Lección 8

Kuxlejalil ta yutil na te ya smulan te Diose

¿Machʼa-a te jolol, o jolal, ta yutil nae? (1)

¿Bin utʼil ya skʼan xkuxin te winik sok te yiname? (2)

¿Bin atʼelil ay ta swenta te tatil ta stojol te jayeb machʼatik ay yuʼun ta yutil snae? (3)

¿Bin atʼelil ay ta swenta te ants ta yutil snae? (4)

¿Bin ya skʼan Dios ta swenta te meʼil tatiletik sok ta swenta te alnichʼanetike? (5)

¿Bin ya yal te Bibia ta swenta te machʼatik jichnax ya xchʼoj sbaik jilel sok te machʼatik ya slajinbeyik sjunal te nujpunele? (6, 7)

1. Te Biblia ya yal te jaʼ jolol, o jolal, ta yutil na te winike (1 Corintios 11:3). Te winike jtulnax ants ya yikʼ, sok ya skʼan xnujpun ta stojol juez (1 Timoteo 3:2; Tito 3:1).

2. Te winike ya skʼan te kʼux ya yaʼiy ta yotʼan te yiname, jich te bitʼil kʼux ya yaʼiy sba stukele. Yame skʼan te jich ya spas te bitʼil Jesús kʼux la yaʼiy ta yotʼan te jnopojeletik yuʼune (Efesios 5:25, 28, 29). Maʼba lek te ya smaj sok te ya sbolkʼoptay te yiname. Jaʼ ya skʼan te ya yichʼ ta mukʼ te yiname (Colosenses 3:19; 1 Pedro 3:7).

3. Te tatile ya skʼan te tulan ya x-atʼej yuʼun jich ya xjuʼ yakʼbey te bin ya xtuun yuʼun te jayeb machʼatik ay ta snae, jich bitʼil: sweʼel, skʼuʼ spakʼ, sok sna. Soknix ya skʼan te ya spʼijubtes te jayeb machʼatik ay yuʼun ta yutil sna ta yichʼel ta mukʼ te Jehovae (1 Timoteo 5:8). Te tatile jaʼ ya swol o ya sjuk te jayeb machʼatik ay ta sna ta yakʼbeyel snop ta swenta te Jehová sok te skʼanojel yotʼane (Deuteronomio 6:4-9; Efesios 6:4).

4. Ya skʼan te jaʼ lekil jkoltaywanej yuʼun smamlal te antse (Génesis 2:18). Soknix ya skʼan te ya skoltay te smamlal ta stojobtesel te yal xnichʼanike (Proverbios 1:8). Jaʼnix jich te Jehovae ya skʼan te sokuk xkʼuxul yotʼan ya x-atʼej te ants ta yutil sna (Proverbios 31:10, 15, 26, 27; Tito 2:4, 5). Sok ya skʼan te ya yichʼ ta mukʼ te smamlale (Efesios 5:22, 23, 33, XCD).

5. Te Diose ya skʼan te ya xchʼuunbeyik smantal smeʼ statik te alnichʼanetike (Efesios 6:1-3). Te meʼil tatiletike ya skʼan te ya spʼijubtes sok ya stojobtes te yal xnichʼanike, jaʼnix jich ya skʼan te ya xjojchobtes sbaik yuʼun ya xkʼopojik sok, yuʼun jich ya snaʼik-a te bin ay ta yotʼanike. Soknix ya skʼan te ya yakʼbeyik snop te bin ya yal te Biblia yuʼun jich ya skoltayikxan ta spasbeyel skʼanojel yotʼan te Diose (Deuteronomio 11:18, 19; Proverbios 22:6, 15). Maʼba lek teme sok yilimba yotʼanik ya stojobtesik o ya smilik ta majel te yal xnichʼanike (Colosenses 3:21).

6. Teme ay kʼop yuʼunik te machʼatik nujpunemike, jaʼ lek te yakuk spasik tulan te ya yichʼik ta mukʼ te mantaliletik yuʼun te Diose. Te Bibliae ya yal te akʼa xkʼuxultay sbaik sok te akʼa spasbey sbaik perdón (Colosenses 3:12-14). Te Skʼop Diose, maʼba ya yal te ya xjuʼ yijkʼitay sbaik teme ay jajchʼ kʼop yuʼunik te maʼba tulan skʼoplale. Jaʼukmeto, te antse ya xjuʼ yijkʼitay smamlal jaʼnax teme: 1) jkʼaxel maʼ skʼan x-akʼbot te bin ya xtuun yuʼun ta yutil snae, 2) kʼax ya xmilot ta majel te ya xjuʼ stsakotjilel ta chamel o te ya xjuʼ xlaj yuʼune 3) o teme yuʼunanix jkʼaxel ya xmakbot sbe te maʼ xjuʼ ya yichʼ ta mukʼ te Jehovae (1 Corintios 7:12, 13).

7. Te machʼatik nujpunemike ya skʼan te jun yotʼan ya xkuxinik ta xchebalik. Melel te antsiwej sok te antsinele tulan mulil ta sit te Diose, jaʼnix jich ta stojol te machʼa nujpunem soke (Hebreos 13:4). Te Bibliae ya yal te ya xjuʼ ta lajinbeyel sjunal te nujpunel sok ya xjuʼ te chaʼnujpunel jaʼnax teme jtul winik o jtul ants ya xway sok te machʼa maʼjaʼuk te smamlal o te yiname (Mateo 19:6-9; Romanos 7:2, 3). Te Jehová ya yilay teme ay machʼa ya slajinbey sjunal te nujpunel teme yuʼunax ya skʼan ya xnujpun sok yan, te kʼalal jich ya spase yak ta xkʼaxintayel te bin tsʼibaybil ta Bibliae (Malaquías 2:14-16).

[Fotoetik yuʼun te página 16 sok 17]

Te Diose jaʼ ya skʼan te ya spʼijubtes sok te ya stojobtes te yal xnichʼanik te meʼil tatiletik

[Foto yuʼun te página 17]

Te jkʼuxul otʼan tatile, ya yakʼbey te bin ya xtuun yuʼun sok ya yakʼbey snop te Biblia te machʼatik ay yuʼun ta snae