AJEO

1 Li ta xchibal jabil yochel ta ajvalil li Darioe, li ta baʼyel kʼakʼal ta svakibal ue, li Jeovae la skʼopon li j-alkʼop Ajeoe.*+ Taje jaʼ sventa tskʼopon li ajvalil Sorobabel+ ta Juda ti jaʼ xnichʼon Sealtiele xchiʼuk li mero bankilal pale Josue ti jaʼ xnichʼon Jeosadake, xi laj yale:

2 «Xi chal li Jeova ti jaʼ bankilal yuʼun soltaroetike:* ‹Li jteklum liʼe xi chale: «Maʼuk to yorail sventa chichʼ vaʼanel* li sna* Jeovae»›».+

3 Kʼoponat yuʼun Jeova yan velta li j-alkʼop Ajeoe,+ xi albate: 4 «¿Mi jaʼ yorail ti xanaki ta anaik ti pasbil ta kʼupil sba teʼetik kʼalal busul slilijemal li jnae?+ 5 Avie, xi chal li Jeova ti jaʼ bankilal yuʼun soltaroetike: ‹Akʼik venta* ti kʼusi yakal chapasike. 6 Ep kʼusitik chatsʼunik, pe juteb chatsobbeik sat.+ Chaveʼik, pe muʼyuk chnoj achʼutik. Cha-uchʼbolajik, pe chʼabal ep avinoik. Chalap akʼuʼ apokʼik, pe muʼyuk chakʼixnajik. Li jsaʼabtele tstikʼ stojol ta yav takʼin ti jomajtike›».

7 «Xi chal li Jeova ti jaʼ bankilal yuʼun soltaroetike: ‹Akʼik venta* ti kʼusi yakal chapasike›.

8 »Xi chal li Jeovae: ‹Muyanik batel ta vits xchiʼuk ichʼik tal teʼetik.+ Vaʼanik li jna sventa ximuyubaj yuʼune+ xchiʼuk ti xkichʼ toybel jkʼoplale›».+

9 «Xi chal li Jeova ti jaʼ bankilal yuʼun soltaroetike: ‹Chakʼan ox chatsobbeik lek sat li kʼusi chatsʼunike, pe juteb kʼusi la ataik. Kʼalal laj avichʼ batel ta anaike, laj kakʼ ti sakchʼay batel ta yikʼal kee.+ ¿Kʼu yuʼun?›. ‹Yuʼun kʼalal jaʼo busul slilijemal li jnae, li voʼoxuke xatal xabatik ta jujuntal ta xchabiel li spat xokon anaike.+ 10 Jech oxal, muʼyuk xyal talel job osil li ta vinajele xchiʼuk muʼyuk kʼusi xchʼi yuʼun li balumile. 11 Laj kakʼ ti oyuk-o kʼepelaltik ta stojolal li balumile, ta stojolal li vitsetike, ta stojolal li sat tsʼunobile, ta stojolal li achʼ vinoe, ta stojolal li aseitee, ta stojolal li kʼusitik chchʼi ta osiltike, ta stojolal li krixchanoetike, ta stojolal li tsʼunbal chonbolometike xchiʼuk ta stojolal skotol li yabtel akʼobike›».

12 Li Sorobabel+ ti jaʼ xnichʼon Sealtiele+ xchiʼuk li mero bankilal pale Josue ti jaʼ xnichʼon Jeosadake+ xchiʼuk skotol li yantik ta jteklume la stsʼet chikintaik li kʼusi laj yal Jeova ti jaʼ Sdiosike xchiʼuk li kʼusi laj yal j-alkʼop Ajeoe, yuʼun jaʼ takat batel yuʼun li Jeova ti jaʼ Sdiosike. Vaʼun, li jteklume lik xiʼtaik* li Jeovae.

13 Laj une, li Ajeo ti jaʼ yaj-almantal Jeovae xi laj yalbe mantal li jteklum jech kʼuchaʼal albil yuʼun li Jeovae: «‹Liʼ jchiʼinojoxuke›,+ xi li Jeovae».

14 Jaʼ yuʼun, li Jeovae la stijbe yoʼonton+ li ajvalil Sorobabel ta Juda+ ti jaʼ xnichʼon Sealtiele xchiʼuk li mero bankilal pale Josue+ ti jaʼ xnichʼon Jeosadake xchiʼuk la stijbe yoʼonton skotol li yantik ta jteklume; vaʼun talik xchiʼuk lik abtejikuk ta sna li Jeova ti jaʼ bankilal yuʼun soltaroetike, ti jaʼ Sdiosike.+ 15 Taje jaʼo kʼot ta pasel li ta skʼakʼalil 24 li ta svakibal ue, ta xchibal jabil yochel ta ajvalil li Darioe.+

2 Li ta skʼakʼalil 21 ta svukubal ue, kʼoponat yuʼun Jeova li j-alkʼop Ajeoe,+ xi albate: 2 «Avokoluk, jakʼbo li ajvalil Sorobabel+ ta Juda ti jaʼ xnichʼon Sealtiele xchiʼuk li mero bankilal+ pale Josue+ ti jaʼ xnichʼon Jeosadake+ xchiʼuk li yantik ta jteklume: 3 ‹¿Buchʼu liʼ to oy avuʼunik ti laj yil kʼu toʼox yutsil li na* liʼe?+ ¿Kʼu yelan chavilik li avie? ¿Mi mu jechuk chavilik ti mu xa jsetʼuk* xkoʼolaje?›.+

4 »Xi chal li Jeovae: ‹Pe li avie, tsotsan me, Sorobabel, tsotsan me ek, mero bankilal pale Josue ti jaʼ xnichʼonot Jeosadake›.

»Xi chal li Jeovae: ‹Tsotsanik me ek, akotolik jteklumal,+ xchiʼuk abtejanik me›.

»Xi chal li Jeova ti jaʼ bankilal yuʼun soltaroetike:* ‹Liʼ jchiʼinojoxuke›.+ 5 ‹Vuleso me ta ajolik li kʼusi laj kakʼ ke ta atojolalik kʼalal lalokʼik talel ta Ejiptoe+ xchiʼuk li vaʼ kʼakʼale, la jtak talel juʼel sventa jbeiltasoxuk.*+ Mu me xaxiʼik›».+

6 «Yuʼun xi chal li Jeova ti jaʼ bankilal yuʼun soltaroetike: ‹Poʼot xa skʼan ti ta jnikes yan velta li vinajele, li balumile, li nabe xchiʼuk li takin balumile›.+

7 »Xi chal li Jeova ti jaʼ bankilal yuʼun soltaroetike: ‹Ta jnikes skotol li mukʼtik lumetike,+ vaʼun skotol li kʼusitik oy sbalil* yuʼun mukʼtik lumetike ch-och li ta na liʼe; chkakʼbe yutsilal li na liʼe,+ noj chkom kuʼun›.

8 »Xi chal li Jeova ti jaʼ bankilal yuʼun soltaroetike: ‹Jaʼ kuʼun li platae xchiʼuk jaʼ kuʼun li oroe›.

9 »Xi chal li Jeova ti jaʼ bankilal yuʼun soltaroetike: ‹Mas to me jun yutsil chbat li na liʼe, jaʼ mu sta ti kʼu toʼox yutsil ta baʼyele›.+

»Xi chal li Jeova ti jaʼ bankilal yuʼun soltaroetike: ‹Chkakʼ ti oyuk jun oʼontonal liʼe›».+

10 Li ta skʼakʼalil 24 ta sbalunebal ue, li ta xchibal xa ox jabil yochel ta ajvalil li Darioe, kʼoponat yuʼun Jeova li j-alkʼop Ajeoe,+ xi laj yale: 11 «Xi chal li Jeova ti jaʼ bankilal yuʼun soltaroetike: ‹Avokoluk, xi xajakʼbe li paleetik ta sventa li mantale:+ 12 «Mi oy jun vinik ti yichʼoj batel ta xpuxbenal skʼuʼ spokʼ li bekʼet ti chʼultajesbile xchiʼuk mi la sta ta tijel pan, veʼlil, vino, aseite o kʼusiuk yan veʼlilal li skʼuʼ spokʼe, ¿mi ta van spas ta chʼul li kʼusitik taje?»›».

Xi la stakʼ li paleetike: «¡Muʼyuk!».

13 Vaʼun, xi la sjakʼ li Ajeoe: «Mi oy buchʼu ibal sba* komem ta skoj ti spikoj animae,* pe mi la spik jtosuk li veʼlil taje, ¿mi ibal van sba chkom li veʼlile?».+

Xi la stakʼ li paleetike: «Ibal sba chkom».

14 Jaʼ yuʼun, xi laj yal li Ajeoe: «Xi chal li Jeovae: ‹Jaʼ jechik li jteklum liʼe, jaʼ jechik ta jtojolal li mukʼta lum liʼe xchiʼuk jaʼ jech skotol li yabtel skʼobike. Ibal sba skotol li kʼusitik chakʼike›.

15 »Xi chal li Jeovae: ‹Pe li avie, avokolikuk, tsakik lek ta venta* liʼe, jaʼ jech xapasik li avie xchiʼuk li ta jelavele. Nopo avaʼiik kʼusi chkʼot ta pasel kʼalal skʼan toʼox xlik yichʼ chaʼmeltsanel li stemplo Jeovae,+ 16 kʼalal oy buchʼu chtal saʼ 20 ta pʼis sat tsʼunobil ti bu busule, jaʼ noʼox oy lajunpʼis; kʼalal oy buchʼu chtal saʼ 50 ta pʼis vino li ta yavile, jaʼ noʼox oy 20 ta pʼis.+ 17 Laj kakʼbe svokol skotol li yabtel akʼobike, laj kakʼ talel kʼixin ikʼ ta slokʼeb kʼakʼal, laj kakʼbe talel xchamel+ xchiʼuk bot, pe mi junuk buchʼu avuʼunik sut talel ta jtojolal›.

18 »‹Avokolikuk, tsakik lek ta venta* liʼe, jaʼ jech xapasik li avie xchiʼuk li ta jelavele, li ta skʼakʼalil 24 li ta sbalunebal u kʼalal laj yichʼ akʼbel snakleb li stemplo Jeovae;+ tsakik lek ta venta liʼe: 19 ¿Mi oy to sbekʼ tsʼunobil li ta yavile?*+ Li steʼel uvae, li steʼel igoe, li steʼel granadae* xchiʼuk li oliva teʼe... muʼyuk to yakʼoj sat, ¿jechuke? Pe li avie, chlik kakʼ talel bendision›».+

20 Kʼoponat yan velta yuʼun Jeova li Ajeo ta skʼakʼalil 24 li ta sbalunebal ue,+ xi laj yale: 21 «Xi xavalbe li ajvalil Sorobabel ta Judae: ‹Ta jnikes li vinajel xchiʼuk li balumile.+ 22 Ta jlajes li chotlebaletik sventa ajvalile xchiʼuk ta jlajesbe skʼoplal li yip mukʼta lumetike;+ ta jlajes xtok li karetae xchiʼuk li buchʼutik te kajajtike, chyalik ta lum li kaʼetike xchiʼuk li buchʼutik te kajajtike, tsmil sba stukik ta espada ta jujuntal›».+

23 «Li Jeova ti jaʼ bankilal yuʼun soltaroetike xi chale: ‹Li vaʼ kʼakʼale, ta jtunesot, kajtunel Sorobabel+ ti xnichʼonot Sealtiele,+ xchiʼuk chakʼot kuʼun kʼuchaʼal jun aniyo ti oy seyoale, yuʼun voʼot jtʼujojot›, xi li Jeovae. Taje jaʼ jech laj yal li Jeova ti jaʼ bankilal yuʼun soltaroetike».