¿Bin-utʼil ya skʼan ya jkʼopontik te Dios yuʼun jich ya yaʼiyotik-a?

JKʼOPONTIK TE JEHOVÁ DIOS TA SWENTA SBIIL JESÚS

«Spisil te bin ya akʼanbeyik te Tatil ta swenta jbiil yame yakʼbeyex» (Juan 16:23).

Te bintik la yal te Jesús la yakʼ jnoptik te Jehová jaʼ ya skʼan te jaʼuk ya jkʼopontike, te ma jaʼuk ya jkʼopontik ta swenta lokʼombaetik, santoetik, chʼul abatetik o te machʼatik lajemikixe, jaʼ ya skʼan te yakuk jpastik ta swenta te sbiil te Jesucristoe. Kʼalal ya jkʼopontik te Dios ta swenta te sbiil te Jesús, ya kakʼtik ta ilel te jnaʼojtik te ya yaʼiybotik jkʼoptik te Dios ta skaj te bin la spas ta jtojoltik te Jesuse. Te Jesús jich la yal: «Maʼyuk machʼa ya xjuʼ ya xkʼot ta stojol te Tatil teme ma jaʼuk ta jwentae» (Juan 14:6).

KALTIK TE BIN AY TA KOʼTANTIK

«¡Halbeyahic bin ay ta awoʼtanic!» (Salmo 62:8).

Kʼalal ya jkʼopontik te Jehová, jichuk ya jkʼopontik bitʼil jtul tatil te kʼuxotik ta yoʼtane. Te kʼalal ya jkʼopontik te Diose, ya skʼan ya jpastik sok respeto sok te yakuk xlokʼ ta koʼtantik, ma jaʼuk te ya jlokʼestik ta jun libro o te jnopojtikix ta memoria te bin ya kaltike.

JAʼ JKʼANBEYTIK DIOS TE BINTIK LEK YA YILE

«Jaʼ te ya xjuʼ ya jkʼanbeytik chikan bin-a, jaʼnax teme jun ay sok te skʼanojel yoʼtane, yame yaʼiybotik te jkʼoptike» (1 Juan 5:14).

Ta Biblia te Dios ya yalbotik te bin ya spas ta jtojoltik sok te bin ya smaliy ya jpastik ta stojol. Yuʼun ya yaʼiybotik te jkʼoptike, jaʼuk ya jkʼanbeytik te bintik snitojbey sba skʼoplal sok «te skʼanojel yoʼtane». Yuʼun ya xjuʼ kuʼuntik spasel, mukʼ skʼoplal te yakuk jkʼopontik te Biblia, yuʼun jich ya jnaʼbeytik sba ta lek-a. Jichme, ya smulan yaʼiyel te jkʼoptike.

¿BINTIK YA XJUʼ YA JKʼANTIK TA ORACIÓN?

Jkʼantik te bin ya xtuun kuʼuntik. Ya xjuʼ ya jkʼanbeytik te Dios te bin ya xtuun kuʼuntik, jich bitʼil te jweʼel kuchʼeltik, te jkʼuʼ jpajtik o te banti ya xnainotik. Jaʼnix jich ya xjuʼ ya jkʼanbeytik te lekuk te bin ya jtatik ta nopel ta jkuxlejaltik sok te yakuk yakʼbotik kiptik ta stsʼikel te wokoliletik. Soknix ya xjuʼ ya jkʼanbeytik te yakuk spasbotik perdón, te yakuk yakʼbotikxan schʼuunel koʼtantik sok te yakuk skanantayotik (Lucas 11:3, 4, 13; Santiago 1:5, 17).

Akʼa jkʼopontik Dios ta stojol te yantik. Te lekil meʼil tatiletik ya smulanik te kʼuxuk ya yaʼiy sbaik te yal snichʼnabike. Te Jehová jaʼ Tatil kuʼuntik, jaʼ yuʼun ya skʼan te talel kʼaxel ya jkanantay jbatike. Lek teme ya jkʼopontik Dios ta stojol te jmamalaltik, kinamtik, kal jnichʼnabtik, jfamiliatik sok te kamigotaktik. Te jnopojel Santiago la yal: «Talel kʼaxel kʼoponbeya abaik Dios» (Santiago 5:16).

Kaltik wokol. Te Jpaswanej kuʼuntik bayal bintik spasoj ta stojol te ants winiketik, te Biblia jich ya yal: «La yakʼbey tal jaʼal ta chʼulchan, la yakʼ sitinuk te yawal stsʼunubik, la yakʼbey bayal sweʼelik sok la yakʼ te kʼax tseʼeluk yoʼtanike» (Hechos 14:17). Kʼalal ya jnoptik spisil te bintik spasoj ta jtojoltik te Diose, yame jkʼan kaltik wokol yuʼun. Jaʼnix jich ya kaltik wokol te kʼalal ya jchʼuunbeytik te mantaliletik yuʼune (Colosenses 3:15).

JNAʼTIK SMALIYEL SOK MAME JKOM JBATIK TA SKʼOPONEL DIOS

Ayniwan ya xchebaj koʼtantik kʼalal ma xkilbeytik sujtib ta oranax te j-oraciontik. ¿Yabal skʼan ya yal te maʼyuk jkʼoplaltik ta yoʼtan te Diose? ¡Maʼuk! Kiltik cheʼoxebuk ejemplo te banti ya yakʼ ta ilel te ma skʼan ya jkom jbatik ta skʼoponel Dios.

Ta sbabial artículo la kalbeytik skʼoplal te Steve. Jich ya yalbotikxan: «Te manchuk jaʼuk la skoltayon te oración, ayniwan bayalix jaʼbil chebajem koʼtan te jichuke». ¿Bin koltayot yuʼun? Jajch ta snopel te sKʼop Dios sok la snop te spisiluk-ora ya skʼan ya skʼopon te Diose. Te Steve jich ya yal: «Ya kalbey wokol yuʼun te Dios te bitʼil ya yakʼbonik koltayel sok skʼuxul yoʼtanik te kamigotak. Kʼax stsʼeel koʼtan ta ora ini».

¿Bin kʼot ta pasel ta stojol te Jenny, te la yal te ma snujpʼuk te ya x-aʼiybot skʼop yuʼun te Diose? Jich ya yal: «Te kʼalal ayon ta tulan wokol-ae, la kalbey te Dios yuʼun akʼa skoltayon ta snaʼel te bin yuʼun kʼax ma lek ya kaʼiy jbae». ¿Koltayotbal? «Te skʼoponel Dios la skoltayon yuʼun jichuk ya kil jba te bitʼil ya yilone. Manchukme ya yalbon te koʼtan te bintik ma lek jpasoje, te Dios ma jichuk ya spas stukel. Jaʼnix jich la skoltayon yuʼun maba ya kijkitay jba». ¿Bin lokʼ yuʼun-a? «Te oración la skoltayon ta yilel te Jehová jich bitʼil jun lekil amigo, jun Tatil te ay skʼuxul yoʼtan sok jun Dios te kuxule. Maʼyuk bin-ora ya yijkitayon sok ya skoltayon teme ya jpas tulan ta spasel te bin ya skʼan yoʼtane».

Kiltik te bin kʼot ta stojol te Isabel. Kʼalal mato x-ayin-a te yale, albot yuʼun te doctoretik te ay schamel ya x-ayin te alale. Lajem la yaʼiy sba. Ay machʼatik jich albot yuʼun te yakuk skʼases te alale. Jich ya yal: «Ta yorail-abi la jkuy te ya xlajone». ¿Bin la spas? «Bayal buelta la jkʼopon Dios yuʼun yakuk skoltayon». Ta patil te kʼalal ayin te skerem-al te Gerard sbiil, jich ayin te bitʼil la yal te doctoretik. ¿Jichbal la yaʼiy te Isabel te sutbot te s-oración yuʼun te Diose? ¡Jich! ¿Bin-utʼil la spas? «Ayix 14 jaʼbil te jkerem-al Gerard jich ya kil te jaʼ jun mukʼul majtanil. Kʼalal ya kil te jkerem-al te ya smulanbey yutsil te skuxlejal, manchukme ma mero lek ay, jich la kil te la sutbon te j-oración te Diose».

Te kʼopetik ini te ya stij koʼtantik, ya sjultes ta koʼtantik te bin la yal te salmista: «Jehová, yac awaʼiybe bin ya scʼan yoʼtanic te machʼatic peqʼuelic, haʼat yac awaʼbe yip yoʼtanic soc yac awaʼiybe te scʼopique» (Salmo 10:17). Jaʼ yuʼun ma skʼan ya jkom jbatik ta skʼoponel Dios.

Ta Biblia ya xjuʼ ya jkʼopontik te oracionetik la spas te Jesús. Te oración te kʼax naʼbil sba, jaʼ te la yakʼbey snop te jnopojeletik yuʼune. ¿Bin ya jnoptik tey-a?