Li baʼyel vaknakʼobale

¿MI XA naʼ kʼusi baʼyel la spas Noé kʼalal lokʼik ta arka xchiʼuk li yutsʼ yalale? La jyakʼbe smoton Dios. Kʼelavil li lokʼol te ta olone, ti jech yakal ta spase. Ti Noee la jyakʼ ta matanal chonetik sventa tstojbe ta vokol Dios ti yuʼun kuxul iktabat li yutsʼ yalale.

¿Mi lek van la jyil Jeova xa naʼ li matanal taje? Ta melel lek. Jech oxal la jyalbe Noé ti muʼyuk xa bu ta xchaʼakʼbe slajeb ta jun nojelal ta voʼ ti lume.

Mu jaluk takij spʼejel li balumile. Vaʼun, ti Noé xchiʼuk li yutsʼ yalale lokʼ nakiikuk ta lumtik. Ti Diose la jyakʼbe slekilalik xchiʼuk xi la jyalanbee: Skʼan cha vil ep avalab anichʼnabik. Skʼan cha epajik jaʼ to mi noj avuʼunik ta krixchanoetik spʼejel li Balumile.

Pe ta tsʼakal ne, kʼalal mi la jyaʼi li krixchanoetik ta sventa li mukʼta Nojelal ta voʼe, yikʼal van ta xiʼik mi chchaʼtal jun nojelal ta voʼ kʼuchaʼal taje. Jech oxal ti Diose oy kʼusi la jyakʼ sventa xvul ta sjolik li kʼusi snopoj ta melel ti Diose, ti muʼyuk xa ta snojes ta voʼ li Balumile. ¿Mi xa naʼ kʼusi la jyakʼ sventa xvul ta sjolik? Jaʼ jun vaknakʼobal.

Bateltike li vaknakʼobale chvinaj ta vinajel kʼalal lek xojobal Kʼakʼal ti jaʼo la jyakʼ voʼe. Li vaknakʼobale ep ta tos kʼupil sba skoloraltak. ¿Mi oy aviloj junuk velta? ¿Mi xa vil li ta lokʼol liʼe?

Liʼe jaʼ ti kʼusi la jyal li Diose: Ta xkal ta melel ti muʼyuk xa ta jchaʼakʼbe slajeb krixchanoetik xchiʼuk chonetik ta jun nojelal ta voʼ. Ta xkakʼ jvaknakʼobal ta tok. Kʼalal ta xlokʼ tal li vaknakʼobale, ta xkil xchiʼuk ta xvul ta jol li kʼusi la jkal ta melele, xi.

Jaʼ yuʼun kʼalal cha vil jun vaknakʼobale, ¿kʼusi skʼan xvul ta ajol? Li kʼusi skʼan xvul ta ajole jaʼ li kʼusi yaloj Dios ta melel ti muʼyuk xa bu ta xchaʼakʼbe slajeb ta jun nojelal ta voʼ ti lume.