ARTÍCULO YUʼUN ESTUDIO 40
Jkʼayinbeytik stalel te Pedro
«Kajwal, kʼeja aba ta jtojol, melel jmulawilon» (LUC. 5:8).
KʼAYOJIL 38 Jehová ya skanantayat
¿BIN YA KILBEYTIK SKʼOPLAL?a
1. ¿Bin la yal te Pedro kʼalal la yil te milagro te la spas te Jesús?
TE Pedro sjunal ajkʼabal ay ta stsakel chay pero maʼyuk stsakoj. Chamnax yoʼtan yuʼun te jich albot yuʼun te Jesús: «Tija bael te barco te banti kʼubulxan te jaʼe, chʼojaik ochel tey-a te stsakojibal achayike» (Luc. 5:4). Manchukme te Pedro ma la schʼuun te ya stsakik chay, la spas te bin albote. La stsakik bayal chayetik te jajch ta tuchʼel te stsakojibal schayike. Tey la snaʼik-a te jaʼ jun milagro, te Pedro sok te sjoʼtak «chamnax yoʼtanik yuʼun». Jich la yal: «Kajwal, kʼeja aba ta jtojol, melel jmulawilon» (Luc. 5:6-9). Jich la yaʼiy te ma snujpʼuk te ay ta stsʼeel te Jesuse.
2. ¿Bin-utʼil ya skoltayotik te bin kʼax ta skuxlejal te Pedro?
2 Melelnix-a te kʼalal la yal te Pedro te jaʼ jmulawil. Te Biblia ya yal te aynix-a te bin ma lek la yal o la spas te la sujtes yoʼtan yuʼun. ¿Jichbal ya awaʼiy aba bitʼil te Pedro? ¿Wokolbal ya awaʼiy slekubtesel atalel o yijkitayel te bin ma lek? Teme jiche, mame xchebaj awoʼtan. Te ejemplo yuʼun te Pedro ya xjuʼ ya skoltayat. Juluk ta awoʼtan te bintik ma lek la spase, juʼniwan te maba la yichʼ stsʼibayel ta Biblia. Pero te Dios la yakʼ ta tsʼibayel yuʼun ay bin ya yakʼ jnoptik (2 Tim. 3:16, 17). Kʼalal ya jnoptik te bin kʼax ta skuxlejal te Pedro, te jaʼ jtul winik te ay bintik wokol la yaʼiy spasel sok te jaʼnix jich la yaʼiy sba te bitʼil ya kaʼiy jbatik, ya xkʼot ta koʼtantik te Jehová maba ya smaliy te kʼax tojotike. Te bin ya skʼane, jaʼ te manchuk ya xchebaj koʼtantik manchukme ay bin wokol ya kaʼiytik spasel.
3. ¿Bin yuʼun ma skʼan ya xchebaj koʼtantik?
3 ¿Bin yuʼun ma skʼan ya xchebaj koʼtantik? Melel, teme ay bin ya jpasulantik ya xpʼijubotikxan ta spasel. Kaltik jun ejemplo. Jich bitʼil te machʼa ya xjajch ta snopel stijel guitarra. Ta sjajchibal maniwan lek te bitʼil ya stije, pero ta patil bael ya xpʼijub ta stijel. Manchukme ya snaʼix stijel ta lek, aynanix banti ya xbajt chʼayuk ta stijel-a. Pero maba ya xchebaj yoʼtan yuʼun. Jaʼnix jich ya xkʼot ta jtojoltik. Ayniwan bin juʼemix kuʼuntik yijkitayel spasel, pero ayniwan ya xjuʼ ya xchaʼyalotik ta spasel, pero ya jpastik tulan ta yijkitayel. Jpisiltik ay bin ya kaltik o ya jpastik te patil ya jmel koʼtantik yuʼun. Manchukme jich, teme maba ya xchebaj koʼtantik te Jehová ya skoltayotik ta slekubteselxan te jtaleltik (1 Ped. 5:10). Kiltik te ejemplo yuʼun Pedro te ma chebaj yoʼtan. Te bitʼil naʼbot yoʼbolil sba yuʼun te Jesús ya stij koʼtantik yuʼun maba ya jkom jbatik ta abatinel ta stojol te Jehová.
TE SWOKOL SOK TE BIN LEK LA STA TE PEDRO
¿Binwan ya apas te jichuk ya xkʼax ta akuxlejal te bin kʼax ta stojol te Pedro? (Ilawil te párrafo 4).
4. ¿Bin-utʼil la yaʼiy sba te Pedro sok bin-utʼil akʼbot smukʼul yoʼtan yuʼun te Jesús? (Lucas 5:5-10).
4 Te Biblia maba ya yal bin yuʼun te Pedro la yal «jmulawilon» sok ma jnaʼtik bin yuʼun te jich la yale (kʼopona Lucas 5:5-10). Pero ayniwan te bintik kʼax ma lek la spase. Te Jesús la yil te ay xiwel ta yoʼtan te Pedro, melel ya skuy te ma xjuʼ yuʼun spasel te bintik leke. Pero te Jesús jaʼnix jich snaʼoj te ya xjuʼ te jun yoʼtan ya yakʼ sba te Pedro. Jaʼ yuʼun jich la yalbey sok yutsil yoʼtan: «Mame xiwat». Kʼalal la yil te Pedro te ay smukʼul yoʼtan te Jesús ta stojole, ay bin akʼbot snop yuʼun. Ta patil, te Pedro sok te Andrés la yijkitayik te yaʼtelik ta stsakel chay yuʼun ya sjokinik te Mesías. Ta swenta-abi, la staik bayal bendicionetik (Mar. 1:16-18).
5. ¿Bintik bendicionetik la sta te Pedro te bitʼil maba chebaj yoʼtan sok te la schʼuun ikʼel yuʼun te Jesús?
5 Te bitʼil och ta jnopojel yuʼun Cristo, te Pedro bayal bintik mukʼ skʼoplal la yil. Jich bitʼil te kʼalal te Jesús la slekubtes te machʼatik ayik ta chamel, te la slokʼes pukujetik sok te la schaʼkuxajtes te machʼatik lajemik (Mat. 8:14-17; Mar. 5:37, 41, 42).b Jaʼnix jich la yil ta najalsitil te yutsilal te Jesús ta Wentainel. Te bin la yile, jeltaybot skuxlejal yuʼun (Mar. 9:1-8; 2 Ped. 1:16-18). Te Pedro bayal bintik la yil te maʼyuk jich snopoj-a. ¡Bayalniwan akʼbot stseʼelil yoʼtan yuʼun te maba chebaj yoʼtane! Jich la sta bayal bendicionetik.
6. ¿Juʼbal yijkitayel ta oranax te bin wokol ya yaʼiy spasel te Pedro?
6 Manchukme bayal bintik la yil o la yaʼiy, te Pedro la spas tulan ta swenta te bintik wokol ya yaʼiy yijkitayel spasel. Kiltik cheʼoxebuk ejemplo. Kʼalal te Jesús la yal te ya xkʼax swokol sok te ya xlaj yuʼun ya skʼotes ta pasel te albilkʼopetik yuʼun te Biblia, te Pedro jajch skom (Mar. 8:31-33). Cheʼoxeb buelta, te Pedro sok te yantik jnopojeletik jajch kʼop yuʼunik ta swenta te machʼa mukʼ skʼoplal ta yolilike (Mar. 9:33, 34). Junxan ajkʼabal ma xlaj-a te Jesús, te Pedro la sbojbey lokʼel schikin jtul winik (Juan 18:10). Ta ajkʼabalnix-abi, bayal xiw te Pedro sok oxeb buelta la smuk ta yoʼtan te Jesús (Mar. 14:66-72). Jich yuʼun te Pedro bayal la yokʼetay sba (Mat. 26:75).
7. Kʼalal chaʼkuxajemix-a te Jesús, ¿bin aʼtelil akʼbot spas te Pedro?
7 Te Jesús ma la yal te ma xtuunix te Pedro, te kʼax chebajem yoʼtan. Te kʼalal chaʼkuxajemix-a te Jesús, la yakʼbey yil te skʼuxul yoʼtan, la yakʼbey skanantay te tuminchijetik yuʼune (Juan 21:15-17). Sok spisil yoʼtan la schʼuun te Pedro, jaʼ yuʼun ay ta Jerusalén ta skʼajkʼalel Pentecostés sok jaʼ nail te la yichʼ tsael yuʼun te chʼul espíritu.
8. ¿Bin-a te kʼax maba lek la spas te Pedro ta Antioquía?
8 Manchukme tsabilix yuʼun-a te chʼul espíritu, te Pedro la spasxan tulan ta yijkitayel te bintik wokol ya yaʼiy spasel. Ta jaʼbil 36, te Pedro la yil te la yichʼ te chʼul espíritu jtul jyanlum te Cornelio sbiil. Tey chiknaj ta ilel te «maʼyuk machʼa tsabilnax yuʼun te Diose» sok te ya xjuʼ ya x-och ta congregación te jyanlumetik (Hech. 10:34, 44, 45). Jaʼto tal ta yorail-abi, te Pedro la sjokin ta weʼel te jyanlumetik (Gál. 2:12). Pero ay judioetik te ya snopik te ma lek te ya sjokin sbaik ta weʼel te judioetik sok te jyanlumetik. Kʼalal kʼotik ta Antioquía te judioetik te jich ya snopik, te Pedro maba la sjokinix ta weʼel te jyanlumetik, jaʼniwan yuʼun te ma skʼan te yakuk x-ilinik te jchʼuunjeletik te jaʼik judioetik. Kʼalal te Pablo la yil te kʼax ma lek te bin yak ta spasel te Pedro, la stojobtes ta komonsitil (Gál. 2:13, 14). Manchukme jich la spas, te Pedro maba chebaj yoʼtan, la spasxan tulan. ¿Bin koltayot yuʼun?
¿BIN KOLTAYOT TE PEDRO YUʼUN MABA YA XCHEBAJ YOʼTAN?
9. Jich bitʼil ya yal Juan 6:68, 69, ¿bin-utʼil la yakʼ ta ilel te jun yoʼtan te Pedro?
9 Te Pedro jun yoʼtan. Maʼyuk bin la yakʼ te ya xchebajtesbot yoʼtan yuʼune. Jich la yakʼ ta ilel kʼalal te Jesús ay bin la yal te ma kʼot ta yoʼtan te jnopojeletik yuʼune (kʼopona Juan 6:68, 69). Bayal machʼatik te maba kʼot ta yoʼtanik, la yijkitayik te Jesús. Pero te Pedro ma jichuk la spas. Jich la yalbey ta komonsitil te Jesús: «Te bintik ya awale ya yakʼ kuxlejalil sbajtelkʼinal».
¿Bin yuʼun ya yakʼ smukʼul koʼtantik te la yakʼ smukʼul yoʼtan te Jesús ta stojol te Pedro? (Ilawil te párrafo 10).
10. ¿Bin-utʼil la yakʼ ta ilel te Jesús te ay smukʼul yoʼtan ta stojol te Pedro? (Jaʼnix jich ilawil te dibujo).
10 Te Jesús maʼyuk bin-ora la yijkitay te Pedro. Junxanix ajkʼabal ma skʼan xlaj-a te Jesús, snaʼojix-a te ya x-ijkitayot yuʼun te Pedro sok te yantik jnopojeletik yuʼune. Manchukme jich, te Jesús la yal te maba ya xchebaj yoʼtan te Pedro sok te jun yoʼtan ya yakʼ sba (Luc. 22:31, 32). Te Jesús snaʼoj stojol te «ay ta yoʼtan te ants winik spasel te bin leke, pero ma xjuʼ yuʼun te bakʼete» (Mar. 14:38). Manchukme te Pedro la smuk ta yoʼtan, te Jesús maba la snop te maʼyukix bin ya xjuʼ ya spase. Melel te kʼalal chaʼkuxajemix-a, la yakʼ sba ta ilel ta stojol te Pedro (Mar. 16:7; Luc. 24:34; 1 Cor. 15:5). Jaʼ te bin koltayot yuʼun maba ya xchebaj yoʼtan te Pedro.
11. ¿Bin-utʼil la yakʼbey yil Jesús te Pedro te ya xkanantayot yuʼun te Jehová?
11 Te Jesús la yalbey te Pedro te ya xkanantayot yuʼun te Jehová. Kʼalal chaʼkuxajemix-a te Jesús, la spas yan milagro te la yil te Pedro sok te yantik jnopojeletik kʼalal la stsakik bayal chayetik (Juan 21:4-6). Ta swenta te milagro ini, te Pedro la snaʼ te ya x-akʼbot yuʼun Jehová spisil te bintik ya xtuun yuʼune. Ta yorail-abi, te Pedro julniwan ta yoʼtan te bin jamal la yal te Jesús te ya xkanantayot yuʼun Jehová te machʼa jaʼ nail ya sle te Wentainel yuʼun Dios (Mat. 6:33). Jaʼ yuʼun te Pedro, jaʼ bajt ta yoʼtan spasbeyel yaʼtel te Dios ma jaʼuk te yaʼtel ta stsakel chay. Ta Pentecostés ta jaʼbil 33 la schol skʼop Dios sok yip yoʼtan sok la skoltay bayal ta tul ants winiketik yuʼun ya schʼuunik te lek yachʼil kʼop (Hech. 2:14, 37-41). Ta patil bael la skoltay bayal samaritanoetik sok jyanlumetik yuʼun ya x-ochik ta jnopojel yuʼun Cristo (Hech. 8:14-17; 10:44-48). Chikan ta ilel te Jehová la stuuntes te Pedro yuʼun bayal ants winiketik ya x-ochik ta jnopojel.
TE BINTIK YA YAKʼ JNOPTIK
12. ¿Bin-utʼil ya skoltayotik te bin kʼax ta skuxlejal te Pedro teme ay bin wokol ya kaʼiytik yijkitayel spasel?
12 Jaʼnix jich te Jehová ya xjuʼ ya skoltayotik, kʼaxtoxan-a teme ay bin wokol ya kaʼiytik yijkitayel spasel. Yaniwan kaʼiytik te kʼaxtoxan ya xchʼayotik te joʼotik ma jichuk bitʼil te Pedro. Pero te Jehová ya xjuʼ ya skoltayotik (Sal. 94:17-19). Jnop kaʼiytik ta swenta jtul hermano, te kʼalal mato snopoj-a te Biblia, antsil winik-a. Manchukme la yijkitayix spasel, ay baeltik te yato xtal ta yoʼtan spasel te bin ma lek. ¿Bin koltayot yuʼun maba ya xchebaj yoʼtan? Jich ya yal: «Te Jehová ya yakʼ yip koʼtantik». Jich ya yalxan: «Ta swenta te koltayel yuʼun te schʼul espíritu te Jehová […], kiloj te ya xjuʼ ya xbeenonxan […] ta be yuʼun te smelelil kʼop». Jich la yal ta slajibal: «Te Jehová skoltayojon yuʼun ya x-abatinon ta stojol […], sok manchukme ay bin wokol ya kaʼiy yijkitayel spasel yakʼojbon yip koʼtan».
Te Horst Henschel jajch ta abatinel ta tiempo completo ta 1 yuʼun enero 1950. ¿Labal snop te maʼyuk skʼoplal te spisil-ora abatin ta stojol te Jehová? (Ilawil te párrafo 13 sok 15).d
13. ¿Bin-utʼil ya xjuʼ ya jkʼayinbeytik stalel te Pedro? (Hechos 4:13, 29, 31; jaʼnix jich ilawil te fotoetik).
13 Jich bitʼil te la kiltikixe, te Pedro bayal buelta xiw ta stojol te ants winiketik. Pero la skʼanbey koltayel te Jehová yuʼun maba ya xiw (kʼopona Hechos 4:13, 29, 31). Jaʼnix jich te joʼotik ya xjuʼ ya kakʼtik ta ilel te maba ya xiwotik. Kiltik te bin kʼax ta skuxlejal te Horst, jtul chʼiel Testigo te kuxin ta Alemania ta yorail te Segunda Guerra Mundial. Bayal buelta xiw ta stojol te smaestro sok te sjoʼtak ta escuela sok jich la yal: Heil, Hitler. Maba la yichʼ utel yuʼun te smeʼ stat, te bin la spasike, jaʼ te la skʼanbeyik koltayel te Jehová yuʼun maba ya xiw yoʼtan te Horst. Ta swenta te koltayel yuʼun te smeʼ stat sok te la smukʼulin yoʼtan te Jehová, te Horst maba xiw sok jun yoʼtan la yakʼ sba ta stojol te Jehová. Ta patil jich la yal: «Te Jehová maʼyuk bin-ora la yijkitayon».c
14. ¿Bin-utʼil ya xjuʼ ya yakʼik smukʼul oʼtanil te jkanantuminchijetik?
14 Te Jehová sok te Jesús maʼyuk bin-ora ya snopik te maʼyukix bin ya xjuʼ kuʼuntik spasel. Kʼalal te Pedro la smuk ta yoʼtan te Jesús, ay bin mukʼ skʼoplal la sta ta nopel, jaʼ teme ya yijkitay te Jesús o maʼuk. Te Jesús la yalbey wokol te Jehová te manchuk ya xpejkʼaj schʼuunel yoʼtan te Pedro. Ta patil, te Jesús la yalbey te Pedro te skʼoponojix Dios ta stojol sok te snaʼoj te ya xjuʼ ya yakʼbey yip yoʼtan te yermanotak (Luc. 22:31, 32). ¡Bayal akʼbot smukʼul yoʼtan te Pedro kʼalal jul ta yoʼtan te bintik albot yuʼun te Jesuse! Jaʼnix jich te joʼotik ay bintik mukʼ skʼoplal ya jtatik ta nopel spasel ta jkuxlejaltik. Kʼalal jich ya xkʼax ta jkuxlejaltik, te Jehová ya stuuntes te jkanantuminchijetik yuʼun ya yakʼ yip koʼtantik, yuʼun jich jun koʼtantik ta stojol-a (Efes. 4:8, 11). Te Paul, te bayalix jaʼbil ay ta anciano ya spas tulan yuʼun ya yakʼ mukʼul oʼtanil. Kʼalal ya yil te ay jtul hermano te yak ta chebajel yoʼtan, ya sjultesbey ta yoʼtan bin-utʼil ikʼot tal yuʼun te Jehová. Jamal ya yalbey te maba ya snop te Jehová te maʼyukix bin ya xjuʼ ya spas, melel kʼux aʼiybil sok maʼyuk bin-ora ya x-ijkitayot yuʼun. Te hermano ini yiloj ta swenta te koltayel yuʼun te Jehová bayal hermanoetik spasojikxan tulan.
15. ¿Bin-utʼil la yakʼ ta ilel te bin kʼax ta stojol te Pedro sok te Horst te spisil-ora ya xkʼot ta pasel te bin ya yal Mateo 6:33?
15 Jich bitʼil la kiltikix, te Jehová la yakʼbey spisil te bin ya xtuun yuʼun te Pedro sok te yantik jpuk-kʼopetik. Jaʼnix jich ya spas ta jtojoltik teme jaʼ nail ya jpas ta jkuxlejaltik te yaʼtel te Diose (Mat. 6:33). Kʼalal kʼaxix-a te Segunda Guerra Mundial, te Horst, te la kalbeytikix skʼoplal la snop te ya x-och ta precursor. Pero te bitʼil maʼyuk stakʼin ma snaʼ teme ya xjuʼ ya sta te bin ya xtuun yuʼun swenta ya x-abatin ta stojol te Jehová ta tiempo completo. ¿Bin la spasix-a? La spas ta prueba te Jehová sok sjunal semana lokʼ ta scholel skʼop Dios ta semana yuʼun visita. Kʼalal laj te semana yuʼun visita, te superintendente yuʼun circuito la yakʼbey jun sobre te yichʼoj takʼin te ay machʼa la yakʼ, chamnax yoʼtan yuʼun te Horst. Sok te takʼin-abi, ya xjuʼ ya x-och ta precursor bayal u. Kʼalal la yichʼ te majtanil-abi, te Horst la yil te jaʼ ya xkanantayot yuʼun te Jehová. Teyto tal-abi, jaʼ nail la yakʼ ta skuxlejal te Wentainel yuʼun Dios (Mal. 3:10).
16. ¿Bin yuʼun mukʼ skʼoplal te ya kiltik te ejemplo yuʼun Pedro sok te cartaetik la stsʼibaye?
16 ¡Kʼax tseʼel yoʼtan la yaʼiy sba te Pedro te bitʼil maba ijkitayot yuʼun te Jesús te kʼalal jich la yalbey: «Kajwal, kʼeja aba ta jtojol»! Te Cristo la schajpanxan te Pedro yuʼun jun yoʼtan ya yakʼ sba sok te lekil ejemplo ya xkʼot ta stojol te yantik jchʼuunjeletik. Te pʼijubtesel la yichʼe, bayal bin ya yakʼ jnoptik. Te Pedro la yalbey cheʼoxeb skʼoplal te nojpteseletik sok yantikxan ta cheb carta te la stikun bael ta stojol te congregacionetik ta sbabial siglo. Ta yan artículo ya xbajt kiltik cheʼoxeb te bintik mukʼik skʼoplal ya yal te cartaetik ini sok te bin-utʼil ya xjuʼ ya jpas ta jkuxlejaltik.
KʼAYOJIL 126 Wikʼilukme jsitik
a Te artículo ini la yichʼ pasel yuʼun ya sta smukʼul yoʼtanik te machʼatik ay bin wokol ya yaʼiyik yijkitayel spasel sok ya yichʼ akʼbeyel snaʼik te ya xjuʼ ya yijkitayik sok te ya xjuʼ ya x-abatinikxan ta stojol te Jehová.
b Ta artículo ini yichʼoj bayal versiculoetik te ayik ta Evangelio yuʼun Marcos. Jich ilel te Marcos la stsʼibay spisil te bin albot yuʼun te Pedro, te jaʼ la yil spisil te bintik kʼot ta pasele.
c Te bin kʼax ta skuxlejal te Horst Henschel, te sbiil «Motivado por la lealtad de mi familia a Dios», te lokʼ ta revista ¡Despertad! 22 yuʼun febrero 1998.
d TE BIN YA XCHIKNAJ TA FOTOETIK: Ya xchiknaj ta ilel te smeʼ stat te Horst Henschel, la skʼoponik Dios sok la stijbeyik yoʼtan yuʼun jun yoʼtan ya yakʼ sba.