Kʼayojiletik ta stojol Dios te ya yakʼ yip koʼtantik

Te Pablo sok te Silas la skʼayojtayik Jehová te kʼalal chukulik-ae (Hch 16:25). Mato ayuk bayal tiempo te jich la spasik-euk te kermanotaktik te kʼalal la yichʼik ikʼel bael ta campo de concentración nazi ta Sachsenhausen (Alemania) sok te kʼalal la yichʼik chukel bael ta Siberia. Te ejemploetik-abi ya yakʼ kiltik te ay yip te kʼayojiletik yuʼun ya yakʼbotik smukʼul koʼtantik te kʼalal ya xtal tsajel ta jtojoltike.

Te yachʼil sjunal kʼayojil te sbiilinej Cantemos con gozo a Jehová nopolme ya yichʼ kʼasesel ta bayal ta chajp kʼopil. Te kʼalal ayix kuʼuntik-ae, akʼa jkʼayojtaytik te kʼalal ya kichʼtik ta mukʼ Dios ta sjunal na yuʼun jich ya xjil ta koʼtantik te sletraule (Ef 5:19). Jich yuʼun te kʼalal ya xtal tsajel ta jtojoltike, te chʼul espiritu jaʼme ya yakʼ xjul ta koʼtantik te kʼayojile. Te kʼayojiletik yuʼun te Diose, jaʼ ya skoltayotik yuʼun ay ta koʼtantik te bin yakotik ta smaliyele. Ya yakʼ yip koʼtantik ta stsalel te wokolile. Jaʼnix jich te kʼalal maʼyuk wokolil ta jtojoltik-ae, te tʼujbil letraetik yuʼun te kʼayojiletike yame stij koʼtantik yuʼun ya jkʼayojtaytik sok sbujtsʼ kʼinal (1Cr 15:16; Sl 33:1-3). Jich yuʼun akʼame jpastik tulan ta snopel te kʼayojiletik-abi.

ILAWIL TE VIDEO JUN KʼAYOJIL TE LA YAKʼ YIP OʼTANIL TA YORAIL WOKOL, TA PATIL AKʼBEYA SUJTIB TE JOJKʼOYELETIKE:

• ¿Bintik wokolil yak kʼaxel ta stojol-a te hermano Frost kʼalal la schajpan jun kʼayojil?

• ¿Bin-utʼil akʼbot yip yoʼtanik te hermanoetik te kʼayojil te kʼalal ayik ta campo de concentración ta Sachsenhausen?

• ¿Bin-ora ya xjuʼ ya akʼayojtay te kʼayojiletik yuʼun ya yakʼbat yip awoʼtan?

• ¿Bintik kʼayojil te ya akʼan ya anopbey sletraule?