¿Bin yuʼun ma xyakʼbey sujtib Dios spisil te oracionetike?

Te jTatik Jehová te ay ta chʼulchan, ya smulan yaʼiyel te kʼalal ya jkʼopontike. Pero te Dios ma xyakʼbey sujtib spisil te oracionetike. ¿Binwan yuʼun? ¿Bin ya skʼan ya kichʼtik ta wenta te kʼalal ya jkʼopontike? Ilawil te bin ya yal te Biblia.

Jtsojb ants winiketik te ayik ta jun iglesia yakik ta skʼoponel Dios jich bitʼil tsʼibaybil ta jun libro.

«Te kʼalal ya akʼopon te Diose, mame junuknax te bin ya awalulanbey skʼoplale» (Mateo 6:7).

Te Jehová ma skʼan te jun-nax te bin ya kalulantik o te ya jkʼopontik ta jun libro te bin ya kalbeytike. Jaʼ ya smulan te yakuk xlokʼ ta koʼtantike. Nopa awaʼiy te ay jtul awamigo te jun-nax te bin ya yalulanbat skʼoplal ta jujun kʼajkʼal. ¡Kʼax mel-oʼtantik sba! Te lekil amigoetik smelelil te bin ya scholbey sbaik. Te kʼalal jaʼ ya kalbeytik Dios te bintik ay ta koʼtantik, ya kakʼtik ta ilel te jich ya kiltik bitʼil jtul amigo.

Jtul winik yak ta skʼeluyel moel ta toyol kʼalal yak ta sjotʼel jun yuʼun loteria.

«Te kʼalal ya akʼanike, maba ya x-akʼbotex, melel jaʼ ta swenta bintik chopol te ya akʼanike» (Santiago 4:3).

Mame sjakʼbotik jkʼoptik te Dios teme ya jkʼanbeytik te bin ma smulane. Nopa awaʼiy te ay machʼa ya yaʼiy tajimal yuʼun ya spas ganar takʼin sok ya skʼanbey Dios te yakuk xkoltayote. Te Jehová ma sut te oración ini, melel yaloj te ma lek te ay sbikʼtal koʼtantik sok te ya jchʼuuntik te ay suertee (Isaías 65:11; Lucas 12:15). Yuʼun ya sutbotik jkʼoptik-a te Diose, jaʼ ya skʼan ya kiltik teme yakotik ta spasel te bin ya yal te Bibliae.

Jtul jwolwanej yuʼun jun religión yak ta skʼoponel Dios sok soldadoetik.

«Te machʼa ma scʼan ya yaʼiy te ley, ha nix hich ihlaybil te bin ya scʼopon Dios yuʼune» (Proverbios 28:9).

Ta namey kʼinal, te Dios ma la yaʼiybey skʼop te machʼatik ya skʼaxuntayik te ley yuʼune, jaʼnix jich ta ora ini (Isaías 1:15, 16; Malaquías 3:6). Teme ya jkʼantik te ya sjakʼbotik te jkʼoptike, ya skʼan ya jpastik tulan ta schʼuunbeyel te mantaliletik yuʼune. ¿Jaxan teme ay bin chopol jpasojtike? ¿Yabal skʼan ya yal-abi te maʼyuk bin-ora ya yaʼiybotik te jkʼoptik te Jehová? Maʼuk, melel te Jehová ya spasbotik perdón teme ya kakʼtik ta ilel te jsujtesojix koʼtantik sok teme ya jpastik te skʼanojel yoʼtane (Hechos 3:19).

«Te machʼa ya xnoptsaj ta stojol te Diose ya skʼan ya schʼuun te yuʼun-nix ay-a te Diose sok te ya yakʼbey smajtan te machʼatik sok spisil yoʼtanik ya xleot yuʼune» (Hebreos 11:6).

Te skʼoponel Dios, ma jaʼuknax ya jpastik yuʼun ya xlaj skʼoplal-a te jwokoltike. Jaʼ jich ya xjuʼ ya kichʼtik ta mukʼ te Dios sok ya kakʼtik ta ilel te smukʼulinoj koʼtantike. Te jnopojel Santiago la yal, teme ma sokuk schʼuunel koʼtantik ya jkʼantik, mame jmaliytik te ay bin ya yakʼbotik te Jehovae (Santiago 1:6, 7). Yuʼun ayuk schʼuunel koʼtantik ta stojol te Dios, ya skʼan ya kakʼtik tiempo sok kiptik ta snopel te Bibliae, yuʼun jich ya jnaʼbeytik sba ta lek-a. Jaʼme ya skoltayotik yuʼun ya jnaʼtik bin-a te skʼanojel yoʼtane, sok te kʼalal ya jkʼopontike ya jnaʼtik te ya yaʼiybotik te jkʼoptike.