¿Bin yuʼun ya skʼan ya jxiʼtik te Jehová?

1, 2. Jich bitʼil ya yal te Salmo 25:14, ¿bin ya skʼan ya jpastik yuʼun ya kamigointikxan ta lek te Jehová?

¿BINTIK talelil ya skʼan ay kuʼuntik yuʼun lekil amigo ya xkʼootik? Yaniwan awal te lekil amigoetik ya skʼan te kʼuxuk ya yaʼiy sbaik sok te yakuk skoltay sbaik. Te kʼalal ya kaltik te taleliletik-abi, maniwan tey ochem skʼoplal-a te xiwele. Jich bitʼil ya yal te texto te banti lokʼem tal te artículo ini, te machʼatik ya skʼan ya yamigoinik te Jehová ya skʼan ya xiʼik (kʼopona Salmo 25:14).

² Chikan jayebix jaʼbil ayotik ta congregación, ya skʼan te ma xkijkitaytik ta xiʼel te Jehová. Pero, ¿bin ya skʼan ya yal te xiʼel te Diose? ¿Bin ya skoltayotik yuʼun stojiluk te bitʼil ya jxiʼtik te Diose? ¿Bin ya yakʼ jnoptik te ejemplo yuʼun te Abdías, te mukʼul sacerdote Jehoiadá sok te ajwalil Jehoás te la xiʼik te Diose?

¿BIN YA SKʼAN YA YAL TE XIʼEL TE DIOSE?

3. ¿Bin-utʼil ya skoltayotik te xiwel?

³ Stalelnanix-a te ya xiwotik kʼalal ya kiltik te ya xjuʼ ya jta jwokoltik. Te xiwel-abi ya skoltayotik yuʼun ya jtsajtay jbatik. Kiltik cheʼoxeb ejemplo. Te xiwel ya skoltayotik yuʼun ma xnoptsajotik te banti ya xjuʼ ya xchʼayotik koel. Te xiwel ya skoltayotik yuʼun ma jchʼik jbatik te banti ya xjuʼ ya jta jwokoltik. Te xiwel ya skoltayotik yuʼun ya jtsajtaytik te bin ya kaltik sok te bin ya jpastik ta stojol te kamigotaktik.

4. ¿Bin ya skʼan te Satanás?

⁴ Te bin ya skʼan te Satanás, jaʼ te yakuk xnijk yoʼtan te ants winiketik ta xiʼel te Jehová. Jaʼ ya skʼan ya jchʼuuntik te bin la yichʼ albeyel te Job yuʼun te Elifaz, te la yakʼ ta naʼel te ya yakʼ spakol te Jehová, te ay yilinba sok te maʼyuk bin-ora ya kakʼbeytik stseʼelil yoʼtan (Job 4:18, 19). Te bin ya skʼane, jaʼ te yakuk xnijk koʼtantik ta xiwel sok te ma x-abatinotikix ta stojol te Jehová. Yuʼun maba ya kakʼ jbatik ta loʼlayel, ya skʼan te stojiluknax te ya jxiʼtik te Diose.

5. ¿Bin ya skʼan ya yal te xiʼel te Diose?

⁵ Te machʼa ya xiʼ o te machʼa ya yichʼ ta mukʼ te Diose, kʼux ta yoʼtan sok maʼyuk bin chopol ya spas ta stojol. Jun ejemplo jaʼ te Jesús te la xiʼ te Diose (Heb. 5:7). Te Jesús ma jaʼuk te ya xnijk ta xiwel ta stojol te Jehová (Is. 11:2, 3). Kʼux ta yoʼtan te sTate sok la schʼuunbey skʼop (Juan 14:21, 31). Jaʼnix jich ya kichʼtik ta mukʼ te Jehová sok ya x-abatinotik ta stojol, melel te Diose ay skʼuxul yoʼtan, ay spʼijil, toj te bin ya spas sok ay yuʼel. Jaʼnix jich jnaʼojtik te kʼuxotik ta yoʼtan sok te ya xjuʼ te ya kakʼbeytik stseʼelil yoʼtan o te ya smel yoʼtane (Sal. 78:41; Prov. 27:11).

¿BIN YA SKOLTAYOTIK YUʼUN YA JXIʼTIK TE DIOSE?

6. ¿Bin ya skʼan ya jpastik yuʼun ya jxiʼtik te Diose? (Salmo 34:11).

⁶ Te xiʼel te Jehová ma staleluk ay kuʼuntik te kʼalal ya x-ayinotik, ya skʼan ay bin ya jpastik yuʼun ya jxiʼtik te Diose (kʼopona Salmo 34:11). Jun te bin ya xjuʼ ya jpastik, jaʼ te ya kiltik te bintik pastiklanbil. Kʼalal ya kiltik «te bintik spasoje» te spʼijil te Jehová, te yuʼel sok te bayal kʼuxotik ta yoʼtan, ya yichʼxan yip te bitʼil ya kichʼtik ta mukʼ sok te skʼuxul koʼtantik ta stojol (Rom. 1:20). Jtul hermana te Adrienne sbiil, jich la yal: «Kʼalal ya kil te bintik spasoj te Jehová, te bayal spʼijil, chamnax koʼtan yuʼun sok ya xkʼotxan ta koʼtan te jaʼ ya snaʼ te bin lek ta jtojole». Te kʼalal la snopilan ta yoʼtan ta swenta-abi, jich la yalxan: «Maʼyuk bin ya jkʼan ya jpas te ya yakʼ xnamajon ta stojol te Jehová, te jaʼ yakʼojbon te jkuxlejal». ¿Yabal xjuʼ ya alokʼes jtebuk tiempo ta semana ini yuʼun ya anopilan ta swenta te bintik pastiklanbil? Jaʼme ya skoltayat yuʼun ya awichʼ ta mukʼ sok te kʼuxukxan ta awoʼtan te Jehová (Sal. 111:2, 3).

7. ¿Bin-utʼil ya skoltayotik te skʼoponel Dios?

⁷ Te kʼalal ya jkʼaytes jbatik ta skʼoponel te Diose, jaʼme ya skoltayotik yuʼun ya jxiʼtik. Te kʼalal spisil-ora ya jkʼopontik te Diose, jichme ya xkʼot te yakotik ta yilel. Kʼalal ya jkʼanbeytik koltayel yuʼun ya xkujch kuʼuntik te jwokoltike, jaʼ ya xtal ta koʼtantik te kʼax bayal yuʼel. Kʼalal ya kalbeytik wokol yuʼun te la yakʼ te sNichʼan ta jtojoltik, ya xjul ta koʼtantik te kʼax kʼuxotik ta yoʼtan. Kʼalal ya jkʼanbeytik koltayel yuʼun ya jsitintaytik te jwokoltik, ya xkʼotxan ta koʼtantik te bayal spʼijile. Te kʼalal jich ya jkʼopontike, jaʼ ya skoltayotik yuʼun ya jpʼajtik te bin maba lek te ya xjuʼ ya yutsʼin te bitʼil kamigoinoj jbatik sok te Jehová.

8. ¿Bin ya skʼan ya jpastik yuʼun ma jkom jbatik ta xiʼel te Jehová?

⁸ Yuʼun maba ya kijkitaytik te xiʼel te Jehová, ya skʼan ya jkʼopontik te Biblia yuʼun ya jnoptik te ejemploetik te lekik sok te maba lekik. Kiltik oxeb ejemplo, nail ya kilbeytik skʼoplal chaʼtul j-abatetik yuʼun Jehová: Te Abdías, te ay ta swenta skanantaybeyel sna te ajwalil Acab, sok te mukʼul sacerdote Jehoiadá. Ta patil ya kiltik te bin kʼax ta skuxlejal te ajwalil Jehoás ta Judá, ta nail lek-a te bin la spas pero ta patil la yijkitay te Jehová.

AYUK YIP KOʼTANTIK JICH BITʼIL TE ABDÍAS

9. ¿Bin-utʼil koltayot yuʼun te Abdías te xiʼel te Dios? (1 Reyes 18:3, 12).

⁹ Te sbabial buelta te ya yal te Biblia ta swenta te Abdías,b jich ya yal: «Te Abdías yichʼoj ta mucʼ te Jehová [o xiʼoj te Jehová]» (kʼopona 1 Reyes 18:3, 12). ¿Bin lek lokʼ yuʼun-a te bitʼil la xiʼ te Diose? Jaʼ te leknax te stalele sok te ya xjuʼ ya smukʼulin yoʼtan te yantike. Ta swenta-abi, te ajwalil la yakʼbey swentain te sna (paja sok te Nehemías 7:2). Jaʼnix jich, koltayot yuʼun ya yakʼ ta ilel te maba xiw, jun talelil te bayal tuun yuʼun. ¿Bin yuʼun? Melel jaʼ kuxin te kʼalal ay ta ajwalil-a te chopol ajwalil Acab, te «cʼax hich a te bin utʼil spisil te yantic ajwaliletic te nahil cʼaxique» (1 Rey. 16:30). Jaʼnix jich te Acab nujpunem sok te Jezabel, te jaʼ ajwalil yuʼun norte-a, te ya yichʼ ta mukʼ te Baal sok te jkʼaxel ya spʼaj te Jehová, ya skʼan ya slajin te smelelil yichʼel ta mukʼ te Dios ta Israel. Bayal la smil te j-alwanejetik yuʼun Dios (1 Rey. 18:4). ¡Jaʼ jun tiempo te kʼax chujkultik sba-a yuʼun ya yichʼik ta mukʼ te Jehová!

10. ¿ Bin-utʼil la yakʼ ta ilel te Abdías te jkʼaxel ma xiwe?

¹⁰ ¿Bin-utʼil la yakʼ ta ilel te Abdías te jkʼaxel ma xiwe? Kʼalal te Jezabel jajch smiltiklan te j-alwanejetik yuʼun Jehová, te Abdías la snakʼtiklan ta chʼen 100 ta tul, ta cheb grupo yuʼun 50, sok la yakʼtiklanbey pan sok jaʼ (1 Rey. 18:13, 14). Te lajuk snaʼ te Jezabel, la smil te jichuke. Melel te Abdías maba ya skʼan ya xlaj, pero jaʼ mukʼxan te skʼuxul yoʼtan ta stojol te Jehová sok te j-abatetik yuʼun te ma la xiʼ te lajele.

11. ¿Bin-utʼil ya skʼayinik bayal j-abatetik yuʼun Jehová te ejemplo yuʼun te Abdías? (Jaʼnix jich ilawil te foto)

¹¹ Ta ora ini, bayal j-abatetik yuʼun Jehová ayik ta kuxinel te banti makbil te kaʼteltike. Ya yichʼik te mukʼ te ajwaliletik, pero jich bitʼil te Abdías te kermanotaktik ini ya yichʼik ta mukʼ te Jehová jich bitʼil snujpʼ ta pasele (Mat. 22:21). Ya yakʼik ta ilel te ya xiʼik te Diose kʼalal ya schʼuunbeyik te skʼope, ma jaʼuk te bin ya yal te ants winiketik (Hech. 5:29). Jaʼ yuʼun ma skom sbaik ta scholel te lek yachʼil kʼop sok ta spasel te tsoblejetik ta muken (Mat. 10:16, 28). Jaʼnix jich, ya spasik tulan te ya yakʼbeyik te hermanoetik te bin ya xtuun yuʼunik ta swenta te schʼuunel yoʼtanik. Kiltik te ejemplo yuʼun te Henri, te yak ta kuxinel ta jun nación ta continente Africano te banti makbil-a te kaʼteltike. Ta yorail-abi, te Henri la sjap sba ta yichʼbeyel bael publicacionetik te hermanoetik. Jich la stsʼibay: «Ta melel bayal ya xiwon, jaʼ yuʼun kʼoem ta koʼtan te jaʼ la skoltayon te yichʼel ta mukʼ te Jehová yuʼun maba ya xiwon». Jaʼnix jich te jaʼat ya xjuʼ ya anopbey stalel te Henri teme ya anop xiʼel te Diose.

JUNUK KOʼTANTIK JICH BITʼIL TE JEHOIADÁ

12. ¿Bin-utʼil la yakʼik ta ilel te jun yoʼtanik ta stojol te Jehová te Jehoiadá sok te yinam?

¹² Te mukʼul sacerdote Jehoiadá xiʼoj-a te Jehová, jaʼ yuʼun jun yoʼtan la yakʼ sba ta stojol sok koltaywan yuʼun ya yichʼ ichʼel ta mukʼ te smelelil Diose. Kʼalal te Atalía, te yantsil-al te Jezabel, la yotses sba ta ajwalil ta Judá, te Jehoiadá la yakʼ ta ilel te xiʼoj-a te Diose. Te Atalía jaʼ jtul ants te kʼax xiʼbantik sba. Kʼax chopol yoʼtan sok te bitʼil jaʼnax ya skʼan ya x-och ta ajwalil la skʼan slajin spisil te stsʼumbal te ajwalil, ¡jaʼ te smamatak o yil-al! (2 Crón. 22:10, 11). Pero, ta swenta te Jehosabeat te yinam te Jehoiadá, ay jtul te maba la yichʼ milel, jaʼ te Jehoás. Te Jehosabeat sok te smamalal la snakʼik sok la skanantayik. Jich maba laj te stsʼumbal te ajwaliletik te talem ta sfamilia te David. Te Jehoiadá jun yoʼtan ta stojol te Jehová maba la xiʼ te Atalía (Prov. 29:25).

13. ¿Bin-utʼil la yakʼxan ta ilel te jun yoʼtan ta stojol te Jehová te Jehoiadá?

¹³ Kʼalal jukebtonax yaʼbilal-a te Jehoás, te Jehoiadá la yakʼxan ta ilel te jun yoʼtan ta stojol te Jehová. Ay bin la snop te ya spas. Teme lek ya xlokʼ te bin la sta ta nopele, te Jehoás jaʼ ya x-och ta ajwalil, te talem ta stsʼumbal te David. Pero, teme maba jich ya xkʼot ta lokʼel te bin la snope, te Jehoiadá ya xjuʼ ya yichʼ milel. Ta swenta te koltayel yuʼun te Jehová, leknax kʼot ta lokʼel te bin la snope. Jaʼnix jich sok te koltayel yuʼun te principaletik yuʼun chajpalchajp na ta Israel sok te levitaetik, te Jehoiadá la yotses ta ajwalil te Jehoás sok la yal ta mantal te yakuk yichʼ milel te Atalía (2 Crón. 23:1-5, 11, 12, 15; 24:1). Ta patil te Jehoiadá «la schap scʼop soc Jehová, te ajwalil soc te pueblo te ha pueblo yuʼun Jehová ya xcʼohtic» (2 Rey. 11:17). «Soc la yacʼ jcanan-tiʼnahiletic ta ochibaletic yuʼun te sna Jehová scuenta yuʼun ma ba ya xʼoch te machʼa bohloben scʼoblal» (2 Crón. 23:19).

14. ¿Bin lek la yichʼ pasbeyel te Jehoiadá ta swenta te la yichʼ ta mukʼ te Jehová?

¹⁴ Te Jehová jich yaloj-a: «Ya quichʼ ta mucʼ te machʼatic ya yichʼonic ta mucʼ», jich la spas ta stojol te Jehoiadá (1 Sam. 2:30). Te Jehová la yakʼ ta tsʼibayel ta sKʼop te bin lek la spas te mukʼul sacerdote Jehoiadá yuʼun yakuk jnopbeytik te stalele (Rom. 15:4). Kʼalal laj te Jehoiadá, ay bin lek la yichʼ pasbeyel: «La smuquic ta Pueblo yuʼun David ta smuquenal te ajwaliletic, ta scaj te lec bin la spas ta stojol Israel, ta stojol Dios soc te templo yuʼune» (2 Crón. 24:15, 16).

15. ¿Bin ya yakʼ jnoptik te bin la spas te Jehoiadá? (Jaʼnix jich ilawil te fotoetik)

¹⁵ Te bin kʼax ta stojol te Jehoiadá ya skoltayotik yuʼun ya jxiʼtikxan te Diose. Te ancianoetik ya xjuʼ ya skʼayinbeyik te stalel yuʼun jun yoʼtan ya skanantayik te tuminchijetik yuʼun Dios (Hech. 20:28). Te hermanoetik te ayix yaʼbilalik te jun yoʼtanik sok te xiʼojik te Jehová, ya xjuʼ ya xtuuntesotik ta spasel te skʼanojel yoʼtan. Te jchʼieletik ya skʼan ya snopbeyik stalel te Jehová te lekuk ya yilik te hermanoetik te ayix yaʼbilalik, kʼaxtoxan-a te machʼatik bayalix jaʼbil yakik ta abatinel ta stojol te Jehová (Prov. 16:31). Jaʼnix jich bayal bin ya xjuʼ ya jnoptik ta swenta te principaletik yuʼun Israel sok te levitaetik, ya skʼan te junuk koʼtantik ya jkoltaytik sok ya jchʼuuntik te machʼatik ya skanantayotik (Heb. 13:17).

MAME JKʼAYINTIK TE JEHOÁS

16. ¿Bin-utʼil la yakʼ ta ilel te Jehoás te maʼyuk yip schʼuunel yoʼtan?

¹⁶ Ta swenta te koltayel yuʼun te Jehoiadá, te kʼalal jchʼielto-a te ajwalil Jehoás la spas tulan ta yichʼel ta mukʼ te Jehová (2 Rey. 12:2). Pero te kʼalal laj te Jehoiadá, te Jehoás jaʼ la yaʼiybey skʼop te principaletik te jaʼik apóstata. Ta swenta-abi, te Jehoás sok te lume «la schʼuhuntayic te locʼombahetic yuʼun Asera soc te yantic locʼombahetic» (2 Crón. 24:4, 17, 18). Te Jehová bayal la smel yoʼtan yuʼun, «la sticombe jalwanejetic ta stojolic yuʼun yacuc suhtes yoʼtanic ta stojol». Pero «ma ba la yichʼic ta cuenta». Manchukme te Zacarías jaʼ snichʼan te Jehoiadá, jaʼ j-alwanej, sacerdote sok jaʼ sprimo te Jehoás, maba la yichʼ ta wenta te bin la yale. Maba jaʼuknax-abi, te Jehoás la yakʼ ta milel te Zacarías. ¡Kʼax ma la snaʼ yaʼlel wokol ta swenta te bin la spas ta stojol te sfamiliae! (2 Crón. 22:11; 24:19-22).

17. ¿Bin kʼot ta stojol te Jehoás?

¹⁷ Te Jehoás la yijkitay ta xiʼel te Jehová, sok la sta swokol yuʼun, melel te Jehová jich yalojix-a: «Te machʼatic mayuc jcʼoblal ta yoʼtanic, mayuc scʼoblal ya xcʼoht cuʼun» (1 Sam. 2:30). Ta patil, te soldadoetik yuʼun Siria te maʼyukik bayal, la stsalik te soldadoetik yuʼun Jehoás te jaʼ kʼax bayalikxan sok la sta tulan ejchen. Te kʼalal sujtik bael te soldadoetik yuʼun Siria, te Jehoás la yichʼ milel yuʼun te j-abatetik yuʼun ta skaj te la smil te Zacarías. Te bitʼil kʼax chopol te stalele, maba la yichʼ mukel «ta muquenal yuʼun te ajwaliletique» (2 Crón. 24:23-25).

18. Jich bitʼil ya yal Jeremías 17:7, 8, ¿bin ya skʼan ya jpastik yuʼun maba ya jkʼayinbeytik te stalel te Jehoás?

¹⁸ ¿Bin ya yakʼ jnoptik te bin kʼax ta stojol te Jehoás? Jich kʼoem bitʼil jpejt teʼ te maba kʼuben ta lek te slojpʼe, te jaʼ koltayot yuʼun te mukʼul sacerdote Jehoiadá, yuʼun maba ya xbuch-a. Kʼalal laj te Jehoiadá sok te jajch skontrainbelik te Jehová, te Jehoás la yijkitay te Jehová. Jaʼ ini ay bin mukʼ skʼoplal ya yakʼ jnoptik: ma xjuʼ ya jxiʼtik te Jehová jaʼnax yuʼun te jich ya spas te hermanoetik, te jfamiliatik te ya yakʼbotik te koltayel yuʼunike. Yuʼun tulan ay te schʼuunel koʼtantik, ya skʼan ya stsakxan yip te skʼuxul koʼtantik ta stojol te Jehová, te yakuk kichʼtik ta mukʼ kʼalal ya jkʼopontik te Biblia, ya jnopilan ta koʼtantik sok te spisil-ora ya jkʼopontik (kʼopona Jeremías 17:7, 8; Col. 2:6, 7).

19. ¿Bin ya skʼan Jehová te yakuk jpastike?

¹⁹ Te Jehová maba ya skʼanbotik te bin maba ya xjuʼ kuʼuntik spasel. Te bin ya skʼanbotik, jaʼ te bin ya yal ta Eclesiastés 12:13, te jich ya yal: «Ichʼa ta mucʼ te Diose soc chʼuhumbeya te mandariletic yuʼune, como hich ay spisil te ay ta scuenta spasel te ants-winiquetique». Teme ya jxiʼtik te Jehová, ya xjuʼ ya jsitintaytik biluk wokolil sok jun koʼtantik jich bitʼil te Abdías sok Jehoiadá. Maʼyuk bin ya yutsʼin te bitʼil kamigoinoj jbatik sok te Jehová.