʼ te lek ya yilotik te Jehová sok te ya yakʼbotik bendision (Hechos 20:24, 35).

Ta melel, te Jehová ya smulan te ya jtuuntestik te jtiempotik sok te kiptik ta spasbeyel te yaʼtel sok ta skoltayel te kermanotaktike. Jaʼukmeto, ¿aytobalxan bin ya xjuʼ ya jpastik? Ay. Ma jaʼuknax te ay bin ya xjuʼ ya jpastik ta stojol te yantike, jaʼnix jich ya xjuʼ ya kichʼtik ta mukʼ te Jehová ta swenta yakʼel majtʼan takʼin ta stojol. Te majtʼan takʼin ya kakʼtike ya xtuun swenta maba ya xtejkʼaj ta cholel te skʼop Dios ta swolol te Balumilale. Jich bitʼil, ya yichʼ tuuntesel te majtʼan takʼin ta swentainel te misioneroetik sok yantik hermanoetik te yakʼoj sbaik ta spasel ta spisil-ora aʼteliletik ta stojol Dios te tulanik skʼoplale. Jaʼnix jich ya xtuun te majtʼan takʼin ta schajpanel sok skʼasesel ta yan kʼopiletik te junetik sok te videoetik, ta skoltayel te machʼatik ay staojik wokol sok ta spasel sNail Tsoblejetik. Ya xjuʼ ya jchʼuuntik sok spisil koʼtantik te ya kichʼtik akʼbeyel bendision teme ay yutsil koʼtantike. Jaʼukmeto te bin mukʼxan skʼoplal jaʼ te ya kichʼtik ta mukʼ te Jehová sok te bin ay kuʼuntike (Proverbios 3:9; 22:9).

¿Bin-utʼil ya xjuʼ ta koltayel te aʼtelil yuʼun scholel skʼop Dios ta swolol Balumilal?

Jichnix bitʼil ta skʼajkʼalel te jpuk-kʼop Pablo, ta ora ini ay machʼatik parte ya yakʼik jtebuk stakʼinik yuʼun ya yakʼik ta kaja te ay ta kongregasion te yichʼoj sbiil «Obra mundial» (1 Corintios 16:2). Ta jujun u, te kongregasionetik yuʼun te testigoetik yuʼun Jehová ya stikunik bael ta sucursal te banti ilbil yaʼtelik ta slumalik te takʼin la stsobike. Teme jich ya akʼan, ya xjuʼ jaʼatnix ya atikun bael te majtʼan takʼin ta stojol te corporación legal te ya stuuntesik te testigoetik yuʼun Jehová ta nasion te banti nainemate. Swenta ya anaʼ bin corporación legal ya stuuntesik, kʼopojan bael ta sucursal te ay ta nasion te banti nainemate. Yame ata te dirección ta www.pr418.com/tzh. Te bin ya kalbeytik skʼoplal ta ora ini, jaʼme chaʼoxchajp bin-utʼil ya xjuʼ ya atikun bael te majtʼan takʼin ya awakʼ (jaʼ chikan bin-utʼil ya yichʼ pasel ta alumale):

DONACIONES INCONDICIONALES

Jaʼ te majtʼanil takʼin ya yichʼ akʼel ta swenta transferencia bancaria electrónica o sok tarjeta yuʼun débito sok crédito. Ay sucursaletik te ya stuuntesik-euk te pajina jw.org o yan pajina te ya xjuʼ ya stuuntesik ta yichʼel te takʼine.
Jaʼnix jich ya xjuʼ ya awakʼ majtʼan takʼin, chʼokowiletik, ualil sok yantikxan te toyol stojole. Yame skʼan ya apasbey sjunal te banti ya awal ta jamal te maba ya akʼan te ya awichʼ sutbeyel te atakʼine.

DONACIONES CONDICIONALES

Jaʼ te takʼin ya awakʼ te ya xjuʼ ya akʼan sujtel teme ya xtuun awuʼune.
Yame skʼan ya apasbey sjunal te banti ya awal ta jamal te ya xjuʼ ya akʼan sujtel te takʼin yakat ta yakʼel teme ya xtuun awuʼune.

DONACIONES PLANIFICADAS

Ta alan koel yame ata jun lista te ya yal bin ya xjuʼ ya apas ta yakʼel atakʼin o te bintik ay awuʼun ta skoltayel te aʼtelil yuʼun scholel skʼop Dios ta swolol Balumilal. Teme ya akʼan ya atuuntes junuke, awokoluk kʼopojan bael ta sucursal te ya swentain te aʼtelil ta nasion banti nainemat yuʼun ya ajojkʼoy teme ya xjuʼ ya atuuntese. Jich bitʼil te ma pajaluk ta jujun nasion te bin ya skʼanik te ajwaliletik sok te leyetik ta swenta te stojel patanil, tulan skʼoplal te ya ale koltayel ta stojol te machʼa ya snaʼ ta lek yuʼun jich ya atsa banti lekxan ya atuuntese.

Seguros sok planes de jubilación: Ya xjuʼ ya yichʼ akʼbeyel jilel ta skʼab jun corporación legal te ya stuuntesik te testigoetik yuʼun Jehová te seguro de vida, fondo de jubilación o plan de jubilación.

Cuentas bancarias: Te machʼa ay stakʼin ta banco ya xjuʼ ya schajpanbey sjunal swenta teme laje jaʼ ya yakʼbey jilel jun corporación legal te ya stuuntesik te testigoetik yuʼun Jehová, jich ya skʼan ya schajpan jilel bitʼil ay te leyetik yuʼun te bancoetik ta nasione.

Acciones sok bonos: Ya xjuʼ ta akʼel ta stojol jun entidad legal te ya stuuntesik te testigoetik yuʼun Jehová. Jaʼnix jich ya skʼan pasbeyel sjunal te banti ya awal ta jamal te ya akʼan te ya yichʼ jilel jun entidad legal te acciones sok bonos awuʼun te kʼalal ya xlajate.

Bienes raíces: Teme ay bintik ay awuʼun te ya xjuʼ ta chonel ya xjuʼ ya awakʼ ta majtʼan ta stojol jun entidad legal te ya stuuntesik te testigoetik yuʼun Jehová. Teme la awakʼ ta majtʼan te ana, ya xjuʼ te yato xnainat tey-a jaʼto teme lajat chikan teme jich la achapike.

Testamentos sok fideicomisos: Ya xjuʼ ya awakʼbey jilel te bintik ay awuʼun o atakʼin jun corporación legal te ya stuuntesik te testigoetik yuʼun Jehová, jaʼnax yuʼun ya skʼan pasel testamento te ilbil yuʼun jtul notario. Jaʼnix jich ya xjuʼ ta akʼel ta stojol te corporación legal jun contrato de fideicomiso. Ya xjuʼ ay bin lek ya xlokʼ te kʼalal ya yichʼ tojel patanil teme jich ya apase.

Te «donaciones planificadas» te xchie, ya yakʼ ta naʼel te ya skʼan ya schap ta lek te machʼa ya yakʼ te majtʼaniletik te la kalbeytikix skʼoplale. Swenta ya yichʼ koltayel te machʼatik jich ya skʼan ya skoltayik te aʼtelil yuʼun scholel skʼop Dios ta swolol Balumilal te ya spasik te testigoetik yuʼun Jehová, la yichʼ chajpanel ta inglés sok ta español te foyeto «Donaciones planificadas para favorecer el servicio del Reino en todo el mundo». Te foyeto ya yalbey skʼoplal te bayal ta chajp ya xjuʼ ya kakʼtik ta majtʼanil jtakʼintik o te bintik ay kuʼuntik. Jichniwan te ma spisiluk jich ta pasel ta alumal, melel te leyetik sok te stojel patanil ya sjel sba ta jujun nasion. Ta swenta te jich ya xjuʼ ta akʼel ta majtʼanil jtakʼintik o te bintik ay kuʼuntik, jich yichʼoj koltayel te aʼtelil ya jpastik ta stojol Dios sok skoltayel te machʼatik ya xkʼax swokolik ta swolol Balumilal, kʼalal jich ya yichʼ pasel jaʼnix jich ay bintik lek ya xjuʼ tael yuʼun (beneficios fiscales). Teme ya xjuʼ ta tael te foyeto te banti nainemate, ya xjuʼ ya akʼanbey junuk te secretario yuʼun te akongregasione.

Teme ya akʼan ya anaʼbeyxan skʼoplal akʼbeya clic te banti ya yal «Ya jkʼan ya kakʼ majtʼan takʼin ta swenta te kaʼtelkotike» te ya ata ta slajibal biluk pajina yuʼun te jw.org, o ya xjuʼ xkʼopojat bael ta sucursal.