¿Bin-utʼil ya sjakʼ jkʼoptik te Jehová?

1, 2. ¿Binwan ya jojkʼoybey jbatik?

¿AYBAL bin-ora ajojkʼoybeyoj aba teme ya sjakʼbat akʼop te Jehová? Teme aye, maba jaʼukatnax. Bayal hermanoetik jichnix ya sjojkʼoybey sbaik, kʼaxtoxan-a teme yakik ta kʼaxel ta wokolil. Ayniwan wokol ya kiltik bin-utʼil ya sjakʼbotik jkʼoptik te Jehová te kʼalal yakotik ta kʼaxel ta wokolil.

² Ta artículo ini ya kiltik bin yuʼun ya skʼan ya schʼuun koʼtantik te ya sjakʼbey skʼop te j-abatetik yuʼun te Jehová (1 Juan 5:15). Jaʼnix jich ya kiltik bin yuʼun te jich yilel te ma sjakʼbotik te jkʼoptik te Jehová sok te bin-utʼil ya sjakʼbotik.

AYNIWAN MA JICHUK YA SJAKʼBOTIK TE JEHOVÁ TE BIN-UTʼIL YA JKʼANTIKE

3. ¿Bin yuʼun ya skʼan Jehová te yakuk jkʼopontik?

³ Te Biblia ya yalbotik te kʼuxotik ta yoʼtan te Jehová sok te mukʼ jkʼoplaltik ta yoʼtan (Hageo 2:7; 1 Juan 4:10). Jaʼ yuʼun ya yalbotik te yakuk jkʼopontik sok te yakuk jkʼanbeytik koltayel (1 Ped. 5:6, 7). Ya skʼan ya skoltayotik yuʼun ya xnoptsajotik ta stojol sok te ya xkujch kuʼuntik te jwokoltike.

4. ¿Bin-utʼil ya jnaʼtik te ya sjakʼbey skʼop te j-abatetik yuʼun te Jehová? (Jaʼnix jich ilawil te dibujo).

⁴ Ta Biblia ya jtatik bayal relatoetik te banti te Jehová la sjakʼbey skʼop te j-abatetik yuʼune. Yaniwan xtal ta koʼtantik te ejemplo yuʼun te ajwalil David. Ta spisil-ora ay bayal skontratak sok bayal buelta la skʼanbey koltayel te Jehová. Ta jun buelta jich la yal: «Jehová, aʼiybon awaʼiy jcʼop, aʼiya te bin ya calbat wocol yuʼun. ¡Jacʼbon jcʼop te bin utʼil stalel jun awoʼtan soc toj awoʼtan!» (Sal. 143:1). Jakʼbot skʼop yuʼun te Jehová sok koltayot (1 Sam. 19:10, 18-20; 2 Sam. 5:17-25). Jaʼ yuʼun te David jich la yal: «Nopol ay te Jehová ta stojol spisil machʼatic ya scʼoponic». Jichnix ya skʼan te ayuk ta koʼtantik-euk (Sal. 145:18).

5. ¿Spisilbal-ora la sjakʼ te Jehová te skʼop te j-abatetik yuʼun jich te bitʼil ya skʼanike? Ala junuk ejemplo. (Jaʼnix jich ilawil te dibujo).

⁵ Ayniwan ma sjakʼ Jehová te jkʼoptik te bitʼil ya jkʼantike. Jich kʼot ta stojol te jpuk-kʼop Pablo. Te swokole jich kʼot te bin-utʼil chʼix ta sbakʼetal sok oxeb buelta la skʼanbey Dios te yakuk xlokʼesbote. ¿Jakʼbotbal skʼop yuʼun te Jehová? Jakʼbot, pero ma jichuk te bin-utʼil ya skʼan te Pabloe. Maba lokʼesbot te swokole, pero akʼbot yip yoʼtan yuʼun te Jehová yuʼun jun yoʼtan ya x-abatin ta stojol (2 Cor. 12:7-10).

6. ¿Bin yuʼun te jich yilel te ma sjakʼbotik jkʼoptik te Jehová?

⁶ Ayniwan te ay bin ya kichʼtik jakʼbeyel te ma jichuk jkʼanojtik-ae. Pero te Jehová ya snaʼ te bin lek ta jtojoltik, sok «ya xjuʼ te kʼaxtoxan jich ya yakʼbotik spisil-a te bin ya jkʼanbeytik o te bin-utʼil jnopojtike» (Efes. 3:20). Jaʼ yuʼun te Jehová ya xjuʼ ya sutbotik te jkʼoptik te kʼalal ma jichuk jmaliyojtik-a.

7. ¿Binwan yuʼun ya skʼan ya jelontestik te bin ya jkʼanbeytik te Jehová? Ala junuk ejemplo.

⁷ Yaniwan skʼan ya jeltaytik te bin ya jkʼanbeytik te Jehová te kʼalal ya xkʼot ta koʼtantik bin-a te skʼanojel yoʼtan. Kiltik te bin kʼax ta stojol te hermano Martin Poetzinger. Te kʼalal mato jaluk snujpunel-ae la yichʼ tikunel bael ta campo yuʼun concentración nazi. Ta sjajchibal ya skʼanbey te Jehová te yakuk x-akʼot ta libre yuʼun ya sjokin te yinam sok te yakuk schol te skʼop Diose. Pero te kʼalal kʼax cheb semana jich yilel ta ma xjakʼbot skʼop yuʼun te Jehová. Jaʼ yuʼun te hermano Poetzinger la skʼopon te Jehová sok jich la yalbey: «Awokoluk, koltayon ta yilel te bin ya akʼan te ya jpase». Jaʼ yuʼun jajch snop te bin yak ta kʼaxel ta stojol te hermanoetik te ayik ta campo yuʼun concentración. Bayal machʼatik yak smelbel yoʼtanik yuʼun te yinamik sok te yal snichʼnabik. Jaʼ yuʼun te hermano Poetzinger jich la yalbey te Jehová: «Wokolawal yuʼun te yachʼil asignación, koltayon yuʼun ya kakʼbey yip yoʼtan te hermanoetik». Jich la spas baluneb jaʼbil te kʼalal chukul-ae.

8. ¿Bin ya skʼan te ayuk ta koʼtantik te kʼalal ya jkʼopontik Dios?

⁸ Juluk ta koʼtantik te ay bin ya skʼan ya spas te Jehová sok te ya spas ta yorail. Te bin ya skʼan ya spase, jaʼ te ya slajin ta sbajtelkʼinal te bin ya yakʼ wokolile, jich bitʼil te kʼalal ya xkʼax te bintik ya xjinawan jilel, te chameletik sok te lajele. Spisil-abi yame skʼotes ta pasel te kʼalal ya xwentainwan (Dan. 2:44; Apoc. 21:3, 4). Jaʼ yuʼun ta ora ini, yato yakʼ te ya xwentainwan te Satanase (Juan 12:31; Apoc. 12:9).b Te yakuk slajin te Jehová te swokol te ants winiketik jich yilel te lek te bin yak ta spasel te Satanase. Jaʼ yuʼun, manchukme ya jmaliytik te bin yaloj te Jehová, ma skʼan ya yal te ma skoltayotike. Kiltik chaʼoxchajp te bin ya spas te Jehová ta jtojoltik.

TE BINTIK-UTʼIL YA SJAKʼBOTIK JKʼOPTIK TE JEHOVÁ

9. ¿Bin-utʼil ya skoltayotik te Jehová te kʼalal ay bin ya jtatik ta nopel spasel? Ala junuk ejemplo.

⁹ Ya yakʼ jpʼijiltik. Te Jehová ya yakʼ jpʼijiltik te kʼalal ay bin ya jtatik ta nopel spasel, kʼaxtoxan-a te kʼalal ay bin mukʼ skʼoplal ya jpastik ta jkuxlejaltik, jich bitʼil teme ya xnujpunotik o maʼuk (Sant. 1:5). Kiltik te bin kʼax ta stojol jtul hermana te María sbiil.c Jun yoʼtan yak ta abatinel ta stojol te Jehová jich bitʼil precursora regular te kʼalal la snaʼbey sba jtul hermano. Jich ya yal: «Ta patil la kamigoin jbatik sok jajch jmulan jbatik. Ya jnaʼ te ay bin ya skʼan ya jpas. Jaʼ yuʼun la jkʼopon te Jehová sok spisil koʼtan, melel ya jkʼan te tojobtesel yuʼun te Jehová, pero jnaʼoj te joʼon-nix ya jta ta nopel te bin ya jpase». Te María jakʼbot skʼop yuʼun te Jehová sok akʼbot spʼijil. ¿Bin-utʼil? La sle información ta publicacionetik kuʼuntik sok la sta bayal articuloetik te akʼbot sujtib te jojkʼoyeletik yuʼune. Jaʼnix jich akʼbot lekil consejo yuʼun te smama te jaʼ testigo yuʼun Jehová. Ta patil, leknax te bin la sta ta nopel spasel te María.

10. Jich bitʼil ya yal Filipenses 4:13, ¿bin-utʼil ya skoltay te Jehová te j-abatetik yuʼune? Ala junuk ejemplo. (Jaʼnix jich ilawil te foto).

¹⁰ Ya yakʼ kiptik yuʼun ya jkuch kuʼuntik. Jich te bitʼil la spas sok te jpuk-kʼop Pablo, te Jehová ya yakʼ kiptik yuʼun ya xkujch kuʼuntik te wokoliletike (kʼopona Filipenses 4:13). Kiltik bin-utʼil la yichʼ koltayel jtul hermano te Benjamin sbiil. Te kʼalal keremto-ae, bayal jaʼbil kuxin sok te sfamilia ta jun lugar ta África te banti ayik te machʼatik lokʼemik ta slumalik. Jich ya yal: «Spisil-ora ya jkʼopon te Jehová sok ya jkʼanbey te yakuk yakʼbon yip koʼtan ta spasel te bin leke. La sjakʼbon te jkʼop, melel la yakʼbon slamalil koʼtan, yip koʼtan yuʼun ya jcholxan skʼop Dios sok publicacionetik te ya skoltayon yuʼun ya stsakxan yip te schʼuunel koʼtan». Jich ya yalxan: «Kʼalal ya jkʼopon te bintik kʼax ta skuxlejal te yantik Testigoetik sok te kʼalal ya kil bin-utʼil koltaybilik yuʼun te Jehová yuʼun ya xkujch yuʼunik, jaʼ la yakʼbon yip koʼtan yuʼun maba ya xchebaj koʼtan sok te junuk koʼtan ta stojol te Jehovae».

11, 12. ¿Bin-utʼil ya stuuntes Jehová te hermanoetik yuʼun ya sjakʼbotik te jkʼoptike? (Jaʼnix jich ilawil te foto).

¹¹ Ya stuuntes te hermanoetik. Te kʼalal junxanix ajkʼabal ya xlaj-a te Jesús la skʼopon sok spisil yoʼtan te Jehová. La skʼanbey koltayel te Jehová te manchuk ya xkuyot te ya sbolobtesbey skʼoplal. Jaʼ yuʼun te Jehová la stikun jtul chʼul-abat te jaʼ sfamilia te Jesús, yuʼun ya x-akʼbot yip yoʼtan (Luc. 22:42, 43). Jaʼnix jich ya skoltayotik te Jehová te kʼalal ya skʼoponotik tal jtul hermano ta teléfono o te kʼalal ya yulaʼtayotik. Jpisiltik ya xjuʼ ya kalbeytik «lequil cʼop» te kermanotaktik (Prov. 12:25).

¹² Kiltik te bin kʼax ta stojol jtul hermana te Míriam sbiil. Te kʼalal mato jaluk slajel-a te smamalal, stukel ay ta sna sok jkʼaxel ma lek ya yaʼiy sba soknix bayal ya smel yoʼtan. Bayal ya x-okʼ sok ay machʼa ya skʼan ya xkʼopoj sok. Jich ya yal: «Kʼaxel maʼyuk kip ya kaʼiy yuʼun ay machʼa ya jkʼopon, jaʼ yuʼun la jkʼopon te Jehová. Te kʼalal yakonto ta skʼoponel-a te Jehová, ay machʼa la skʼoponon talel ta teléfono. Jaʼ jtul anciano». Te anciano sok te yinam la yakʼbeyik smukʼul yoʼtan te Míriam, jaʼ yuʼun schʼuunoj yoʼtan te jaʼ Jehová te la stijbey yoʼtan te hermano yuʼun ya xkʼoponot bael.

13. Ala junuk ejemplo te bin-utʼil te Jehová ya stuuntes yantik ants winiketik yuʼun ya sjakʼbotik te jkʼoptik.

¹³ Ya stuuntes yantik ants winiketik (Prov. 21:1). Ay baeltik te Jehová ya stuuntes yantik ants winiketik yuʼun ya skoltay te j-abatetik yuʼun. Jich la spas te Jehová kʼalal te ajwalil Artajerjes la yakʼbey permiso te Nehemías yuʼun ya chaʼsujt ta Jerusalén yuʼun ya xchaʼyichʼ pasel (Neh. 2:3-6). Jaʼnix jich ta ora ini, te Jehová ya stuuntes te machʼatik ma Testigouk yuʼun ya skoltayotik te kʼalal ya xtuun kuʼuntik.

14. ¿Bin-utʼil ya yakʼbat smukʼul awoʼtan te bin kʼax ta stojol te Soo Hing? (Jaʼnix jich ilawil te foto).

¹⁴ Jtul hermana te Soo Hing sbiil jich la yaʼiy te la stuuntes jtul doctor te Jehová yuʼun ya xkoltayot. Te yal yichʼoj bayal chamel ta sjol sok la sta jun accidente, jaʼ yuʼun te Soo Hing sok te smamalal la yijkitay te yaʼtelik, ta swenta-abi la sta swokolik yuʼun takʼin. Kʼax wokol la yil te Soo Hing te jich la yaʼiy te ma xjuʼix yuʼun, jaʼ yuʼun la skʼopon te Jehová sok spisil yoʼtan sok la skʼanbey koltayel. Te doctor la smel yoʼtan ta stojolik, jaʼ yuʼun la yichʼik koltayel yuʼun te j-ajwalile sok la staik jun lugar te banti ya xkuxinik te ma kʼax bayal stojole. Te Soo Hing jich ya yalxan: «La kiltik te koltayel yuʼun te Jehová. Ya jnaʼtik te spisil-ora ya yaʼiybotik te jkʼoptike» (Sal. 65:2).

YA SKʼAN TE AYUK SCHʼUUNEL KOʼTANTIK YUʼUN YA KILTIK TE BIN-UTʼIL YA SJAKʼBOTIK JKʼOPTIK TE JEHOVÁ

15. ¿Bin-utʼil koltayot jtul hermana yuʼun ya yil bin-utʼil ya xjakʼbot skʼop yuʼun te Jehová?

¹⁵ Jteb ma spisil-ora te Jehová ma yanuknax te bin-utʼil ya sjakʼbotik te jkʼoptike. Te bitʼil ya sjakʼbotik te jkʼoptike, jaʼ te ya yakʼbotik te bin ya xtuun kuʼuntik yuʼun jun koʼtantik ya kakʼ jbatik ta stojol. Jaʼ yuʼun ya skʼan kiltik ta lek te bin-utʼil ya sjakʼbotik te jkʼoptik te jTatik te ay ta chʼulchan. Jtul hermana te Yoko sbiil, jich ya yil te ma xjakʼbot skʼop yuʼun te Jehová, pero ta patil jajch stsʼibay te bintik ya skʼanbey te Jehová. Te kʼalal kʼax bael te tiempoe, la yil te bintik la stsʼibay sok la sta ta ilel te jteb ma spisil akʼbot te bin la skʼanbey te Jehová, manchukme ay cheʼoxeb te ma xjulix ta yoʼtan te bin skʼanoje. Lek te ya jlokʼestik tiempo yuʼun ya jnopilan ta koʼtantik bin-utʼil sjakʼojbotik jkʼoptik te Jehová (Sal. 66:19, 20).

16. ¿Bin-utʼil ya skoltayotik te schʼuunel koʼtantik kʼalal ya jkʼopontik Dios? (Hebreos 11:6).

¹⁶ Ma jaʼuknax ya skʼan te ayuk schʼuunel koʼtantik te kʼalal ya jkʼopontik te Jehová, jaʼnix jich ya skʼan te tseʼeluk koʼtantik te bitʼil ya sutbotik te jkʼoptike (kʼopona Hebreos 11:6). Kiltik te bin kʼax ta stojol te Mike sok te yinam te sbiil Chrissy, te yakʼoj ta yoʼtanik te ya skʼan ya x-abatinik ta Betel. Te Mike jich ya yal: «La jtikuntik bael bayal buelta te solicitud sok bayal buelta ya jkʼopontik te Jehová ta swenta te bin ya jkʼantike, pero maʼyuk bin-ora la kichʼtik ikʼel». Te Mike sok te Chrissy spisil-ora la smukʼulin yoʼtanik te Jehová te jaʼ ya snaʼ banti ya xjuʼ ya x-abatinik. Jaʼ la spasikxan te bin ya xjuʼ yuʼunik ta stojol te Jehová: abatinik jich bitʼil precursor regular te banti ya skʼanikxan koltayel ta scholel skʼop Dios sok aʼtejik ta construcción, ta ora ini ya x-abatinik jich bitʼil superintendente yuʼun circuito. Te Mike jich ya yal: «Te Jehová ma spisiluk-ora ya sjakʼbotik te bitʼil ya jkʼantike, pero la sjakʼbotik te bin jkʼanojtike sok jaʼ lekxan-a te bin yakʼojbotik».

17, 18. Jich bitʼil ya yal Salmo 86:6, 7, ¿bin-a te jnaʼojtik te ya spas te Diose?

¹⁷ (Kʼopona Salmo 86:6, 7). Te David snaʼoj-a te ya x-aʼiybot skʼop yuʼun te Jehová sok te ya xjakʼbot te skʼope. Jaʼnix jich ya yaʼiybat akʼop-euk. Te bintik la kiltik ta artículo ini, ya yakʼ kiltik te Jehová ya yakʼbotik te jpʼijiltik sok yip koʼtantik yuʼun ya xkujch kuʼuntik te wokolile. Jaʼnix jich la kiltik te ya stuuntes te hermanoetik sok yantik ants winiketik yuʼun ya skoltayotik.

¹⁸ Manchukme ay ma jichuk ya sutbotik jkʼoptik te Jehová te bitʼil ya jkʼantike, pero ya jnaʼtik te yananix sutbotik-ae. Ya yakʼbotik te bin ya xtuun kuʼuntik ta mero yorail. Jaʼ yuʼun jkʼopontik sok spisil koʼtantik, melel ya jnaʼtik te ya skanantayotik ta ora ini sok te ya yakʼbey te bin ya xtuun yuʼun te ants winiketik ta achʼ balumilal (Sal. 145:16).