SOFONIAS
1 Li ta skʼakʼalil Josias+ ti jaʼ xnichʼon Amon+ ti jaʼ ajvalil ta Judae, li Jeovae oy kʼusi laj yalbe Sofonias* ti jaʼ xnichʼon Kusie, ti jaʼ xnichʼon Guedaliase, ti jaʼ xnichʼon Amariase xchiʼuk ti jaʼ xnichʼon Esekiase, xi albate:
2 «Ta jlajesbe skʼoplal ta j-echʼel skotol li kʼusitik oy ta sba balumile», xi li Jeovae.+
3 «Ta jlajesbe skʼoplal li krixchanoetike xchiʼuk li chonbolometike.
Ta jlajesbe skʼoplal li mutetik ta vinajele xchiʼuk li choyetik ta nabe,+
ta jlajesbe skʼoplal li kʼusi tsmak* akanile*+ xchiʼuk li buchʼutik toj chopolike;
xchiʼuk ta jtupʼbe lokʼel skʼoplal ta sba balumil li krixchanoetike», xi li Jeovae.
4 «Ta jyeʼ batel jkʼob sventa jkontrain li Judae
xchiʼuk skotol li jnaklejetik ta Jerusalene,
ta jtupʼbe lokʼel skʼoplal te li skomenal* Baale,+
ta jtupʼbe skʼoplal sbiik li paleetik yuʼun jecheʼ diosetike xchiʼuk li yan paleetike,+
5 ta jtupʼbe skʼoplal li buchʼutik tskejan sbaik ta jol naetik sventa chichʼik ta mukʼ skotol li soltaroetik ta vinajele+
xchiʼuk li buchʼutik tskejan sbaik ta stojolal Jeova ti chalik ta jamal ti tukʼ chakʼ sbaik ta stojolale,+
pe ti jamal chalbeik Malkam xtok ti tukʼ chakʼ sbaik ta stojolale.+
6 Ta jtupʼbe skʼoplal li buchʼutik muʼyuk xa tstsʼakliik Jeovae+
xchiʼuk li buchʼutik muʼyuk xa tsaʼik li Jeovae o ti muʼyuk xa tskʼanbeik beiltasele».+
7 Tsʼijlanik ta yeloval li Ajvalil Jeova ti jaʼ Mukʼul Jpasmantale, yuʼun nopol xa li skʼakʼalil Jeovae.+
Xchapanoj xa milbil matanal li Jeovae; xchʼultajesoj xa li buchʼutik stakoj ta ikʼele.
8 «Li ta skʼakʼalil kʼalal chkakʼ milbil matanale, voʼon li Jeovaune, chkakʼbe kastigo li bankilaletike,
li xnichʼnab ajvalile+ xchiʼuk skotol li buchʼutik slapojbe li skʼuʼ spokʼ jyanlumetike.
9 Chkakʼbe kastigo li buchʼutik te oyik ta chotlebal sventa ajvalil* li vaʼ kʼakʼale,
li buchʼutik tsnojesik ta paskʼop xchiʼuk ta loʼlavanej li sna yajvalike».
10 Jech xtok, xi chal li Jeovae: «Li vaʼ kʼakʼale,
chichʼ aʼiel ti oy buchʼutik x-avetik te to ta ochebal ti Choy sbie,+
ti x-avetik te to ta Xchibal Barrio ta jteklume+
xchiʼuk oy kʼusi tsots chbakʼ li ta bikʼtal vitsetike.
11 Jnaklejetik ta Maktes,* okʼanik,
yuʼun laj xa yichʼ lajesel* skotol li jpʼolmajeletike;
laj xa yichʼ lajesel skotol li buchʼutik tspʼisik platae.
12 Li vaʼ kʼakʼale, ta jchaj lek ta saʼel ta kantil te ta Jerusalen,
vaʼun chkakʼbe kastigo li buchʼutik jaʼ noʼox tspas li kʼusi tskʼan stukike,* jaʼ li buchʼutik xi chal ta yoʼontonike:
‹Li Jeovae muʼyuk kʼusi lek tspas xchiʼuk muʼyuk kʼusi chopol tspas›.+
13 Chichʼik pojbel batel li skʼulejalike xchiʼuk chichʼ jinesbel li snaike.+
Tsvaʼan snaik, pe muʼyuk tsnaklebinik;
xchiʼuk tstsʼun s-uvaik, pe muʼyuk chuchʼik ta vino.+
14 ¡Nopol xa li smukʼta kʼakʼalil Jeovae!+
¡Nopol xa xchiʼuk anil xa tajek chtal!+
Solel toj xibal sba ti kʼu yelan x-avetik li ta skʼakʼalil Jeovae.+
Li vaʼ kʼakʼale, oy jun tsatsal jpaskʼop ti x-avete.+
15 Li vaʼ kʼakʼale, jaʼ skʼakʼalil li skʼakʼal yoʼonton Diose,+
skʼakʼalil vul oʼonton xchiʼuk vokolil,+
skʼakʼalil tsatsal ikʼaloʼ xchiʼuk ti stsʼijlan* chkome,
skʼakʼalil ikʼal osil xchiʼuk ti ikʼmutsʼane,*+
skʼakʼalil ti tsinil toke* xchiʼuk ti x-ikʼubinaj osil ta toke,+
16 skʼakʼalil chichʼ jupanel kachu xchiʼuk ch-avanik ta paskʼop+
sventa xichʼ tsakel ta kʼop li jteklumetik ti oy lek smuroaltake xchiʼuk li tayal kʼelob osiletik ti oy ta jujun eskinae.+
17 Chkakʼbe svokol li krixchanoetike,
vaʼun koʼol kʼuchaʼal maʼsat chanavik,+
yuʼun laj xa saʼ smulik ta stojolal li Jeovae.+
Li xchʼichʼelike xkoʼolaj kʼuchaʼal pukuk* ti chichʼ pechʼilanel ta tekʼele
18 Li splataik xchiʼuk s-oroike mu xuʼ xpojatik li ta skʼakʼalil skʼakʼal yoʼonton Jeovae;+
yuʼun li skʼakʼal yoʼontone xkoʼolaj kʼuchaʼal kʼokʼ ti chchikʼ spʼejel balumile,+
yuʼun toj xibal sba ti kʼu yelan tstupʼbe skʼoplal skotol li jnaklejetik ta balumile».+
2 Yoʼ to mu xkʼot ta pasel li kʼusi chapanbil skʼoplale,
yoʼ to mu xbat ta anil li kʼakʼal jech kʼuchaʼal kuchbil chbat ta ikʼ li jobele,
yoʼ to mu xvul ta atojolalik li skʼakʼal yoʼonton Jeova ti xtiltune,+
yoʼ to mu xvul ta atojolalik li skʼakʼalil skʼakʼal yoʼonton Jeovae,
3 saʼik li Jeovae,+ akotolik ti manxooxuk* ta balumile,
voʼoxuk ti chachʼunbeik li stukʼil mantaltake.*
Pasik li kʼusi tukʼe xchiʼuk manxouk* xavakʼ abaik.
Yikʼaluk* van xavichʼik chabiel* li ta skʼakʼalil skʼakʼal yoʼonton Jeovae.+
Li jnaklejetik ta Asdode ta xichʼik nutsel lokʼel ta kʼakʼaltik*
xchiʼuk li jnaklejetik ta Ekrone ta xichʼik bulel lokʼel.+
5 «¡Abol sba li jnaklejetik ta tiʼtiʼ nabe, li slumal jkretaetike!+
Li Jeovae yaloj xa ti oy kʼusi chopol chkʼot ta atojolalike.
Kanaan, voʼot ti yosilalot jfilisteaetike, ta jlajesot,
vaʼun mi junuk jnaklej te chkom.
6 Li tiʼtiʼ nabe chkʼot ta jamal yaxaltik,
ch-ayan posoetik sventa jchabichijetik xchiʼuk koraletik* sventa chijetik.
Kʼalal mi mal kʼakʼale, te ta xvayik li ta naetik ta Askelone.
Yuʼun chchabiatik yuʼun* li Jeova ti jaʼ Sdiosike
xchiʼuk jaʼ ta stsob sutel tal li buchʼutik chukbilik batel yuʼunike».+
8 «Laj kaʼi kʼu yelan chlabanvan li Moabe+ xchiʼuk ti kʼu yelan chchopol kʼoptavan li j-ammonetike,+
jaʼik li buchʼutik la saʼik ta kʼop* li jteklumale xchiʼuk ti xtoyetik xa la sibtasik sventa spojbeik li yosilike.+
9 Jaʼ yuʼun, jamal chkal ta skoj ti kuxulune,
li Moabe jech chkʼot kʼuchaʼal li Sodomae,+
li j-ammonetike jech chkʼotik kʼuchaʼal li Gomorrae,+
chkʼot ta yavil laetik,* ta xchʼenal atsʼam xchiʼuk jecheʼ stsʼijlan* ta xkom ta sbatel osil.+
Li skomenal* jteklumale ta spojbeik li kʼusitik oy yuʼunike
xchiʼuk li jayvoʼ kuxul komik ta jlumale ta xuʼuninbeik li kʼusitik oy yuʼunike», xi li Jeova ti jaʼ bankilal yuʼun soltaroetike,* li Dios yuʼun Israele.
10 «Taje jaʼ jech chkʼot ta stojolalik ta skoj li stoyobbailike,+
yuʼun la saʼik ta kʼop* xchiʼuk la stoy sbaik ta stojolal li steklumal Jeova ti jaʼ bankilal yuʼun soltaroetike.
11 Li Jeovae oy kʼusi xibal sba* tspas ta stojolalik,
yuʼun tstupʼbe skʼoplal skotol li diosetik ta balumile,
skotol li jteklumetik ti joyolik ta nabe ta snijan sbaik ta stojolal,*+
te to ta snijan sbaik tal ta jujuntal ti bu oyike.
12 Li voʼoxuk eke, j-etiopiaetik, chavichʼik milel ta j-espada».+
13 Ta syeʼ batel skʼob ta stukʼil norte xchiʼuk ta slajesbe skʼoplal li Asiriae,
stsʼijlan* ta xkom yuʼun li Ninivee,+ solel takin ta xkom yuʼun kʼuchaʼal takixokol balumil.
14 Te ta xpuchʼan sbaik ta yut li jtsop chonbolometike, skotol li jeltos teʼtikal chonbolometike.
Li pelikano mute xchiʼuk li chʼix-uche te ch-echʼ yuʼunik akʼobal li ta xlechlechul sjol yoyaltake.
Te xchʼivlajet mutetik* li ta ventanae.
Oy kʼusitik busul chkom sjinemal li ta koriyole;*
yuʼun chakʼ vinajuk ti pasbil ta sedro teʼe.
15 Taje jaʼ li jtoyba jteklum ti jun toʼox yoʼonton chotole,
ti xi chal ta yoʼontone: «Jtuk noʼox jechun, muʼyuk buchʼu yan jech kʼuchaʼal voʼone».
¡Solel xibal sba tajek ti kʼu yelan kome,
kʼot xa ta xpuchʼleb teʼtikal chonbolometik!
Skotol li buchʼutik te ch-echʼike tslabanik* xchiʼuk chbechkʼobtaik batel.+
3 ¡Abol sba li jteklum ti jtoybae, ti sokesbile xchiʼuk ti ch-ilbajinvane!+
2 Muʼyuk la xchikinta li mantale;+ muʼyuk la xchʼam li tukʼibtasele.+
Muʼyuk la spat yoʼonton ta stojolal li Jeovae;+ muʼyuk nopaj ta stojolal li Sdiose.+
3 Li bankilaletik yuʼune xkoʼolajik kʼuchaʼal leonetik ti x-avetike.+
Li jchapanvanejetik yuʼune xkoʼolajik kʼuchaʼal loboetik* ti tsaʼ sveʼelik ta akʼobaltike;
muʼyuk xa chiktaik junuk bak sventa xjechʼik li ta sobe.
4 Li j-alkʼopetik yuʼune jtoybaetik, jaʼik jloʼlavanej viniketik.+
5 Li Jeovae tukʼ kʼusi tspas li ta jteklume;+ muʼyuk tspas li kʼusi chopole.
Jech kʼuchaʼal persa onoʼox tsakub osil li ta kʼakʼaltike,
jaʼ jech chakʼ ta ojtikinel ta jujun sob li stukʼilale.+
Pe li buchʼu muʼyuk tukʼe mu xojtikin kʼu yelan li kʼexlale.+
6 «La jlajesbe skʼoplal mukʼtik lumetik; solel jinem kom li tayal kʼelob osiletik ta jujun s-eskinaile.
Stsʼijlan* kom kuʼun li skayealtak sventa muʼyuk buchʼu te x-echʼe.
Jinem kom li jteklumetik yuʼune, mi junuk krixchano kom, mi junuk jnaklej kom.+
7 Xi laj kalbe li jteklume: ‹Skʼan xaxiʼtaun* xchiʼuk skʼan xachʼam li tukʼibtasele›,+
sventa mu xkakʼbe kastigo ta skoj li kʼusitik la spase,+
vaʼun jech muʼyuk chichʼ lajesbel li yavile.
Pe mas lik ayanuk ta yoʼonton spasel li kʼusi toj chopole.+
8 Xi chal li Jeovae: ‹Jaʼ yuʼun, oyuk tajek ta avoʼontonik* xamalaikun,+
jaʼ to mi kʼot skʼakʼalil chitots tal sventa xkuʼunin li kʼusitik oy ta jteklume,*
yuʼun li kʼusi kʼotem ta nopel kuʼune jaʼ ti ta jtsob li lumetike, ta jtsob li jteklumetike,
sventa jmal talel ta stojolalik li skapemal jole,+ skotol li skʼakʼal koʼonton ti xtiltune;
yuʼun li skʼakʼal koʼontone xkoʼolaj kʼuchaʼal kʼokʼ ti chchikʼ spʼejel balumile.+
9 Vaʼun, jaʼo ta jelbe skʼopik li krixchanoetik sventa xlik kʼopojikuk ta jun lekil kʼope,
sventa xlik skʼanik vokol ta sbi li Jeovae,
sventa jmoj xtunik ta stojolal›.+
10 Te to ta yosilal ukʼumetik ta Etiopia
chichʼbeikun tal jmoton li buchʼutik tskʼanbeikun vokole, jaʼ li jteklumal ti tanpuk batemike.+
11 Li vaʼ kʼakʼale, muʼyuk chavichʼ akʼel ta kʼexlal
ta skoj li kʼusitik la apas ti jaʼ la atoy-o aba ta jtojolale,+
yuʼun ta jlokʼes batel ta atojolal li jtoybaetik ti stuk xa noʼox chaʼi sbaike;
muʼyuk xa chatoy aba li ta chʼul vits kuʼune.+
12 Te chkakʼ nakiuk ta atojolal jun jteklum ti bikʼit chakʼ sbae xchiʼuk ti manxoe+
xchiʼuk tsaʼ snakʼobbailik ta stojolal* Jeova.
13 Li skomenal* Israele+ muʼyuk ta spasik li kʼusi muʼyuk tukʼe;+
muʼyuk ta xalik jutbil kʼop* xchiʼuk muʼyuk ta xloʼlavanik;
ta xkoʼolajik kʼuchaʼal chijetik ti tsmakʼlin sbaike* xchiʼuk ti chpuchʼan sbaike, muʼyuk buchʼu ta sibtasatik».+
14 Stseb Sion, ¡avanan ta muyubajel!
Israel, ¡avanan ta skoj ti kuch avuʼune!+
Stseb Jerusalen, ¡kuxetuk avoʼonton xchiʼuk muyubajan ta sjunul avoʼonton!+
15 Li Jeovae laj xa slokʼes batel ta atojolal li kastigoe.+
Laj xa slokʼes batel li avajkontratake.+
Li Jeova ti jaʼ Ajvalil ta Israele te oy ta atojolal.+
Muʼyuk xa chaxiʼ yuʼun li vokolile.+
16 Li vaʼ kʼakʼale, xi chichʼ albel li Jerusalene:
«Sion, mu xaxiʼ.+
Mu xavakʼ ti jecheʼ xa te majajtik* xkom li akʼobe.
17 Te oy ta atojolal li Jeova ti jaʼ Adiose.+
Oy sjuʼel xchiʼuk chpojvan.
Solel xkuxet yoʼonton ta atojolal.+
Jun yoʼonton* ta xkom ta skoj ti chakʼ ta ilel ti skʼanojote.
Solel x-avet ta muyubajel ta atojolal.
18 Ta jtsob talel li buchʼutik chat yoʼontonik ta skoj ti muʼyuk te oyik li ta kʼinetik avuʼune;+
chʼabal te oyik ta atojolal ta skoj ti te chichʼik chopol kʼoptael ta yan lume.+
19 ¡Kʼelavil! Li vaʼ kʼakʼale, oy kʼusi ta jpas ta stojolal li buchʼutik chilbajinote;+
xchiʼuk ta jpoj li buchʼutik xkoxkun chanavike,+
ta jtsob talel li buchʼutik tanpuk batemike.+
Chkakʼ ti xichʼik kʼupil kʼoptael xchiʼuk ti xichʼik ojtikinel
li ta jteklumetik ti bu laj yichʼik kʼexlaltasele.
20 Li vaʼ kʼakʼale, chkikʼoxuk sutel tal li ta nae,
ta jtsoboxuk tal li vaʼ kʼakʼale.
Yuʼun chkakʼ ti xavichʼik kʼupil kʼoptaele xchiʼuk ti xavichʼik ojtikinel+ ta stojolal li jteklumetik ta balumile,
ta xavil ta asat atukik kʼalal mi la jtsob sutel tal li achiʼiltakik ti chukbilik batele», xi li Jeovae.+
Jaʼ skʼan xal ‹snakʼoj lek (ep sbalil chil) li Jeovae›.
O «chtʼab yuʼun».
Yaʼeluke, jaʼ skʼoplal li kʼusitik sventa yichʼel ta mukʼ diosetike xchiʼuk li kʼusitik chichʼ pasele.
O «senyail».
Jaʼ van skʼoplal li skajleb jun chotlebal sventa ajvalile.
Yaʼeluke, jaʼ jsep yosilal Jerusalen ti nopol xil li ochebal ti Choy sbie.
Literal «yichʼ tsʼijtsanel».
Literal «tstsʼan sba smatsʼilike», xkoʼolaj kʼuchaʼal vino ti oy bu tsʼanale.
O «tsʼijil».
O «ikʼpulane».
O «pimil toke».
O «lum».
Literal «li sbikilike».
O «tsoʼ».
O «ti bikʼit chavakʼ abaik».
Literal «li stukʼilale».
O «bikʼituk».
O «Xuʼ».
O «nakʼel».
O «tsʼijil».
O «ta oʼlol kʼakʼal».
Jaʼ skʼoplal mok ti pasbil ta tonetike.
O «skomelal».
Literal «chakʼ talel sat ta stojolalik».
O «la xchopol kʼoptaik; la slabanik».
O «ortiga tsʼiʼleletik».
O «tsʼijil».
O «skomelal».
Kʼelo Glosario, Jeova ti bankilal yuʼun soltaroetike.
O «la xchopol kʼoptaik; la slabanik».
O «labal sba».
O «ta xichʼik ta mukʼ».
O «tsʼijil».
O jaʼ van skʼoplal ti xjumumet ikʼe o ti te ch-avan jkotuk chonbolome.
O «skorredorale».
Literal «tspiobtaik».
Li loboe xkoʼolajtik kʼuchaʼal okʼil.
O «Tsʼijil».
Kʼelo Glosario, xiʼtael Dios.
O «smalael avuʼunik».
O jaʼ van skʼoplal «chikʼot kʼuchaʼal testigoe».
Literal «ta sbi».
O «skomelal».
O «nopbil kʼop; epal kʼop».
O «ti chveʼike».
O «jokʼajtik».
O «Tsʼijil».