Salmos
Sventa bankilal jtijson. Skʼejimol David.
40 La jpat sjunul koʼonton ta stojolal* li Jeovae,
vaʼun la stsʼetan lek xchikin ta jtojolal* xchiʼuk laj yaʼi ti xivokolet ta jkʼan akʼo skoltaune.+
2 La slokʼesun tal li ta chʼen ti xvoʼoʼet tajeke,
la snitun lokʼel ta achʼeltik.
La svaʼanun muyel ta tayal ton,
te laj yakʼ xanavkun ta yijil lum.
3 Vaʼun, laj yakʼ akʼo lokʼuk ta ke jun achʼ kʼejimol,+
jaʼ jun kʼejimol sventa skʼupil kʼoptael Jdiostik.
Ep buchʼutik chʼayal to yoʼonton tskʼelik li kʼusi spasoj Diose,
vaʼun tspat yoʼontonik ta stojolal li Jeovae.
4 Xmuyubaj noʼox li jun krixchano ti spatoj yoʼonton ta stojolal Jeovae
xchiʼuk ti muʼyuk tskʼel li buchʼutik tsaʼvanik ta kʼope o li buchʼutik tsjutik kʼope.*
5 Mu xa noʼox albajuk li kʼusitik apasoje,
Kajval Jeova, Dios kuʼun,
toj labalik sba li avabteltake xchiʼuk li kʼusitik anopoj ta jtojolalkutike.+
Muʼyuk buchʼu yan kʼuchaʼal voʼote;+
¡ti xkalbeuk xchiʼuk ti jloʼiltabeuk skʼoplal li kʼusitik taje,
mi jaʼuk onoʼox xlaj kuʼun ta albel skʼoplal!+
6 Maʼuk kʼupil sba laj avil li milbil chonbolometik sventa matanale xchiʼuk li yantik matanale;+
pe la ajambun jchikin sventa xkaʼi xchiʼuk sventa jchʼun li amantaltake.+
Muʼyuk la akʼan chikʼbil matanaletik xchiʼuk matanaletik sventa mulil.+
7 Jaʼ yuʼun, xi laj kale: «Kʼelavil, lital.
Te tsʼibabil jkʼoplal li ta balbalvune.+
8 Dios kuʼun, toj kʼupil sba chkaʼi* spasel li kʼusi tskʼan avoʼontone+
xchiʼuk te oy ta yutil to koʼonton li amantale.+
9 Chkal lekil aʼyejetik sventa tukʼilal li ta mukʼta tsobobbaile.+
¡Kʼelavil! Muʼyuk ta jmak ke,+
Kajval Jeova, xanaʼ lek ti jech ta jpase.
10 Muʼyuk ta jmuk ta koʼonton li atukʼilale.
Chkal batel ti tukʼ chavakʼ abae xchiʼuk ti kʼu yelan chakoltavane.
Muʼyuk ta jnakʼ* ta mukʼta tsobobbail li tukʼil kʼanelal avuʼune xchiʼuk li kʼusi melel avuʼune».+
11 Kajval Jeova, oyuk xkʼuxul avoʼonton ta jtojolal.
Jechuk-o akʼo xchabiun+ li tukʼil kʼanelal avuʼune xchiʼuk li kʼusi melel avuʼune.
12 Mu xa noʼox xlaj ta chapel li vokoliletik+ joyol ta jpat jxokone.
Toj echʼ xa noʼox ep li jpaltailtak* ti chakʼ jvokole, ti mu xa xkil jbe yuʼune;+
toj echʼ xa noʼox ep, jaʼ xkom to ta be yepal li stsotsil jole
xchiʼuk chibaj xa koʼonton yuʼun.
13 Kajval Jeova, avokoluk, oyuk ta avoʼonton xakoltaun.+
Jeova, laʼ koltaun ta anil.+
14 Li buchʼutik tskʼan tsmilikune
akʼo yichʼik kʼexlaltasel xchiʼuk bikʼtajesbel skʼoplalik.
Li buchʼutik kʼupil sba chilik kʼalal chkil jvokole
akʼo ta kʼexlaluk xjatavik batel.
15 Li buchʼutik xi tslabanikune: «¡Ata atot un!»* ti xiike
akʼo xiʼikuk tajek ta skoj ti kʼexlal chkomike.
16 Pe li buchʼutik yakal tsaʼikote+
akʼo xkuxetuk tajek yoʼontonik xchiʼuk xmuyubajikuk tajek ta atojolal.+
Li buchʼu skʼanoj li kʼusitik apasoj sventa xakoltavane skotoluk ora xi xalike:
«Akʼo yichʼ mukʼibtasbel skʼoplal li Jeovae».+
17 Pe li voʼone mu xpak kuʼun jkʼoplal xchiʼuk abol jba;
jaʼuk akʼo xchabiun li Jeovae.