Jaʼ stseʼelil koʼtantik te Jehová

1, 2. 1) ¿Bin yaʼiyel ya yaʼiy sba bayal ta tul ants winiketik ta ora ini? 2) ¿Bin ya xbajt kilbeytik skʼoplal ta artículo ini?

BAYAL ants winiketik ta kʼajkʼal ini, bayal bin ya spasik yuʼun ya staik te tseʼel oʼtanil. Manchukme ya spasik tulan ta stael te tseʼel oʼtanil, te tseʼel oʼtanil-abi maba ya xjalaj. Bayal machʼatik ya smel yoʼtanik sok te jich ya yaʼiyik te ma xlekub te skuxlejalik. Ayniwan chaʼoxtul j-abatetik yuʼun Jehová te jaʼnix jich ya yaʼiy sbaik-euk. Te bitʼil ayotik ta kuxinel ta «slajibal kʼajkʼale», bayal wokoliletik ya xkʼax ta jtojoltik te «tulan ta sitintayele» (2 Tim. 3:1).

² Ta artículo ini ya xbajt kilbeytik skʼoplal bintik-a te ya xchʼaybotik te stseʼelil koʼtantik sok bin ya xjuʼ ya jpastik yuʼun ya jtatik yan buelta te stseʼelil koʼtantik. Pero, nail ya xbajt kalbeytik skʼoplal machʼa-a te ya yakʼbotik te smelelil tseʼel oʼtanil.

¿MACHʼA-A TE YA YAKʼBOTIK TE SMELELIL TSEʼEL OʼTANIL?

3. ¿Bin ya yakʼ jnoptik ta stojol te Jehová te bintik spastiklanoje? (Jaʼnix jich ilawil te fotoetik).

³ Te Jehová spisil-ora tseʼel yoʼtan sok ya skʼan te jaʼnix jich tseʼeluk koʼtantik-euk. Jaʼ yuʼun, bayal bintik spastiklanoj te ya yakʼ stseʼelil koʼtantik, jich bitʼil te tʼujbil Balumilal, te bayal ta chajp coloretik, te bayal ta chajp bujtsʼan weʼeliletik sok chambalametik te ya yakʼ stseʼelil koʼtantik ta swenta te bin ya spasik. Chikan ta ilel te kʼuxotik ta yoʼtan te Jehová sok ya skʼan te yakuk jmulantik te jkuxlejaltik.

Chʼin elefante: Image © Romi Gamit/Shutterstock; chʼin pingüinoetik: Vladimir Seliverstov/500px via Getty Images; chʼin tentsunetik: Rita Kochmarjova/stock.adobe.com; chaʼkojt delfinetik: georgeclerk/E+ via Getty Images

4. 1) ¿Bin yuʼun tseʼel yoʼtan te Jehová manchukme ya yil te wokoliletik te ay ta Balumilal? 2) ¿Bin ya spas ta jtojoltik te Jehová? (Salmo 16:11).

⁴ Manchukme te Jehová jaʼ «te Dios te tseʼel yoʼtane», ya snaʼ ta lek spisil te wokoliletik te ya xkʼax ta Balumilal (1 Tim. 1:11). Pero, ma jaʼuk ya yakʼ te ya xchʼay stseʼelil yoʼtan yuʼun. Snaʼoj te jkʼaxelnax ay te wokoliletik, melel jaʼnix yakʼojbey yorail te ya xlaj skʼoplal. Ya smaliy sok slamalil yoʼtan te ya xkʼot yorail yuʼun ya slajin ta jkʼaxel te bintik kʼux sok te mel-oʼtan. Te bitʼil ay ta smaliyel te ya xkʼot yorail, spisil-ora ay ta yoʼtan te bin-utʼil ya kaʼiy jbatik sok ay bin ya spas ta jtojoltik: ya skoltayotik yuʼun ayuk stseʼelil koʼtantik (kʼopona Salmo 16:11). Kiltik bin-utʼil la spas ta stojol te Jesús.

5, 6. ¿Bin yuʼun tseʼel yoʼtan te Jesús?

⁵ Yanxan te machʼa kʼax tseʼel yoʼtan jich bitʼil te Jehová, jaʼ te Jesuse. ¿Bin yuʼun? Sbabial, jaʼ ta swenta te «jaʼ slokʼomba te Dios te ma chikan ta ilele» sok ya yakʼ ta ilel ta lek te taleliletik yuʼun te sTate (Col. 1:15; 1 Tim. 6:15). Schebal, jaʼ ta swenta te bayal tiempo sjokine ta aʼtel te Jehová, te machʼa ya yakʼ te smelelil tseʼel oʼtanil.

⁶ Jaʼnix jich, te Jesús tseʼel yoʼtan, melel spisil-ora ya spas te bin ya skʼan te sTate (Prov. 8:30, 31; Juan 8:29). Te bitʼil ya schʼuun kʼop lek ya x-ilot yuʼun te Jehová sok ya xkoltayot yuʼun (Mat. 3:17).

7. ¿Bin ya skʼan ya jpastik yuʼun ya jtatik te smelelil tseʼel oʼtanil?

⁷ Jaʼnix jich, te joʼotik ya xjuʼ te ay stseʼelil koʼtantik teme ya xnoptsajotik ta stojol te Jehová. Kʼalal ya kakʼbeytikxan tiempo snopel ta stojol te Jehová, jich ya jkʼayintik ta lek te taleliletik yuʼun sok ya jtatikxan stseʼelil koʼtantik. Yanxan te bin ya yakʼ stseʼelil koʼtantik jaʼ te ya jpasbeytik te skʼanojel yoʼtan sok te ya jnaʼtik te lek ya yilotik te Jehová (Sal. 33:12).a Manchukme jich-abi ya xjuʼ te ay baeltik te jich ya kaʼiytik te ya xchʼay te stseʼelil koʼtantik. ¿Yabal skʼan ya yal-abi te maba lek ya yilotik te Diose? Maʼuk. Te Jehová ya xkʼot ta yoʼtan te maba tojotik, te ay baeltik te ya jmel koʼtantik sok te ay bin kʼux ya kaʼiytik (Sal. 103:14). Ta ora ini kiltik bintik-a te ya yakʼ xchʼay te stseʼelil koʼtantik sok bin ya xjuʼ ya jpastik yuʼun ya jtatik yan buelta te stseʼelil koʼtantik.

MAME XA AWAKʼ TE AY BIN YA XCHʼAYBAT TE STSEʼELIL AWOʼTAN

8. ¿Bin-utʼil ya xjuʼ ya yutsʼinotik te wokoliletik te ya xkʼax ta jkuxlejaltik?

⁸ Sbabial te bin ya schʼaybotik stseʼelil koʼtantik: te wokoliletik te ya xkʼax ta jkuxlejaltik. Ayniwan ta kʼaxel jwokoltik, jich bitʼil te kontrainel, te bin ya xjinawan jilel, te pobreil, te chamel o te ayix kaʼbilaltik. Kʼalal jich ya xkʼax ta jkuxlejaltik yaniwan xchʼaybotik te stseʼelil koʼtantik, kʼaxtoxan-a te kʼalal maʼyuk bin ya xjuʼ ya jpastik. Te Biblia jich ya yal: «Te machʼa ay ta wokol yoʼtan ya xlaj yip yoʼtan yuʼun» (Prov. 15:13). Kiltik te bin kʼax ta stojol jtul anciano te Babis sbiil, ta chanebnax jaʼbil laj te sbankil sok te smeʼ stat. Te Babis la yal te bin yaʼiyel la yaʼiy sba te kʼalal kuxulikto-a te sfamiliae, jich la yal: «Jich la kaʼiy te jtukel ayon sok te maʼyuk machʼa ya xjuʼ ya skoltayone. Ta skaj te bayal bin la jpase, maba juʼ kuʼun sjokinel bayal tiempo te jfamilia, jaʼ te bin kʼax kʼux ya kaʼiye». Jich bitʼil la kiltikix, te wokoliletik te ya xkʼax ta jtojoltik ya xjuʼ ya yutsʼin te jkuxlejaltik sok te bin yaʼiyel ya kaʼiy jbatik.

9. ¿Bin ya xjuʼ ya jpastik yuʼun ya jtatik yan buelta te stseʼelil koʼtantik? (Jeremías 29:4-7, 10).

⁹ ¿Bin ya xjuʼ ya jpastik yuʼun ya jtatik yan buelta te stseʼelil koʼtantik? Te yakuk kichʼtik ta wenta te bin yak ta kʼaxel ta jkuxlejaltik sok te yakuk kaltik wokol. Te ants winiketik ta balumilal ini ya snopik te ya skʼan te manchuk ya xkʼax swokolik yuʼun jichlaj ya staik-a te tseʼel oʼtanil, pero ma smeleliluk. Jun ejemplo, te Jehová la yalbey te judioetik te ikʼbilik bael ta Babilonia te yakuk spasik tulan yuʼun lekuk ya xkuxinik, manchukme ay swokolik (kʼopona Jeremías 29:4-7, 10). ¿Bin ya yakʼbat anop? Jaʼ te ayuk ta awoʼtan te ma xjuʼ ya ajeltay te bin yak ta kʼaxel ta akuxlejal sok te yakuk awal wokol ta swenta te bintik lek ay awuʼune. Ayuk ta awoʼtan te ya sjokinat te Jehová sok te ya skoltayat (Sal. 63:7; 146:5). Jtul hermana te Efi sbiil, te ma juʼix sbeel ta skaj jun accidente, jich ya yal: «Te Jehová, te jfamilia sok te congregación bayal la skoltayonik. Teme ya kakʼ jba ta tsalel yuʼun te wokoliletik jich ya kaʼiy te maba ya kal wokol ta stojolik, jaʼ yuʼun ya jpas tulan yuʼun lekuk te bin ya jnop sok te ayuk stseʼelil koʼtan».

10. ¿Bin yuʼun ya xjuʼ te tseʼel koʼtantik manchukme ya xkʼax jwokoltik?

¹⁰ Manchukme ya xkʼax jwokoltik o ya xkʼax swokol te jfamiliatik, ya xjuʼ te tseʼel koʼtantik (Sal. 126:5).b ¿Bin yuʼun? Melel te stseʼelil koʼtantik ma jaʼuk ta swenta te bin yilel te jkuxlejaltik. Jtul precursora te María sbiil, jich ya yal: «Kʼalal ya xkʼax jwokoltik ma xchʼay te stseʼelil koʼtantik, melel ay ta koʼtantik te bintik sjapojbotik te Jehová. Pero, ma jaʼuk ya skʼan ya yal te ma xjuʼ ya x-okʼotik o te ma xkakʼtik ta ilel te bin yaʼiyel ya kaʼiy jbatik. Te jTatik Jehová ya skoltayotik yuʼun ma xchʼay te stseʼelil koʼtantik chikan bin ya xkʼax ta jtojoltik». Manchukme ta ora ini ay bayal wokolil ta jkuxlejaltik, juluk ta koʼtantik te jkʼaxelnax ay te jwokoltike. Jich kʼoem te bin-utʼil señail koktik te ya xjil ta sjiʼal mar te ya xtupʼ te kʼalal ya xtaot yuʼun te jaʼe, ta pajel chaʼbej jaʼnix jich te Jehová ya xbajt stupʼ te jwokoltike.

11. ¿Bin-utʼil ya skoltayat te ejemplo yuʼun te jpuk-kʼop Pablo?

¹¹ ¿Jaxan teme ya xjajch jnoptik te ya xkʼax jwokoltik ta skaj te ma lek ya yilotikix te Jehová? Te bin ya xjuʼ ya skoltayotik jaʼ te ya jnopilan ta koʼtantik te j-abatetik te jun yoʼtan la yakʼ sbaik ta stojol te Jehová, manchukme la sitintayik bayal wokolil. Jnoptik ta swenta te ejemplo yuʼun te jpuk-kʼop Pablo. Te Jesús la yakʼbey mukʼ yaʼtel: te ya yichʼ bael te lek yachʼil kʼop «ta stojol te nacionetik, ajwaliletik soknix ta stojol te snichʼnab Israel» (Hech. 9:15). Manchukme jich-abi, bayal wokolil la sitintay te Pablo (2 Cor. 11:23-27). ¿Yabal skʼan ya yal-abi te maba lek ilbilix yuʼun te Diose? ¡Maʼuk! Te bitʼil jun yoʼtan kujch yuʼun jaʼ jun prueba te jokinbil yuʼun te Jehová (Rom. 5:3-5). Nopa ta swenta te bin yak ta kʼaxel ta atojol. Te bitʼil jun awoʼtan ay ta kujchel awuʼun manchukme ya xkʼax awokol, ya xjuʼ ya schʼuun awoʼtan te lek ya yilat te Jehová.

12. ¿Bin yuʼun ya yakʼ xchʼay te stseʼelil koʼtantik te ma xkʼot ta pasel te bin ya jkʼantike?

¹² Schebal te bin ya yakʼ xchʼay te stseʼelil koʼtantik: te ma xkʼot ta pasel te bin ya jkʼantike (Prov. 13:12). Te j-abatotik yuʼun Jehová ya kakʼ jmetatik yuʼun ya kakʼbeytik yil te kʼux ta koʼtantik sok te ya kaltik wokol ta stojol. Pero ya skʼan te ya kichʼtik ta wenta te bin yilel te jkuxlejaltik te kʼalal ya kakʼ jmetatik, teme ma jichuk ya jpastik ya xjuʼ ya xchebaj koʼtantik (Prov. 17:22). Jtul precursora te Holly sbiil, jich ya yal: «Ya jkʼan-a te ya xboon ta Escuela yuʼun Evangelizador, te ya x-abatinon ta yan nación o te ya xkoltaywanon ta construcción ta Ramapo. Pero jelon te jkuxlejal sok la yakʼbon bayal mel-oʼtan te ma juʼix kuʼun spasel te metaetik-abi. Ma lek ya kaʼiy jbatik yuʼun te bayal bintik ya jkʼan ya jpastik, pero te ma xjuʼ kuʼuntik skʼotesel ta pasel». Bayal hermanoetik jich ya yaʼiy sbaik-euk.

13. Teme ma xjuʼ ya jpastik te bin ya jkʼantik ta skaj te bin ya xkʼax ta jkuxlejaltik, ¿bintik-a te ya xjuʼ ya jpastike?

¹³ ¿Bin ya xjuʼ ya jpastik yuʼun ya jtatik yan buelta te stseʼelil koʼtantik? Juluk ta koʼtantik te maba ya skʼanbotik Jehová te ya jpastik te bintik ma xjuʼ kuʼuntik spasel. Mukʼ skʼoplal ta yoʼtan te j-abatetik yuʼun ta swenta te tʼujbil taleliletik ay yuʼunik, ma jaʼuk ta swenta te aʼteliletik ya spasike. Jaʼ lekxan te bintik ay ta koʼtantik, ma jaʼuk te bitʼil ya x-abatinotik ta stojol. Jaʼ ya skʼan te jaʼuk ya jpastik te bintik ya xjuʼ kuʼuntik sok te junuk koʼtantik (Miq. 6:8; 1 Cor. 4:2). Jaʼ yuʼun, ¿snujpʼbal te ya jpastik te bin ma skʼanbotik te Jehová?c Maʼuk. Teme ma xjuʼ awuʼun spasel te bin ya skʼan awoʼtan ta swenta te bintik ya xkʼax ta akuxlejal, jaʼuk ya xbajt ta awoʼtan te bintik ya xjuʼ awuʼun spasel. Jun ejemplo, ¿yabal xjuʼ ya awamigoin jtul jchʼiel ta congregación yuʼun ya akoltay swenta ya xchʼi te schʼuunel yoʼtan? ¿Yabal xjuʼ ya akoltay te hermanoetik te ayix yaʼbilale? ¿Yabal xjuʼ ya awakʼ ta awoʼtan te ay machʼa ya awakʼbey smukʼul kʼinal yaʼiy chikan teme ta teléfono o ta mensaje? Teme ya ale bintik-utʼil ya akoltay te yantik, te Jehová ya yakʼbat bendición te bitʼil ya apas tulan. Nopa te bayal bintik ya xjuʼ ya apas ta stojol te Jehová ta achʼ balumilal, te maʼyuk jich anopoj-a. Te Holly, te la kalbeytik skʼoplal ta yan párrafo, jich ya yal: «Kʼalal chebajem koʼtan ya jultes ta koʼtan te ya xkʼot yorail te ya xkuxinon ta sbajtelkʼinal. Ay cheʼoxeb metaetik jnopoj te ya xbajt jpas ta achʼ balumilal, sok jaʼ ya skoltayon te Jehová yuʼun ya jkʼotes ta pasel».

14. ¿Binxan-a te ya yakʼ xchʼay te stseʼelil koʼtantik?

¹⁴ Yoxebal te bin ya yakʼ xchʼay te stseʼelil koʼtantik: te bin ya skʼan te koʼtantik. Ay machʼatik ya yakʼik ta ilel ta redes sociales te yalaj skʼan ya xbootik ta viaje, te ya xmanbajotik sok te ya jpastik spisil te bin ya skʼan te koʼtantik yuʼun jich tseʼel koʼtantik. Ma chopoluk te ya jmulantik te bin ya jkʼantike, melel jich spasojotik te Jehová. Manchukme jich-abi, bayal ants winiketik staojik ta ilel te bin snopojik-a te ya x-akʼbot stseʼelil yoʼtanik ma jichuk ya xkʼot ta pasel. Jtul precursora te Eva sbiil, jich ya yal: «Kʼalal jaʼnax ya apas te bin ya skʼan awoʼtan, maʼyuk bin-ora tikʼat-a, spisil-ora ay bin ya akʼanxan». Te talelil-abi ya yakʼ mel-oʼtan sok ma lek ya kaʼiy jbatik yuʼun.

15. ¿Bin ya yakʼ jnoptik te bin kʼax ta stojol te ajwalil Salomón?

¹⁵ Jnoptik te bin kʼax ta stojol te ajwalil Salomón. La skʼan snaʼ teme yuʼun-nix ya sta-a te tseʼel oʼtanil teme ya spas te bin ya skʼan yoʼtane. Jaʼ yuʼun bajt yoʼtan ta smulanel te bujtsʼan weʼelil, yaʼiyel música sok sleel te bintik tʼujbil ta stiempo. ¿Bin lokʼ yuʼun-a? Ma lek la yaʼiy sba sok jich la stsʼibay: «Ma tikʼuk ya yaʼiy te sitil te bin ya yile sok ma tikʼuk ya yaʼiy te chikinil te bin ya yaʼiy stojole» (Ecl. 1:8; 2:1-11). Te snopojibal yuʼun te ants winiketik ta swenta stael te smelelil tseʼel oʼtanil, jich kʼoem te bin-utʼil lotil takʼin: ya xtuun yilel, pero manix ya xtuun-a.

16. ¿Bin yuʼun ya yakʼ stseʼelil koʼtantik kʼalal ay bin ya jpastik ta stojol te yantik? (Jaʼnix jich ilawil te fotoetik).

¹⁶ ¿Bin ya xjuʼ ya jpastik yuʼun ya jtatik yan buelta te stseʼelil koʼtantik? Te Jesús la yal «te machʼa ay bin ya yakʼ jaʼ bayalxan stseʼelil yoʼtan te bin-utʼil machʼa ay bin ya yichʼe» (Hech. 20:35). Jtul anciano te Alekos sbiil, jich ya yal: «Jaʼ bajt ta koʼtan spasel te bintik ya xjuʼ kuʼun ta stojol te yantike. Kʼalal jich ya jpas, jaʼ ya yakʼbonxan stseʼelil koʼtan». ¿Bintik ya xjuʼ ya apas ta stojol te yantike? Teme ya awaʼiy te ay machʼa yak ta kʼaxel swokol, pasa tulan yuʼun ya awakʼbey smukʼul yoʼtan. Maniwan ya alajinbey te swokole, pero ya xjuʼ te lek ya yaʼiy sba te kʼalal ya awaʼiy te skʼop sok slekil awoʼtan, te ya anaʼbey yoʼbolil sba sok te ya ajultesbey ta yoʼtan te ya xjuʼ ya yalbey Jehová te bin yak ta kʼaxel ta stojole (Sal. 55:22; 68:19). Akʼbeya snaʼ te maba ijkitaybil yuʼun te Jehová (Sal. 37:28; Is. 59:1). Jaʼnix jich ya xjuʼ ya ajap aba ta spasbeyel sweʼel o te ya awikʼ ta paxial. Ikʼa ta scholel skʼop Dios jichme ya awakʼbey smukʼul yoʼtan. Kʼalal jaʼ ya akoltay te yantik, jich ya xkʼoat bin-utʼil aʼtejibal ta skʼab te Jehová sok jich ya ata te smelelil tseʼel oʼtanil (Prov. 11:25).

17. Teme ya jkʼan ya jtatik te smelelil tseʼel oʼtanil, ¿bin ya skʼan ya jpastik? (Salmo 43:4).

¹⁷ Teme ya xnoptsajotikxan ta stojol te jTatik te ay ta chʼulchan, jaʼme ya yakʼxan stseʼelil koʼtantik. Te Biblia ya yal te Jehová jaʼ te machʼa ya yakʼbotik bayal stseʼelil koʼtantik (kʼopona Salmo 43:4). Jaʼ yuʼun, chikan bin ya xkʼax ta jtojoltik ya xjuʼ te ay slamalil koʼtantik. Mame ayuk bin-ora ya jpit jbatik ta stojol te Jehová, jaʼme ya skoltayotik yuʼun tseʼel koʼtantik ta sbajtelkʼinal (Sal. 144:15).