Jeremias

33 Kʼoponat tal yan velta yuʼun Jeova li Jeremias kʼalal jaʼo te chukul ta Yamakʼ* Jchabivanejetike,+ xi albate: 2 «Xi chal li Jeova ti jaʼ Jpasvanej yuʼun li balumile, li Jeova ti jaʼ la spas xchiʼuk la snakan leke; li sbie jaʼ Jeova: 3 ‹Taun ta kʼoponel, vaʼun ta jtakʼbot xchiʼuk chkalbot ta anil li kʼusitik mukʼtik skʼoplale xchiʼuk li kʼusitik vokol ta aʼiel ti mu to xanabe skʼoplale›».+

4 «Yuʼun li Jeova ti jaʼ Dios yuʼun Israele xi chal ta sventa li naetik liʼ ta jteklume xchiʼuk li snatak ajvaliletik ta Juda ti laj yichʼ jinesel sventa spoj-o sbaik kʼalal la svaʼan stekʼobik li yajkontraike xchiʼuk kʼalal tsakatik ta kʼope+ 5 xchiʼuk xi chal ta sventa li buchʼutik chtal stsakik ta kʼop li jkaldeaetik ti liʼ telajtik chkom li sbekʼtalike, ti laj kakʼ lajikuk ta skʼakʼal koʼonton xchiʼuk ta skapemal jole, ti jaʼ ta smulik ti la jnakʼ* jsat ta stojolal li jteklume: 6 ‹Chkakʼ ti xlekubik yan veltae, chkakʼ ti xpoxtajike+ xchiʼuk ti xkolike, chkakʼ ti junuk tajek yoʼontonike xchiʼuk chkakʼbe yojtikinik lek li kʼusi melele.+ 7 Ta xkikʼik sutel tal yan velta li buchʼutik chukbilik batel yuʼun li Juda xchiʼuk li Israele,+ jpʼel skʼoplal chkakʼbeik bendision yan velta jech kʼuchaʼal la jpas ta slikebale.+ 8 Ta jpokbe lokʼel skotol li smul spasojik ta jtojolale+ xchiʼuk ta jpasbe perton skotol li kʼusi chopol spasojbeikune xchiʼuk li smul spasojik ta jtojolale.+ 9 Chimuyubaj yuʼun kʼalal chkaʼibe sbi li jteklum liʼe xchiʼuk chakʼ ti skʼupil kʼoptaikun xchiʼuk ti xichʼikun ta mukʼ li mukʼtik lumetik ti chaʼiik ti oy kʼusitik lekik jpasoj ta stojolal li jteklumale.+ Ta xlik xiʼikuk xchiʼuk chlik tʼelikuk*+ ta skoj li kʼusi lekik chkakʼbe li jteklumale xchiʼuk li jun oʼontonal chkakʼbe ti mu albajuke›».+

10 «Xi chal li Jeovae: ‹Ti chavalik ti jecheʼ xokol li jteklume, ti chʼabal krixchanoetik xchiʼuk ti chʼabal tsʼunbal chonbolometike, li ta jteklumetik ta Juda xchiʼuk ta skayealtak Jerusalen ti jecheʼ xokole, ti bu chʼabal krixchanoetik, jnaklejetik mi jaʼuk tsʼunbal chonbolometike, chichʼ aʼiel yan velta 11 ti xkuxet yoʼontonike xchiʼuk ti xmuyubajike,+ li yechʼomal ye jnupunel kereme xchiʼuk li yechʼomal ye jnupunel tsebe xchiʼuk li yechʼomal ye li buchʼutik xi chalike: «¡Tojbeik ta vokol li Jeova ti jaʼ bankilal yuʼun soltaroetike,* yuʼun toj lek yoʼonton li Jeovae;+ te oy-o sbatel osil li tukʼil kʼanelal yuʼune!»›.+

»‹Chichʼik tal chikʼbil matanal ta sna Jeova kʼalal tstojik ta vokole,+ yuʼun chkikʼik sutel tal ta jteklum li buchʼutik chukbilik batel jech kʼuchaʼal onoʼox ta slikebale›, xi li Jeovae».

12 «Xi chal li Jeova ti jaʼ bankilal yuʼun soltaroetike: ‹Li ta lum ti jecheʼ xokol kome, ti chʼabal krixchanoetike, ti chʼabal tsʼunbal chonbolometik xchiʼuk ta skotol li jteklumetik yuʼune chchʼi yan velta yaxal* sventa te xikʼ batel xkux xchijik li jchabichijetike›.+

13 »Xi chal li Jeovae: ‹Chlik xchap yan velta xchijik li jchabichijetik li ta jteklumetik ti te oy ta vitstikaltike, li ta jteklumetik ta stenlejaltike, li ta jteklumetik ta sure, li ta yosilal Benjamine, li ta spat xokon Jerusalene+ xchiʼuk li ta jteklumetik yuʼun Judae›».+

14 «Xi chal li Jeovae: ‹¡Kʼelavil! Chkʼot skʼakʼalil ti chkʼot ta pasel li kʼusitik lekik laj kal ta jpas ta stojolal li jteklum Israele xchiʼuk li jteklum Judae.+ 15 Li vaʼ orae xchiʼuk li vaʼ kʼakʼale, chkakʼ lokʼuk tal ta stojolal David jun skʼelom ti lek tukʼe,*+ ti tspas li kʼusi tukʼ ta jteklume* xchiʼuk ti tspas li kʼusi chal mantale.+ 16 Li vaʼ kʼakʼale, chichʼ pojel li Judae+ xchiʼuk jun noʼox yoʼonton chnakiik ta Jerusalen li krixchanoetike.+ Xchiʼuk xi chichʼ biiltasele: Jaʼ Tukʼilal Kuʼuntik li Jeovae›».+

17 «Yuʼun xi chal li Jeovae: ‹Jpʼel skʼoplal ti oy-o jun snitilulal David ti te chchoti ta chotlebal sventa ajvalil ta jteklum Israele,+ 18 jech xtok, li paleetik ti jaʼik jlevietike oy-o buchʼu yuʼunik ti te vaʼal ta keloval sventa xakʼik li skotlej chikʼbil matanale, sventa xchikʼik li matanal sat tsʼunobiletike xchiʼuk sventa xakʼik li milbil matanale›».

19 Kʼoponat tal yan velta yuʼun Jeova li Jeremiase, xi albate: 20 «Xi chal li Jeovae: ‹Ti xtuchʼuk avuʼunik li trato la jpas ta sventa li kʼakʼaltike xchiʼuk li trato la jpas ta sventa li akʼobaltik sventa mu xvul ta yorail li kʼakʼaltik xchiʼuk akʼobaltike,+ 21 vaʼun bi, chtuchʼ jechuk li trato jpasoj xchiʼuk kajtunel David+ sventa muʼyukuk xa junuk xnichʼon ti xchoti li ta xchotleb sventa ajvalile+ xchiʼuk chtuchʼ jechuk xtok li trato jpasoj xchiʼuk li paleetik ti jaʼik jlevietike, li kajtuneltake.+ 22 Jech kʼuchaʼal mu stakʼ chapel li soltaroetik ta vinajele xchiʼuk ti mu stakʼ pʼisel li sjiʼal* nabe, jaʼ jech ta xkepajesbe snitilulal li kajtunel Davide xchiʼuk li jlevietik ti chtunik ta jtojolale›».

23 Kʼoponat tal yan velta yuʼun Jeova li Jeremiase, xi albate: 24 «¿Mi muʼyuk avakʼoj venta ti kʼusi ta xal li jteklum liʼe: ‹Li Jeovae ta spʼaj li chib utsʼ alalil ti la stʼuje›? Jech xtok, muʼyuk chichʼik ta mukʼ li jteklumale xchiʼuk maʼuk xa jun mukʼta lum chilik.

25 »Xi chal li Jeovae: ‹Jech kʼuchaʼal muʼyuk chchʼay-o skʼoplal li trato jpasoj ta sventa li kʼakʼaltik xchiʼuk li akʼobaltike,+ li mantaletik ta sventa li vinajel xchiʼuk balumile,+ 26 jaʼ noʼox jech ek, muʼyuk onoʼox ta jpʼaj li snitilulal Jakobe xchiʼuk li snitilulal kajtunel Davide, jaʼ yuʼun te ta jlokʼes tal ta snitilulal David li ajvaliletik ti tsventainbeik li snitilulal Abraan, Isaak xchiʼuk Jakobe. Yuʼun ta jtsob sutel tal li buchʼutik chukbilik batel yuʼune+ xchiʼuk chkʼuxubajik ta koʼonton›».+