Jeremias

35 Li Jeremiase oy kʼusi albat yuʼun Jeova li ta skʼakʼalil Jeoiakim+ ti jaʼ xnichʼon Josiase xchiʼuk ti jaʼ ajvalil ta Judae, xi albate: 2 «Bat kʼelo xchiʼuk bat kʼopono li yutsʼ yalal Rekabe+ xchiʼuk ikʼo batel ta sna Jeova, ikʼo ochel ta junuk yut veʼebal,* vaʼun akʼbo yuchʼik vino».

3 Jaʼ yuʼun, laj kikʼ batel li Jaasanias ti jaʼ xnichʼon Jeremias xchiʼuk ti jaʼ smom Abasiniase, li xchiʼiltak ta vokʼele, skotol li xnichʼnabe xchiʼuk skotol li yutsʼ yalal Rekabe. 4 Te laj kikʼik batel ta sna Jeova. Laj kikʼik batel li ta veʼebal yuʼun xnichʼon Anan ti jaʼ smom Igdaliase, ti jaʼ yajtunel li melel Diose, ti te nopol xil li veʼebal yuʼun bankilaletike xchiʼuk ti te oy ta yakʼol li veʼebal yuʼun Maaseya ti jaʼ xnichʼon Salum xchiʼuk ti jaʼ jchabitiʼnae. 5 Vaʼun, te la jvuchan kopaetik xchiʼuk vasoetik ti noj ta vino ta yeloval li yutsʼ yalal Rekabe, vaʼun xi laj kalbeike: «Uchʼanik vino».

6 Pe xi laj yalike: «Muʼyuk ta xkuchʼkutik vino, yuʼun xi laj yalbunkutik mantal li Jeonadab*+ ti jaʼ xnichʼon Rekab ti jaʼ jmoltotkutike: ‹Mu me xavuchʼik jsetʼuk* vino ti kʼu sjalil kuxuloxuke xchiʼuk mi jaʼuk stakʼ xuchʼik ek li anichʼnabike. 7 Jech xtok, mu me xavaʼan anaik, mu kʼusi xatsʼunik; mu me xatsʼunik uva, mi jaʼuk xavuʼuninik osiletik ti bu tsʼunbil uvaetike. Ti kʼu sjalil kuxuloxuke jaʼ noʼox xuʼ xanakiik ta karpanaetik sventa jal xakuxiik li ta jteklum ti bu nakaloxuk kʼuchaʼal jyanlume›. 8 Jaʼ yuʼun, jech-o ta jchʼunkutik skotol li kʼusi laj yal Jeonadab ti jaʼ xnichʼon li jmoltotkutik Rekabe, ti mu stakʼ xkuchʼkutik vino ti kʼu sjalil kuxulunkutike, mu stakʼ xuchʼik ek li kajnilkutike xchiʼuk li jkerem jtsebkutike. 9 Muʼyuk jvaʼanoj jnakutik sventa te xinakikutik, chʼabal bu tsʼunajtik j-uvakutik, chʼabal kosilkutik xchiʼuk sbekʼ jtsʼunobkutik. 10 Jech-o ta karpana nakalunkutik xchiʼuk ta jchʼunkutik-o skotol li kʼusi laj yalbunkutik li Jeonadab* ti jaʼ jmoltotkutike. 11 Pe kʼalal tal stsak ta kʼop jteklum li Nabukodonosor* ti jaʼ ajvalil ta Babiloniae,+ xi laj kalkutike: ‹Laʼik, batik ta Jerusalen sventa xijatavutik ta stojolal li yajsoltarotak jkaldeaetik xchiʼuk jsiriaetike›, li avi une liʼ xa nakalunkutik ta Jerusalene».

12 Xi kʼoponat tal yuʼun Jeova li Jeremiase: 13 «Xi chal li Jeova ti jaʼ bankilal yuʼun soltaroetike,* li Dios yuʼun Israele: ‹Batan, xi xbat avalbe li viniketik ta Judae xchiʼuk li jnaklejetik ta Jerusalene: «¿Mi mu nopolikuk noʼox la jtij avoʼontonik sventa xachʼunik li kʼusi chkale?»,+ xi li Jeovae. 14 «Li Jeonadab ti jaʼ xnichʼon Rekabe laj yalbe mantal snitilulal ti mu xuchʼik vinoe. Vaʼun, jech xchʼunojik-o tal kʼalal to avie, muʼyuk chuchʼik li vinoe. Jaʼ jech xchʼunojik-o tal li kʼusi albatik yuʼun smoltotike.+ Pe li voʼoxuke muʼyuk xachʼunbeikun, akʼo mi ep ta velta la jkʼoponoxuk.*+ 15 Jech-o la jtak tal ta atojolalik li j-alkʼopetik ti jaʼ kajtuneltake, ep ta velta la jtakik tal,*+ xi laj yalike: ‹Avokolikuk, sutanik tal, iktaik li achopol beike+ xchiʼuk pasik li kʼusi tukʼe. Mu xabatik ta stojolal yan diosetik xchiʼuk mi jaʼuk xatunik ta stojolal. Vaʼun, te chanakiik-o li ta balumil ti laj kakʼboxuke xchiʼuk ti laj kakʼbe li amoltotakike›.+ Pe muʼyuk laj avaʼibeikun xchiʼuk muʼyuk la atsʼet chikintabeikun. 16 Li snitilulal Jeonadab ti jaʼ xnichʼon Rekabe jech-o la xchʼunik li kʼusi albatik yuʼun li smoltotike,+ yan li jteklum liʼe mu skʼan xchikintabeikun»›».

17 «Jaʼ yuʼun, xi chal li Jeova Dios ti jaʼ bankilal yuʼun soltaroetike, li Dios yuʼun Israele: ‹Chkakʼ talel ta stojolal Juda xchiʼuk ta stojolal skotol jnaklejetik ta Jerusalen skotol li vokoliletik ti kalojbeik xa onoʼox chkakʼ tale,+ yuʼun la jkʼoponik, pe muʼyuk la skʼan la xchikintaik, ep ta velta la jtakik ta ikʼel, pe muʼyuk la stakʼbeikun›».+

18 Li Jeremiase xi laj yalbe li yutsʼ yalal Rekabe: «Xi chal li Jeova ti jaʼ bankilal yuʼun soltaroetike, li Dios yuʼun Israele: ‹Ta skoj ti la achʼunik li kʼusi laj yalboxuk li amoltotik Jeonadabe xchiʼuk ti jech-o tajek chapasik kʼuchaʼal laj yalboxuke, 19 xi chal li Jeova ti jaʼ bankilal yuʼun soltaroetike, li Dios yuʼun Israele: «Muʼyuk chlaj-o skʼoplal li snitilulal Jeonadab* sventa xtunik ta jtojolale»›».