Jnopbeytik te snopojibal yuʼun te Jehová sok te Jesús

1, 2. 1) ¿Bin smakbeyoj skʼoplal te kʼux ta koʼtantik te Jehová? 2) ¿Bin-utʼil la yakʼ ta ilel te Jesús te kʼux ta yoʼtan te Jehová?

TE Jesús la yal jilel ta jamal te bin mantalil te kʼax mukʼ skʼoplal te ay ta ley yuʼun Moisés kʼalal jich la yal: «Kʼuxukme xa awaʼiy ta awoʼtan te Jehová te Dios awuʼun ta spisil awoʼtan, ta spisil akuxlejal, ta spisil apʼijil sok ta spisil awip» (Mar. 12:30). Jaʼ yuʼun ya skʼan te kʼuxuk ta koʼtantik te Jehová ta spisil te jkuxlejaltik sok ta spisil te bin ay kuʼuntik. Tey ochem skʼoplal-a te bintik ya skʼan koʼtantik, te bin yaʼiyel ya kaʼiy bajtik sok te kiptik. Jaʼnix jich tey ochem skʼoplal-a te bin-utʼil ya jtuuntestik te snopojibal kuʼuntik, jaʼ ya skʼan ya yal te bin ya jpastik pensar. Te skʼuxul koʼtantik ta stojol te Jehová jaʼ ya stij koʼtantik ta skʼayinbeyel te snopojibal yuʼune. Ta melel ma xjuʼ te ya xkʼot ta koʼtantik ta lek te snopojibal yuʼun te Jehová. Pero te bin ya skoltayotik ja te ya jnoptik «te snopojibal yuʼun te Cristoe», melel la skʼayinbey ta lek te bin-utʼil snopojibal yuʼun te state (1 Cor. 2:16).

² Te Jesús kʼux la yaʼiy sok spisil yoʼtan te Jehová. Snaʼoj-a te bin-a te skʼanojel yoʼtan Dios ta stojol sok yakʼoj ta yoʼtan te ya skʼotes ta pasel manchukme snaʼoj te ya sta swokol yuʼune. Te bitʼil jaʼ baem ta yoʼtan yakʼbeyel stseʼelil yoʼtan te sTat, maʼyuk bin la yakʼ te ay bin ya xchʼaybot yoʼtan yuʼune.

3. ¿Bin la snop te jpuk-kʼop Pedro ta stojol te Jesús sok bin la stijbey yoʼtan ta spasel te jchʼuunjeletik? (1 Pedro 4:1).

³ Te Pedro sok te yantikxan jnopojeletik juʼ la smulanik te ya skʼasesik tiempo sok te Jesús sok te la snopbeyik te snopojibal yuʼune. Kʼalal te Pedro la stsʼibay te sbabial carta la stijbey yoʼtan te jchʼuunjeletik te chapalukik ta skʼayinel te snopojibal yuʼun te Cristo (kʼopona 1 Pedro 4:1). Kʼalal te Pedro la stsʼibay ta kʼopil hebreo te chajpana abaik o «akʼa ta awoʼtanik», la stuuntes jun kʼopil te ya stuuntesik te soldadoetik yuʼun ya schajpan sbaik ta yakʼel guerra. Jich la yakʼ ta naʼel teme ya jkʼayinbeytik te snopojibal yuʼun te Jesús jaʼ jun aʼtejibal te ay kuʼuntik yuʼun ya xjuʼ ya jtsaltik te bintik ma lek ya skʼan te koʼtantik sok te bin ya sjap te balumilal yuʼun te Satanás (2 Cor. 10:3-5; Efes. 6:12).

4. ¿Bin ya kilbeytik skʼoplal ta artículo ini?

⁴ Ta artículo ini, ya kilbeytik skʼoplal te snopojibal yuʼun te Jesús sok bin-utʼil ya xjuʼ ya jkʼayinbeytik. Jaʼnix jich ya xbajt kiltik 1) te bin-utʼil ya xjuʼ ya jnopbeytik te snopojibal yuʼun te Jehová, 2) te pekʼeluk koʼtantik sok 3) te ayuk spʼijil koʼtantik.

JNOPBEYTIK TE SNOPOJIBAL YUʼUN TE JEHOVÁ

5. Ala junuk te bin-utʼil te Pedro la yakʼ ta ilel te ma jichuk la snop te bitʼil te snopojibal yuʼun te Jehová.

⁵ Kiltik junuk te bin-utʼil te Pedro la yakʼ ta ilel te maba pajaluk te snopojibal yuʼun sok te Jehová. Te Jesús la yalbey te jpuk-kʼopetik te ya skʼan ya xbajtik ta Jerusalén, te banti ay te jwolwanejetik yuʼun religión te ya stsakot ta chukel yuʼun, te ya xkʼax swokol ta majel sok te ya yichʼ milel (Mat. 16:21). Te Pedro snaʼoj-a te jaʼ te Mesías te albil skʼoplal te Jesús te ya yakʼ ta libre te lum yuʼun te Diose, jaʼ yuʼun wokolniwan la yaʼiy schʼuunel bitʼil te Jehová ya yakʼ te ya xkʼax swokol te Jesús (Mat. 16:16). Jaʼ yuʼun, te Pedro la yikʼ bael ta stukel sok jich la yalbey: «¡Kajwal, ma xa awal jich-abi! Maʼyuk bin-ora jich ya xkʼot ta atojol te bitʼil yakat ta yalele» (Mat. 16:22). Ta swenta te bin la yal te Pedro maba la yakʼ ta ilel te jich snopojibal yuʼun bitʼil te Jehová, jich la yakʼ ta ilel te maba pajal te snopojibal yuʼun sok te Jesús.

6. ¿Bin-utʼil la yakʼ ta ilel te Jesús te pajal snopojibal yuʼun sok te Jehová?

⁶ Te Jesús pajal snopojibal yuʼun sok te sTat te ay ta chʼulchan. Jich la yalbey te Pedro: «¡Kʼeja aba ta jtojol, Satanás! Ma xa amakbon te jbee, melel ma jichuk snopojibal awuʼun te bitʼil te Diose, jaʼ jich snopojibal awuʼun te bitʼil te winike» (Mat. 16:23). Te Jesús snaʼoj-a te yuʼun ya skʼotes ta pasel te skʼanojel yoʼtan te Jehová ya xkʼax swokol ta skuxlejal sok ya xlaj, jaʼ yuʼun la spʼaj te bin albot yuʼun te Pedro te lajniwan yal sok slekil yoʼtan. Jaʼ yuʼun, te jpuk-kʼop Pedro kʼot ta yoʼtan te ya skʼan te jichuk snopojibal yuʼun bitʼil te Jehová. ¡Jaʼnix jich ay bin ya yakʼ jnoptik-euk!

7. ¿Bin-utʼil la yakʼ ta ilel te Pedro te la spas tulan yuʼun pajaluk snopojibal yuʼun sok te Jehová? (Jaʼnix jich ilawil te dibujo ).

⁷ Ta patil bael, te Pedro la yakʼ ta ilel te jich snopojibal yuʼun bitʼil te Jehová. Te Dios yalojix-a te ya yikʼ ta lum yuʼun spisil te ants winiketik te yanyantik snacionik. Sok la yalbey te Pedro te yakuk xbajt scholbey skʼop Dios te Cornelio, te machʼa ya x-och ta sbabial jchʼuunjel te maba judiouke. Te judioetik maba ya sjokin sba sok te jyanlumetike, jaʼ yuʼun te Pedro wokolniwan la yaʼiy spasel te bin albot yuʼun te Jehová. Pero, te kʼalal kʼot ta yoʼtan bin-a te skʼanojel yoʼtan te Jehová, la sjeltay te snopojibal yuʼun. Kʼalal te Cornelio la yalbey te Pedro te yakuk xbajt ta ulaʼtayel yuʼun, maʼyuk bin la smak sba ta kʼop yuʼun (Hech. 10:28, 29). La scholbey skʼop Dios te Cornelio sok te machʼatik ay yuʼun ta sna sok la yichʼik jaʼ (Hech. 10:21-23, 34, 35, 44-48).

8. ¿Bin-utʼil ya kakʼtik ta ilel te jich snopojibal kuʼuntik bitʼil te Jehová? (1 Pedro 3:8).

⁸ Bayal jaʼbil ta patil, te Pedro jich la yalbey te jchʼuunjeletike: «Junuknaxme te bin ya snop awoʼtanike» (kʼopona 1 Pedro 3:8). Yuʼun junuknax te snopojibal kuʼuntik te bitʼil testigootik yuʼun Jehová, ya skʼan ya jkʼayinbeytik te snopojibal yuʼun te Jehová, te ya jtatik ta Biblia. Jich bitʼil, te Jesús la stijbey yoʼtan te jnopojeletik yuʼun te jaʼuk nail ya yakʼ ta skuxlejalik te wentainel yuʼun te Dios (Mat. 6:33). Te bitʼil jnaʼojtikix ta swenta-abi, jnop kaʼiytik te ay jtul hermano ta congregación te ya snop te ya x-abatin ta tiempo completo. ¿Jichbal ya kalbeytik te bin-utʼil la yal te Pedro ta stojol te Jesuse? Maʼuk. Ya kutsilkʼoptaytik te bin lek la sta ta nopel sok ya jap jbatik ta skoltayel.

AYUK SPEKʼELIL KOʼTANTIK

9, 10. ¿Bin ya yakʼ jnoptik te bitʼil la yakʼ ta ilel spekʼelil yoʼtan te Jesús?

⁹ Junxanix ajkʼabal ya skʼan yuʼun ya yichʼ milel-a te Jesús, ay bin mukʼ skʼoplal la yakʼbey snop te Pedro sok te yantikxan jpuk-kʼopetik ta swenta te pekʼel oʼtanil. Ta swenta te bitʼil junxanix buelta ya xweʼ sok te jnopojeletik yuʼun te Jesús, la yalbey te Pedro sok te Juan te yakuk schajpanik te banti ya xweʼik. Laniwan spasik tulan yuʼun ya yakʼik jun vasija sok toalla yuʼun jich te machʼatik ikʼbilik ya yichʼik pokbeyel yokik-a te kʼalal ya x-ochik ta weʼele. Pero, ¿machʼa ya spas te aʼtelil-abi?

¹⁰ Te aʼtelil ini jaʼ yaʼtel jtul j-abat. Pero ta yorail-abi, te Jesús la spoktiklanbey yok te jpuk-kʼopetik. ¡Chamniwan yoʼtanik yuʼun te jpuk-kʼopetik kʼalal la yilik te la slokʼes te snajtil kʼuʼ te Jesús, te la schuk te toalla ta schʼujt, te la yakʼ jaʼ ta vasija sok te jajch spoktiklanbey yok te jpuk-kʼopetik! (Juan 13:4, 5). ¿Yabal anaʼ jayeb tiempo jaʼlaj ta spasel te Jesús? La spoktiklanbey yok te 12 ta tul jpuk-kʼopetik, tey ay-euk-a te Judas te machʼa akʼawan ta kʼabal ta patil. ¡Kʼax pekʼel yoʼtan te Jesús! Ta patil sok slamalil yoʼtan jich la scholtiklanbey yaʼiyik: «¿Yabal xkʼot ta awoʼtanik te bin la jpas ta atojolike? Te jaʼexe Maestro sok Kajwal ya awalbonik, snujpʼ te jich ya awalbonik, melel joʼon-nix-a. Teme joʼon la jpokbeyex awokik te bitʼil Awajwalonik sok te Maestroon awuʼunike, jaʼnixme jich ya skʼan ya apokbey aba awokik-euk» (Juan 13:12-14).

11. ¿Bin-utʼil la yakʼ ta ilel te ay spekʼelil yoʼtan te Pedro? (1 Pedro 5:5; jaʼnix jich ilawil te dibujo).

¹¹ Te Pedro la snopbey te spekʼelil yoʼtan te Jesús. Te kʼalal moemix bael ta chʼulchan-a te Jesús, te Pedro la slekubtes jtul winik te koxo ta yayinelto (Hech. 1:8, 9; 3:2, 6-8). Chamnax yoʼtanik yuʼun te ants winiketike (Hech. 3:11). ¿Binwan la spas te Pedro? Juluk ta koʼtantik te stsʼumbal mukʼ skʼoplal ya yilik te machʼatik mukʼ skʼoplalik. ¿Labal skʼan te ya yichʼ albeyel yutsil skʼoplal? Maʼuk, la yakʼ ta ilel spekʼelil yoʼtan sok jaʼ la yalbey yutsil skʼoplal te Jehová sok te Jesús. Jich la yal ta swenta te Jesús: «Ta swenta sbiil sok ta swenta schʼuunel koʼtantik ta sbiil la yichʼ yip te winik ini te yakex ta yilel te ya anaʼbeyik sbae» (Hech. 3:12-16). Ta patil, te Pedro la stsʼibaybey te jchʼuunjeletik te mukʼ skʼoplal te pekʼeluk yoʼtanik. Te bintik la yal ya sjultes ta koʼtantik kʼalal te Jesús la schuk toalla ta schʼujt sok te la spoktiklanbey yok te jpuk-kʼopetik (kʼopona 1 Pedro 5:5).

12. Jich bitʼil te Pedro, ¿bin-utʼil ya kakʼtik ta ilel te ay spekʼelil koʼtantik?

¹² Jich bitʼil te Pedro, jaʼnix jich te joʼotik ya xjuʼ ya kakʼtik ta ilel te ay spekʼelil koʼtantik. Te bin ya skoltayotik ta spasel jaʼ te ayuk ta koʼtantik te smelelil pekʼel oʼtanil, jaʼ te ya xlokʼ tal ta koʼtantik spasel ma jaʼuknax te ya kaltike. Jaʼ te bin kʼax mukʼ skʼoplal la yal te Pedro kʼalal la yalbey skʼoplal te «pekʼel oʼtanil» te ay ta 1 Pedro 5:5. Ay bin ya jpastik ta stojol te yantik, melel kʼux ta koʼtantik te Jehová sok te jpatxujktik, maba ya jpastik yuʼun-nax ya jkʼantik te ya kichʼtik albeyel yutsil jkʼoplaltik. Teme sok stseʼelil koʼtantik ya x-abatinotik ta stojol te Jehová sok ta stojol te kermanotaktike, jichme ya kakʼtik ta ilel te pekʼel koʼtantik, ma jaʼuk ya xbajt ta koʼtantik teme ya kichʼtik ilel yuʼun te yantike (Mat. 6:1-4).

AYUKME SPʼIJIL KOʼTANTIK

13. ¿Bin smakbeyoj skʼoplal te ayuk spʼijil koʼtantik?

¹³ ¿Bin smakbeyoj skʼoplal te ayuk spʼijil koʼtantik? (1 Ped. 4:7). Jaʼ skʼoplal te ya kichʼtik ta wenta te snopojibal yuʼun te Jehová kʼalal ay bin ya jtatik ta nopel spasel. Jaʼnix jich tey ochem skʼoplal-a te ya jnaʼtik te jaʼ mukʼ skʼoplal te bitʼil lek kiloj jbatik sok te Jehová. Teme ay spʼijil koʼtantik maba mukʼuk jkʼoplal ya jkuy jbatik sok maba ya jnoptik te spisil ya jnaʼtikixe. Jaʼnix jich ya jkʼanbeytik koltayel te Jehová kʼalal ya jkʼopontik sok spekʼelil koʼtantik yuʼun yakuk stojobtesotik.a

14. Ala junuk te bin-utʼil te Pedro maba la yakʼ ta ilel te ya smukʼulin yoʼtan te Jehová.

¹⁴ Kʼalal junxanix ajkʼabal ya skʼan yuʼun ya xlaj-a te Jesús jich la yalbey te jnopojeletik yuʼune: «Ta ajkʼabal ini yame awijkitayonik jilel ta apisilik». Te Pedro jich la yal sok spisil yoʼtan: «Manchukme ya yijkitayat te yantike, ¡te joʼone maʼyuk bin-ora ya kijkitayat!». Ta ajkʼabalnix-abi, te Jesús jich la yaltiklanbey chaʼoxtul jnopojeletik yuʼun: «Wikʼilukme asitik sok kʼoponaik Dios ta spisil-ora» (Mat. 26:31, 33, 41). Te lajuk yichʼ ta wenta te consejo-abi, te Pedro laniwan sta yip yoʼtan ta yalel te jaʼ jnopojel yuʼun te Jesús. Pero te bitʼil ma la yichʼ ta wenta la yal te maba ya snaʼbey sba te Yajwale. ¡Bayal la smel yoʼtan yuʼun! (Mat. 26:69-75).

15. ¿Bin koltayot te Jesús yuʼun ayuk spʼijil yoʼtan te kʼalal nopol ya xlajix-a?

¹⁵ Te Jesús la smukʼulin yoʼtan ta jkʼaxel te Jehová. Manchukme jaʼ tojil winik-a spisil-ora la skʼopon te Dios te kʼalal junxanix ajkʼabal ya skʼan yuʼun ya xlaj-a. Jich la sta yip yoʼtan yuʼun ya spasbey te skʼanojel yoʼtan te sTate (Mat. 26:39, 42, 44; Juan 18:4, 5). Te Pedro la yil bin-utʼil te Jesús maba la skom sba ta skʼoponel te Diose, jaʼ te bin maʼyuk bin-ora chʼay ta yoʼtan te Pedro.

16. ¿Bin-utʼil la yakʼ ta ilel te Pedro te la sta spʼijil yoʼtan? (1 Pedro 4:7).

¹⁶ Ta patil bael te Pedro la snop yakʼel smukʼul yoʼtan ta stojol te Jehová ta swenta te oración. Te kʼalal chaʼkuxajemix-a te Jesús la yalbey te Pedro sok te yantik jpuk-kʼopetik te ya yichʼik te chʼul espíritu yuʼun ya xjuʼ ya scholik skʼop Dios. Pero, jaʼnix jich la yaltiklanbey te manchuk ya xlokʼik bael ta Jerusalén (Luc. 24:49; Hech. 1:4, 5). ¿Bin la spas te Pedro te bitʼil ay ta malab? Te Biblia jich ya yal ta stojol sok ta stojol te yantik jchʼuunjeletik: «Jun-nax la stsob sbaik ta skʼoponel Dios» (Hech. 1:13, 14). Ta patil, ta sbabial carta te la stsʼibay te jpuk-kʼop Pedro, la stijbey yoʼtan te jchʼuunjeletik te ayuk spʼijil yoʼtanik sok te yakuk yakʼ smukʼul yoʼtanik ta stojol te Jehová ta swenta te oración (kʼopona 1 Pedro 4:7). Te Pedro la yakʼ smukʼul yoʼtan ta stojol te Jehová sok jaʼ yoyal kʼot ta stojol te congregación (Gál. 2:9).

17. ¿Bin ya skʼan ya jpastik manchukme ay bin ya jnaʼtik spasel ta lek? (Jaʼnix jich ilawil te foto).

¹⁷ Yuʼun ayuk spʼijil koʼtantik ya skʼan te spisil-ora ya jkʼopontik te Jehová. Melel jnaʼojtik te ya skʼan te spisil-ora ya jkʼanbeytik te yakuk stojobtesotik manchukme jich yilel te ma wokoluk te bintik ya jtatik ta nopel spasel. Jaʼ kʼaxtoxan mukʼ skʼoplal-a te ya jkʼanbeytik te koltayel yuʼun te kʼalal ay bin mukʼ skʼoplal ya jtatik ta nopel spasel, melel seguro ayotik te jaʼ ya snaʼ te bin lek ta jtojoltik.

18. Jich bitʼil te Pedro, ¿bin-a te ya xjuʼ ya jpastike?

¹⁸ Ya kalbeytik bayal wokol te Jehová te jich spasojotik te ya xjuʼ ya jkʼayinbeytik te tʼujbil taleliletik yuʼune (Gén. 1:26). Jnaʼojtik te ma xjuʼ kuʼuntik te kʼax toj te bin-utʼil ya jkʼayintike (Is. 55:9). Pero, jich bitʼil te Pedro ya xjuʼ ya jnopbeytik te snopojibal yuʼun te Jehová, te ayuk spekʼelil koʼtantik sok te ayuk spʼijil koʼtantike.