Pasbilotik yuʼun ya xkuxinotik sbajtelkʼinal

¿Yuʼunbal ma snujpʼuk te ya smulan koʼtantik-abi? Maʼuk. Te Biblia ya yal te la yakʼbotik ta koʼtantik te Dios te ya xkuxinotik ta sbajtelkʼinale (Eclesiastés 3:11). Jaʼnix jich ya yal te «Jcʼuxul-oʼtanil stuquel te Diose» (1 Juan 4:8, XCD). ¿Snujpʼbal te la yakʼbotik ta koʼtantik te Dios te ya xkuxinotik ta sbajtelkʼinal, pero te maʼyuk bin-ora ya xkʼot ta pasele?

Maʼyuk machʼa ya skʼan ya xlaj. Jaʼ yuʼun te Biblia ya yal te jaʼ jun «jcontrahinwanej» te lajele (1 Corintios 15:26). Ay machʼatik jchʼielikto-a te ya xtaotik yuʼun te lajele sok ay yantik te patilto ya xtaotik yuʼune, pero ta jpisiltik yananix staotik-a. Bayal ants winiketik ma smulanik te ya spasik pensar ta swenta te lajel sok ay machʼatik ya sxiʼik. ¿Aybal bin-ora ya xjuʼ ya jtsaltik te jkontratike?

TE BINTIK YA YAKʼ JNAʼTIK TE AY BIN YA XJUʼ YA JMALIYTIKE

¿Anaʼojbal-a te ma jaʼuk skʼanojel yoʼtan Dios te ya xlajotike? Te libro yuʼun Génesis ya yakʼ kiltik te jaʼ la skʼan Dios te ya xkuxinotik ta sbajtelkʼinal liʼ ta Balumilal. Te Jehováa kʼax lek la schajpan te Balumilal yuʼun ayuk spisil te bin ya xtuun yuʼun te ants winiketike. Jich yuʼun te kʼalal la spas te sbabial winik te Adán sbiile, la yakʼ ta nichimal kʼinal Edén. Ta patil te «Dios la yil spisil te bintic la spas, mero lec cʼoht» (Génesis 1:26, 31).

Ta slokʼombail Dios la yichʼ pasel te Adane, jaʼ yuʼun tojil winik-a (Deuteronomio 32:4). Te yinam te Adán te Eva sbiile, toj-a te sbakʼetal sok te snopojibal yuʼune. Te Jehová jich la yaltiklanbey: «Sitinan soc pʼohla abahic, nojesahic ta swohlol te bahlumilal, soc tuhunahic te qʼuinale. Ajwalilat ya xcʼohat yuʼun te schayul haʼetic, te mutetic te ya xwihlic ta toyol soc spisil te chambahlametic te ya xbehenic ta lumqʼuinal» (Génesis 1:28).

Swenta ya snojesik ta ants winiketik te Balumilale, ya yichʼ bael tiempo, melel ya skʼan ya x-alaj te Eva sok ya skʼan ya x-alnichʼnajik te yalatak swenta ya xnoj ta ants winiketik swolol te Balumilale (Isaías 45:18). ¿Snujpʼbal te la yakʼ te mantalil-abi te Jehová teme jaʼnax ya yilbeyik sit te yal snichʼnabik sok te smamike?

Jaʼnix jich nopa awaʼiy ta swenta te aʼtelil akʼbot spas te Adán te ya skanantay te chambalametike. Albot yuʼun Dios te ya skʼan yakʼtiklanbey sbiil ta jujun kojt. Spasel te aʼtelil-abi, bayal tiempo ya x-ichʼbot yuʼun (Génesis 2:19). Jaʼnix jich ya skʼan ya snaʼtiklanbey sba ta lek ta jujun kojt swenta ya snaʼ te bin-utʼil ya skʼan ya skanantaye, spasel-abi ya x-ichʼbotxan bayal tiempo.

Te aʼtelil akʼbot spas te Adán sok te Eva ta skanantayel te chambalametik sok te ya snojesik te Balumilale, ya yakʼ jnaʼtik te la yichʼik pasel yuʼun ya xkuxinik bayal jaʼbil. Te Adán yuʼun-nix kuxin bayal jaʼbil-a.

KUXINIK BAYAL JAʼBIL

Te Biblia ya yal te kʼalal mato xtal-a te Pulemale, bayal jaʼbil kuxinik te ants winiketik, ma jichuk te bitʼil ta ora ini. Ta Génesis 5:5, XCD, ya yal te «lajuneb sjucwinic yoxbajcʼ (930) jaʼwil cuxin te Adán». Ta patil ya yichʼ albeyel skʼoplal waktul winiketik te kʼaxem ta 900 jaʼbil kuxinike, jaʼik te Set, Enós, Cainán, Jared, Matusalén sok Noé. Te Noé ayix 600 yaʼbilal-a te kʼalal tal te Pulemale (Génesis 5:6-20, 25-27; 7:6; 9:29). ¿Bin yuʼun te kuxinik bayal jaʼbile?

Jaʼniwan yuʼun te ayinik te kʼalal mato kʼaxem bayal tiempo-a te kuxin jich bitʼil tojil winik te Adán sok te Evae. Pero, ¿jaʼbal yuʼun ma xkuxinotikix bayal jaʼbil ta skaj te maba tojotikixe? Sok, ¿bin-utʼil ya yichʼ tsalel te lajele? Swenta ya kakʼbeytik sujtib te jojkʼoyeletik-abi, ta nail ya skʼan ya jnaʼtik te bin yuʼun ya xmeʼel mamalubotike.