Chʼiom tot vakax ti pasbil ta kʼanal takʼine

¡KʼU YUʼUN jech leʼ ne! ¿Kʼusi yakal tspas li krixchanoetike? Yakal tsmuyubtaik jkot chʼiom tot vakax. ¿Kʼu yuʼun jech ta spasik leʼ ne?

Kʼalal jalij tajek ta vits li Moisese, li jteklume xi la jyale: Mu jnaʼtik kʼusi la spas ti Moisese. Jpastik junuk dios ti tslokʼesutik li ta balumil liʼe, xiik.

Lek oy, xi Aarón, li sbankil Moisese. Akʼbikun tal li kʼusitik pasbil ta kʼanal takʼin avuʼunike, xut li krixchanoetike. Kʼalal la jyakʼbeik li Aarone, la jyunijes li kʼanal takʼine vaʼun la pas ta chʼiom tot vakax. Li jteklum ne xi la jyale: ¡Liʼe jaʼ jDiostik, ti la slokʼesutik tal ta Egiptoe! Vaʼun la spasik jun mukʼta kʼin, la smuyubtaik li chʼiom tot vakax ti pasbil ta kʼanal takʼine.

Kʼalal la jyil Jeova li kʼusi tspasik taje, ilin tajek. Jech oxal xi la jyalbe li Moisese: Sujaba, yalan batel, xut. Yuʼun li jteklume toj chopol kʼusi tspas. La xchʼay ta sjolik li jmantaltake xchiʼuk tsnijan sbaik ta stojolal jkot chʼiom tot vakax ti la spasik ta kʼanal takʼine, xi.

Ti Moisese yal tal ta anil. Vaʼun kʼalal nopaj batele, xi yakal tspasik kʼot sta. ¡Li krixchanoetike chkʼejinik xchiʼuk ch-akʼotajik ta spat xokon li chʼiom tot vakax pasbil ta kʼanal takʼine! Li Moisese la svokʼ li chaʼpech ton ti te tsʼibabil li mantaletike yuʼun ilin tajek, lilijem kom ta jmoj. Vaʼun li Moisese la stsak li chʼiom tot vakax ti pasbil ta kʼanal takʼine, la jyunijes. Jech pas ta pukuk yuʼun.

Toj chopol tajek li kʼusi la spas li jteklume. Jaʼ yuʼun li Moisese la jyalbe jayvoʼ viniketik ti akʼo stsak yespadaike. Li chopol krixchanoetik ti tsmuyubtaik li chʼiom tot vakax pasbil ta kʼanal takʼine akʼo yichʼik milel, xi li Moisese. ¡Jech oxal la smilik oxmil krixchanoetik! ¿Mi mu jechuk ti jaʼ jpʼijubtaseltik ti jaʼ noʼox skʼan jmuyubtatik li Jeovae ti mu jaʼuk jmuyubtatik li jecheʼ diosetike?