¿KʼUXI XUʼ JUNUK NOʼOX KOʼONTONTIK?
¿Mi solel chavul tajek avoʼonton?
«Jkotoltik onoʼox ta jvul koʼontontik, pe li voʼone solel mu xa xkuch kuʼun chkaʼi. Ti jech chkaʼi jbae, maʼuk noʼox ta skoj ti oy kʼusi tsots yakal ta jnuptane, yuʼun oy ep jvokol xchiʼuk oy xa sjayibal jabil yakal ta jkʼel jmalal ta skoj ti ip ta snopben xchiʼuk ti oy xchamele» (Julia).a
«Laj yiktaun komel li kajnile, jaʼ yuʼun jtuk la jtsʼites li chaʼvoʼ jnichʼnabe. Toj vokol laj kaʼi ti jtuk la jkʼel li jnichʼnabe. Pe maʼuk noʼox la jnuptan taje, yuʼun muʼyuk kabtel likom xchiʼuk chʼabal jtakʼin sventa jmeltsan li jkaroe. Mu xa jnaʼ kʼusi ta jpas laj kaʼi. Mu xa xkuch kuʼun laj kaʼi li vul oʼontone. Jnaʼoj ti muʼyuk lek ti ta jmil jba jtuktike, jaʼ yuʼun xivokolet ta stojolal Dios ti akʼo smilune» (Barry).
Jech kʼu chaʼal kʼot ta xkuxlejal li Julia xchiʼuk Barry, ¿mi mu xa chkuch avuʼun chavaʼi li avokole? Mi jeche, tskoltaot xchiʼuk tspat avoʼonton li revista liʼe, yuʼun jaʼ chalbe skʼoplal ti kʼu yuʼun sujomutik xchiʼuk ti mu xa jnaʼ kʼusi ta jpas ta jkuxlejaltike (estrés), ti kʼusi chkʼot ta jtojolaltik yuʼune xchiʼuk te chalbutik kʼusi xuʼ jpastik sventa xkuchʼ kuʼuntik batel.
a Jelbil li biiletike.