¡Ma jkʼan ya xlajon-a!

TE BIN YILEL JKUXLEJAL-A

Ayinon ta Paddington, jaʼ jpam lum te ay ta Londres (Inglaterra). Tey nainon sok-a te jnan sok oxtul jwixitak. Ta skaj te bayal ya xyakub te jtate, ma spisil-ora la sjokinonkotik ta nainel.

Te kʼalal chʼinonto-ae, te jmama la snojpteson ta spasel oración ta jujun ajkʼabal. Ay chʼin jBiblia-a te jaʼnax yichʼoj salmoetik, joʼon-nix ya jle te bitʼil ya jkʼayojtay. Ta jun buelta ay bin la jkʼopon ta jun libro te chajpnax la kaʼiye: «Yame sta yorail te ya xlaj spisil te bintik aye». Jaʼ-abi maba la yakʼon ta wayel, bayal la jnop te bin ya xkʼot ta pasel ta pajel chaʼbej. Jich la jnop: «Maniwan jichuknax te kuxlejalile. ¿Bin swentail te ayon ta kʼinale?». ¡Ma jkʼan ya xlajon-a!

Bayal la yikʼbon koʼtan te espiritismoe. La jle te bin-utʼil ya jkʼopon te machʼatik lajemike, jaʼ yuʼun ya xboon ta mukenal sok te kamigotak ta escuela. Jaʼnix jich ya jtsob jbatik ta yilel peliculaetik te ya yakʼ xiwel. Spisil-abi ya yakʼ bayal jxiweltik, pero jaʼnix jich ya jmulantik-a.

Manchukme jaʼtonax 10 kaʼbilal-a, ma lekix-a te jkuxlejale. Jajch jnukʼ may, ma juʼix kuʼun yijkitayel-a. Tey-abi och jnukʼ marihuana. Te kʼalal jaʼtonax 11 kaʼbilal-a jajch kuchʼ trago, manchukme ma jmulanbey te sbujtsʼe jaʼ ya jmulan te bitʼil yakuben ya kaʼiy jba. Kʼaxto ya jmulan yaʼiyel música sok ajkʼot-a, bayal ya xboon ta kʼinetik-a. Ta ajkʼabal ya xlokʼon bael ta jna sok ya xchaʼochon tal ta sab te kʼalal maʼyuk machʼa ya yilon-ae. Te kʼalal jich ya jpas-ae, kʼax lujbenon ya kaʼiy jba te ma jkʼan ya xboon-nix ta escuela. Pero te kʼalal ya xboon-ae, jaʼnax ya xbajt kuchʼ trago.

Ta slajibal grado, kʼax ma lek lokʼ te jcalificacione. Te jmama ma snaʼoj-a te bin chopol yakon ta spasele, jaʼ yuʼun la smel yoʼtan sok la yilintayon. La kut jbakotik, jich lokʼon bael ta jna. Nainon cheʼoxeb kʼajkʼal sok te Tony te jaʼ te jlekole. Te Tony ya x-elkʼaj-a, ya schon droga sok naʼbil sba yuʼun te bayal ya xmajawan. Ma jaluk ta patil la jta kal, ayin te kʼalal 16 kaʼbilal-a.

¿BIN-UTʼIL LA SJELBON JKUXLEJAL TE BIBLIAE?

La jnaʼbey sba te testigoetik yuʼun Jehová ta jun albergue te bantinax ya x-ayinik antsetik te maʼyuk stat te yalike. Juʼ kuxinon tey-a ta swenta te koltayel ya yakʼ te j-aʼtel patanetik. Chaʼtul antsetik te Testigoik ya xkʼot yulaʼtayik-a te antsetike. Jun buelta la jokinik ta snopel te Biblia swentanax ya jkʼan ya kakʼ ta ilel te chʼayemik te Testigoetike. Pero sok slamalil yoʼtanik la yakʼbonik sujtib sok te Biblia te jojkʼoyeletik kuʼune. Bayal la jmulanbey te stalelik te leknax yoʼtanik sok te ay skʼuxul yoʼtanik. Jich yuʼun la jkʼan la jnop te Biblia sok te Testigoetik-abi.

Ay bin la jnop ta Biblia te la sjeltaybon te jkuxlejal. Jaʼto tal te kʼalal chʼinonto, jxiʼoj-a te ya xlajone, pero la jnop te bin la yal te Jesús ta swenta te chaʼkuxajele (Juan 5:​28, 29). Jaʼnix jich la jnop te ay jkʼoplal ta yoʼtan te Diose (1 Pedro 5:⁠7). Mero la stijbon koʼtan te bin ya yal te Jeremías 29:11 te jich ya yal: «Como ya jnaʼ te bin jnopoj ta acuentahic, xchi te Jehová, ha jnopoj te lec ya xcʼohex, ma haʼuc te ya xcʼax awocolic, ya caʼbeyex te bin yaquex ta smahliyele». Jajch jchʼuun te ya xjuʼ ya xkuxinon sbajtelkʼinal liʼ ta Balumilal ta Nichimal Kʼinal (Salmo 37:29).

La yakʼbonik kil te bayal kʼuxon ta yoʼtanik te testigoetik yuʼun Jehová. Te sbabial buelta kʼoon ta tsoblej yuʼunike, leknax la kaʼiy bajt tey-a sok la kil te lek yoʼtanike. Spisilik leknax stalelik (Juan 13:​34, 35). ¡Jkʼaxel ma jichuk stalelik ta religión te banti ayon-ae! Te Testigoetik maba la slabanonik yuʼun te bin yilel te jkuxlejale. Kʼax bayal la skoltayonik sok la yakʼbonik kil skʼuxul yoʼtanik. Jich la kaʼiy te la jta jun familia te leknax yoʼtanike.

Te kʼalal jajch jnop te Bibliae, kʼot ta koʼtan te ya skʼan ya jel te jkuxlejal yuʼun jich ya jpas-a te bin lek ya yil te Diose. Wokol la kaʼiy yijkitayel snukʼel may. Jaʼnix jich la jta ta ilel te ay música te ya stijbon koʼtan ta snukʼel marihuana, jich yuʼun la kijkitay sok jajch kaʼiy yan música. Maba ya xboonix ta kʼinetik-a, melel jnaʼoj te ya xjuʼ ya stijbonik koʼtan ta yuchʼel trago. Jaʼnix jich la jle lekil kamigotak te ya xjuʼ ya skoltayonik ta spasel te bin leke (Proverbios 13:20).

Ta yorailnix-abi, te Tony jaʼnix jich yak ta snopel-a te Biblia sok te testigoetik yuʼun Jehová. La sta ta ilel te jaʼ smelelil te bin yak ta snopele, melel akʼbot sujtib sok te Biblia te jojkʼoyeletik yuʼune. Bayal bintik la sjel ta skuxlejal, la yijkitay te schopol yamigotak, maba elkʼajix sok la yijkitay snukʼel marihuana. Swenta ya x-abatinotik ta stojol te Jehová la kiltik te ya skʼan ya xnujpunotik sok te lek ay kuʼuntik te kal jnichʼantike. Jich yuʼun nujpunotik ta jaʼbil 1982.

Ya xjul ta koʼtan te la jle ta revistaetik ta J-ilkʼinal ta toyol sok ta ¡Wikʼame asit!a experienciaetik yuʼun ants winiketik te juʼ yuʼunik sjeltayel te skuxlejalike. Te bin kʼax ta skuxlejalik bayal ya yakʼbon smukʼul koʼtan sok yip koʼtan yuʼun jich maba ya jkom jba ta spasel tulan-euk. Spisil-ora ya jkʼanbey-a te Jehová te manchuk ya yijkitayone. Te joʼon sok te Tony la kichʼtik jaʼ ta julio ta 1982, jich ochotik ta testigo yuʼun Jehová.

¿BINTIK LEKILAL JTAOJ YUʼUN?

Te manchuk la jnaʼbey sba te Jehová lajemonix te jichuke. Te joʼon sok te Tony kilojtik bin-utʼil te Jehová skoltayojotik te kʼalal jtaojtik tulan wokoliletik. Te kʼalal jich kʼaxem ta jtojoltik jaʼ smukʼulinoj koʼtantik te Jehová sok kilojtik te jaʼ skanantayoj te jfamiliatik (Salmo 55:22).

Yakʼoj bayal tseʼelil koʼtantik te la jkoltaytik te jkeremtik sok te achʼix kuʼuntik yuʼun ya yamigoinik te Jehová. Jaʼnix jich ya yakʼbon bayal tseʼelil koʼtan te yakik ta snaʼbeyel sba te Jehová te jmamtake.

Maba ya xbajtix jwayel ta skaj snopilanel ta swenta te pajel chaʼbej o ta swenta te lajele. Te joʼon sok te Tony ya kulaʼtaytik ta jujun semana te congregacionetik yuʼun te testigoetik yuʼun Jehová swenta ya kakʼbeytik smukʼul yoʼtan te kermanotaktike. Sok ya jokintik ta snojptesel te ants winiketik te jaʼnix jich ya xjuʼ ya xkuxinik sbajtelkʼinal teme ya yakʼ schʼuunel yoʼtanik ta stojol te Jesuse.