TE BIN-UTʼIL YA XLAJ SKʼOPLAL TE PʼAJAW
3 | Lokʼesa ta awoʼtan te pʼajaw
Te Biblia jich ya yal:
«Yanuc awilelic ta scuenta yachʼubtesel te snopojibal awuʼunic, scuenta yuʼun hich yac anaʼic a te bin ya scʼan yoʼtan te Dios, te ha ay yutsil soc te cʼax leque» (ROMANOS 12:2).
Te bin ya skʼan ya yal:
Te Dios ay skʼoplal ya yil te bin ya jnoptike (Jeremías 17:10). Pero maba tikʼuknax-a te ya jtsajtaytik te bin ya kaltik sok te bin ya jpastike. Te bitʼil ya xjajch talel ta jpensartik sok ta koʼtantik te pʼajaw, ya skʼan ya jlokʼestik ta jkʼaxel. Jich ma xpʼajawanotikix-a sok jich ya jlajinbeytik skʼoplal.
Pasa awil ini:
Ilawil te bin ya anop ta stojol te yantike, kʼaxtoxan-a teme yan stsʼumbalik o yan-a te slumalike. Jojkʼoybeya aba: «¿Bin-utʼil ya kiltiklan? Bin ya kal ta stojolik, ¿jaʼbal te bintik kiloj o jaʼ te bintik ya yal te yantike?». Mame xa awil ta Internet peliculaetik o yantikxan te ya yakʼik ta ilel pʼajaw sok te utsʼinwanej.
Te sKʼop Dios ya xjuʼ ya skoltayotik ta slajinel te pʼajaw ta koʼtantik
Wokolniwan ta naʼel te bin ya kaʼiytik sok te bin ya jnoptike. Pero te sKʼop Dios ya xjuʼ ya skoltayotik, melel «ya stsahtay te jpensartic soc bintic ya scʼan ya spas te coʼtantique» (Hebreos 4:12). Nopa te sKʼop te Dios sok paja awil te nojpteseletik ya yakʼ sok te bin ya anope. Pasa tulan yuʼun pajaluk te bin ya anop sok te bin ya yakʼ ta nopel te Bibliae. Te sKʼop Dios ya xjuʼ yuʼun «sjinel te bintic ay yip» ta jpensartik sok ta koʼtantik, jich bitʼil te pʼajaw (2 Corintios 10:4, 5).