Jkoltaytik te machʼatik ayik ta wokol

1. ¿Bin ya spas te Jehová yuʼun ya yakʼbey sujtib te oración ya spas te j-abatetik yuʼune?

¿ANAʼOJBAL te ya xjuʼ ya stuuntesat te Jehová yuʼun ya yakʼbey sujtib te s-oracion jtul hermano? Chikan teme ancianootik, siervo ministerialotik, precursorotik, publicadoretik, jchʼielotik, ayix kaʼbilaltik, antsotik o winikotik. Kʼalal ay machʼa ya skʼanbey koltayel te Jehová, te Dios bayal buelta jaʼ ya stuuntes te ancianoetik sok yantik j-abatetik yuʼun swenta ya yakʼbey «smukʼul kʼinal» ya yaʼiy te machʼa ay ta wokole (Col. 4:11). Jaʼ jun mukʼul majtanil te jich ya x-abatinotik ta stojol te Jehová sok ta stojol te kermanotaktik. Ya xjuʼ jich ya jpastik te kʼalal ya xtal jun tulan chamel, te ya xpujk ta bayuk te kʼalal ya xtal jun tulan wokolil o kontrainel.

TE KʼALAL YA XTAL JUN TULAN CHAMEL TE YA XPUJK TA BAYUK

2. ¿Bin yuʼun ay wokol ya kaʼiytik skoltayel te hermanoetik te kʼalal ay ya xtal jun chamel te ya xpujk ta bayuke?

² Te kʼalal ay jun tulan chamel te ya xpujk ta bayuk ayniwan wokol ya kiltik te talel kʼaxel ya jkoltay jbatike. Ayniwan ya jmulantik yulaʼtayel te hermanoetik ta snaik, pero maniwan xjuʼ te jich ya jpastike. O ayniwan ya jmulantik yikʼel ta weʼel te machʼatik ay swokolik yuʼun te takʼine, pero jaʼnix jich ma xjuʼ te jich ya jpastike. Ayniwan ta koʼtantik te ya jkoltaytik te yantike, pero jaʼnix jich ayik ta wokol te familiaetike. Manchukme jich-abi, ya jkʼan ya jkoltaytik te kermanotaktik, teme jich ya jpastike te Jehová ya x-akʼbot bayal stseʼelil yoʼtan (Prov. 3:27; 19:17). Jich yuʼun, ¿bin ya xjuʼ ya jpastik?

3. ¿Bin ya snojptesotik te bin la spas te ancianoetik ta scongregacion te Desi? (Jeremías 23:4).

³ Te bin ya xjuʼ ya spasik te ancianoetik. Teme ancianoat ta congregación, naʼbeya sba ta lek te tuminchijetike (kʼopona Jeremías 23:4). Te Desi te la kalbeytik skʼoplal ta yan artículo, jich ya yal: «Te ancianoetik ta jgrupo yuʼun cholel skʼop Dios kʼayemik-a te ya sjokinonik ta scholel skʼop Dios sok te ya sjokinik te yantik hermanoetik, jaʼnix jich bayal bin ya spasik ta jtojoltik».b Ta swenta te jich spasojik, te ancianoetik maba wokol la yaʼiyik skoltayel te Desi te kʼalal tal te COVID-19 sok te kʼalal ay laj chaʼoxtul sfamilia ta skaj te chamele.

4. ¿Bin yuʼun te ancianoetik juʼ yuʼunik skoltayel te Desi sok bin ya yakʼ jnoptik?

⁴ Te Desi jich ya yal: «Te ancianoetik jaʼ kamigotakix-a, jaʼ yuʼun maba wokol la kaʼiy yalel te bin yaʼiyel ya kaʼiy jba sok te bin ya jmel koʼtan yuʼune». ¿Bin ya x-akʼbot snopik yuʼun-a te ancianoetike? Jaʼ te ya skʼan ya yulaʼtayik te tuminchijetik sok te ya yamigoinik kʼalal mato ayuk-a te swokolike. Teme ma xjuʼ awuʼunik yulaʼtayel ta skaj te ay tulan chamel, leaik te bintik-utʼil ya xjuʼ ya akʼoponik te hermanoetike. Te Desi jich ya yalxan: «Ay baeltik te ta jun-nax kʼajkʼal bayal ancianoetik ya skʼopononik tal ta teléfono o ya stikunbonik tal mensajeetik. Te textoetik te ya stikunbonik tal ya stijbon koʼtan, manchukme ay jkʼoponojix-a».

5. ¿Bin-utʼil ya xjuʼ ya snaʼik te ancianoetik te bin ya xtuun yuʼunik te hermanoetik, sok bin-utʼil ya xjuʼ ya skoltayik?

⁵ Jun te bin-utʼil ya xjuʼ ya snaʼik te ancianoetik te bin ya xtuun yuʼun te hermanoetike, jaʼ te ayuk swentail te bin ya sjojkʼoybeyike (Prov. 20:5). ¿Aybal sweʼel yuchʼelik o te poxiletik? ¿Aybal yaʼtelik o snaik? ¿Yabal skʼanik te ya jkoltaytik ta stael te koltayel ya yakʼ te gobierno? Te Desi, ay la yichʼ koltayel ta takʼin yuʼun te hermanoetik. Pero te bin koltayotxan jaʼ te akʼbot smukʼul yoʼtan sok yip chʼuunel yoʼtan yuʼun te ancianoetik, jich ya yal: «Te ancianoetike la sjokinonik ta skʼoponel Dios, Ma xjul ta koʼtan te bin la yalike, pero yato jnaʼ te bin yaʼiyel la kaʼiy jba yuʼune. Jich kʼoem te jich ya yalbon te Jehová ‹Ma atukeluk ayat›» (Is. 41:10, 13).

6. ¿Bin-utʼil talel kʼaxel ya xjuʼ ya jkoltay jbatik ta congregación? (Ilawil te fotoetik).

⁶ Te bin ya xjuʼ ya spasik te hermanoetik ta congregación. Jnaʼojtik te jaʼ ay ta swentaik te ancianoetik skanantayel te hermanoetik. Pero te Jehová ya skʼanbotik ta jpisiltik te ya kakʼbeytik yip yoʼtan sok ya jkoltaytik te yantike (Gál. 6:10). Manchukme jtebnax te bin ya jpastik sok skʼuxul koʼtantik, bayal skʼoplal ya yil te machʼa ay ta chamele. Te alaletik ya xjuʼ ya stsʼibayik jun tarjeta o ya spasik jun dibujo yuʼun ya yakʼbey smukʼul yoʼtan jtul hermano. Te jchʼieletik ya xjuʼ ya sjap sbaik ta skoltayel ta smanel sbiluk jtul hermana. Te yantike ya xjuʼ ya schajpanbeyik sweʼel te machʼa ay ta chamel sok ya xbajt yijkitaybeyik ta sna, Ta melel kʼalal tulan yak ta kʼaxel te chamele, jpisiltik ta congregación ya jkʼantik yip koʼtantik, jaʼ yuʼun lek teme ya xjilotikxan jtsʼinuk te kʼalal ya xlaj te tsoblej yuʼun ya xkʼopojotik sok te kermanotaktik, chikan teme ta sNail Tsoblej o ta videollamada. Jaʼnix jich te ancianoetik ya skʼan te ya kakʼbeytik yip yoʼtanik. Ay hermanoetik te ya stsʼibaybeyik tarjetaetik te ancianoetik yuʼun ya yalbeyik wokol, melel ta yorail te tulan chamel bayalxan yaʼtelik. Kʼax lek te jpisiltik ya jpastik tulan ta spasel te mantalil ini: «Talel kʼaxel xa awakʼbey aba smukʼul awoʼtanik sok talel kʼaxel xa awakʼbey aba yip awoʼtanik» (1 Tes. 5:11).

TE KʼALAL YA XTAL JUN TULAN WOKOLIL

7. ¿Bin ya xkʼot ta pasel kʼalal ay ya xkʼax jun tulan wokolil?

⁷ Te kʼalal ay machʼa ya sta jun tulan wokolil ya xjuʼ te ya xjelon ta oranax te skuxlejal. Yaniwan chʼay sbiluk, sna o ay machʼa ya xlaj yuʼun. Spisil-abi jich ya xkʼax ta stojol te hermanoetik. ¿Bin-utʼil ya xjuʼ ya jkoltaytik?

8. ¿Bin ya skʼan ya spas te ancianoetik sok te meʼil tatiletik te kʼalal mato xtal jun tulan wokolil-ae?

⁸ Te bin ya xjuʼ ya spasik te ancianoetik. Ancianoetik, koltayaik te hermanoetik yuʼun ya schajpan sbaik te kʼalal ay ya xtal jun tulan wokolil. Ilaik ta lek te spisiluk te congregación ya snaʼik te bin ya skʼan ya spasik yuʼun ya skanantay sbaik, sok te bin-utʼil ya xjuʼ ya skʼoponexe. Te Margaret te la yichʼ albeyel skʼoplal ta yan artículo, jich ya yal: «Ta jun discurso te banti ya skʼan ya x-aʼtej te congregación, te ancianoetik la sjultesbotik ta koʼtantik te kʼalal mato kʼaxem yorail-a te ya xlokʼ te kʼajkʼ sok la kichʼtik albeyel te oranax ya skʼan ya xlokʼotik teme jich la yalik te j-aʼtel patanetik sok teme yak ta toyel te wokolile». Te discurso-abi tuun kuʼuntik, melel joʼeb semana ta patil jajch ta lokʼel kʼajkʼ. Meʼil tatiletik te kʼalal ya apasik te yichʼel ta mukʼ Dios ta sjunal na, albeyaik skʼoplal te bin ya xjuʼ ya apasik te kʼalal ay ya xtal jun tulan wokolil. Teme chapalex sok te awal anichʼnabik maniwan ya x-animaj awoʼtanik.

9. ¿Bin ya skʼan ya spasik te ancianoetik kʼalal mato talem jun tulan wokolil sok te kʼalal kʼaxix-ae?

⁹ Teme superintendenteat yuʼun grupo, mame jaʼukto xa amaliy te kʼalal ya xtal te tulan wokolil yuʼun ya stsob te datoetik yuʼun te hermanoetik ta agrupo, pasa jun alista sok achʼubtesa spisil-ora. Teme jich ya apase, kʼalal ya xtal jun tulan wokolil ya xjuʼ ya akʼopon te hermanoetik sok jich ya anaʼ te bin ya xtuun yuʼunike. Kʼasesbeya te coordinador yuʼun te ancianoetik ta congregación te bin anaʼojixe, yuʼun jich ya skʼopon bael-euk te superintendente yuʼun circuito. Teme jun ya x-aʼtejotike lek bin ya xlokʼ-a. Kʼalal kʼaxix-a te kʼajkʼe, te superintendente yuʼun circuito yuʼun te Margaret 36 ora maba way, melel jaʼ yak ta yilel te aʼtel ya spas te ancianoetik te yakik ta yilel sok ta skoltayel te 450 ta tul hermanoetik te lokʼik ta anel (2 Cor. 11:27). Te bitʼil jich la spasike, la yichʼ tael te banti ya xjilik spisil te hermanoetik te ayik ta wokole.

10. ¿Bin yuʼun te mukʼ skʼoplal te ya skanantayik te tuminchijetik te ancianoetike? (Juan 21:15).

¹⁰ Te ancianoetik ay ta swentaik yakʼbeyel smukʼul yoʼtanik sok yip schʼuunel yoʼtanik te hermanoetik (1 Ped. 5:2). Kʼalal ay bintik ya xkʼax te ya xjinawan jilel, te ancianoetik ya skʼan ya yilik teme ay sweʼelik, ay skʼuʼ spakʼik sok snaik te hermanoetik. Te machʼatik ya xkʼax swokole yaniwan skʼan akʼbeyel smukʼul yoʼtanik sok yip schʼuunel yoʼtanik ta bayal tiempo (kʼopona Juan 21:15). Te Harold te ya x-aʼtej ta jun Comité yuʼun Betel, ay kʼopojem sok te machʼatik staoj swokolike, jich ya yal: «Yaniwan yichʼ bael bayal tiempo yuʼun ya xlekub te skuxlejal te hermanoetike, pero te bin kʼax ta stojolike maba ya xchʼay ta yoʼtanik, ayniwan machʼa laj yuʼunik, ay bin chʼay yuʼunik te mukʼ skʼoplale o ta swenta jun tulan wokolil te kʼax yuʼunike, kʼalal ya xjul ta yoʼtanik te swokolike ya x-akʼbot smel yoʼtanik. Pero jaʼ-abi maba ya skʼan ya yal te maʼyuk schʼuunel yoʼtanike, stalel te jich ya kaʼiy jbatike».

11. ¿Bin koltayel ya xtuun yuʼunik te familiaetik ta bayal tiempo?

¹¹ Te ancianoetik mukʼ skʼoplal te ya spasik te mantalil ini: «Okʼanikme sok te machʼatik ya x-okʼike» (Rom. 12:15). Te machʼatik la yil swokolik, ya xtuun yuʼunik te ya jultesbeytik ta yoʼtanik te kʼux aʼiybilik yuʼun te Jehová sok te hermanoetik. Te ancianoetik ya xjuʼ ya skoltayik te familiaetik te manchuk ya yijkitayik spasel te oración, te snopel te skʼop Dios, te ya xbajtik ta tsoblejetik sok te scholel skʼop Dios. Jaʼnix jich te ancianoetik ya xjuʼ ya stijbey yoʼtanik te meʼil tatiletik yuʼun ya skoltay te yal snichʼnabik te ayuk ta yoʼtanik te ay bintik maba ya xlaj te kʼalal ay ya xkʼax jun tulan wokolile. Meʼil tatiletik jultesbeya ta yoʼtanik te awal anichʼnabik te spisil-ora jaʼ yamigoik te Jehová sok te ma x-ijkitayotik yuʼune. Cholbeya yaʼiyik te ay hermanoetik sok hermanaetik ta swolol balumilal sok te chapalik ta koltaywanej (1 Ped. 2:17).

12. ¿Bin-utʼil ya xjuʼ ya xkoltaywan te congregación kʼalal ya xkʼax jun tulan wokolil? (Ilawil te foto).

¹² Te bin ya xjuʼ ya spasik te hermanoetik ta congregación. Teme ay kʼax tulan yikʼal jaʼal, nijkel o yantikxan te banti nopol ayat ta kuxinele, jojkʼoybeya te ancianoetik te bin-utʼil ya xjuʼ ya xkoltaywanat. Yaniwan xjuʼ ya awakʼ ta majanel te ana ta jun tiempo yuʼun ya xjilik tey-a te hermanoetik te ay swokolik o te machʼatik ya xkoltaywanik ta aʼtele. Yaniwan xjuʼ ya xkoltaywanat ta spukel weʼelil o yantikxan te bintik ya xtuun. Pero teme namal te banti kʼax te wokolil, jaʼnix jich ya xjuʼ ya xkoltaywanat. ¿Bin-utʼil? Jaʼ te ya akʼopon Dios ta stojol te machʼatik ay swokolik sok te ya awakʼ te majtan takʼin ta obra mundial (2 Cor. 1:8-11; 8:2-5). Teme ya xjuʼ awuʼun ya xbaat te banti kʼax te tulan wokole, jojkʼoybeya te ancianoetik te bin-utʼil ya xjuʼ ya xkoltaywanat. Teme la awichʼ ikʼele, yaniwan awichʼ nojptesel yuʼun ya xkoltaywanat te banti ya skʼanik koltayele.

TE KʼALAL YA KICHʼTIK KONTRAINEL

13. ¿Bin wokolil ya staik te hermanoetik te banti makbil te kaʼteltike?

¹³ Te kʼalal ya yichʼik kontrainel te kermanotaktik bayal ya sta swokolik. Te machʼatik kuxinemik te banti makbil te kaʼteltik ay swokolik yuʼun takʼin, ya stsakotik ta chamel, jaʼnix jich ay machʼatik ya xlaj yuʼunik. Te bitʼil maʼyuk permiso yuʼun ya jpas te kaʼteltike, te ancianoetik ayniwan maba ya xjuʼ te ya xbajt yulaʼtayik o te jun yoʼtan ya xkʼopojik sok te machʼatik ya skʼanik koltayele. Jaʼ jich kʼax ta stojol te Andréi, te la kalbeytik skʼoplal ta yan artículo. Jtul hermana te ay ta sgrupo yuʼun scholel skʼop Dios yak ta kʼaxel swokol yuʼun maʼyuk stakʼin-a sok ta patil la sta jun accidente ta carro. La yichʼ bayal operación sok ma xjuʼ ya x-aʼtej. Manchukme makbil te kaʼteltik sok te ay te tulan chamel, te hermanoetik la spasik tulan yuʼun ya skoltayik te hermana, soknix te Jehová yak ta yilel spisil te bin yak ta kʼaxele.

14. ¿Bin-utʼil ya yakʼik ta ilel te ancianoetik te ya smukʼulin yoʼtanik te Jehová?

¹⁴ Te bin ya xjuʼ ya spasik te ancianoetik. Te Andréi la skʼopon te Jehová sok la spas te bin ya xjuʼ yuʼun spasel. ¿Bin-utʼil sutbot skʼop yuʼun te Jehová? Jaʼ te la stuuntes hermanoetik te ya xjuʼ ya xlokʼik yuʼun ya spasik te bin ya xjuʼ yuʼunike. Ay hermanoetik te ya yikʼik bael ta doctor te hermanae sok ay yantik te ya yakʼbeyik koltayel ta takʼin. Te bitʼil junax aʼtejik sok te bayal bintik la spasike, akʼbotik bendición yuʼun te Jehová (Heb. 13:16). Ancianoetik, kʼalal ya yichʼ makel te kaʼteltik, akʼbeyaik yaʼtel yantik hermanoetik (Jer. 36:5, 6). Pero te bin mukʼxan skʼoplale, kʼanbeyaik koltayel te Jehová. Jaʼme ya skoltayex yuʼun ya xjuʼ awuʼunik skoltayel te hermanoetik.

15. ¿Bin ya xjuʼ ya jpastik yuʼun jun-nax ya x-ayinotik ta yorail kontrainel?

¹⁵ Te bin ya xjuʼ ya spasik te hermanoetik ta congregación. Te kʼalal ya kichʼtik kontrainel o utsʼinel, jaʼnaxniwan ya xjuʼ ya jtsob jbatik ta chʼin grupoetik. Jaʼ yuʼun kʼax mukʼ skʼoplal te lekuk ya kil jbatik sok te yantik ta ora ini. Jaʼme ya skʼan ya jkontraintik te Satanás, ma jaʼuk te kermanotaktike. Jpasbeytik perdón te kermanotaktik sok jchajpantik ta ora teme ay ya xjajch kʼop kuʼuntike (Prov. 19:11; Efes. 4:26). Jpastik tulan te talel kʼaxel ya jkoltay jbatik (Tito 3:14). Bayal bintik lek lokʼ-a te bitʼil la skoltayik te hermana te machʼatik ayik ta sgrupo te Andréi. Jich kʼotik bitʼil jun familia (Sal. 133:1).

16. Jich bitʼil ya yal Colosenses 4:3, 18, ¿Bin ya xjuʼ ya jpastik ta stojol te hermanoetik te ya yichʼik kontrainel o utsʼinel?

¹⁶ Bayal ta jmil ta tul kermanotaktik ya x-abatinik ta stojol te Jehová manchukme ya yichʼ makel te kaʼteltik yuʼun te j-aʼtel patanetike. Ay machʼatik ayik ta chukel ta skaj te schʼuunel yoʼtanike. Jkʼopontik Dios ta stojolik, ta stojol te sfamiliaik sok ta stojol te hermanoetik te ya spasik tulan ta yakʼbeyel yip schʼuunel yoʼtanik, te bin ya xtuun yuʼunik te hermanoetik sok te ya xkoltaywanik ta schajpanel te kʼopetike (kʼopona Colosenses 4:3, 18).c Mame jnoptik te maʼyuk yuʼel te oración ya jpastike (2 Tes. 3:1, 2; 1 Tim. 2:1, 2).

17. ¿Bin-utʼil ya jchajpan jbatik ta ora ini yuʼun ya jsitintaytik te kontrainele?

¹⁷ Te jaʼat sok te afamilia ya xjuʼ ya achajpan abaik ta ora ini ta swenta te kontrainel o utsʼinele (Hech. 14:22). Ma jaʼuk xa anopilan ta awoʼtanik te bintik chopol ya xjuʼ ya xkʼot ta pasele. Jaʼ lek te ya stsakxan yip te bitʼil awamigoinej abaik sok te Jehová sok koltayaik te awal anichʼnabik te jichuk ya spasik-euk. Teme ay ya amel awoʼtanike, kʼoponaik te Jehová (Sal. 62:7, 8). Albeyaik skʼoplal ta afamiliaik te bayal bin yuʼun te ya xjuʼ ya smukʼulin koʼtantik te Jehová.d Te kʼalal ya yichʼ chajpanel te alnichʼanetik te kʼalal ya xtal jun wokolil, jaʼnix jich yakat ta schajpanel te kʼalal ya xtal kontrainel sok te ya smukʼulin yoʼtanik te Jehová, yuʼun jich ma xiwik-a sok ay slamalil yoʼtanik-a.

18. ¿Bin lekilal yakotik ta smaliyel ta pajel chaʼbej?

¹⁸ Te lamalkʼinal ya yakʼ te Dios lek ya kaʼiy jbatik yuʼun (Filip. 4:6, 7). Ta swenta-abi, te Jehová ya slamantes koʼtantik kʼalal ay ya xtal jun chamel te ya xpujk ta bayuk, te kʼalal ay ya xkʼax jun tulan wokolil o te kʼalal ya kichʼtik kontrainel. Te Jehová ya stuuntes te ancianoetik yuʼun ya skanantayik te tuminchijetik sok ya yakʼ te talel kʼaxel ya jkoltay jbatik. Te lamalkʼinal-abi ya schajpanotik yuʼun ya xkujch kuʼuntik te pruebaetik ya xtal ta pajel chaʼbej, jich bitʼil te «tulan wokolil» (Mat. 24:21). Ta yorail-abi, mukʼ skʼoplal te manchuk ya xiwotik sok te yakuk jkoltaytik te yantik te manchuk ya xiwik-euke. Pero te kʼalal kʼaxix-a te tulan wokolil, maʼyukix bin-ora ya xtal wokolil te ya yakʼbotik xiwel. Jich ya xkʼot ta pasel te skʼanojel yoʼtan te Jehová ta jtojoltik, jaʼ te ya xkuxinotik ta lamalkʼinal ta sbajtelkʼinal (Is. 26:3, 4).