Lección 13
¿Bin utʼil ya xjuʼ ata te smelelil religione?
¿Spisilbal te religionetik lek ya yil te Diose o junaxbal? (1)
¿Bin yuʼun te ay bayal religionetik te ya yalik te jaʼ jnopojeletik yuʼun te Cristoe? (2)
¿Bin utʼil ya xjuʼ anaʼ stojol machʼatik-a te smelelil jnopojeletik yuʼun te Cristoe ? (3-7)
1. Te Jesuse la xjachjilel junax smelelil religión. Jaʼ yuʼun ta kʼajkʼal ini, ay jtsojbnax te smelelil j-abatetik yuʼun te Jehová Diose (Juan 4:23, 24; Efesios 4:4, 5). Te Biblia ya yal te maʼyuk bayal te machʼatik ya x-ochikbael ta tut be te ya x-ikʼawanbael ta kuxlejal ta sbajtʼel kʼinal (Mateo 7:13, 14).
2. Te kʼalal lajikbael te jpuk kʼopetik kʼunkʼun ochtal te lotil pʼijubtesel sok te bintik maʼba lek ta pasel. Soknix chiknaj jloʼlaywanejetik ta yolil te jchʼuunjeletik, jich yuʼun bayal machʼatik la yijkʼitayik ta stʼunel te Cristoe. Te Biblia yaloj te jich ya xkʼot ta pasele (Mateo 7:15, 21-23; Hechos 20:29, 30). Jaʼ yuʼun ta kʼajkʼal ini, ay bayal ta jchajp religionetik te ya yalik te jaʼ jnopojeletik yuʼun te Cristoe. ¿Bin utʼil ya xjuʼ jnaʼtik stojol machʼatik-a te smelelil jnopojeletik yuʼun te Cristoe?
3. Te bin utʼil ya xjuʼ anaʼ stojol machʼatik-a te smelelil jnopojeletik yuʼun te Cristoe, jaʼ te bitʼil talel kʼaxel kʼux ya yaʼiy sbaik ta yotʼanike (Juan 13:34, 35). Maʼba jich snopojik te ya stoy sbaik ta swenta te machʼatik yan stsʼumbalike. Jaʼnix jich maʼba ya spʼajik te ants winiketik te talemik ta yanyantik nacionetik (Hechos 10:34, 35). Jaʼ yuʼun te smelelil j-abatetik yuʼun te Diose, maʼba ya xbajtʼik ta guerra melel jich bitʼil yermanotak ya yil sbaik (1 Juan 4:20, 21).
4. Te yan senyail te smelelil religion jaʼ te ya yichʼik ta mukʼ te bin ya yal te Bibliae, melel xchʼuunejik te jaʼ lokʼemtal ta yotʼan te Diose, sok ya xchʼuunik te bin ya yal tey-ae (Juan 17:17; 2 Timoteo 3:16, 17). Te j-abatetik yuʼun te Diose jaʼ bayal skʼoplal ta yotʼanik te bin ya yal te Skʼop Diose, maʼ jaʼuk te snopojibal yotʼan o te costumbreetik yuʼun te ants winiketik ta balumilale (Mateo 15:1-3, 7-9). Te bin ya yakʼik ta nopel ta stojol te ants winiketike ya spasik ta xkuxlejalik (Tito 1:15, 16).
5. Te machʼatik ayik ta smelelil religione ya yichʼik ta mukʼ te sbiil te Diose (Mateo 6:9). Te Jesuse la yakʼ ta naʼel te sbiil te Diose jaʼ Jehová. Jaʼ yuʼun te smelelil jnopojeletik yuʼun te Cristoe ya yakʼik ta naʼel euk (Juan 17:6, 26; Romanos 10:13, 14). ¿Machʼatik ya yakʼik ta naʼel sbiil te Dios ta alumale?
6. Te machʼatik ayik ta smelelil religión ya yakʼik ta nopel te bin ya spas te ajwalil tsabil yuʼun te Diose. Te Jesuse la yakʼ ta nopel te jich ya xkʼot ta pasele (Lucas 8:1). Sok la yalbey mantal te jnopojeletik yuʼun te jaʼnix jich akʼa spukik ta alel ta swolol Balumilal (Mateo 24:14; 28:19, 20). Te machʼatik ayik ta smelelil religión xchʼuunejik te kʼalal ya xmantalaj te ajwalil tsabil yuʼun te Dios, yame x-ayin utsilal sok lamal kʼinal ta Balumilal (Salmo 146:3-5).
7. Te jnopojeletik yuʼun te Cristoe maʼba uʼuninbilik yuʼun te chopol balumilale (Juan 17:16). Jaʼ yuʼun maʼba ya xchʼik sbaik ta política sok ta kʼopetik te ya spasik te ants winiketike, sok maʼba ya snopik spasel te bintik chopol te kʼayemik ta spasel te ants winiketik yuʼun te balumilale (Santiago 1:27; 4:4). ¿Aybal awiloj o awaʼiyoj stojol teme ay jun religión ta alumal te ya spasik te bintik lekik jich bitʼil la yichʼix alele?
[Fotoetik yuʼun te página 26 sok 27]
Te smelelil jnopojeletik yuʼun te Cristoe kʼux ya yaʼiy sbaik ta yotʼanik, ya yichʼik ta mukʼ te Bibliae, sok ya yakʼik ta nopel te bin ya spas te Ajwalil te tsabilixe