JOEL
1 Xi tal albatuk yuʼun Jeova li Joel* ti jaʼ xnichʼon Petuele:
2 «Moletik, aʼio avaʼiik;
chikintaik akotolik ek, jnaklejetik ta lum.
¿Mi oy jech kʼotem ta pasel avilojik li avie
o ta skʼakʼalil li amoltotakike?+
3 Albo yaʼi li avalab anichʼnabike,
li avalab anichʼnabik eke akʼo yalbeik li yalab xnichʼnabike,
li yalab xnichʼnabik eke akʼo yalbeik li jkʼol kuxlejal chtale.
4 Li kʼusi kom yuʼun li kʼulub ti toj echʼ noʼox xveʼe jaʼ la slajes li kʼulub ti oy xikʼe;+
li kʼusi kom yuʼun li kʼulub ti oy xikʼe jaʼ la slajes li kʼulub ti muʼyuk xikʼe;
li kʼusi kom yuʼun li kʼulub ti muʼyuk xikʼe jaʼ la slajes li kʼulub ti xkechet tslajes skotole.*+
5 ¡Julavanik, jyakubeletik+ xchiʼuk okʼanik!
Milo abaik ta okʼel akotolik, j-uchʼ-vinoetik,
yuʼun laj xa yichʼ pojel lokʼel ta aveik li chiʼil vinoe.+
6 Yuʼun tal ta jlumal jun mukʼta lum ti lek xuʼ yuʼune xchiʼuk ti toj epike.+
Xkoʼolaj kʼuchaʼal stanal ye leon li stanal yee+ xchiʼuk xkoʼolaj kʼuchaʼal sbakil ye leon li sbakil yee.
7 Laj xa slajes-o ta j-echʼel li steʼeltak j-uvae xchiʼuk xchumanil xa laj yikta li steʼeltak j-igoe,
jecheʼ xa chijajtik kom yuʼun xchiʼuk jecheʼ xa te chexajtik laj yikta,
solel la xchoʼanbe spat li yuni kʼobkʼobtake.
9 Li matanal sat tsʼunobiletik+ xchiʼuk li matanal vinoe+ muʼyuk xa chichʼ akʼel ta sna li Jeovae;
chat yoʼontonik li paleetik ti jaʼ yajtuneltak Jeovae.
10 Muʼyuk xa kʼusi oy li ta osile, chat yoʼonton li balumile;+
yuʼun laj xa yichʼ lajesel li sat tsʼunobile, ul xa li achʼ vinoe xchiʼuk laj xa li aseitee.+
11 Li j-abteletik ta osile xchiʼuk li jtsʼun-uvaetike tsvul yoʼontonik xchiʼuk chat yoʼontonik
ta skoj li trigo xchiʼuk sevadae;
yuʼun muʼyuk xa kʼusi xchʼi li ta balumile.
12 Takij xa li steʼeltak uvae,
takij xa li steʼeltak igoe.
Laj xa takijanuk li steʼeltak granadae,* li steʼeltak xane xchiʼuk li steʼeltak mantsanae,
takij xa skotol li teʼetik ta osiltike;+
yuʼun laj xa skʼoplal li xkuxetel yoʼonton krixchanoetike, puro xa noʼox kʼexlal chaʼiik.
13 Paleetik, lapik chʼixal kʼuʼil xchiʼuk majo stiʼ avoʼontonik ta at-oʼonton;
milo abaik ta okʼel, voʼoxuk ti te cha-abtejik ta skajleb matanale.+
Yajtuneltak Jdios, batanik ta yamakʼil* templo xchiʼuk lapik chʼixal kʼuʼil sjunul akʼobal;
yuʼun li matanal sat tsʼunobiletik+ xchiʼuk li matanal vinoe+ muʼyuk xa chichʼ akʼel li ta sna Adiosike.
14 Alik batel ti chichʼ pasel ayunoe;* pasik jun tsobajel ti tsots skʼoplale.+
Tsobik tal li moletike xchiʼuk skotol li jnaklejetik ta jteklume
sventa xtalik ta sna li Jeova Dios avuʼunike+ yoʼ skʼanbeik koltael li Jeovae.
15 ¡Toj xibal sba li vaʼ kʼakʼale!,
yuʼun nopol xa skʼan xtal li skʼakʼalil Jeovae,+
chtal lajesvanuk li Buchʼu skotol xuʼ yuʼune.
16 ¿Mi mu teuk jkʼelojtik laj kichʼtik pojbel batel li jveʼeltike
xchiʼuk mi mu teuk jkʼelojtik laj yichʼ pojel batel li xkuxetel koʼontontik ta sna Jdiostike?
17 Matsʼemik xa li sbekʼ tsʼunobile* xchiʼuk te xa laj kʼaʼanuk.
Xokol xa kom li snailtake.
Laj xa yichʼ jinesel li snailtak bekʼ tsʼunobile, yuʼun muʼyuk xa xakʼ sat li kʼusitik laj yichʼ tsʼunele.
18 ¡Kʼalal to ta chonbolometik x-avlajetik ta okʼel!
¡Mu xa snaʼ bu chbat li vakaxetike, yuʼun muʼyuk xa bu sta yaxal* sloʼik!
Kʼalal ta chijetik chichʼik kastigo ek.
19 Voʼot ta jkʼanbot vokol, Jeova;+
yuʼun kʼakʼ xa li yaxal* ta osiltike
xchiʼuk kʼakʼ xa skotol li teʼetik ta osiltike.
20 Kʼalal ta jtiʼvanej chonbolometik tsaʼikot sventa xavakʼbe voʼ yuchʼik,
yuʼun takij xa li beoʼetike
xchiʼuk kʼakʼ xa li yaxal* ta osiltike».
2 «¡Jupanik kachu te ta Sion!+
Avananik ta jchʼul vits ta skoj ti chlik jun paskʼope.
Akʼo nikikuk ta xiʼel li jnaklejetik ta lume,
¡yuʼun chtal xa li skʼakʼalil Jeovae!+ ¡Poʼot xa skʼan xtal!
2 Jaʼ skʼakʼalil pimil ikʼal* osil,+
jaʼ skʼakʼalil chtal tok xchiʼuk pimil tok,+
jaʼ jech kʼuchaʼal tsakub tal osil ta baba vitstike.
Oy jun lum ti lek xuʼ yuʼune xchiʼuk ti toj epike;+
muʼyuk bu jech xkiltik-o
xchiʼuk muʼyuk xa bu jech chtal
li ta jaykʼol kuxlejal chtale.
3 Li ta yelovale oy jun kʼokʼ ti chchikʼvane,
li ta spate oy jun kʼokʼ ti chchikʼvane.+
Jaʼ jech kʼuchaʼal nichimaltik Eden+ li osil te oy ta yelovale,
pe li ta spate jaʼ jech kʼuchaʼal takixokol balumil,
jech oxal muʼyuk kʼusi chkom jsetʼuk.*
4 Jaʼ jech spat xokonik jech kʼuchaʼal kaʼetik,
jaʼ jech ch-anilajik jech kʼuchaʼal li kaʼetik sventa paskʼope.+
5 Jaʼ jech xchakʼlajet chbakʼ jech kʼuchaʼal karetaetik ti xvilik noʼox ta vitstikaltike,+
jaʼ jech chbakʼ jech kʼuchaʼal kʼalal xjumumet noʼox ta kʼakʼel li jobele.
Jaʼ jech kʼuchaʼal jun jteklum ti lek xuʼ yuʼun ti xcholoj sbaik sventa paskʼope.+
6 Jaʼ yuʼun, chil tsots svokol li jteklumetike.
Sakpakʼan chkom skotolik.
7 Anil tajek chanavik jech kʼuchaʼal soltaroetik,
xjokʼlajetik noʼox muyel ta muro jech kʼuchaʼal soltaroetik,
jaʼ te chbatik ti bu onoʼox sbeik ta jujuntale,
muʼyuk chkʼejpʼujik* ta be.
8 Muʼyuk bu tstakolta sbaik;
ta jujuntal stamoj batel lek sbeik.
Akʼo mi oy buchʼu xcham junukal yuʼunik ta bikʼit lansa,
muʼyuk onoʼox bu tspuk sbaik batel.
9 Mu vokoluk chaʼi ch-ochik li ta jteklume, xyoletik* noʼox ta anil li ta baba muroe.
Xjokʼlajetik noʼox muyel ta naetik, xchʼoletik noʼox ochel ta ventana jech kʼuchaʼal junuk j-elekʼ.
10 Chnik li balumil xchiʼuk li vinajel ti te oy ta yelovalike.
11 Li Jeovae tsots ch-avan sventa sbeiltas li yajsoltarotake,+ yuʼun ep tajek li yajsoltarotake+
xchiʼuk tsots sjuʼel li buchʼu chkʼot yuʼun ta pasel li kʼusi chale.
Ta melel, toj mukʼ xchiʼuk toj echʼ xa noʼox xibal sba li skʼakʼalil Jeovae.+
¿Buchʼu xa noʼox xkuch yuʼun?».+
12 Xi chal li Jeovae: «Jaʼ yuʼun, sutanik tal ta jtojolal ta sjunul avoʼontonik,+
13 Jaʼ xaliʼ ta jatel li avoʼontonike,+ maʼuk xaliʼ ta jatel li akʼuʼ apokʼike,+
sutanik tal ta stojolal li Jeova Dios avuʼunike,
yuʼun oy slekil yoʼonton xchiʼuk chkʼuxubinvan, mu ta aniluk chlik skʼakʼal yoʼonton+ xchiʼuk ep tukʼil kʼanelal yuʼun+
xchiʼuk chchaʼnop to lek* mi chakʼ tal li vokolile.
14 Xuʼ van mu xa xtal skʼakʼal yoʼonton xchiʼuk xuʼ van xchaʼnop to* li kʼusi tspase,+
xuʼ van xakʼboxuk bendision,
xuʼ van xakʼboxuk matanal sat tsʼunobiletik xchiʼuk matanal vino sventa xavakʼbeik li Jeova Dios avuʼunike.
15 ¡Jupanik kachu te ta Sion!
Alik ti chichʼ pasel ayunoe; jech xtok, pasik jun tsobajel ti tsots skʼoplale.+
16 Tsobik li jteklume; chʼultajesik li tsobobbaile.+
Tsobik tal li moletike; tsobik tal li kʼoxetike+ xchiʼuk li ololetik ti chchuʼunik toe.
Li jnupunel kereme akʼo lokʼuk tal li ta skuarto ti ta yutil to oye, li jnupunel tsebe akʼo lokʼuk tal li ta kuarto sventa achʼ jnupunele.
17 Ta oʼlol ti bu oy li ochebal xchiʼuk li skajleb matanale+
te akʼo okʼikuk li paleetik ti jaʼ yajtuneltak Jeovae xchiʼuk xi akʼo yalike:
‹Kajval Jeova, kʼuxubajuk ta avoʼonton li ateklumale;
mu xavakʼ lajuk ta labanel li arextoe,*
mu me jaʼuk spasatik ta mantal yuʼun li yantik lume.
Mu me xiuk xalik li jteklumetike: «¿Bu oy li Sdiosike?»›.+
18 Vaʼun, li Jeovae chlik ayanuk ta yoʼonton li yosile
xchiʼuk chlik kʼuxubajuk ta yoʼonton li steklumale.+
19 Li Jeovae xi tstakʼbe li steklumale:
‹Ta jtakboxuk tal sat tsʼunobil, achʼ vino xchiʼuk achʼ aseite,
jech lek noj chkom achʼutik;+
vaʼun muʼyuk xa tspʼajoxuk kuʼun li yan lumetike.+
20 Nom to bu ta jnutsboxuk batel li avajkontraik ta nortee;
te ta jtakik batel ti bu takin xchiʼuk ti bu jecheʼ xokol li balumile,
li buchʼutik jbabe batel yuʼunike ta jipik batel ta nab ta slokʼeb kʼakʼal.*
Li buchʼutik ta patil batem yuʼunike ta jipik batel ta nab ta smaleb kʼakʼal.*
21 Mu xaxiʼ, balumil.
Muyubajan xchiʼuk kuxetuk noʼox avoʼonton, yuʼun toj mukʼtik kʼusitik tspas li Jeovae.
22 Jechoxuk ek chonbolometik ta osiltik, mu xaxiʼik,
yuʼun chlik yaxubuk li yaxal* ta takixokol balumile+
xchiʼuk chlik yakʼ sat li teʼetike;+
tsʼuyul noʼox chlik yakʼ sat li igoe xchiʼuk li uvae.+
23 Skeremtak Sion, muyubajanik xchiʼuk kuxetuk noʼox avoʼontonik ta stojolal li Jeova Dios avuʼunike,+
yuʼun chakʼ talel voʼ ti kʼu yepal chtun avuʼunik ta otonyoe,*
xlomomet noʼox chakʼ taluk voʼ,
chlik yakʼ voʼ ta otonyo xchiʼuk ta primavera* jech onoʼox kʼuchaʼal ta slikebale.+
24 Chnoj ta lekil sat tsʼunobil ti bu chichʼ ikʼael sat tsʼunobile,
jech xtok, xmal noʼox lokʼel achʼ vino xchiʼuk aseite li ta spitsʼobile.+
25 Ta jkʼextaboxuk skotol ti jayib jabil li kʼusitik la slajes
li kʼulub ti oy xikʼe, li kʼulub ti muʼyuk xikʼe, li kʼulub ti xkechet tslajes skotole xchiʼuk li kʼulub ti toj echʼ noʼox xveʼe,*
ti jaʼ kajsoltarotak ti la jtakboxuk tal ta atojolalike.+
26 Vaʼun, chaveʼik jaʼ to mi noj chkom achʼutike,+
chlik avichʼbeik ta mukʼ li sbi Jeova Dios avuʼunike,+
jaʼ li buchʼu toj kʼupilik sba kʼusitik spasoj ta atojolalike;
muʼyuk xa chlajik ta kʼexlal li jteklumale.+
27 Jech chanaʼik ti te oyun ta stojolal li Israele+
xchiʼuk voʼon Jeova Diosun avuʼunik+ —¡muʼyuk yan!—.
Muʼyuk xa chlajik ta kʼexlal li jteklumale.
28 Ta tsʼakal une, ta jmal yalel tal jchʼul espiritu+ ta stojolal skotol krixchanoetik,
vaʼun li akerem atsebike ta xalik albil kʼopetik,
li moletik avuʼunike ta xvaychinajik
xchiʼuk oy kʼusitik chilik li akeremike.+
29 Jech xtok, kʼalal to ta jmosotak xchiʼuk ta jkiaratak
ta jmal tal ta stojolalik jchʼul espiritu li vaʼ kʼakʼale.
30 Chkakʼ ta ilel xtok kʼusitik labal sba ta vinajel xchiʼuk ta balumil,
31 Ch-ikʼub li kʼakʼale xchiʼuk tspas ta chʼichʼ li lunae,*+
taje jaʼo chkʼot ta pasel kʼalal skʼan toʼox xtal li smukʼta kʼakʼalil Jeova ti toj labal sbae.+
32 Skotol li buchʼu tskʼan vokol ta sbi Jeovae jaʼ chkol;+
yuʼun li buchʼu kolem chkomike te chbatik ta vits Sion xchiʼuk ta Jerusalen+ jech onoʼox kʼuchaʼal yaloj Jeovae,
jaʼ li buchʼutik kuxul chkomik ti chtakatik ta ikʼel yuʼun li Jeovae».
3 «Yuʼun mi sta skʼakʼalil, mi sta yoraile,
kʼalal mi laj kikʼik sutel talel li buchʼutik chukbilik lokʼel ta Juda xchiʼuk ta Jerusalene,+
2 ta jtsob tal skotol li yan lumetik eke,
te chyalik batel kuʼun li ta stenlejal yuʼun Jeosafate.*
Te chlik jchapanik+
ta skoj li kʼusi la spasbeik li jteklumal xchiʼuk li jrexto* Israele,
yuʼun la spukik batel ta yantik lum
xchiʼuk la xchʼakbe sbaik li kosile.+
3 Laj yakʼik suerte ta stojolal li jteklumale;+
la sjelik ta jchonbail ants li uni kʼox kereme
xchiʼuk la xchonik batel uni kʼox tseb sventa xuchʼik vino.
4 Jechoxuk ek, Tiro, Sidon xchiʼuk skotol yosilal Filistea,
¿kʼusi jmul avuʼunik?
¿Mi yuʼun oy kʼusi chakʼan chapakbeikun sutel?
Mi jech chapasike,
ta anil noʼox chkakʼ kʼotuk ta atojolalik li kʼusi chakʼan chapasbeikune.+
5 Yuʼun laj avichʼik batel li jplatae xchiʼuk li j-oroe,+
jech xtok, te bat avakʼ ta atemploik li jkʼulejal ti mas lekike;
6 la achonbeik batel jgresiaetik+ li jnaklejetik ta Juda xchiʼuk ta Jerusalene
sventa xnamajik li ta yosilike;
7 pe ta jtijik likel sventa sutik talel ti bu la achonik batele,+
vaʼun chkakʼ atojik li kʼusi la apasike.
8 Ta jchonbe batel jnaklejetik ta Juda li skeremik xchiʼuk stsebike,+
jaʼ xa chchonbeik batel ek li viniketik ta Sabae, ta jun namal jteklum;
yuʼun jech yaloj stuk li Jeovae.
9 Xi xavalbeik li jyanlumetike:+
‹¡Chapano abaik sventa li paskʼope! ¡Tijik likel li viniketik ti lek xuʼ yuʼunike!
¡Akʼo nopajikuk talel li soltaroetike, akʼo talikuk!+
10 Kʼatajesik ta espada li slokobil balumil avuʼunike, kʼatajesik ta lansa li ajosike.*
Xi akʼo yal li buchʼu kʼune: «Lek tsots xuʼ kuʼun».
11 ¡Jyanlumetik ta buyuk noʼox, tsobo abaik talel sventa xtal koltavananik!›».+
Kajval Jeova, te akʼo yalikuk batel avuʼun li avajsoltarotake.
12 «Akʼo yichʼik tijel likel li jyanlumetike sventa xmuyik batel ta stenlejaltik yuʼun Jeosafat;
yuʼun jaʼ te chichoti sventa jchapan li jyanlumetik ta buyuk noʼoxe.+
13 Lik xa tuchʼik ta jos* li kʼusitik tsʼunbile, yuʼun yijik xa.
Yalanik batel xchiʼuk tʼusilanik ta tekʼel li uvae, yuʼun noj xa li ta spitsʼobile.+
Chmal xa lokʼel li ta spitsʼobile, yuʼun toj echʼ noʼox li xchopolilike.
14 Epal krixchanoetik, epal krixchanoetik te oyik li ta stenlejaltike,
jaʼ te ti bu chichʼik chapanel li krixchanoetike, yuʼun nopol xa li skʼakʼalil Jeovae.+
15 Chlik ikʼubuk li kʼakʼal xchiʼuk li lunae,*
muʼyuk xa chojobaj likel li kʼanaletike.
16 Li Jeovae te chlik avanuk ta Sion jech kʼuchaʼal jkot leon,
te chlik avanuk ta Jerusalen.
Chlik nikuk li vinajel xchiʼuk li balumile,
akʼo mi jech, li Jeovae chkʼot ta jun pojobbail yuʼunik li steklumale,+
chkʼot ta tsatsal nakʼobbail ta stojolal li steklumal Israele.
17 Jech chlik anaʼik ti voʼon Jeova Diosun avuʼunik ti te nakalun ta Sione, jaʼ li chʼul vits kuʼune.+
18 Li vaʼ kʼakʼale, te chlik lokʼuk chiʼil vino li ta vitstike,+
chlik nojuk ta leche li bikʼtal vitsetike,
chlik nojuk li ukʼumetik ta Judae.
19 Pe li Ejiptoe jecheʼ xokol chkom+
xchiʼuk chkʼataj ta takixokol balumil li Edome,+
yuʼun laj yilbajinik li jteklum Judae+
xchiʼuk te la smalbeik xchʼichʼel krixchanoetik ti muʼyuk smulike.+
20 Pe li Judae oy-o yajval chkom,
li Jerusalene oy-o yajval jaʼ ti jaykʼol kuxlejal ch-echʼe.+
21 Muʼyuk xa smul chkilbe li xchʼichʼel ti oy toʼox smul chkilbee;+
vaʼun te chlik nakiuk ta Sion li Jeovae».+
Jaʼ skʼan xal ‹jaʼ Dios li Jeovae›.
Li ta ebreo kʼope jelajtik sbi chalbe li chantos kʼulube.
Kʼelo Glosario, chʼixal kʼuʼil.
O «smalale».
Jaʼ jtos sat teʼ ti lek tsoj skoloral ti xkoʼolajtik kʼuchaʼal mantsanae.
O «stiʼ». Kʼelo Glosario, amakʼ.
Kʼelo Glosario, ayuno.
O jaʼ van skʼoplal «Takijemik xa li igoetike».
O «tsʼiʼlel».
O «tsʼiʼlel».
O «tsʼiʼlel».
O «ikʼpulan».
O «jutebuk».
O «chkʼejevik; tstsʼepʼujik».
O «xtoletik; xviletik».
O «li ue».
Kʼelo Glosario, ayuno.
O «chopol to chaʼi sba».
O «chopol chaʼi sba ta skoj».
O «apukulale; apartee».
Jaʼ xkaltik, li nab Muertoe.
Jaʼ xkaltik, li nab Mediterraneoe.
O «tsʼiʼlel».
Jaʼ xkaltik, yorail voʼtik.
Jaʼ xkaltik, yorail uninaltik.
Li ta ebreo kʼope jelajtik sbi chalbe li chantos kʼulube.
O «chʼayil».
O «li ue».
Jaʼ skʼan xal ‹jaʼ jchapanvanej li Jeovae›.
O «jpukulal; jparte».
Jun lukluk natil kuchilu ti jaʼ sventa xtuchʼobil li kʼusitik tsʼunbile o sventa chichʼ tsobbel-o sat.
Jun lukluk natil kuchilu ti jaʼ sventa xtuchʼobil li kʼusitik tsʼunbile o sventa chichʼ tsobbel-o sat.
O «li ue».
O «jyanlumetike».
O «tsmalta».
O «Beoʼtik ta stenlejaltik».