Te Jehová kʼax lek ya yil te j-abatetik yuʼun te pekʼel yoʼtanike

1. Cholbeya skʼoplal bin yilel ya yil Jehová te machʼatik pekʼel yoʼtanike.

TE Jehová kʼux ta yoʼtan te machʼatik pekʼel yoʼtanike. Jaʼnax te machʼatik ya yakʼik ta ilel te smelelil pekʼel-oʼtanil ya xjuʼ ya x-amigoinotik sok kʼux ya x-aʼiyotik yuʼun te Jehovae. Pero «te machʼa stoyoj sba, namal ya yil stuquel» (Sal. 138:6). Jpisiltik ya jkʼantik te tseʼeluk yoʼtan kuʼuntik te Jehová sok te yakuk kaʼiybeytik te skʼuxul yoʼtane, jich yuʼun bayal swentail te ya skʼan pekʼeluk koʼtantike.

2. ¿Bin ya kilbeytik skʼoplal ta artikulo ini?

² Ta artikulo ini ya kilbeytik sujtib oxeb jojkʼoyeletik. Sbabial, ¿bin-a te pekʼel-oʼtanile? Schebal, ¿bin yuʼun ya skʼan ya kakʼtik ta ilel te talelil ini? Yoxebal, ¿bintik ya xjuʼ ya spas ta prueba te spekʼelil koʼtantike? Jich bitʼil ya kilbeytik skʼoplale, teme pekʼel koʼtantike, ya kakʼbeytik stseʼelil yoʼtan te Jehová sok ya jta jlekilaltik yuʼun (Prov. 27:11; Is. 48:17).

¿BIN-A TE PEKʼEL-OʼTANILE?

3. ¿Bin-a te pekʼel-oʼtanile?

³ Te pekʼel-oʼtanil jkʼaxel maba pajal sok te toybaile. Te Biblia ya yakʼ ta ilel te machʼa pekʼel yoʼtan snaʼoj ta lek te jaʼ toyolxan stukel te Jehová sok jaʼ mukʼxan skʼoplal ya yil te yantike (Filip. 2:3, 4).

4, 5. ¿Bin yuʼun ya kaltik te ma jaʼuk pekʼel-oʼtanil te bin ya xchiknaj ta ilele?

⁴ Ay machʼatik pekʼel yoʼtanik yilel. Lamalnax yoʼtanik, ya x-ichʼawanik ta mukʼ sok leknax yoʼtanik ta stojol yantik ta skaj te jich stsʼumbalik o te jich la yichʼik chʼitesele. Pero ayniwan toybail ta yoʼtanik. Pero aynanix bin-ora ya xchiknaj ta ilel te bin-nix yilel stalelik-ae (Luc. 6:45).

⁵ Ay yantik te jamal ya yalik te bin ya snopike, pero ma skʼan ya yal te ya stoy sbaike (Juan 1:46, 47). Pero te machʼatik jich stalelike, ya skʼan ya stsajtay sbaik te manchuk ya smukʼulin yoʼtanik te spʼijilik o te bintik ya snaʼik spasele. Chikan bin yilel jtaleltik, jpisiltik ya skʼan ya jpastik tulan te pekʼeluk koʼtantik ta smelelile.

6. Jich bitʼil ya yal 1 Corintios 15:10, ¿bin ya yakʼ jnoptik te ejemplo yuʼun te jpuk-kʼop Pabloe?

⁶ Kiltik te ejemplo yuʼun te jpuk-kʼop Pablo. Te Jehová la stuuntes yuʼun ya sjach yachʼil kongregasionetik ta yanyantik lugar. Maniwan ayuk yan jpuk-kʼop yuʼun Jesucristo te bayal aʼtej jich bitʼil te Pabloe. Manchukme jich-abi, te Pablo maba la snop te jaʼ mukʼxan skʼoplal kʼot ta stojol te yermanotake, jich la yal sok spekʼelil yoʼtan: «Te hoʼone peqʼuel ayon yuʼun te yantic jpuc-cʼopetic, ma snuhpʼuc te jbihilinej jpuc-cʼop, yuʼun la jcutsʼinlan te iglesia [«kongregasion», TNM] yuʼun Dios» (1 Cor. 15:9). Ta patil, la yal te jaʼ kʼax lekil amigo yuʼun Jehová ta swenta te akʼbot yil yutsil yoʼtane, ma jaʼuk yuʼun te mukʼ skʼoplale o te bayal bin la spase (kʼopona 1 Corintios 15:10). Ta melel, la yakʼ ta ilel lekil ejemplo yuʼun te pekʼel-oʼtanil kʼalal la stsʼibay te karta ta stojol te corintoetik, manchukme snaʼoj stojol te ay machʼatik ma lek ya x-ilot yuʼune (2 Cor. 10:10).

7. ¿Bin-utʼil la yakʼ ta ilel spekʼelil yoʼtan jtul ermano te kʼax naʼbil sbae?

⁷ Bayal Testigoetik ya xtijbot yoʼtanik kʼalal ya skʼoponik te bin kʼax ta skuxlejal te ermano Karl Klein te aʼtej ta Kuerpo Gobernante. Te ermano Klein la yal sok spekʼelil yoʼtan cheʼoxeb te bintik wokol la yaʼiy spasel ta skuxlejal te bayal jaʼbil la spas tulan yuʼune. Kiltik cheʼoxeb ejemplo. Ta jaʼbil tal 1920, lokʼ ta scholel skʼop Dios ta nanatik ta sbabial buelta, kʼax wokol la yaʼiy spasel, jaʼ yuʼun cheb jaʼbil maba lokʼ ta scholel skʼop Dios. Ta patil, kʼalal ayix ta Betel-ae la yilintay jtul ermano ta skaj te akʼbot tojobtesel yuʼune. Soknix la sta depresión nerviosa, pero lekub ta patil. Jaʼnix jich la spas bayal tʼujbil aʼteliletik. Te ermano Klein la yakʼ ta ilel spekʼelil yoʼtan, melel manchuk kʼax naʼbil sba, la yal te bintik wokol la yaʼiy spasel ta skuxlejale. Bayal ermanoetik ya snaʼik te ermano Klein soknix te bin kʼax ta skuxlejale.b

¿BIN YUʼUN YA SKʼAN AY SPEKʼELIL KOʼTANTIK?

8. ¿Bin-utʼil ya skoltayotik te bin ya yal 1 Pedro 5:6 ta snaʼel te ya smulan Jehová te pekʼel-oʼtanile?

⁸ Te bin yuʼun kʼax mukʼxan skʼoplal te ayuk spekʼelil koʼtantike, jaʼ yuʼun te ya x-akʼbot stseʼelil yoʼtan te Jehovae, jich bitʼil la yal ta jamal te jpuk-kʼop Pedroe (kʼopona 1 Pedro 5:6). Ta swenta te bin ya yal te teksto ini, te libro «Ven, sé mi seguidor» jich ya yal: «Te toybaile jaʼ jun beneno te jkʼaxel ya xlajinwane. Jich yuʼun te machʼa ay stoybail yoʼtan ma xtuun ta sit te Dios manchukme bayal bin ya snaʼ spasel. Yan stukel te machʼa pekʼel yoʼtan bayal ya xtuun ta sit Jehová manchukme maʼyuk skʼoplal yilel». Sok ya yalxan te «sok yutsil yoʼtan ya smajtantesotik teme jaʼnix jich ya kakʼtik ta ilel te talelil ini».c Ta melel, te bin kʼax mukʼ skʼoplal ya xjuʼ ya jpastike, jaʼ te ya kakʼbeytik stseʼelil yoʼtan te Jehovae (Prov. 23:15).

9. ¿Bin yuʼun te ants winiketik jaʼ ya smulanik sjokinel te machʼatik pekʼel yoʼtanike?

⁹ Te pekʼel-oʼtanil ya yakʼbey stseʼelil yoʼtan te Jehová, jaʼnix jich ay bin lek ya jtatik yuʼun. Te spekʼelil koʼtantik ya yakʼ xnoptsaj ta jtojoltik te ants winiketike. Swenta ya xkʼot ta koʼtantik, jnoptik bin yilel stalel ya jkʼantik te machʼa ya jokintike (Mat. 7:12). ¿Mabal jichuk te ma jmulantik sjokinel te machʼatik jaʼnax ya sleik te bin ya skʼan yoʼtanik sok te ma skʼanik tojobtesele? Pero ya jmulantik stukel kʼalal ya jokintik ermanoetik te ay skʼoplal ta yoʼtanik te bin yaʼiyel ya yaʼiy sbaik te yantike, te kʼux ta yoʼtanik te ermanoetik, ay yutsil yoʼtanik sok spekʼelil yoʼtanik (1 Ped. 3:8). Teme jich ya jkʼantik te joʼotike, ya xkʼot ta koʼtantik te jaʼnix jich ya skʼanik te yantike, teme pekʼel koʼtantike jaʼnaxme jich lek ya yaʼiy sbaik te kʼalal ya sjokinotike.

10. ¿Bin yuʼun ya skoltayotik te pekʼel-oʼtanil ta sitintayel wokoliletik ta jkuxlejaltik?

¹⁰ Te pekʼel-oʼtanil jaʼnix jich ya skoltayotik ta sitintayel wokoliletik ta jkuxlejaltik. Stalelnanix-a te ay bintik maba lek o ma stojil ya kiltik. Te pʼijil ajwalil Salomón jich la yal: «Ay quiloj mosohetic te mohemic ta cawu; soc príncipaletic te yacalic ta behel hich te bin utʼil mosohetic» (Ecl. 10:7). Te machʼatik bayal bintik ya snaʼik spasele ay maba ya yichʼik albeyel lek skʼoplalik, yan stukel te machʼatik jtebnax bin ya snaʼike jaʼ lekxan ya yichʼ albeyel skʼoplalik. Jaʼ yuʼun te Salomón kʼot ta yoʼtan te jaʼ lekxan te ya jchʼuuntik te bin ya xkʼot ta pasele, ma jaʼuk te ya xbajt ta koʼtantik te bintik maba lek o ma stojiluke (Ecl. 6:9). Teme pekʼel koʼtantike, ya skoltayotik yuʼun maba wokol ya xkʼayotik-a te bin yilel ay te kuxlejalil kʼalal ay bin ma lek o ay bin ma jmulantike.

TE BINTIK YA XKʼOT TA PASEL TE YA SPAS TA PRUEBA TE SPEKʼELIL KOʼTANTIKE

11. ¿Bin yuʼun ya xtuun kuʼuntik te pekʼel-oʼtanil kʼalal ya kichʼtik akʼbeyel tojobtesele?

¹¹ Ta jujun kʼajkʼal ay bayal bintik-utʼil ya xjuʼ ya kakʼtik ta ilel te spekʼelil koʼtantike. Kiltik cheʼoxeb. Kʼalal ya kichʼtik akʼbeyel tojobtesel. Ya skʼan ya jnaʼtik te kʼalal ay machʼa la yakʼ stiempo swenta ya yakʼbotik tojobtesele, yuʼun-niwan mukʼ te bin ma lek la jpastike. Te kʼalal jich ya kichʼtik tojobtesele, te bin nail ya jpastike jaʼniwan te ma jkʼantik te koltayele. Ayniwan bin ma lek ya kaltik ta stojol te machʼa la stojobtesotike o maniwan ya jmulantik te bitʼil la yalbotike. Pero teme ay spekʼelil koʼtantike, ya jpastik tulan ta sjeltayel te jtaleltike.

12. Jich bitʼil ya yal Proverbios 27:5, 6, ¿bin yuʼun ya skʼan ya kaltik wokol kʼalal ay machʼa ya yakʼbotik tojobtesel? Ala jun ejemplo.

¹² Te machʼa ay spekʼelil yoʼtan, ya yal wokol yuʼun te tojobtesel ya x-akʼbote. Kaltik jun ejemplo. Jnop kaʼiytik te yakotik ta aʼiyej sok chaʼoxtul ermanoetik ta sNail Tsoblej. Pero ay jtul ermano te ya yikʼotik lokʼel yuʼun ya yalbotik te ay bin pakʼal ta sbakel ketik. Ya xkʼexawotik yuʼun, pero ya kaltik wokol yuʼun te la yalbotike. Sok jaʼ la jkʼantik te ayuk machʼa la yalbotik ta orae. Jaʼ pajal kʼoem sok, ya skʼan ya kaltik wokol sok spekʼelil koʼtantik kʼalal jtul ermano la spas tulan yuʼun ya yakʼbotik tojobtesel te ya xtuun kuʼuntike. Ma skʼan ya kiltik jich bitʼil jkontratik o te ya spʼajotike, jichuk akʼa kiltik bitʼil kamigotik te kʼuxotik ta yoʼtane (kʼopona Proverbios 27:5, 6; Gál. 4:16).

13. ¿Bin-utʼil ya kakʼtik ta ilel pekʼel-oʼtanil kʼalal ya yichʼ yaʼtelik te ermanoetike?

¹³ Kʼalal ya yichʼik akʼbeyel yaʼtel te ermanoetik. Jtul ansiano te Jason sbiil jich ya yal: «Kʼalal ya kil te ya yichʼik akʼbeyel yaʼtel te yantike, ay ya jnop bin yuʼun maba joʼon la yakʼbonik». ¿Aybal jich kaʼiyoj jbatik? Maba chopol te ya jpastik tulan te bayalxan bin ya jpastik ta stojol te Jehová (1 Tim. 3:1). Pero ya skʼan ya jkanantaytik te bin ya jpastik pensare, teme maʼuke ya xjuʼ xkaj ta chʼiel toybail ta koʼtantik. Jich bitʼil, jtul ermano ayniwan ya xkaj snop te jaʼnax lek ya snaʼ spasel jun aʼtelil. O jtul ermana yaniwan xkaj snop te jaʼ ya snaʼxan spasel ta lek jun aʼtelil te smamalal te bitʼil yan ermanoe. Teme pekʼel koʼtantik ta smelelile, mame jichuk ya jnoptik.

14. ¿Bin ya yakʼ jnoptik te bin la spas te Moisés kʼalal la yichʼ yaʼtelik te yantik israeletik?

¹⁴ Kiltik bin la spas te Moisés kʼalal akʼbot yaʼtel yantik israeletik sok kiltik bin ya jnoptik yuʼun. Te Moisés kʼax mukʼ skʼoplal ta yoʼtan te yaʼtel yichʼoj ta jwolwanej ta Israel, pero kʼalal te Jehová la yakʼbey yaʼtel yantik israeletik swenta ya xkoltayot, maba tal sbikʼtal yoʼtan yuʼun (Núm. 11:24-29). Jaʼnix jich la yakʼ ta ilel spekʼelil yoʼtan kʼalal la skʼan koltayel ta schajpanel te kʼopetik yuʼun te lume (Éx. 18:13-24). Kʼalal bayalxan juesetik, oranax ya yichʼ chajpanel te kʼopetike sok jich maba bayal tiempo ya smaliyik te israeletike. Te Moisés jaʼ bayalxan skʼoplal ta yoʼtan te slekilal te israeletik, ma jaʼuk te yaʼtele. ¿Mabal jichuk te jaʼ kʼax lekil ejemplo kuʼuntike? Ayukme ta koʼtantik teme ya jkʼantik ya stuuntesotik te Jehová jaʼme mukʼxan skʼoplal te spekʼelil koʼtantik, ma jaʼuk te jpʼijiltike. Te Salmo 138:6 jich ya yal: «Toyol ay te Jehová, ya yil te machʼa peqʼuel ay».

15. ¿Bintik jelonem ta skuxlejal bayal ermanoetik?

¹⁵ Kʼalal ay bintik ya xjelon ta jkuxlejaltike. Te cheʼoxebtonax tal jaʼbile, bayal ermanoetik te bayalix jaʼbil pʼijubenik ta spasel jun aʼtelil, la yichʼik jeltaybeyel te s-asignasionike. Jich bitʼil ta jaʼbil 2014, te superintendenteetik yuʼun distrito sok te yinamik la yichʼik akʼbeyel yan asignasion ta tiempo kompleto. Jaʼto tal ta jaʼbil-abi, te superintendenteetik yuʼun sirkuito ya yijkitayik te s-asignasionik kʼalal ayix setenta yaʼbilalike. Jaʼnix jich, te ermanoetik te ayix ochenta yaʼbilalik ma xjuʼ ya x-ochikix ta koordinador yuʼun ansianoetik. Te bayal jaʼbil kʼaxemix tale, bayal betelitaetik jelbot s-asignasionik, la yichʼik albeyel te ya x-ochik ta prekursor. Ay yantik te la yijkitayik te abatinel ta tiempo kompleto ta skaj chamel, skanantayel sfamiliaik o yantikxan bin jelon ta skuxlejalik.

16. ¿Bin-utʼil yakʼojik ta ilel spekʼelil yoʼtanik chaʼoxtul kermanotaktik?

¹⁶ Ta melel, te ermanoetik ini wokol la yaʼiyik te bitʼil jelon te skuxlejalike. Bayal ta tul kʼaxto la smel yoʼtanik yuʼun te la yijkitayik te s-asignasionik te bayal jaʼbil la spasik sok la smulanike. Pero ta patil kʼayik-a. ¿Bin yuʼun? Jaʼ yuʼun te kʼux ta yoʼtanik te Jehovae. Maba chʼay ta yoʼtanik te jaʼ la yakʼ skuxlejalik ta stojol te Jehová, ma jaʼuk ta swenta jun asignasion o jun aʼtelil (Col. 3:23). Tseʼel yoʼtan ya x-abatinikxan ta stojol Jehová sok spekʼelil yoʼtanik chikan bin asignasion ay yuʼunik. Te ermanoetik ini ya yakʼbeyik ta skʼab Jehová spisil te bin ya smel yoʼtanik yuʼune, melel snaʼojik te jaʼ ya xkoltayotike (1 Ped. 5:6, 7).

17. ¿Bin yuʼun ya kaltik wokol yuʼun te sKʼop Dios te ya yalbotik te ya skʼan pekʼeluk koʼtantike?

¹⁷ Bayal ya kaltik wokol yuʼun te sKʼop Dios te ya yalbotik te ya skʼan pekʼeluk koʼtantike. Kʼalal pekʼel koʼtantik ya jta jlekilaltik sok ya sta slekilalik te yantike. Te tʼujbil talelil ini ya skoltayotik ta sitintayel te wokoliletik ta jkuxlejaltik, pero te bin lekxane, jaʼ te ya xnoptsajotikxan ta stojol te jTatik ay ta chʼulchane. Bayal ya yakʼ stseʼelil koʼtantik snaʼel te manchukme te Jehová jaʼ te «Machʼa toyol ay», kʼux ta yoʼtan sok mukʼ skʼoplal ya yil te j-abatetik te pekʼel yoʼtanike (Is. 57:15).