Bin utʼil ya xjuʼ anaʼbey sba te Diose

Ta skʼoponel te Biblia ya xjuʼ anaʼbey sba te Jeobae. Ta nameykʼinal, te Dios la stsa chaʼoxtul winiketik yuʼun ya stsʼiʼbaybeyik te snopojiʼbal yuʼune. Te bina la stsʼiʼbayike jaʼ sbiil Biblia. Ta yoʼtik ini, ta skʼoponel te Biblia ya xjuʼ anaʼbey sba te Diose. Yuʼun jaʼ skʼop te Jeobae, jaʼnix jich euk jaʼ sbiilinej sKʼop Dios. Ya stakʼ achʼuun te bina ya yal te Bibliae, yuʼun kʼaxel ma spas lot te Jeobae. “Ma xjuʼ ya spas lot stukel te Diose.” (Hebreos 6:18.) Jaʼ yuʼun, te sKʼop Diose jaʼ yichʼoj te melele (Juan 17:17).

Te Biblia jaʼ jun majtʼanil te kʼax mukʼ skʼoplal yakʼojbotik te Diose. Jich kʼoyem te bitʼil karta te ya stsʼiʼbay jtul kʼux otʼan tatil ta stojol te yalxnichʼanaʼbe. Ya yal te bina yalojbey skʼoplal ta melel te Diose, te ya spas ta kʼax tʼujbil ya xkʼot te Balumilal yuʼun kuxinel: jun paraiso. Ya yal te bina la spas te Diose, te bina yak ta spasel sok te bina yame spas ta stojol te yalxnichʼanaʼb te ma x-ijkʼitaywanike. Jich euk, ya skoltayat ta xchapel te kʼopetik awuʼun sok ta stael te tseel otʼanile (2 Timoteo 3:16, 17).

Te stestikotak te Jeoba jaʼ yamikoinejik te Diose; yame skoltayatik te ya xkʼot ta awotʼan te pʼijuʼbtesel yuʼun te Bibliae. Jaʼnax albeya te ya akʼan anop te Bibliae. Ma skʼanik stojolik yuʼun te ya spʼijuʼbtesate (Mateo 10:8, Nuevo Testamento en Tzeltal de Chilón). Jaʼnix jich, ya stakʼ xbaat ta tsoʼblej yuʼun tsʼaklinwanejetik yuʼun Kristo. Jaʼ ini ya yichʼ pasel ta banti yawil te ya yichʼ nopbeyel skʼoplal te Diose, jaʼ sbiilinej Naetik yuʼun Reino. Teme ya xkʼoat tey-a, oranaxme ya xtoy te apʼijil ta stojol te Diose.

Ta swenta snopel awuʼun te bintik spastilayoje, ya xjuʼ anaʼbey sba te Diose. Jich bitʼil ya yal te Bibliae: “[Te] Dios la spas spisil te bintik aye, chʼulchan [sok] balumilal” (Génesis 1:1, Pen). Kʼalal la spas “chʼulchan” te Jeoba, la spas euk te Kʼajkʼal. Jaʼ ini ¿bina ya yalbotik ta swenta te Diose? Jaʼ ya yalbotik te bitʼil ay bayal yuʼel te Jeobae. Jaʼnax stukel juʼ yuʼun spasel te bina kʼax bayal yip jich bitʼil te Kʼajkʼale. Jaʼnix jich, ya yalbotik te ay bayal spʼijil te Jeobae, melel ya skʼan bayal pʼijilil kʼalal la yichʼ pasel te Kʼajkʼale, te ya yakʼbotik xkʼixinal, sakilal kʼinal sok kʼaxel maʼba ya xtupʼ.

Ta spisil te bina spastilayoj te Jeobae, ya yakʼ ta ilel te kʼuxotik ta yotʼane. Nopa awaʼiy jayeʼb ta chajpʼ siteakʼetik te ay ta Balumilale. Te jichuk yotʼan te Jeobae, chajpʼnax siteʼakʼ la yakʼbotik o maʼyuk xaal te jichuke. Jaʼukmeto, te Jeoba la yakʼbotik bayal ta chajpʼ siteʼakʼetik te yanyantiknax stalemalik, smukʼulik, sbonilik sok sbujtsʼik. Jaʼ ini jaʼ ya yakʼ ta ilel te kʼuxotik ta yotʼan te Jeobae, bayal ya smulan yakʼel, ya snop ta yantik sok ya spas te bina leke (Salmo 104:24).