Jeremias
21 Li Jeremiase jaʼo kʼoponat tal yuʼun Jeova kʼalal tal kʼelatuk yuʼun Pasjur+ ti jaʼ xnichʼon Malkias xchiʼuk li pale Sofonias+ ti jaʼ xnichʼon Maaseyae, ti jaʼ takatik tal yuʼun li ajvalil Sedekias+ sventa xi skʼanbeik vokole: 2 «Avokoluk, kʼopono Jeova ta jtojolalkutik, yuʼun li Nabukodonosor* ti jaʼ ajvalil ta Babiloniae yakal tstsakunkutik ta kʼop.+ Yikʼaluk van xakʼ ta ilel ta jtojolalkutik Jeova li kʼusi labalik sba tspase, yoʼ xlokʼ batel ta jtojolalkutik li ajvalile».+
3 Xi la stakʼ li Jeremiase: «Xi skʼan xavalbeik li Sedekiase: 4 ‹Xi chal li Jeova ti jaʼ Dios yuʼun Israele: «Kʼelavilik, ta joypʼin tal ta aba atukik li abtejebaletik ta paskʼop ti te atsakojike, ti jaʼ chatsakik-o ta kʼop li ajvalil ta Babilonia+ xchiʼuk li jkaldeaetik ti te oyik ta spat muro ti sjoyobtaojoxuke. Liʼ ta jtsob ta oʼlol jteklume. 5 Voʼon ta jtsakoxuk ta kʼop+ ta jkʼob ti tsotse xchiʼuk ti oy sjuʼele, ta skʼakʼal koʼonton, ta skapemal jol xchiʼuk ta skoj ti ilinemun tajeke.+ 6 Ta jlajes li jnaklejetik ta jteklum liʼe, kʼalal ta krixchanoetik xchiʼuk ta chonbolometik. Ta xchamik ta tsatsal chamel»›.+
7 »‹Xi chal li Jeovae: «Ta tsʼakale, li Sedekias ti jaʼ ajvalil ta Judae xchiʼuk li yajtuneltake xchiʼuk li jnaklejetik ta jteklum liʼe, ti jaʼik li buchʼutik muʼyuk xchamik ta tsatsal chamel, ta espada xchiʼuk ta viʼnale, chkakʼik batel ta skʼob li Nabukodonosor* ti jaʼ ajvalil ta Babiloniae, chkakʼik ta skʼob li yajkontraike xchiʼuk chkakʼik ta skʼob li buchʼutik tskʼan chmilatike.+ Chmilatik ta espada yuʼun li ajvalile. Muʼyuk abol sba ch-ilatik, muʼyuk chopol chaʼi sba ta stojolalik xchiʼuk mi jaʼuk chkʼuxubinatik jsetʼuk»›.*+
8 »Xi skʼan xavalbe li jteklum liʼe: ‹Xi chal li Jeovae: «Chkakʼ atʼujik li sbelel kuxlejale xchiʼuk li sbelel lajelale. 9 Li buchʼutik liʼ chkomik ta jteklume ta xlajik ta espada, ta tsatsal viʼnal xchiʼuk ta tsatsal chamel. Pe buchʼuuk noʼox ti chlokʼ batel xchiʼuk ti chakʼ sba ta skʼob li jkaldeaetik ti setuvanemike jaʼ kuxul chkom, ta xpoj yuʼun li xkuxlejale»›.*+
10 »‹Xi chal li Jeovae: «Yuʼun kakʼoj talel jsat sventa xkakʼbe svokol li jteklum liʼe, maʼuk sventa slekilal.+ Ta xichʼ akʼel ta skʼob ajvalil ta Babilonia,+ vaʼun li ajvalile ta xchikʼ ta kʼokʼ li jteklume».+
11 »›Xi skʼan xavalbe li yutsʼ yalal ajvalil ta Judae: chikintaik li kʼusi chal Jeovae. 12 Snitilulal ajvalil David, xi chalbot li Jeovae:
«Pakbeik skʼoplal jujun sob li kʼusi tukʼe
xchiʼuk pojik lokʼel ta skʼob jloʼlavanej li buchʼu lajem ta j-elekʼe,+
sventa mu stsan kʼuchaʼal kʼokʼ li skapemal jole+
xchiʼuk ti xtil tajek ti muʼyuk xa buchʼu xtupʼ yuʼune,
ta skoj li kʼusitik chopol chapasike»›.+
13 Xi chal li Jeovae: ‹Jnaklejetik ta stenlejaltik,
krixchanoetik ti nakaloxuk li ta jteklum ti kajal ta sba tone, ta xkakʼboxuk kastigo.
Voʼoxuk ti xi chavalike: «¿Buchʼu chtal stsakutik ta kʼop?
¿Buchʼu xuʼ yuʼun ch-och tal ta persa ti bu nakalutike?»›.
14 Xi chal li Jeovae: ‹Chkakʼboxuk kastigo
ta skoj ti kʼusitik chapasike.+
Ta jtsanbe skʼakʼal li teʼtikaltik avuʼune,
vaʼun ta xkʼakʼ yuʼun skotol li kʼusitik oy ta apat axokone›».+