BAʼYEL SKARTA JUAN

1 Li buchʼu te onoʼox ta slikebale, ti kaʼiojbekutik onoʼox skʼoplale, ti kiloj ta jsat jtukutike, ti la jkʼelkutik leke xchiʼuk ti la jpik ta jkʼob jtukutik li kʼop ti chakʼ kuxlejale+ 2 (jech, laj yichʼ akʼel ta ilel li kuxlejale, laj kilkutik,+ jaʼ yuʼun jamal chkalbotkutik avaʼiik xchiʼuk ta jcholbotkutik avaʼiik skʼoplal li kuxlejal sbatel osil+ ti te lik talel ta stojolal li Totile xchiʼuk ti li-akʼbat kilkutike). 3 Yakal chkalbotkutik skʼoplal avaʼiik li kʼusi kilojkutik xchiʼuk kaʼiojkutike+ sventa teuk akʼoplalik ta jtojolalkutik. Jech xtok, te jkʼoplaltik ta stojolal li Totile xchiʼuk li Xnichʼon ti jaʼ Jesukristoe.+ 4 Jaʼ yuʼun, jech la jtsʼibakutik talel sventa kuxetuk tajek koʼontontik.

5 Liʼe jaʼ li aʼyej laj kaʼikutik yuʼune xchiʼuk ti yakal chkalbotkutike: ti jaʼ lus li Diose+ xchiʼuk ti muʼyuk chilik ikʼal osil li buchʼutik jmoj oyik xchiʼuke. 6 Yuʼun mi xi chkaltike: «Te jkʼoplaltik ta stojolal», pe mi te chijxanavutik-o ta ikʼal osile, yakal ta jutik kʼop* un bi xchiʼuk maʼuk yakal ta jpastik li kʼusi melele.+ 7 Pe mi te chijxanav ta sakil osil jech kʼuchaʼal te oy ta sakil osil li stuk eke, ta melel te me kapal jkʼoplaltik ta jujuntal ek, vaʼun tsakubtas skotol jmultik li xchʼichʼel Xnichʼon ti jaʼ li Jesuse.+

8 Yuʼun mi chkaltik ti muʼyuk jmultike, yakal ta jloʼla jba jtuktik+ xchiʼuk muʼyuk te ta jtojolaltik li kʼusi melele. 9 Tukʼ xchiʼuk xuʼ jpat koʼontontik ta stojolal li Diose. Jaʼ yuʼun, mi jamal chkal li jmultike, tspasbutik perton jmultik xchiʼuk tspokbutik lokʼel skotol li kʼusi muʼyuk tukʼe.+ 10 Yuʼun mi chkaltik ti muʼyuk jpasoj jmultike, jutkʼop* chkʼot kuʼuntik xchiʼuk muʼyuk te ta koʼontontik li skʼope.

2 Kuni nichʼnab, jaʼ sventa mu xasaʼ jtosuk amulik ti ta jtsʼibaboxuk tale. Pe oy jun jkoltavanej kuʼuntik* ti te oy xchiʼuk Totil mi oy la asaʼ jtosuk amulike, jaʼ li Jesukristo+ ti jaʼ tukʼil vinike.+ 2 Jaʼ kʼotem ta milbil matanal*+ sventa jmultik+ yoʼ lek xkil jbatik xchiʼuk li Diose, pe maʼuk noʼox ta jventatik, moʼoj, yuʼun jaʼ sventa skotol li krixchanoetike.+ 3 Mi jech ta jchʼunbetik-o li smantaltake, jaʼ jech chvinaj ti xkojtikintik xae. 4 Li buchʼu xi chale: «Xkojtikin xa maʼ li voʼone», pe mi muʼyuk chchʼunbe li smantaltake, jutkʼop* me xchiʼuk muʼyuk me te oy ta stojolal li kʼusi melele. 5 Pe buchʼuuk noʼox ti chchʼunbe li smantaltake tukʼibem xa yuʼun li kʼanelal ta stojolal Diose.+ Jaʼ jech ta jnaʼtik ti jmoj oyutik xchiʼuke.+ 6 Li buchʼu chal ti jmoj oy xchiʼuke persa skʼan jechuk-o chanav jech kʼuchaʼal xanav li stuke.+

7 Voʼoxuk ti jkʼanojoxuke, mu achʼ mantaluk ti kʼusi ta jtsʼibaboxuke, moʼoj, jaʼ voʼneal mantal ti oy xa onoʼox avuʼunik ta slikebale.+ Li voʼne mantal taje jaʼ li kʼop ti laj xa onoʼox avaʼiike. 8 Pe ta jtsʼibaboxuk jun achʼ mantal ti jaʼ melel ta stojolal li Kristoe xchiʼuk ti jaʼ melel ta atojolalik eke, yuʼun yakal xa chjelav li ikʼal osile xchiʼuk yakal xa chojobaj talel li melel sakil osile.+

9 Li buchʼu chal ti oy ta sakil osile oy-o ta ikʼal osil+ mi spʼajoj+ li yermanoe. 10 Te oy-o ta sakil osil+ li buchʼu skʼanoj yermanoe xchiʼuk muʼyuk kʼusi tsmak-o* yakan. 11 Pe te oy ta ikʼal osil li buchʼu spʼajoj yermanoe xchiʼuk te chanav ta ikʼal osil,+ jech xtok, mu snaʼ bu chbat,+ yuʼun jaʼ makbil-o sat yuʼun li ikʼal osile.

12 Ta jtsʼibaboxuk, kuni nichʼnab, yuʼun laj xa avichʼ chʼaybel amulik ta skoj li sbie.+ 13 Ta jtsʼibaboxuk, totiletik, yuʼun laj xa avojtikinik li buchʼu te onoʼox oy ta slikebale. Ta jtsʼibaboxuk, keremetik, yuʼun laj xa atsalik li Satanase.*+ Ta jtsʼibaboxuk, uni ololetik, yuʼun laj xa avojtikinik li Totile.+ 14 Ta jtsʼibaboxuk, totiletik, yuʼun laj xa avojtikinik li buchʼu te onoʼox oy ta slikebale. Ta jtsʼibaboxuk, keremetik, yuʼun tsotsoxuk+ xchiʼuk achʼunojik li skʼop Diose+ xchiʼuk laj xa atsalik li Satanase.*+

15 Mu me xakʼanik li balumile mi jaʼuk li kʼusitik oy ta balumile.+ Muʼyuk kʼanbil yuʼun Totil li buchʼu tskʼan balumile;+ 16 yuʼun skotol li kʼusitik oy ta balumile —li kʼusi tskʼan jbekʼtaltike,+ li kʼusi tskʼan jsatike+ xchiʼuk ti xijtoyet xa chkakʼtik ta ilel li kʼusitik oy kuʼuntike— maʼuk te likem talel ta stojolal Totil, moʼoj, te likem talel ta stojolal balumil. 17 Jech xtok, ta xjelav li balumile xchiʼuk li kʼusi tskʼan yoʼontone,+ pe te chkom-o sbatel osil li buchʼu tspas kʼusi tskʼan yoʼonton Diose.+

18 Uni ololetik, slajebal xa ora jech kʼuchaʼal avaʼiojbeik onoʼox skʼoplal ti chtal li yajkontra Kristoe,*+ ep xa lokʼem talel yajkontra Kristo li avie;+ taje jaʼ chakʼ jnaʼtik ti slajebal xa orae. 19 Te lokʼik ta jtojolaltik, pe mu xkoʼolajik jech kʼuchaʼal li voʼotike;*+ ti xkoʼolajikuk kʼuchaʼal voʼotike, te komik-o jchiʼuktik ti jechuke. Pe bu chata, lokʼik batel sventa xichʼik akʼel ta ilel ti mu xkoʼolajik jech kʼuchaʼal voʼotike.+ 20 Li voʼoxuke tʼujbiloxuk yuʼun li buchʼu chʼule+ xchiʼuk xanabeik skʼoplal akotolik. 21 Ti jech ta jtsʼibaboxuke mu yuʼunuk mu xanabeik skʼoplal li kʼusi melele,+ moʼoj, yuʼun xanabeik skʼoplal, jech xtok, mi junuk jutbil kʼop* te chlik talel li ta kʼusi melele.+

22 ¿Buchʼu li jutkʼope?* ¿Mi mu jaʼuk li buchʼu tsmuk ta yoʼonton ti jaʼ Kristo li Jesuse?+ Taje jaʼ me li yajkontra Kristoe,+ jaʼ li buchʼu tsmuk ta yoʼonton li Totil xchiʼuk li Nichʼonile. 23 Muʼyuk lek ch-ilat yuʼun Totil skotol li buchʼu tsmuk ta yoʼonton li Nichʼonile.+ Pe lek ch-ilat yuʼun Totil+ li buchʼu jamal chalbe skʼoplal li Nichʼonile.+ 24 Skʼan me te xkom-o ta atojolalik li kʼusi laj avaʼibeik skʼoplal ta slikebale.+ Mi te chkom-o ta atojolalik li kʼusi laj avaʼibeik skʼoplal ta slikebale, jmoj oyoxuk-o xchiʼuk li Nichʼonile xchiʼuk jmoj oyoxuk-o xchiʼuk li Totile. 25 Jech xtok, jaʼ laj yalbutik stuk ti chakʼbutik li kuxlejal sbatel osile.+

26 Li kʼusitik ta jtsʼibaboxuke jaʼ ta skoj li buchʼutik tskʼan tsloʼlaoxuke. 27 Ti jech laj avichʼik tʼujele te me chkom-o ta atojolalik+ xchiʼuk mu xa persauk ti oy buchʼu xchanubtasoxuke; jaʼ melel ti laj avichʼik tʼujele, maʼuk jutbil kʼop* xchiʼuk jaʼ yakal chakʼ achanik skotol li kʼusitike.+ Te me jmoj xakomik-o xchiʼuk jech kʼuchaʼal laj avichʼik chanubtasele.+ 28 Jaʼ yuʼun, uni nichʼnabiletik, teuk-o me oyanik ta stojolal sventa lek jamal xijkʼopoj kʼalal chichʼ akʼel ta ilele,+ jaʼ altik mi chijatavutik batel ta skoj kʼexlal kʼalal mi liʼ xa oye. 29 Mi anaʼojik ti tukʼ li stuke, naʼik me xtok ti te vokʼemoxuk talel ta stojolal mi jaʼ chapasik li kʼusi tukʼe.+

3 ¡Kʼelavilik ti toj echʼ xa noʼox skʼanojutik li Totile,+ yuʼun xnichʼnabutik Dios+ chkichʼtik albel! Jaʼ xnichʼnabutik ta melel. Jaʼ yuʼun, mu xojtikinutik li balumile,+ yuʼun mu xojtikinik li Diose.+ 2 Voʼoxuk ti jkʼanojoxuke, avie xnichʼnabutik xa Dios+ akʼo mi mu to xvinaj ti kʼu kelantik ta jelavele.+ Mi la sta yorail chichʼ akʼel ta ilele, jnaʼojtik ti xijkoʼolajutik xchiʼuke, yuʼun chkiltik ti kʼu yelan li stuke. 3 Skotol li buchʼutik spatoj yoʼonton ta stojolale tsakubtas sbaik ek+ jech kʼuchaʼal sak li stuke.

4 Skotol li buchʼutik jaʼ tspasik li mulile jaʼ yakal tspasik li choplejale, jech oxal, li mulile jaʼ spasel choplejal. 5 Anaʼojik xtok ti jaʼ sventa tslokʼes jmultik+ ti jech laj yichʼ akʼel ta ilele, yuʼun muʼyuk smul li stuke. 6 Skotol li buchʼutik jmoj te oyik xchiʼuke muʼyuk tspasik li mulile;+ mi oy buchʼu tspas li mulile, muʼyuk to yiloj xchiʼuk muʼyuk to yojtikinoj. 7 Kuni nichʼnab, mu me buchʼu sloʼlaoxuk; tukʼ skʼoplal li buchʼu jaʼ tspas li kʼusi tukʼ jech kʼuchaʼal tukʼ li stuk eke. 8 Te likem talel ta stojolal Diablo li buchʼu jaʼ tspas li mulile, yuʼun ta slikebal onoʼox lik spas talel smul li Diabloe.+ Jech oxal, jaʼ sventa tslilinbe yabteltak Diablo+ ti laj yichʼ akʼel ta ilel li Xnichʼon Diose.

9 Skotol li buchʼu vokʼem ta stojolal Diose muʼyuk bu tspas li mulile,+ yuʼun te oy-o ta stojolal li xchʼul espiritu Diose xchiʼuk mu stakʼ spas li mulile, yuʼun te vokʼem ta stojolal Dios.+ 10 Li xnichʼnab Dios xchiʼuk li xnichʼnab Diabloe lek jamal xvinaj ta kʼelel ta skoj liʼe: maʼuk te likem ta stojolal Dios skotol li buchʼu muʼyuk tspas kʼusi tukʼe xchiʼuk li buchʼu mu skʼan yermanoe.+ 11 Liʼe jaʼ li aʼyej ti avaʼiojbeik xa onoʼox skʼoplal ta slikebale, ti skʼan jkʼan jbatik ta jujuntale;+ 12 mu jechuk jpastik kʼuchaʼal li Kain ti te likem talel ta stojolal li Satanase* xchiʼuk ti la smil li yitsʼine.+ ¿Kʼu yuʼun ti milvane? Yuʼun toj chopol li yabteltake,+ pe tukʼ yabteltak li yitsʼine.+

13 Ermanoetik, mu me toj labaluk xavaʼiik ti tspʼajoxuk li balumile.+ 14 Jnaʼojtik ti xkoʼolaj kʼuchaʼal chamemutik toʼoxe, pe li avie kuxulutik xa+ ta skoj ti jkʼanojtik li ermanoetike.+ Te oy-o ta lajelal li buchʼu mu xkʼanvane.+ 15 Jaʼ jmilvanej buchʼuuk noʼox ti tspʼaj yermanoe+ xchiʼuk anaʼojik ti muʼyuk tsta kuxlejal sbatel osil li jmilvaneje.+ 16 Xkojtikintik kʼanelal ta skoj liʼe: yuʼun laj yakʼ xkuxlejal* ta jtojolaltik,+ jaʼ yuʼun li voʼotik eke persa chkakʼ jkuxlejaltik* ta stojolal li kermanotaktike.+ 17 Buchʼuuk noʼox ti oy kʼusi x-ayan yuʼun liʼ ta balumile, pe mi muʼyuk bu chkʼuxubin yermano kʼalal chil ti oy kʼusi chtun yuʼune, ¿kʼuxi xa noʼox chal ti skʼanoj li Diose?+ 18 Kuni nichʼnab, skʼan xijkʼanvan, yuʼun maʼuk noʼox ti chkaltike o ti ta ketik noʼox chlokʼe,+ moʼoj, yuʼun skʼan xkakʼtik ta ilel ta melel+ ta skoj li kʼusitik ta jpastike.+

19 Jaʼ yuʼun, jech ta jnaʼtik ti te likemutik talel ta stojolal li kʼusi melele xchiʼuk ta jpat lek koʼontontik* ti skʼanojutik Dios 20 manchuk mi ta kʼusiuk noʼox ti oy jmul chkaʼi jbatik yuʼun li koʼontontike, yuʼun mas to toyol skʼoplal li Diose, jaʼ mu sta li koʼontontike xchiʼuk xojtikin skotol li kʼusitike.+ 21 Voʼoxuk ti jkʼanojoxuke, mi muʼyuk jmultik chkaʼi jbatik yuʼun li koʼontontike, xuʼ me jamal ta jkʼopontik li Diose;+ 22 ta xakʼbutik ti kʼusiuk noʼox ta jkʼanbetike,+ yuʼun yakal ta jchʼunbetik li smantaltake xchiʼuk ta jpastik li kʼusitik lek chile. 23 Ta melel, liʼe jaʼ li smantale: ti oyuk xchʼunel koʼontontik ta sbi li Jesukristo ti jaʼ Xnichʼone+ xchiʼuk ti jkʼan jbatik ta jujuntal+ jech kʼuchaʼal laj yalbutik mantale. 24 Jech xtok, li buchʼu chchʼunbe smantaltake te jmoj oy-o xchiʼuk li Diose, li Dios eke te jmoj oy-o xchiʼuk ek.+ Ta skoj li chʼul espiritu laj yakʼbutike, jnaʼojtik ti te jmoj oy-o ta jtojolaltike.+

4 Voʼoxuk ti jkʼanojoxuke, mu me xachʼunik skotol li kʼusi akʼbil ta naʼele,+ jaʼ lek akʼik venta mi te likem talel ta stojolal Dios+ li kʼusi akʼbil ta naʼele, yuʼun ep jloʼlavanej j-alkʼopetik lokʼemik talel li ta balumile.+

2 Liʼe jaʼ senyail sventa xanaʼik mi te likem talel ta stojolal Dios li kʼusi akʼbil ta naʼele: te likem talel ta stojolal Dios skotol li kʼusi akʼbil ta naʼel mi jamal chalbe skʼoplal ti ay kʼuchaʼal krixchano li Jesukristoe.+ 3 Pe maʼuk te likem talel ta stojolal Dios skotol li kʼusi akʼbil ta naʼel mi muʼyuk jamal chalbe skʼoplal li Jesuse.+ Jech xtok, jaʼ li kʼusi akʼbil ta naʼel ti jech chal li yajkontra Kristoe*+ xchiʼuk ti chichʼ xa alel ta balumil avie.+

4 Ta stojolal Dios likemoxuk talel li voʼoxuke, kuni nichʼnab, xchiʼuk atsalojik xa li krixchanoetik taje,+ yuʼun jaʼ mas mukʼ skʼoplal li buchʼu te xchiʼukoxuke,+ jaʼ mu sta li buchʼu jmoj oy xchiʼuk balumile.+ 5 Likemik talel ta balumil;+ jaʼ yuʼun jaʼ chalik li kʼusi likem talel ta balumile xchiʼuk ch-aʼibatik yuʼun li balumile.+ 6 Li voʼotike likemutik ta stojolal Diose. Chaʼibutik li buchʼutik chojtikinik Diose;+ pe muʼyuk chaʼibutik li buchʼutik maʼuk te likemik talel ta stojolal Diose.+ Jaʼ yuʼun, xkojtikintik mi jaʼ melel li kʼusi akʼbil ta naʼele xchiʼuk xkojtikintik mi loʼlael li kʼusi akʼbil ta naʼele.+

7 Voʼoxuk ti jkʼanojoxuke, jechuk-o jkʼan jbatik ta jujuntal,+ yuʼun li kʼanelale jaʼ yuʼun li Diose, jech xtok, vokʼem ta stojolal Dios skotol li buchʼu chkʼanvane xchiʼuk xojtikin li Diose.+ 8 Li buchʼu mu xkʼanvane muʼyuk bu yojtikinoj li Diose, yuʼun jaʼ kʼanelal li Diose.+ 9 Jaʼ yuʼun, laj yichʼ akʼel ta ilel ta jtojolaltik li kʼanelal yuʼun Diose, yuʼun la stak talel ta balumil li jun noʼox Xnichʼon+ sventa jtatik li kuxlejal ta stojolale.+ 10 Xi yelan li kʼanelale: mu yuʼunuk voʼotik la jkʼantik li Diose, yuʼun jaʼ la skʼanutik xchiʼuk la stakbutik talel Xnichʼon kʼuchaʼal milbil matanal*+ sventa jmultik yoʼ lek xkil jbatik xchiʼuk li Diose.+

11 Voʼoxuk ti jkʼanojoxuke, mi jech la skʼanutik li Diose, persa skʼan jkʼan jbatik ta jujuntal ek.+ 12 Muʼyuk buchʼu yiloj li Diose.+ Mi jech-o ta jkʼan jbatik ta jujuntale, te chkom-o ta jtojolaltik li Diose xchiʼuk chvinaj lek ti skʼanojutike.*+ 13 Jaʼ yuʼun, li voʼotike jnaʼojtik ti jmoj oyutik-o xchiʼuke, li stuk eke jmoj oy-o jchiʼuktik, yuʼun yakʼojbutik li xchʼul espiritue. 14 Jech xtok, kilojtik ti stakoj talel Xnichʼon li Totil ti jaʼ jkoltavanej yuʼun li balumile xchiʼuk jaʼ yakal chkalbetik skʼoplal.+ 15 Buchʼuuk noʼox ti jamal chalbe skʼoplal ti jaʼ Xnichʼon Dios li Jesuse,+ li Diose jmoj oy-o xchiʼuk li buchʼu jech chale, li buchʼu jech chale jmoj oy-o xchiʼuk li Dios eke.+ 16 Li voʼotike laj xa kojtikintik xchiʼuk jchʼunojtik ti te oy ta jtojolaltik li kʼanelal yuʼun Diose.+

Jaʼ kʼanelal li Diose,+ jech xtok, jmoj oy-o xchiʼuk Dios li buchʼu jech-o chkʼanvane, li Diose jmoj oy-o xchiʼuk ek.+ 17 Ta skoj taje, laj xa yichʼ tukʼibtasel ta jtojolaltik li kʼanelal sventa jamaluk xijkʼopoj*+ li ta skʼakʼalil chapanele, yuʼun jaʼ jechutik liʼ ta balumil ti kʼu yelan li stuk avie. 18 Tspajesutik li xiʼele, pe muʼyuk chijxiʼ mi jkʼanojtik Diose,+ yuʼun tsnuts lokʼel xiʼel li tukʼil kʼanelale. Ta melel, muʼyuk to tukʼibtasbil ta kʼanelal li buchʼu chiʼe.+ 19 Li voʼotike chijkʼanvanutik, yuʼun jaʼ la skʼanutik baʼyel li stuke.+

20 Mi oy buchʼu xi chale: «Jkʼanoj Dios maʼ voʼone», pe jutkʼop* mi spʼajoj li yermanoe.+ Yuʼun li buchʼu mu skʼan yermano+ ti yiloj ta sate mu stakʼ skʼan Dios ti muʼyuk yiloj ta sate.+ 21 Jaʼ yakʼojbutik li mantal liʼe: akʼo me skʼan yermano xtok li buchʼu skʼanoj Diose.+

5 Vokʼem ta stojolal Dios skotol li buchʼu xchʼunoj ti jaʼ Kristo li Jesuse,+ jech xtok, skotol li buchʼu skʼanoj Totile skʼanoj xtok li buchʼu te vokʼem ta stojolale. 2 Liʼe jaʼ senyail mi jkʼanojtik li xnichʼnab Diose:+ jaʼo kʼalal jkʼanojtik li Diose xchiʼuk kʼalal ta jchʼunbetik batel li smantaltake. 3 Liʼe jaʼ smelolal ti jkʼanojtik li Diose: ti jchʼunbetik li smantaltake;+ mu toj tsotsuk ta chʼunbel li smantaltake,+ 4 skotol li buchʼu* vokʼem ta stojolal Diose tspas ta kanal li balumile.+ Li xchʼunel koʼontontike spasoj xa ta kanal li balumile.+

5 ¿Buchʼu xuʼ spas ta kanal li balumile?+ ¿Mi mu jaʼuk li buchʼu yakʼoj xchʼunel yoʼonton ti jaʼ Xnichʼon Dios li Jesuse?+ 6 Li Jesukristoe jaʼ li buchʼu lokʼ tal ta stojolal voʼ xchiʼuk chʼichʼe, maʼuk noʼox tal xchiʼuk voʼ,+ moʼoj, yuʼun tal xchiʼuk voʼ xchiʼuk chʼichʼ.+ Jamal yakal chalbe skʼoplal li chʼul espiritue,+ yuʼun jaʼ melel li chʼul espiritue. 7 Oy oxtos ti jamal chalbeik skʼoplale: 8 jaʼ li chʼul espiritue,+ li voʼe+ xchiʼuk li chʼichʼe;+ koʼol jamal chal yoxtosalik.

9 Jchʼamojtik li kʼusi jamal chal krixchanoetike, pe jaʼ mas to mukʼ skʼoplal li kʼusi jamal chal Diose. Liʼe jaʼ li kʼusi jamal chal Diose: ti jamal laj yalbe skʼoplal li Xnichʼone. 10 Li buchʼu oy xchʼunel yoʼonton ta stojolal li Xnichʼon Diose te oy ta yut yoʼonton li kʼusi jamal albile. Li buchʼu muʼyuk yakʼoj xchʼunel yoʼonton ta stojolal Diose kʼotem ta jutkʼop*+ yuʼun li Diose, yuʼun mu xchʼun li kʼusi jamal yaloj Dios ta stojolal Xnichʼone. 11 Liʼe jaʼ li kʼusi jamal albile: ti laj yakʼbutik kuxlejal sbatel osil li Diose,+ li kuxlejal taje te oy ta stojolal li Xnichʼone.+ 12 Li buchʼu chchʼam li Nichʼonile oy xkuxlejal sbatel osil; li buchʼu muʼyuk chchʼam li Xnichʼon Diose muʼyuk xkuxlejal sbatel osil.+

13 Ti jech ta jtsʼibaboxuk tale jaʼ sventa xanaʼik ti ataojik li kuxlejal sbatel osil+ ta skoj ti avakʼoj xchʼunel avoʼontonik ta sbi li Xnichʼon Diose.+ 14 Liʼe jaʼ li kʼusi jpatoj-o koʼontontik* ta stojolale,+ yuʼun kʼusiuk noʼox ti ta jkʼanbetike chaʼibutik mi jech ta jkʼanbetik jech kʼuchaʼal tskʼan yoʼontone.+ 15 Jech xtok, jpatoj koʼontontik ti chaʼibutik kʼalal oy kʼusi ta jkʼanbetike, jaʼ yuʼun jnaʼojtik ti ta jtatik li kʼusitik la jkʼanbetik ta skoj ti jaʼ la jkʼanbetike.+

16 Mi oy buchʼu laj yil yermano ti yakal tspas smul ti maʼuk sventa lajelale, akʼo spas orasion ta stojolal, vaʼun ch-akʼbat xkuxlejal yuʼun Dios li jpasmulile,+ jech, jaʼ li buchʼutik tspas smulik ti maʼuk sventa lajelale. Pe oy jun mulil ti jaʼ sventa lajelale.+ Jaʼ yuʼun, chkalbe ti mu me spas orasion ta stojolal mi jaʼ tspas li mulil taje. 17 Mulil skotol li kʼusitik muʼyuk tukʼe,+ akʼo mi jech, oy jun mulil ti maʼuk sventa lajelale.

18 Jnaʼojtik ti muʼyuk tspas smul skotol li buchʼu vokʼem ta stojolal Diose. Pe chchabiat yuʼun li buchʼu vokʼem ta stojolal Diose,* jaʼ yuʼun mu xtaat ta tsakel yuʼun li Satanase.*+ 19 Jnaʼojtik ti likemutik talel ta stojolal Dios li voʼotike, pe skotol li krixchanoetike oyik ta sjuʼel li Satanase.*+ 20 Akʼo mi jech, jnaʼojtik ti tal li Xnichʼon Diose+ xchiʼuk yakʼojbutik jpʼijiltik* sventa xkojtikintik li buchʼu jaʼ melele. Jech xtok, jmoj oy jchiʼuktik li buchʼu jaʼ melel+ ta skoj li Xnichʼon ti jaʼ li Jesukristoe. Taje jaʼ li melel Diose xchiʼuk jaʼ li kuxlejal sbatel osile.+ 21 Kuni nichʼnab, chʼako abaik lokʼel ta stojolal li santoetike.+