«Tsaaik ta ora ini te machʼa ya awichʼik ta mukʼe»

1. Swenta ay stseʼelil koʼtantik, ¿bin ya skʼan ya jpastik sok bin yuʼun? (Isaías 48:​17, 18).

TE Jehová te jaʼ jTatik te ay ta chʼulchan te kʼax kʼuxotik ta yoʼtan, ya skʼan te yakuk jmulanbeytik yutsilal te jkuxlejaltik ta ora ini soknix ta pajel chaʼbej (Ecl. 3:​12, 13). Spasojotik yuʼun ay bintik ya xjuʼ kuʼuntik spasel. Pero maba la yakʼbotik ta jwentatik te ajwalil ya xkʼootik ta stojol te yantike sok maʼyuk ta jwentatik yalel te bin lek sok te bin ma lek (Ecl. 8:9; Jer. 10:23). Snaʼoj te jaʼ ya yakʼ stseʼelil koʼtantik teme ya x-abatinotik ta stojol sok teme ya jchʼuunbeytik te skʼope (kʼopona Isaías 48:​17, 18).

2. ¿Bin ya skʼan te Satanás te yakuk jchʼuuntik, sok bin-utʼil yakʼojbey sujtib te Jehová te lotil-abi?

² Te Satanás ya skʼan te yakuk jchʼuuntik te ya jta stseʼelil koʼtantik manchukme ma x-abatinotik ta stojol te Jehová sok te ya xjuʼ ya jwentain jbatik ta jtukeltik (Gén. 3:​4, 5). Yuʼun ya yichʼ naʼel te jaʼ lotil-abi, te Jehová yakʼoj tiempo yuʼun ya swentain sbaik te ants winiketik. Jamal chikan ta ilel te bin ma lek lokʼem-a te bitʼil jaʼnix ya swentain sbaik te ants winiketik. Pero, te Biblia ya yalbey skʼoplal bayal ta tul ants winiketik te la sta stseʼelil yoʼtanik te bitʼil abatinik ta stojol te Jehová, te machʼa kʼax tseʼelxan yoʼtan la yaʼiy sba, jaʼ te Jesucristo. Sbabial, kiltik bin yuʼun te Jesús la sta ta nopel te ya x-abatin ta stojol te Jehová. Schebal, ya xbajt kiltik bin yuʼun snujpʼ te ya kichʼtik ta mukʼ te jTatik te ay ta chʼulchan. Yoxebal, ya xbajt jultes ta koʼtantik bin yuʼun la jtatik ta nopel te ya x-abatinotik ta stojol Jehová.

TE JESÚS LA STSA TE YA X-ABATIN TA STOJOL TE JEHOVÁ

3. ¿Bin japbot te Jesús yuʼun te Satanás sok bin la sta ta nopel spasel te Jesús?

³ Te kʼalal kʼax ta Balumilal te Jesús la stsa te ya x-abatin ta stojol te Jehová. Kʼalal yichʼbeltonax jaʼ-a te Jesús pasot ta prueba yuʼun te Satanás kʼalal japbot te kʼulejalil yuʼun te nacionetik teme jaʼnax ya skejan sba jun buelta ta stojol yuʼun ya yichʼ ta mukʼ. Pero jich la yal te Jesús: «¡Baan, Satanás! Melel jich tsʼibaybil: ‹Jaʼnaxme xa awichʼ ta mukʼ te Jehová te Dios awuʼune sok jaʼnaxme xa awakʼ aba ta abatinel ta stojol›» (Mat. 4:​8-10). ¿Bin yuʼun te jich la sta ta nopel te Jesuse? Kiltik bin yuʼun.

4, 5. ¿Bintik yuʼun abatin ta stojol te Jehová te Jesús?

⁴ Jun te bin yuʼun te la sta ta nopel te Jesús te ya x-abatin ta stojol te sTat, jaʼ ta swenta te kʼux ta yoʼtane (Juan 14:31). Jaʼnix jich, te Jesús snaʼoj te abatinel ta stojol te Jehová jaʼ te bin snujpʼ ta pasel (Juan 8:​28, 29; Apoc. 4:11). Snaʼoj te jaʼ yakʼojbotik jkuxlejaltik te Jehová, te bayal yutsil yoʼtan sok te ya xjuʼ ya smukʼulin koʼtantik (Sal. 33:4; 36:9; Sant. 1:17). Te Jehová spisil-ora yalojbey te bin smelelil sok spisil te bin ay yuʼun te Jesús jaʼ akʼbil yuʼun te sTate (Juan 1:14). Pero, te Satanás jaʼnax yichʼoj talel lajel ta stojol te ants winiketik, jloʼlaywanej te bayal sbikʼtal yoʼtan sok stʼutʼil yoʼtan (Juan 8:44). Te Jesús ya snaʼbey sba ta lek te Jehová soknix te Satanás, jaʼ yuʼun maʼyuk bin-ora la sta ta nopel te ya skʼayinbey stalel te Satanás sok te ya skontrain te Jehová (Filip. 2:​5-8).

⁵ Yanxan te bin yuʼun te Jesús la sta ta nopel te ya x-abatin ta stojol te Jehová, melel snaʼoj te bintik lek ya xlokʼ-a teme jun yoʼtan ya yakʼ sba ta stojole (Heb. 12:2). Snaʼoj-a teme jun yoʼtan ya yakʼ sbae, ya schʼultesbey sbiil te sTat sok te ya slajinbey skʼoplal te wokolil yakʼoj te pukuje.

SNUJP TE YA KICHʼTIK TA MUKʼ TE JEHOVÁ

6, 7. ¿Bin yuʼun te ay bayal ants winiketik ma x-abatinik ta stojol te Jehová? ¿Bin yuʼun snujpʼ te jaʼnax ya kichʼtik ta mukʼ te Jehová?

⁶ Ta kʼajkʼal ini, bayal ants winiketik te maba ya x-abatinik ta stojol te Jehová, melel maba ya snaʼbeyik sba. Jaʼnix jich ma snaʼbeyik te tʼujbil taleliletik ay yuʼune sok te bin spasoj ta stojolike. Jich stalelik-a te ants winiketik te la scholbey skʼop Dios te Pablo ta Atenas (Hech. 17:​19, 20, 30, 34).

⁷ Te Pablo la yaltiklanbey ta swenta te smelelil Dios te «ya yakʼbey skuxlejal spisil te ants winiketik, ya yakʼbey yichʼik ikʼ sok ya yakʼbey spisil te bintik ya xtuun yuʼune». Jaʼnix jich «jaʼ ta swenta te kuxulotik, ya xbeenotik sok te ayotik ta kʼinale». Jich la yaltiklanbeyxan: «Ta swentanax jtul winik la yakʼ chiknajuk spisil ta chajp nacionetik». Te bitʼil jaʼ Jpaswanej kuʼuntik, snujpʼ te jaʼ ya kichʼtik ta mukʼe (Hech. 17:​25, 26, 28).

8. ¿Bin-a te maʼyuk bin-ora jich ya spas te Jehová?

⁸ Te bitʼil jaʼ Jpaswanej sok jaʼ Mukʼul Ajwalil, te Jehová ya xjuʼ te ya suj te ants winiketik yuʼun ya x-ichʼot ta mukʼ yuʼun. ¡Pero maʼyuk bin-ora te jich ya spase! Jaʼ ya skʼan te spisiluk te ants winiketik ya smulanik yamigoinel ta sbajtelkʼinal (1 Tim. 2:​3, 4). Jaʼ yuʼun yakʼoj kiltik bayal pruebaetik te yuʼun-nix ay-a te Diose sok te kʼax kʼuxotik ta yoʼtane. Ta swenta-abi, te Jehová ya spʼijubtesotik yuʼun ya jnojptestik te ants winiketik ta swenta te bintik lek ya xbajt spas ta stojolik ta pajel chabe sok te bin-utʼil ya xbajt spase (Mat. 10:​11-13; 28:​19, 20). Jaʼnix jich ya xchajpanotik ta jujun congregación sok ya yil te bin-utʼil ya skanantayotik sok skʼuxul yoʼtan te superintendenteetik (Hech. 20:28).

9. ¿Bin-utʼil ya yakʼ ta ilel te skʼuxul yoʼtan te Jehovae?

⁹ Te Jehová ya yakʼ ta ilel te skʼuxul yoʼtan ta swenta te bin-utʼil ya yil te machʼatik ma schʼuunik te ay te Diose. Te jayebix jaʼbil kʼaxem tale, bayal millón ta tul ants winiketik jaʼ ya spasik te bin lek ya yilik stukelike. Pero, ta swenta te mero lek yoʼtan stukel te Jehová, yakʼojbey te bintik ya xtuun yuʼunik sok te ya smulanbeyik yutsilal te skuxlejalike (Mat. 5:​44, 45; Hech. 14:​16, 17). Ta swenta te Jehová ya xjuʼ ya sta sfamiliaik, yal snichʼnabik, yamigotakik sok te ya smulanbeyik yutsil te yaʼtelike (Sal. 127:3; Ecl. 2:24). Te jTatik te ay ta chʼulchan kʼux ta yoʼtan ta spisil te ants winiketik (Éx. 34:6). Ta ora ini ya kiltik bin yuʼun te joʼotik la jtsʼajtik te ya x-abatinotik ta stojol te Jehová sok te bin-utʼil ya yakʼbotik bendición.

LA JTSATIK TE YA X-ABATINOTIK TA STOJOL TE JEHOVÁ

10. 1) ¿Bin yuʼun te ya x-abatinotik ta stojol te Jehová? (Mateo 22:37). 2) ¿Bin-utʼil skoltayojat te bitʼil ma x-ilin ta ora te Jehová? (Salmo 103:​13, 14).

¹⁰ Jich bitʼil te Jesuse, te bin yuʼun ya x-abatinotik ta stojol te Diose jaʼ ta swenta te kʼux ta koʼtantike (kʼopona Mateo 22:37). Kʼalal ya jnaʼbeytik-xan sba ta lek te Jehová, kʼaxtoxan ya yikʼbotik koʼtantik te tʼujbil taleliletik yuʼune. Jich bitʼil te ma-orauk ya x-ilin ta jtojoltik. Kʼalal te israeletik la skʼaxuntaybeyik te smantale jich la yaltiklanbey: «Ihquitayahic hilel te chopol behetic awuʼunic» (Jer. 18:11). Te Jehová ya snaʼ te tsʼubil lumetike (kʼopona Salmo 103:​13, 14). Kʼalal ya anopilan ta awoʼtan te bitʼil maba ya x-ilin ta oranax te Jehová sok te yantik taleliletik yuʼune, ¿mabal yakuk stijbat awoʼtan yuʼun ya x-abatinat ta stojol ta spisil-ora?

11. ¿Bintik yuʼun te ya x-abatinotik ta stojol te jTatik te ay ta chʼulchane?

¹¹ Te binxan ya stij koʼtantik yuʼun ya x-abatinotik ta stojol te Jehová, jaʼ ta swenta te jnaʼojtik te jaʼ stojil te jich ya jpastike (Mat. 4:10). Jaʼnix jich ay ta koʼtantik te bin lek ya xlokʼ kuʼuntik-a te bitʼil jun koʼtantik ta stojol te Dios: te ya xkoltaywanotik te ya yichʼ schʼultesel te sbiil te Jehová, ya kakʼtik ta ilel-a te jaʼ jpas lot te Satanás sok jich ya kakʼbeytik stseʼelil yoʼtan-a te jTatik te ay ta chʼulchan. Teme jaʼ ya jtsatik te ya x-abatinotik ta stojol te Jehová ta ora ini, yame xjuʼ ya x-abatinotik ta stojol ta sbajtelkʼinal (Juan 17:3).

12, 13. ¿Bin ya yakʼ jnoptik te bin kʼax ta skuxlejal te Jane sok Pam?

¹² Ta jchʼiniltikto ya xjuʼ te kʼux ya kaʼiytik ta koʼtantik te Jehová, manchukme ya xkʼax te jaʼbiletik maba ya xlaj te kʼuxul oʼtanil-abi. Kiltik te ejemplo yuʼun chaʼtul hermanaetik te jaʼik te Jane sok Pam.a Te ay 11 sok 10 yaʼbilalik-a te kʼalal jajchik ta snopel te Biblia. Manchukme te smeʼ statik maba la skʼanik nojptesel ta Biblia, akʼbotik permiso yuʼun ya sjokinik te testigoetik, jaʼnax teme maba ya skom sbaik ta bael ta religión te banti ya stsob sba te sfamilia ta jujun slajibal semana. Te Jane jich ya yal: «Te bin la yakʼbonik jnop te Testigoetik yuʼun Jehová ta swenta te Biblia la skoltayon ta stsʼikel te tenel yuʼun te joʼtak ta clase yuʼun maba ya jtuuntes te drogaetik o spasel mulwej».

¹³ Te kʼalal chʼiike ochik ta publicadora. Ta patil bael, ochik ta precursora sok jaʼnix jich ya skanantayik te smeʼ statik te ayix yaʼbilalik. Te kʼalal ya snop te bin kʼaxem ta skuxlejal te Jane jich ya yal: «La kil ta jkuxlejal te bin-utʼil te Jehová ya skanantay te yamigotak jich bitʼil ya yal 2 Timoteo 2:19: ‹Te Jehová ya snaʼbey sba te machʼatik yuʼune›». Ta melel te Jehová ya skanantay te machʼa kʼux ya x-aʼiyot yuʼun sok te ya x-abatin ta stojol.

14. ¿Bin-utʼil ya xjuʼ ya jkoltaybeytik skʼoplal te sbiil te Jehová? (Jaʼnix jich ilawil te fotoetik).

¹⁴ Ya jkʼantik te ya xkoltaywanotik ta schʼultesbeyel te sbiil te Jehová. Nopa awaʼiy ta swenta te ejemplo ini. Te ay jtul awamigo te kʼux ta awoʼtan, melel ay slekil yoʼtan, ay yutsil yoʼtan sok ya snaʼ spasel perdón. Pero ya awaʼiy te ay machʼa ya yal te jaʼ la jpas lot sok chopol stalel te awamigoe. ¿Bin ya apas? ¿Mabal jichuk te ya akoltaybey skʼoplale? Jaʼnix jich kʼoem te kʼalal ay machʼa ya kaʼiytik te ya yal lotiletik ta stojol te Jehová, te bin ya jpastike jaʼ te ya kaltik te bin smelelil sok ya jkoltaybeytik skʼoplal te bantito kʼalal ya xjuʼ kuʼuntik (Sal. 34:1; Is. 43:10). Te bin ya kaltik sok te bin ya jpastik ya yakʼ ta ilel te ya jkʼan ya x-abatinotik ta stojol te Jehová sok spisil koʼtantik.

15. ¿Bintik bendicionetik la sta te jpuk-kʼop Pablo te bitʼil la sjeltay te bin snopoj ya spas ta skuxlejale? (Filipenses 3:​7, 8).

¹⁵ Sok spisil koʼtantik ya jeltik te bin jnopoj ya jpas ta jkuxlejaltik swenta jaʼ ya kakʼbeytik stseʼelil yoʼtan te Jehová sok ya x-abatinotik-xan ta stojol. Jun ejemplo, te jpuk-kʼop Pablo sok spisil yoʼtan la yijkitay te mukʼ skʼoplal ya xkʼot ta slumal yuʼun jaʼ ya stʼun te Cristo sok te jaʼ ya x-abatin ta stojol te Jehová (Gál. 1:14). Ta swenta-abi, la sta stseʼelil yoʼtan ta skuxlejal sok la sta te majtanil te ya xwentainwan sok te Cristo ta chʼulchan. Te Pablo maʼyuk bin-ora la sut skʼop te bitʼil la sta ta nopel te ya x-abatin ta stojol te Jehová, jichnix ya jpastik-euk (kʼopona Filipenses 3:​7, 8).

16. ¿Bin ya yakʼ jnoptik te bin kʼax ta skuxlejal te Julia? (Jaʼnix jich ilawil te fotoetik).

¹⁶ Teme jaʼ ya xbajt ta koʼtantik te ya x-abatinotik ta stojol te Jehová, bayal bendicionetik ya jtatik ta ora ini sok ta pajel chaʼbej. Kiltik te experiencia yuʼun jtul hermana te Julia sbiil. Te kʼalal chʼinto-ae ya xkʼayojin ta jun iglesia. Jtul ants te la yil te ya snaʼ kʼayoj te Julia, la yalbey te ya skʼan ya skoltay sok ya snojptes yuʼun ya xkʼayojin ta lek. Maba jal ta patil, kʼax naʼbil sba kʼot te Julia sok kʼayojin ta lugaretik te mukʼik skʼoplal. Te kʼalal ay ta nop jun ta jun escuela yuʼun música te kʼax naʼbil sbae, jtul sjoy ta escuela cholbot skʼoplal ta swenta te Dios sok albot te jaʼ Jehová te sbiile. Ta patil bael, te Julia jajch snop te Biblia cheb buelta ta jujun semana. Ta patil, la sta ta nopel te ya x-abatin ta stojol te Jehová sok la yijkitay te música. Wokol la yaʼiy te bin la sta ta nopel spasel. Jich ya yal: «Bayal ants winiketik la yalbonik te ma yakon ta stuuntesel te bin ya jnaʼ spasel, pero te joʼone jaʼ ya jkʼan te ya x-abatinon ta stojol te Jehová». ¿Bin ya snop te Julia ta ora ini te bitʼil kʼaxemix 30 jaʼbile? Jich ya yal: «Kʼax tseʼel koʼtan sok seguro ayon te Jehová ya xbajt yakʼbon spisil te bin ya skʼan koʼtan ta pajel chaʼbej» (Sal. 145:16).

MAME XA AKOM ABA TA ABATINEL TA STOJOL TE JEHOVÁ

17. Te bitʼil j-abatotik yuʼun Dios, ¿bin ya skʼan ya yal te ayotikix ta slajibal kʼajkʼal? Sok ¿bin ya skʼan ya yal ta stojol te ants winiketik te ma jaʼukik j-abatetik yuʼun Diose?

¹⁷ Nopol ayotikix ta slajibal te kʼajkʼal. Te jpuk-kʼop Pablo jich la stsʼibay: «Melel ‹jtebxanix ya skʼan› te ‹ya xjul te machʼa yak ta talele, sok maba ya xjalajix›» (Heb. 10:37). ¿bin smakojbey skʼoplal te bin la yale? Jaʼ te jtebxanix tiempo ay yuʼunik te ants winiketik yuʼun ya staik ta nopel teme ya x-abatinik ta stojol te Jehová (1 Cor. 7:29). Teme jtaojtikix ta nopel te jaʼ ya x-abatinotik ta stojol te Diose, manchukme ya xbajt jsitintaytik cheʼoxeb pruebaetik, jnaʼojtik te «jtebxanix ya skʼan» yuʼun ya xlaj skʼoplal.

18. ¿Bin ya skʼan te yakuk jpastik te Jehová sok te Jesús?

¹⁸ Te Jesús la stijbey yoʼtan te ants winiketik yuʼun ya x-ochik ta jnopojel yuʼun sok te manchuk ya skom sbaik ta stʼunel (Mat. 16:24). Teme ayix jaʼbil ayotik ta abatinel ta stojol te Jehová, mame jkom jbatik. Yaniwan skʼan te ya jpastik tulan yuʼun ya x-abatinotikxan ta stojol te Jehová, melel ay wokol ya kaʼiytik pasel. Pero ya xjuʼ ya jtatik stseʼelil koʼtantik sok bendicionetik te bitʼil ya x-abatinotik ta stojol te Jehová (Sal. 35:27).

19. ¿Bin ya yakʼ jnoptik te bin kʼax ta skuxlejal te Gene?

¹⁹ Ay chaʼoxtulik te ya snopik te bayal bintik ma xjuʼ yuʼunik spasel teme ya x-abatinik ta stojol te Jehová. Teme jchʼielate, ¿jichbal ya anop te ay bin ya xchʼay awuʼun teme ya ata ta nopel teme ya x-abatinat ta stojol te Diose? Jtul jchʼiel te Gene sbiil jich ya yal: «Jnopoj te ay bayal bintik ma xjuʼ kuʼuntik spasel te bitʼil testigootik yuʼun Jehová. Jich ya jnop te bayal bin ya smulanik spasel te yantik jchʼieletik te pajal kaʼbilal sok, jich bitʼil te ya xbajtik ta kʼinetik, ya xlokʼik ta paxial sok achʼixetik sok te ya yixtalanik videojuegoetik te maba lekike, yan te joʼone jaʼnax ya xboon ta tsoblejetik sok ta scholel skʼop Dios». ¿Bin-utʼil utsʼinbot yoʼtan te Gene te bitʼil jich la snope? Jich ya yal: «Jajch jpas te bintik ya spasik te yantik jchʼieletik sok lek la kaʼiy jba te kʼalal jich la jpase. Pero, maba la jta stseʼelil koʼtan. Jajch jultes ta koʼtan te bintik jnopoj ta Biblia te maba la jpas ta jkuxlejale sok jajch jnop ta koʼtan te bin lek ya jta-a teme ya jpas ta jkuxlejal. Jaʼ yuʼun la jta ta nopel te ya x-abatinon ta stojol te Jehová sok spisil koʼtan. Te kʼalal jich la jpase, jich la kaʼiy te la sjakʼbon spisil te j-oración te Jehová».

20. ¿Bin ya skʼan ya kakʼ ta koʼtantik spasel?

²⁰ Jtul salmista jich kʼayojin ta stojol te Jehová: «Bayel me yutsil te machʼa tsahbil awuʼun soc te yac awicʼ tal ta atsʼehl yuʼun ya xnahin ta amaqʼuetic awuʼun» (Sal. 65:4). Jich bitʼil te Josué, jich jamal ya kaltik: «Te joʼon sok te machʼatik ay kuʼune jaʼme ya kakʼ jbakotik ta abatinel ta stojol te Jehová» (Jos. 24:15).