1 Pasik li kʼusi avalojike

¿KʼUSI SMAKOJ?

Li nupultsʼakaletik ti oy ta yoʼontonik spasel li kʼusi yalojbe sbaike maʼuk noʼox junchib kʼakʼal chil li snupunelike. Vaʼun, jun noʼox yoʼonton oyik, jpʼel ta yoʼonton ti muʼyuk chikta sbaike mu ventauk li kʼusi tsnuptanike.

Junantik nupultsʼakaletike muʼyuk chikta sbaik ta skoj noʼox li yutsʼ yalalike o li yamigotakike. Pe jaʼ mas toj lek mi jmoj oyik ta skoj ti skʼanoj sbaik xchiʼuk ti yichʼoj sbaik ta mukʼe.

BEILTASEL TA VIVLIA: «Mu me xikta yajnil ek li malalile» (1 Korintios 7:11).

«Mi oy ta avoʼonton spasel li kʼusi avaloje, jaʼ tskoltaot sventa mu ta aniluk xa˗ilin. Jech xtok, tskoltaot sventa mas kʼunuk xavaʼi skʼanel perton xchiʼuk ti xachʼaybe smul li achiʼile. Anaʼoj ti ta onoʼox xlik akʼopike, pe maʼuk sventa xtuchʼ˗o anupunelik» (Micah).

¿KʼU YUʼUN TSOTS SKʼOPLAL?

Mi muʼyuk tsots skʼoplal chilik li kʼusi yakʼoj yeik spasele, xuʼ van xkʼot ta nopel yuʼunik ti chchʼak sbaik mi lik skʼopike o tsnopik ti maʼuk onoʼox snup xchiʼil sbaike.

«Oy buchʼutik tsnopik ti xuʼ xtuchʼ snupunelik mi nupunemik xa oxe. Mi jech anopoj kʼalal skʼan toʼox xanupune, chvinaj ti muʼyuk tsots skʼoplal chavil li kʼusi chavakʼ ave spasele» (Jean).

¿KʼUSI STAKʼ XAPAS?

NOPBO SKʼOPLAL LIʼE:

¿Kʼusi chapas kʼalal chlik akʼopik xchiʼuk li anup achiʼile?

• ¿«Kʼu yuʼun ti linupune» mi xachi?

• ¿Mi ta van xanop ti mas lek akuxlejal ti yanuk˗o buchʼu lanupun xchiʼuke?

• ¿Mi oy van xi avaloje: «ta xkiktaot» o «ta jsaʼ yan ti mas skʼanojune»?

Mi oy jech anopoje, jaʼ me yorail sventa mas tsotsuk skʼoplal xavil li kʼusi avakʼoj ave spasele.

LOʼILTA˗O XCHIʼUK ANUP ACHIʼIL LIʼE:

• ¿Mi muʼyuk xa tsots skʼoplal chkiltik li kʼusi kakʼoj ke ta jpastike? Mi jaʼ jeche, ¿kʼu yuʼun?

• ¿Kʼusi stakʼ jpastik sventa tsotsuk skʼoplal xkiltik li kʼusi kakʼoj ketik spasele?

LI KʼUSI XUʼ XAPASE

• Oyuk kʼusi xatsʼibabe li anup achiʼil sventa xavakʼbe ta ilel ti akʼanoje.

• Teuk slokʼol avuʼun anup achiʼil ti bu cha˗abteje.

• Sil kʼakʼal xakʼopon batel anup achiʼil mi oyot ta avabtele o kʼalal muʼyuk te achiʼuke.

BEILTASEL TA VIVLIA: «Ti kʼusi spasoj ta jun li Diose muʼyuk buchʼu xuʼ xchʼak» (Mateo 19:6).