Jeremias
13 Xi laj yalbun li Jeovae: «Batan, bat mano jlikuk achuk ti pasbil ta linoe xchiʼuk chuko ta achukbenal,* pe mu me xatʼuxubtas». 2 Jaʼ yuʼun, bat jman jchuk jech kʼuchaʼal laj yalbun li Jeovae xchiʼuk la jchuk ta jchukbenal.* 3 Xi la skʼoponun tal ta xchibal velta li Jeovae: 4 «Tsako li achuk ti la aman ti te achukinoje, vaʼun likan xchiʼuk batan li ta Eufratese, te xbat anakʼ* ta sjavbenal tayal mukʼta chʼen». 5 Jech oxal, libat xchiʼuk te la jnakʼ* ta xokon Eufrates, jech kʼuchaʼal laj yalbun li Jeovae.
6 Kʼalal echʼ xa ox epal kʼakʼale, xi laj yalbun li Jeovae: «Likan, batan li ta Eufratese, bat ichʼo tal li chukil ti laj kalbot ti xbat anakʼ* komel tee». 7 Jaʼ yuʼun, libat li ta Eufratese xchiʼuk la jotsʼ lokʼel li chukile, la jtsak lokʼel ti bu la jnakʼe,* jaʼ to chkile kʼaʼem xa, mu xa kʼusi xtun-o.
8 Xi laj yalbun li Jeovae: 9 «Xi chal li Jeovae: ‹Jaʼ jech ta jlajesbe skʼoplal li stoyobbail Juda xchiʼuk li stoyobbail Jerusalen ti mu albajuke.+ 10 Li chopol jteklumetik taje, ti mu skʼan xchʼunik li kʼusi chkale,+ ti tspasik li kʼusi tskʼan yoʼonton stukik ta skoj ti pimik ta mantale,+ ti yakal tstsʼakliik batel yan diosetike, ti chtunik ta stojolale xchiʼuk ti tsnijan sbaik ta stojolale, jaʼ jech chkʼotik kʼuchaʼal li chukil ti mu xa kʼusi xtun-oe›. 11 Xi chal li Jeovae: ‹Jech kʼuchaʼal jlik chukil ti lek napʼal ta xchukbenal* li jun vinike, jaʼ jech la jnapʼan lek ta jtojolal li jteklum Israel xchiʼuk sjunul li jteklum Judae, sventa xkʼotik ta jteklumal,+ sventa xkʼotik ta jmukʼulal,+ sventa skʼupil kʼoptaikun xchiʼuk sventa xichʼikun ta mukʼ. Pe muʼyuk la xchʼunik›.+
12 »Jech xtok, skʼan xavalbe yaʼiik li aʼyej liʼe: ‹Xi chal li Jeova ti jaʼ Dios yuʼun Israele: «Skotol li mukʼtik pʼinetike skʼan xichʼ nojesel ta vino»›. Pe xi tstakʼbeikote: ‹¿Mi yuʼun mu jnaʼkutik avaloj ti skʼan nojesel ta vino skotol li mukʼtik pʼinetike?›. 13 Vaʼun, xi xavalbe yaʼiike: ‹Xi chal li Jeovae: «Kʼelavilik, ta jyakubtas skotol li jnaklejetik ta jteklum liʼe,+ li ajvaliletik ti te chotolik li ta xchotleb ajvalil Davide, li paleetike, li j-alkʼopetike xchiʼuk skotol li jnaklejetik ta Jerusalene. 14 Ta xkakʼ ti smaj sbaik ta jujuntale, li totil xchiʼuk li xnichʼone.+ Muʼyuk chkakʼ ta ilel slekil koʼonton, muʼyuk chkakʼ ta ilel xkʼuxul koʼonton ta stojolalik xchiʼuk muʼyuk kʼusi chopol chkaʼi ta stojolalik; muʼyuk kʼusi tspajtsanun sventa jlajesik»›,+ xi li Jeovae.
15 Aʼiik xchiʼuk tsʼet chikintaik.
Mu me xatoy abaik, yuʼun jaʼ jech yaloj li Jeovae.
16 Albeik yutsilal li Jeova ti jaʼ Adiosike,
yoʼ to mu xakʼ talel ikʼal osil
xchiʼuk yoʼ to mu xamak* avakanik li ta vitsetik kʼalal mi chʼayem xa ox batel li kʼakʼale.
Li voʼoxuke chamalaik ti oyuk sakil osile,
pe chakʼ talel ikʼal osil;
17 Mi mu xakʼan xachikintaike,
ta xi-okʼ ta mukul ta skoj li atoyobbailike.
Ta jmal lokʼel ep yaʼlel jsat xchiʼuk stsʼujlajet noʼox chlokʼ li yaʼel jsate,+
yuʼun laj xa yichʼ chukel batel li xchijtak Jeovae.+
18 Xi xavalbe li ajvalil xchiʼuk smeʼe:+ ‹Chotlanik ti bu mas pekʼele,
yuʼun ta xpʼaj* lokʼel ta ajolik li akoronaik ti kʼupil sbae›.
19 Li jteklumetik ta sure bajalik* lek, muʼyuk buchʼu xuʼ sjam.
Skotol li krixchanoetik ta Judae laj yichʼik chukel batel, laj yichʼik ikʼel batel skotolik.+
20 Toyo batel li asate xchiʼuk kʼelavil li buchʼutik te xtalik ta nortee.+
¿Bu oy li chijetik ti laj avichʼ akʼbele, li achijtak ti kʼupilik sbae?+
21 ¿Kʼusi van chaval mi tal yakʼboxuk kastigo
li avamigotak ti voʼne xa lek xavil aba achiʼuke?+
¿Mi mu tauk xavaʼibe xkʼuxul jech kʼuchaʼal li jun ants ti chaʼibe xkʼuxul kʼalal yakal chvokʼ yole?+
22 Kʼalal mi xi laj aval ta avoʼontone: ‹¿Kʼu yuʼun jech kʼot ta pasel ta jtojolal?›,+
jaʼ ta skoj ti toj tsots la apas amul ti laj avichʼ nitbel lokʼel li akʼuʼ apokʼe+
xchiʼuk ti oy kʼusi kʼux tajek chaʼi li xchak avakane.
23 ¿Mi xuʼ van sjel skoloral snukulil li jun vinik ti likem ta Kuse* o mi xuʼ sjel spintoal li leopardoe?+
Ti yuʼun xuʼuke, spas avuʼunik ek li kʼusi leke,
voʼoxuk ti lek chanubtasbiloxuk ta spasel li kʼusi chopole.
24 Jaʼ yuʼun, ta jpukoxuk batel kʼuchaʼal jobel ti kuchbil chbat ta ikʼ ti likem talel ta takixokol balumile.+
25 Taje jaʼ jech chkʼot ta atojolal, jaʼ li aparte jpʼisojbot sventa chavuʼunine», xi li Jeovae,
«yuʼun la achʼayun ta ajol+ xchiʼuk jaʼ la apat avoʼonton li ta jutbil kʼope.*+
26 Jech xtok, voʼon ta jvalkʼun muyel kʼalal to ta asat li akʼuʼ apokʼe,
vaʼun chvinaj li kʼusi kʼexlal sba avuʼune,+
27 ti chamukul sativane,+ ti chakʼan xa tajek chiʼinel ta vayele
xchiʼuk ti toj ibal sba* kʼu yelan chachon abae.
Kiloj li kʼusitik toj kʼexlal sba chapas
ta osiltike xchiʼuk li ta sba bikʼtal vitsetike.+
¡Toj abol aba, Jerusalen!
¿Bakʼin to van ti chasakubtas abae?».+