Yame xkuxinik ta paraiso te yamikotak te Diose

Te Paraiso mame spaj sba sok te kuxinel jich bitʼil yoʼtik. Te Diose maʼba la skʼan te yuʼunuk nojeluk ta kʼopetik, bintik kʼuxik sok woklajel te Balumilale. Ta pajelchaʼbej, te Diose yame skʼatpʼuntes ta paraiso te Balumilale. ¿Binme utʼil yilel? Te Biblia ya yalbotik.

Lekil kristianoetik. Te Paraiso jaʼme sna te yamikotak te Diose. Ta spisil pajal yame skoltay sbaik sok yame xkuxinik ta toj beetik yuʼun te Jeobae (Proverbios 2:21).

Bayal weʼelil. Maʼyukme machʼa ya xwoklaj yuʼun wiʼnal ta Paraiso. Te Bibliae ya yal: “Yame xchiknaj kʼax bayal awalil [o weʼelil] ta balumilal” (Salmo 72:16, NM).

Lekil naetik sok mulantik sba atʼel. Kʼalal kʼatpʼujemix ta Paraiso te Balumilale, ta jujun wol na ayme snaik, sok spisilik ayme yatʼelik te ya stseen yotʼanik yuʼun (Isaías 65:21-23).

Lamalkʼinal ta spamal Balumilal. Kʼaxel maʼyukme machʼatik ya stsak sbaik sok ma xlajikix ta kera. Te sKʼop Dios ya yal: “[Te Diose] ya slajin te kerajetike” (Salmo 46:8, 9, NM).

Maʼyukix chameletik. Te Biblia ya yal ta melel: “Maʼyukme jtuluk te machʼa ay ta kuxinel [ta Paraiso] yame yal: «Ayon ta chamel»” (Isaías 33:24, NM). Maʼyukix koxoetik, maʼsitetik, kojkʼchikinetik sok umaʼetik (Isaías 35:5, 6).

Mame ayukix te mel otʼanil, te bina kʼux sok te lajele. Te sKʼop Dios ya yal: “Sok [mame ayukix] te lajele sok te okʼele sok te mel otʼane sok te bila ay skʼuxule. Yuʼun te bila ay ta neelale, chʼayix beel ta spisil” (Apocalipsis 21:4).

Mame ayukix chopol kristianoetik. Te Jeoba ya yalbey skʼoplal ta melel: “Jaʼ te chopol otʼanetik [kristianoetik], yame yichʼik bojel lokʼel ta balumilal; sok te akʼawanetik ta kʼaʼbale, yame yichʼik bulel lokʼel tey-a” (Proverbios 2:22, NM).

Te kristianoetike yame xkʼux otʼantay sbaik sok yame yichʼ sbaik ta mukʼ. Mame ayukix tsael, utsʼinel, bikʼtal otʼanil, sok te il otʼanil. Junaxme yotʼanik sok yame xkuxinik ta toj beetik yuʼun Dios te kristianoetike (Isaías 26:9).