¿KʼUXI XUʼ JUNUK NOʼOX KOʼONTONTIK?

¿Kʼu yuʼun mu xa jnaʼ kʼusi ta jpastik?

Li Klinika Mayo ta Estados Unidos ti lek ojtikinbile chal ti jutuk mu skotoluk li buchʼutik staoj xa svaʼlejike «mas to chil svokolik ta skoj ti mu xa noʼox snaʼ kʼusitik tspas ta xkuxlejalik xchiʼuk ti sujomike. Li jkuxlejaltik avie xuʼ xjel noʼox ta anil ti chakʼbutik vul oʼontonale». Jnopbetik skʼoplal jaytosuk kʼusitik ti kʼu yuʼun mu xa noʼox jnaʼ kʼusi ta jpas ta jkuxlejaltik xchiʼuk ti sujomutike:

xtuchʼel nupunel ta registro civil
kʼalal oy buchʼu chcham kuʼuntike
jun tsatsal chamel
kʼalal oy kʼusi ta jnuptantike
k’alal oy choplejale
ti ep kʼusitik ta jpas ta jkuxlejaltik jujun kʼakʼale
kʼalal ch-echʼ nojelal ta voʼ o yan kʼusitike o li kʼusi chopol tspas li krixchanoetike
sujel ta chanob vun o ta abtel
vul oʼontonal ta skoj abtel xchiʼuk takʼin

LI KʼOXETIK TI MU XA SNAʼ KʼUSI TSPASIKE

Mu labaluk sba ta aʼiel ti mu xa noʼox snaʼ kʼusitik tspas ta xkuxlejalik li kʼoxetike. Yuʼun jlome chil svokolik ta chanob vun, mu stsakatik ta mukʼ ta snaik, xuʼ van chichʼik majel, chopol chaʼi sbaik o chichʼik ilbajinel ta chiʼinejbail ta vayel. Yantike tsvul yoʼontonik ta skoj s-eksamenik xchiʼuk ti kʼu yelan chlokʼ skalifikasionike. Yantik xtoke, chil kʼu yelan chchʼak sba li stot smeʼik ta skoj ti chtuchʼ snupunelike. Li kʼoxetik ti mu xa noʼox snaʼ kʼusitik tspas ta xkuxlejalike xuʼ oy kʼusitik xibal sba xvaychintaik, vokol chaʼiik xchanel vun, ch-ipajik ta vul oʼonton o mu skʼan buchʼu xchiʼinik. Jlome mu xa snaʼ kʼusi tspasik sventa junuk noʼox yoʼontonik. Li buchʼutik jech chil svokolike tskʼanik noʼox koltael ta anil.