¿Bin kʼot ta pasel te kʼalal la yichʼ chʼuumbeyel skʼop te Satanase?

Te Adán sok te Evae lajik ta skaj te la skʼaxuntaybeyik smantal te Diose (Génesis 3:6, 23)

Te Evae la schʼuumbey skʼop te chane, jich la sloʼbey sit te teʼ te albil te ma xjuʼ ya sloʼe. Ta patil la yakʼbey te Adane, jaʼnix jich la sloʼ euk.

Te bin la spasik ini ma lekuk: mulil te bin la spasike. Te Dios la slokʼes bael ta nichimal kʼinal te Adán sok te Evae.

Kʼax chujkʼultik bajtʼ te skuxlejalike, soknix euk te yal snichʼnabike. Kʼalal kʼax bael te kʼajkʼale, meʼel mamalubik sok lajik bael. Maba bajtʼik ta chʼulchan, o ta yan awilal; jaʼnax tupʼ skʼoplalik ta kʼinal.

Te machʼatik lajemikixe ya xkʼatpʼujik ta tsʼubil lum sok maʼyuk bin ya xjuʼ ya spasikix ta jkʼaxel (Génesis 3:19)

Jpisiltik jaʼ yal snichʼanotik te Adán sok te Evae. Jaʼ yuʼun ya xlajotik euk. Te machʼatik lajemikixe ma xyilikix kʼinal, ma xyaʼiyikix kʼop sok maʼyuk bin ya xjuʼ ya spasikix ta jkʼaxel (Eclesiastés 9:5, 10).

Te Jehová ma jaʼuk skʼanojel yoʼtan-a te ya xlajik te ants winiketike. Nopolme ya schaʼkuxajtes te machʼatik lajemikixe. Teme ya schʼuumbeyik te smantale, maʼyuk bin ora ya xlajikix-abi. Yame xkuxinik ta sbajtʼel kʼinal.