Isaias
27 Li vaʼ kʼakʼale, li Jeovae tstunes smukʼta espada ti oy lek ye+
sventa xakʼbe kastigo li Leviatane,* li chon ti xkilet ta anile, li chon ti xotoj sbae.
Ta smil li mukʼta chanul nabe.
2 Li vaʼ kʼakʼale, xi xakʼejintaik li jteklume:*
«¡Lek chakʼ vino ti bu tsʼunajtik uvae!+
3 Voʼon li Jeovaune lek jchabioj.+
Jujulikel chkakʼbe yaʼlel.+
Ta kʼakʼal akʼobal ta jchabi
sventa muʼyukuk buchʼu xilbajin.+
4 Chʼabal xa kapem jol ta stojolal.+
Mi oy jun kajkontra ti tsmakbun jbe ta chʼixtik xchiʼuk ta chopol tsʼiʼlel li ta paskʼope,
ta jpechʼ ta tekʼel xchiʼuk ta jtsanbe skʼakʼal skotol.
5 Jaʼ yuʼun, akʼo stsak lek yikob li ta tsatsal pojobbail kuʼune.
Akʼo saʼun sventa junuk koʼontonkutik;
akʼo saʼun sventa lekuk xkil jbakutik».
6 Li kʼakʼaletik ta xtale, li Jakobe ta xakʼ yibel,
li Israele ta xnichin xchiʼuk ta xakʼ sat,+
vaʼun chlik nojuk yuʼun balumil li satake.+
7 ¿Mi yuʼun skʼan xichʼ majel jech kʼuchaʼal yakal chichʼ majele?
¿Mi yuʼun skʼan xichʼ milel jech kʼuchaʼal laj yichʼik milel li buchʼutik lajemik ta milel yuʼune?
8 Toj xibal sba ti kʼu yelan ch-avan kʼalal mi la stsak ta utel sventa stak batele.
Ta stsatsal yikʼal ye ta snuts-o lokʼel kʼalal jaʼo xjumumet li ikʼ ta slokʼeb kʼakʼale.+
9 Liʼe jaʼ jech ta xichʼ chʼaybel-o spaltail* li Jakobe,+
jaʼ jech chkʼot ta pasel kʼalal mi chʼaybat li smule:
ta slilin kʼuchaʼal kʼunil ton
skotol li skajleb matanaletik ti pasbil ta tone
xchiʼuk chʼabal xa chkom junuk chʼul poste* o xchikʼobil pom.+
10 Yuʼun li jteklum ti joyol lek ta muroe solel stsʼijlan* chkom;
li yaxaltike solel stuk ta xkom xchiʼuk ta xichʼ jipel komel kʼuchaʼal takixokol balumil.+
Te ta xveʼ xchiʼuk te ta xkux yoʼonton li chʼiom tot vakaxe
xchiʼuk jaʼ ta slajes li skʼobtak teʼ ti te oye.+
11 Kʼalal mi takij xa ox li yuni bikʼtal kʼobkʼobtake,
ta xtal li antsetike xchiʼuk ta skʼasik,
vaʼun jaʼ ta stsan-o skʼokʼik.
Yuʼun li jteklum liʼe mu xaʼibeik smelolal.+
Jech oxal, muʼyuk chkʼuxubinatik yuʼun li Jpasvanej yuʼunike
xchiʼuk li buchʼu pasatik yuʼune muʼyuk ch-akʼbatik ta ilel slekil yoʼonton.+
12 Li vaʼ kʼakʼale, li Jeovae ta stsobbe ta jujupʼej li sat teʼe, te chlik stsob li ta Ukʼum* ti tsots lek yoke xchiʼuk te to chpaj ta beoʼtik ta stenlejaltik* Ejipto.+ Li voʼoxuke, jteklum Israel, jaʼ jech chavichʼik tsobel ta jujuntal.+ 13 Li vaʼ kʼakʼale, ta xichʼ jupanel jun mukʼta kachu,+ vaʼun li buchʼutik jutuk xa skʼan xchamik ta yosilal Asiriae+ xchiʼuk li buchʼutik tanpuk batemik ta yosilal Ejiptoe+ chtalik xchiʼuk tskejan sbaik ta yeloval Jeova li ta chʼul vits ta Jerusalene.+