Jkʼayinbeytik stalel te Jesús sok jcholtik skʼop Dios sok stseʼelil koʼtantik

1. ¿Bin yuʼun te maba pajalotik sok te lotil jchʼuunjeletike?

TE JOʼOTIK maba pajalotik sok te lotil jchʼuunjeletik, te testigootik yuʼun te Jehová ya kakʼtik ta ilel te sok stseʼelil koʼtantik ya jcholtik te skʼop Dios (Tito 2:14). Manchukme jich-abi ay baeltik te ay machʼatik jich ya yaʼiy sbaik te maʼyuk stseʼelil yoʼtanik ta scholel skʼop Dios. Jichniwan ya xkʼax ta jtojoltik te bitʼil kʼax ta stojol jtul anciano, te jich la yal: «Ay baeltik te maʼyuk bin ya stijbon koʼtan ta scholel skʼop Dios».

2. ¿Bin yuʼun te ay baeltik te maʼyuk stseʼelil koʼtantik ta scholel te skʼop Diose?

² Ayniwan yantik aʼteliletik te ya jpastik ta stojol te Dios te jaʼ ya yakʼxan stseʼelil koʼtantik te bitʼil te scholel skʼop Diose. ¿Bin yuʼun? Melel te kʼalal ya jpastik o te ya kachʼubtestik te sNail Tsoblej, te ya xkoltaywanotik te banti ya xkʼax te bintik ya xjinawan jilel o te ya kakʼbeytik smukʼul yoʼtan te hermanoetik oranax ya kiltik te bintik lek ya xlokʼ sok lek ya kaʼiy jbatik yuʼun. Jaʼnix jich, te kʼalal ya x-aʼtejotik ta swenta-abi ya jmulantik te lamal kʼinal, te kʼuxul oʼtanil sok jnaʼojtik te ya yalik wokol sok te lek ya yilik te bitʼil ya jpastik tulane. Pero ta scholel skʼop Dios, bayalniwan jaʼbil ya jcholtik skʼop Dios ta jun-nax territorio sok te maʼyuk bayal te ants winiketik te ya skʼan ya yaʼiyik te skʼop Diose. Ayniwan machʼatik te ma lek ya yilik te ya jcholbeytik te skʼop Diose. Sok jaʼnix jich jnaʼojtik, te kʼalal nopolix-a te slajibal kʼajkʼal ya kichʼtikxan kontrainel (Mat. 10:22). ¿Bin ya skoltayotik yuʼun ya stsakxan yip te stseʼelil koʼtantik ta scholel te skʼop Dios?

3. ¿Bin ya yakʼ jnoptik te Lucas 13:6-9 ta swenta te Jesús?

³ Te bin ya xjuʼ ya skoltayotik yuʼun ayuk stseʼelil koʼtantik ta scholel skʼop Dios, jaʼ te ya kilbeytik skʼoplal te ejemplo yuʼun te Jesús. Te kʼalal xtaluk ta Balumilal maba la skom sba ta scholel skʼop Dios sok stseʼelil yoʼtan (kʼopona Lucas 13:6-9). La spajaltay sba sok jtul winik te la skanantay oxeb jaʼbil jpet higuera, pero te maba la yakʼ sit. Jich bitʼil te winik te la skanantay te higuera, jaʼnix jich te Jesús oxeb jaʼbil la scholbey skʼop Dios te judioetik, pero te ma bayal ants winiketik te och ta jnopojel yuʼun. Jich bitʼil te winik te maba la skom sba ta skanantayel te higuera yuʼun yakuk yakʼ sit, jaʼnix jich te Jesús maba la skom sba ta scholel skʼop Dios. La spas tulan yuʼun ya xkʼot ta yoʼtan te ants winiketik te lek yachʼil kʼop.

4. ¿Bin chanchajp ya kilbeytik skʼoplal ta artículo ini?

⁴ Ta artículo ini ya kalbeytik skʼoplal bin-utʼil te Jesús la yakʼ ta ilel te stseʼelil yoʼtan te wakebxan u ayin ta Balumilal (Luc. 10:1). Ya kalbeytik skʼoplal chanchajp te bin-utʼil la yakʼ kiltik lekil ejemplo: 1) jaʼ bajt ta yoʼtan spasel te skʼanojel yoʼtan te Jehová, 2) la yakʼ ta yoʼtan te albilkʼopetik, 3) la smukʼulin yoʼtan te jaʼ ya xkoltayot yuʼun te Jehová sok 4) la snop te ay bin lek ya xlokʼ-a ta swenta te scholel skʼop Dios sok la yakʼ ta yoʼtan te ay machʼatik ya x-aʼiybot skʼop yuʼune.

LA YAKʼ TA YOʼTAN SPASEL TE SKʼANOJEL YOʼTAN TE JEHOVÁ

5. ¿Bin-utʼil la yakʼ ta ilel te Jesús te jaʼ bajt ta yoʼtan spasbeyel te skʼanojel yoʼtan te Dios?

⁵ Te Jesús sok stseʼelil yoʼtan la schol «te lek yachʼil kʼop yuʼun te Wentainel», melel snaʼoj te jaʼ te bin ya skʼan te Dios te yakuk spas (Luc. 4:43). Jaʼ te bin kʼax mukʼ skʼoplal la yil ta skuxlejal te Jesús. Jaʼnix jich, te kʼalal cheʼoxebxanix u la schol skʼop Dios ta Balumilal «la sbeentay te mukʼul lumetik sok te chʼin lumetik. Yak ta snojptesel te ants winiketike» (Luc. 13:22). Jaʼnix jich la snojptes te yantik jnopojeletik te yakuk xlokʼik ta scholel skʼop Dios (Luc. 10:1).

6. ¿Bin-utʼil snitojbey sba skʼoplal te aʼtelil ya jpastik ta stojol Jehová sok te scholel te skʼop Diose? (Jaʼnix jich ilawil te foto).

⁶ Te scholel te lek yachʼil kʼop ta kʼajkʼal ini, jaʼ te bin kʼax mukʼ skʼoplal yakʼojbotik jpastik te Jehová sok te Jesús (Mat. 24:14; 28:19, 20). Spisil te aʼtelil ya jpastik ta stojol te Jehová snitojbey sba skʼoplal sok te scholel te skʼop Dios. Jich bitʼil, te spasel te sNail Tsoblej yuʼun tey ya yichʼ ta mukʼ-a te Jehová te ants winiketik te ya jcholbeytik skʼop Dios. Jaʼnix jich te aʼteliletik te ya yichʼ pasel ta Betel sok ta yantikxan lugaretik te pajalik soke. Sok ya jkoltaytik te hermanoetik te banti ya xkʼax te bintik ya xjinawan jilel, ma jaʼuknax ya jkoltaytik ta swenta te bintik ya xtuun yuʼunik, jaʼnix jich yuʼun ya schaʼlokʼik ta scholel te skʼop Dios. Mame xchʼay ta koʼtantik te scholel skʼop Dios jaʼ te bin kʼax mukʼ skʼoplal yakʼojbotik jpastik te Jehová. Teme jich ya jpastike ya yichʼxan yip te stseʼelil koʼtantik ta scholel skʼop Dios. Jtul hermano te jaʼ slumal Hungría te János sbiil, jich ya yal: «Spisil-ora ya jultes ta koʼtan te maʼyuk bin ya spaj te scholel skʼop Dios. Jaʼ te aʼtelil te kʼax mukʼ skʼoplal te akʼbilotik jpastike».

7. ¿Bin yuʼun ma skʼan te Jehová te ya jkom jbatik ta scholel te skʼope? (1 Timoteo 2:3, 4).

⁷ Te bin ya xjuʼ ya skoltayotik yuʼun ma xchʼay te stseʼelil koʼtantik ta scholel te skʼop Dios, jaʼ te jichuk ya kiltik te ants winiketik te bin-utʼil ya yil te Jehová. Te Jehová ya skʼan te bayal ants winiketik ya yaʼiyik sok ya schʼuunik te lek yachʼil kʼope (kʼopona 1 Timoteo 2:3, 4). Te bitʼil ya sta skuxlejalik ta swenta te lek yachʼil kʼop, te Jehová ya skʼan ya skoltayotik yuʼun ya jnatik scholel ta lek te skʼope. Jich bitʼil, yakʼojbotik te folleto Otsesa jnopojeletik te ya skoltayotik yuʼun ya jachtik aʼiyej sok ya jachtik jun nojptesel ta Biblia yuʼun ya kotsestik jnopojeletik. Manchukme ta kʼajkʼal ini ma schʼuunik, yaniwan schʼuunik te kʼalal nopol ya xlajix-a te tulan wokolil. Te bin ya kalbeytik ta ora ini jaʼniwan te bin ya xtijbot yoʼtanik yuʼun ya schʼuunik te lek yachʼil kʼop ta patil bael. Jaʼ yuʼun mukʼ skʼoplal te manchuk ya jkom jbatik ta scholel te skʼop Dios.

LA YICHʼ TA WENTA TE ALBILKʼOPETIKE

8. ¿Bin-utʼil koltayot te Jesús te bitʼil snaʼoj te albil kʼopetike?

⁸ Te Jesús snaʼoj-a te bin-utʼil ya xkʼot ta pasel te albilkʼopetik te ay ta Biblia, jaʼ yuʼun snaʼoj-a te ya xjalaj oxeb jaʼbil sok olil te ya schol skʼop Dios ta Balumilal (Dan. 9:26, 27). Jaʼnix jich snaʼoj-a te bin-ora sok te bin-utʼil ya xlaje, melel albilix skʼoplal-a (Luc. 18:31-34). Te bitʼil te Jesús snaʼojbeyix swentail-a te albilkʼopetike, la stuuntes ta lek te stiempo ta scholel sok stseʼelil yoʼtan te lek yachʼil kʼop yuʼun jich ya skʼotes ta pasel te aʼtelil akʼbot spas yuʼun te Diose.

9. ¿Bin yuʼun ya stij koʼtantik ta scholelxan skʼop Dios te albilkʼopetike?

⁹ Snaʼel te albil kʼopetik te ay ta Biblia ya stij koʼtantik ta scholel te skʼop Dios sok stseʼelil koʼtantik. Jnaʼojtik te nopolix ya yichʼ lajinel te balumilal ini. Te bintik yak ta kʼoel ta pasel ta ora ini sok te taleliletik yuʼun te ants winiketik ya yakʼ kiltik te ay ta kʼoel ta pasel te bin ya yal te Biblia ta swenta te slajibal kʼajkʼal. Ya xkʼot ta koʼtantik te yak ta kʼoel ta pasel te albilkʼopetik te ya yal te ya skontrain sbaik te ajwalil ta sur (jaʼ te Reino Unido sok te Estados Unidos) sok te ajwalil ta norte (jaʼ te Rusia sok te sjoʼtak) (Dan. 11:40). Jaʼnix jich ya yakʼ jnaʼtik te yok te mukʼul lokʼomba te ya yalbey skʼoplal te Daniel 2:43-45 jaʼ skʼoplal te potencia mundial te jaʼik te Reino Unido sok Estados Unidos. Snopel te albilkʼopetik te ay ta Biblia ya yakʼ schʼuun koʼtantik te Wentainel yuʼun te Dios nopol ya slajinbey skʼoplal te ajwaliletik yuʼun balumilal. Spisil te albilkʼopetik ini ya yakʼ jnaʼtik te bin tiempo ayotik ta kuxinel sok ya stij koʼtantik ta scholelxan te skʼop Diose.

10. ¿Bintik-utʼil ya stij koʼtantik te albilkʼopetik yuʼun ya jcholtik te skʼop Dios sok stseʼelil koʼtantik?

¹⁰ Te albilkʼopetik te ay ta Biblia ay bin ya yakʼ jnatik te ya skʼan ya kalbeytik te yantike. Jtul hermana te Carrie sbiil te ya x-abatin ta República Dominicana, jich ya yal: «Kʼalal ya jnop te bintik tʼujbil sjapojbotik te Jehová ta pajel chaʼbej jich ya kaʼiy te ya jkʼan ya kalbey te yantike. Kʼalal ya kil te swokol te ants winiketik ya jnop ta koʼtan te maba joʼon-nax te jich ya sjapbon te Jehová, jaʼnix jich ta stojol te yantike». Te albilkʼopetik ta Biblia ya stij koʼtantik yuʼun ya jcholtik te skʼop Dios, melel ya sjultes ta koʼtantik te Jehová ya skoltayotik ta spasel te aʼtelil-abi. Jtul hermana te ay ta Hungría te Leila sbiil jich ya yal: «Te Isaías 11:6-9 ya yakʼbon jnaʼ te Jehová ya xjuʼ ya skoltay te ants winiketik yuʼun ya sjeltay te skuxlejalik. Jaʼ ya stijbon koʼtan ta scholbeyel skʼop Dios, sok te machʼatik jich yilel te ma skʼan ya yaʼiyik stojole». Jtul hermano ta Zambia te Christopher sbiil jich ya yal: «Jich bitʼil ya yalbey skʼoplal ta Marcos 13:10, te lek yachʼil kʼop yak ta cholel ta swolol Balumilal, jich ya kil bin-utʼil majtanil te ya xkoltaywanon yuʼun jich ya xkʼot ta pasel te albilkʼop-abi». Jaxan te jaʼate, ¿bin albilkʼop ya stijbat awoʼtan yuʼun ya acholxan skʼop Dios?

LA SMUKʼULIN YOʼTAN TE JAʼ YA XKOLTAYOT YUʼUN TE JEHOVÁ

11. ¿Bin yuʼun te Jesús la skʼan la smukʼulin yoʼtan te Jehová yuʼun ya schol skʼop Dios sok stseʼelil yoʼtan? (Lucas 12:49, 53).

¹¹ Te Jesús la smukʼulin yoʼtan te Jehová te jaʼ ya xkoltayot yuʼun ya schol te skʼop Dios sok stseʼelil yoʼtan. Te Jesús ichʼawan ta mukʼ te kʼalal la schol skʼop Dios, melel snaʼoj te ay machʼatik ya x-ilinik yuʼun sok ya xkontrainwanik ta swenta te lek yachʼil kʼop (kʼopona Lucas 12:49, 53). Jaʼnix jich, te jwolwanejetik yuʼun te religionetik la skontrainik te Jesús ta swenta te la schol skʼop Dios ta skaj-abi bayal buelta la skʼan smilik (Juan 8:59; 10:31, 39). Manchukme jich-abi, te Jesús maba la yijkitay ta scholel te skʼop Dios, melel snaʼoj te jokinbil yuʼun te Jehová. Jich la yal: «Maba jtukel ayon, sjokinojon te Tatil te la stikunon tale» (Juan 8:16). Sok jaʼnix jich: «Maba yijkitayojon jtukel, melel spisil-ora jaʼ ya jpas te bin lek yoʼtan yuʼune» (Juan 8:29).

12. ¿Bin-utʼil la schajpan te jnopojeletik yuʼun te Jesús swenta maba ya skom sbaik ta scholel skʼop Dios manchukme la yichʼik kontrainel?

¹² Te Jesús la sjultesbey ta yoʼtan te jnopojeletik yuʼun te ya xjuʼ ya smukʼulin yoʼtanik te Jehová te jaʼ ya xkoltayotik yuʼun. Te bitʼil snaʼoj te ya yichʼik kontrainel, bayal buelta la yaltiklanbey te jaʼ ya xkoltayotik yuʼun te Jehová (Mat. 10:18-20; Luc. 12:11, 12). Sok la yaltiklanbey te pʼijuk ya yakʼ sbaik (Mat. 10:16; Luc. 10:3). Jaʼnix jich la yaltiklanbey teme ma skʼan ya yaʼiyik te lek yachʼil kʼop te ants winiketik ma skʼan ya sujik (Luc. 10:10, 11). Sok la yalbey te yakuk xlokʼik ta anel te kʼalal ya yichʼik kontrainel (Mat. 10:23). Manchukme te Jesús la smukʼulin yoʼtan te Jehová sok la schol skʼop Dios sok stseʼelil yoʼtan, la stsajtay sba yuʼun maba ya sta swokol (Juan 11:53, 54).

13. ¿Bin yuʼun ya schʼuun awoʼtan te ya skoltayat te Jehová?

¹³ Ta ora ini jaʼnix jich ay kontrainel, jaʼ yuʼun ya jkʼantik te ya skoltayotik te Jehová yuʼun ma jkom bajtik ta scholel skʼop Dios sok stseʼelil koʼtantik (Apoc. 12:17). ¿Bin yuʼun ya schʼuun koʼtantik te ya skoltayotik ta jujuntul te Jehovae? Jaʼ ta swenta te oración la spas te Jesús te ya jtatik ta capítulo 17 yuʼun Juan. Jaʼ la skʼanbey te sTat te yakuk skanantay te jpuk-kʼopetik sok sutbot skʼop yuʼun te Jehová. Ta libro yuʼun Hechos ya yal te bin-utʼil koltayotik yuʼun te Dios te jpuk-kʼopetik ta scholel skʼop Dios sok stseʼelil yoʼtanik manchukme ay kontrainel. Ta oración te la spas te Jesús, jaʼnix jich la skʼanbey te Jehová te yakuk skanantay te machʼatik ya yakʼ schʼuunel yoʼtanik ta swenta te lek yachʼil kʼop te la scholik te jpuk-kʼopetik. Sok tey ochem jkʼoplaltik ta jujun jtul-a. Jaʼ yuʼun seguro ayotik te Jehová maba skomoj sba ta sutbeyel te oración te la spas te Jesús sok te ya skoltayotik jich bitʼil la spas ta stojol te jpuk-kʼopetik (Juan 17:11, 15, 20).

14. ¿Bin yuʼun ya schʼuun koʼtantik te ya xjuʼ ya jcholtikxan te skʼop Dios sok stseʼelil koʼtantik? (Jaʼnix jich ilawil te foto).

¹⁴ Te bitʼil yak ta noptsajel tal te slajibal kʼajkʼale wokolniwan ya kaʼiytik scholel kʼop Dios sok tseʼelil koʼtantik. Pero, te Jesús jamal la yalbotik te ya yakʼbotik te koltayel te ya xtuun kuʼuntik (Luc. 21:12-15). Jich bitʼil te Jesús sok te jnopojeletik yuʼun, ya kakʼtik te stukel ya staik ta nopel te ants winiketik teme ya schʼuunik o maʼuk te lek yachʼil kʼop sok maba ya jtsak bajtik ta kʼop sok te ants winiketik. Manchukme te hermanoetik kuxinemik ta nacionetik te banti makbil te kaʼteltik, juʼem yuʼunik scholel te lek yachʼil kʼop, melel jaʼ smukʼulinoj yoʼtanik te Jehová, ma jaʼuk ya smukʼulin sba yoʼtanik. Jich bitʼil ta sbabial siglo te Jehová la yakʼbey yip yoʼtan te j-abatetik «yuʼun jich tsʼakal ya yichʼ cholel te skʼop Dios», jaʼnix jich ta ora ini ya yakʼbotik yip koʼtantik yuʼun ya jcholtik te skʼop Dios jaʼto te kʼalal ya yal tikʼix-a (2 Tim. 4:17). Teme jaʼ ya smukʼulin koʼtantik te Jehová ya xjuʼ ya jcholtikxan te skʼop Dios sok stseʼelil koʼtantik.

LEK TE BIN LA SNOP

15. ¿Bin-utʼil ya jnaʼtik te leknax te bin la sta ta nopel te Jesús ta swenta te scholel skʼop Dios?

¹⁵ Te Jesús schʼuunoj yoʼtan-a te ay ants winiketik te ya skʼan ya yaʼiyik te lek yachʼil kʼop, te bitʼil jich la sta ta nopel jaʼ koltayot yuʼun ya scholxan te skʼop Dios sok stseʼelil yoʼtan. Ta slajibal bael te jaʼbil 30, te Jesús la yil te ay bayal ants winiketik te ya skʼan ya yaʼiyik te skʼop Dios, jaʼ yuʼun la spajaltay sok te awal tsʼunubil te kʼanubenix te chapalix yuʼun ya yichʼ tsobele (Juan 4:35). Ayniwan jun jaʼbil ta patil bael te Jesús jich la yalbey te jnopojeletik: «Bayal sit te awal tsʼunubile» (Mat. 9:37, 38). Sok ta patil bael jich la yalxan: «Bayal sit te awal tsʼunubile, […] kʼanbeyaik te Yajwal te awal tsʼunubil te yakuk stikunxan j-aʼteletik» (Luc. 10:2). Te Jesús spisil-ora la yakʼ ta yoʼtan te ay ants winiketik te ya skʼan ya yaʼiyik te skʼop Dios sok te kʼalal jich ya spasike, bayal ya x-akʼbot stseʼelil yoʼtan yuʼun (Luc. 10:21).

16. ¿Bin lokʼombakʼop la stuuntes te Jesús yuʼun ya yakʼ ta ilel te ay bin lek ya xlokʼ-a ta swenta te scholel skʼop Dios? (Lucas 13:18-21; jaʼnix jich ilawil te foto).

¹⁶ Te Jesús la snojptes te jnopojeletik yuʼun lekuk te bin ya staik ta nopel sok te ya yilik te ay bin lek ya xlokʼ yuʼunik-a ta swenta te scholel skʼop Dios, te jaʼ ya xkoltayotik yuʼun ayuk stseʼelil yoʼtanik. Kiltik cheb lokʼombakʼop te la spajaltaybey skʼoplal sok te scholel skʼop Dios (kʼopona Lucas 13:18-21). Sbabial, la yal te spukel te lek yachʼil kʼop yuʼun te Wentainel jaʼ jich kʼoem bin-utʼil sbakʼ mostaza te ya xchʼi jaʼto te kʼalal ya xkʼot ta mukʼul teʼ. Ta swenta-abi la yakʼ ta naʼel te bayal ta tul ants winiketik ya schʼuunik te lek yachʼil kʼop sok te maʼyuk bin ya xmakotik yuʼun. Schebal, la yal te spukel te lek yachʼil kʼop yuʼun te Wentainel jich kʼoem bin-utʼil levadura. Jich la yakʼ ta naʼel te ya yichʼ cholel ta swolol Balumilal te lek yachʼil kʼop sok te ya yakʼ te ya sjeltay stalel te ants winiketik, manchukme ta sjajchibal maba ya xchiknaj ta ilel. Ta swenta te lokʼombakʼop ini, koltayotik te jnopojeletik yuʼun ya staik ta ilel te ay bin lek ya xlokʼ-a te scholel skʼop Dios.

17. ¿Bintik ya stij koʼtantik yuʼun lekuk te bintik ya jtatik ta nopel ta swenta te scholel skʼop Dios?

¹⁷ Jun te bin ya stijbotik koʼtantik yuʼun maba ya jkom jbatik ta scholel skʼop Dios sok stseʼelil koʼtantik, jaʼ te ya kiltik te bintik lek yak ta lokʼel ta swolol Balumilal ta swenta te aʼtelil-abi. Ta jujun jaʼbil bayal millón ta tul ants winiketik ya xkʼotik ta Snaʼojibal slajel te Jesús sok ya snopik te Biblia. Jaʼnix jich bayal ta mil ta tul te machʼatik ya xjajch sjokinotik ta scholel te skʼop Dios sok te ya yichʼik jaʼ. ¿Jayebtoxan ants winiketik ya skʼan ya schʼuunik te lek yachʼil kʼop? Maba ya jnaʼtik. Te bin ya jnaʼtike jaʼ te Jehová ay ta stsobel te ipal ants winiketik yuʼun ya xkolik jilel ta yorail te tulan wokolil (Apoc. 7:9, 14). Te Jehová te yajwal te awal tsʼunubil yak ta yilel te ay ta moel yajtalul te j-aʼteletik yuʼune, jaʼ yuʼun ma skʼan ya jkom jbatik ta scholel te skʼop Diose.

18. ¿Bin ya jkʼantik te ya staik ta ilel te ants winiketik?

¹⁸ Te smelelil jnopojeletik yuʼun te Jesús spisil-ora la yichʼik naʼbeyel sbaik te ya scholik skʼop Dios sok stseʼelil yoʼtanik. Kʼalal te ants winiketik la yilik te yip yoʼtanik sok te stseʼelil yoʼtanik te jpuk-kʼopetik «jich la snaʼik stojol te jaʼ la sjokinik te Jesuse» (Hech. 4:13). Te joʼotik jaʼnix jich ya jkʼantik te ya yilik te ants winiketik te ya jcholtik te skʼop Dios sok stseʼelil koʼtantik, jich bitʼil la spas te Jesús.