Svokʼel Jesús kʼalal to ta slajel

Li anjel Gabriele la jyichʼ takel tal ta stojolal jun lekil tsebal ants ti jaʼ sbi Mariae. La jyalbe ti ta xil jun yol ti chkʼot ta jpas mantal kʼuchaʼal ajvalil ta sbatel osile. Li olol Jesuse, vokʼ ta snail vakax ti bu la jyichʼ vulaʼanel yuʼun jayvoʼ jchabi chijetike. Ta tsʼakale, beiltasatik batel yuʼun jpʼej kʼanal ta stojolal Jesús jayvoʼ viniketik ti likemik tal ta slokʼeb Kʼakʼale. Ta jchantik buchʼu akʼbat yilik li kʼanal taje, xchiʼuk noxtok ta jchantik kʼuxi muʼyuk xcham Jesús manchuk mi ep krixchanoetik tsmilik ox yaʼiik.

Ta tsʼakal, ta xkiltik ti yakal ta xchiʼin ta loʼil jchanubtasvanejetik ta chʼulna ti kʼalal yichʼoj xaʼox 12 jabil li Jesuse. Kʼalal lokʼ xaʼox vaxaklajuneb jabil ti jech kʼot ta pasel taje, li Jesuse la jyichʼ voʼ, vaʼun lik xchol mantal xchiʼuk lik chanubtasvanuk ta sventa li Ajvalilale, yuʼun jaʼ ta sventa ti la jyichʼ-o takel tal ta Balumil yuʼun li Diose. Sventa chkoltaat ta spasel li abtelal taje, la stʼuj lajchaʼvoʼ viniketik ti kʼot ta yajtakboltake.

La spas ep skʼelobiltak juʼelal noxtok li Jesuse. La smakʼlin ta smilal noʼox krixchanoetik ta uni jaykot choy xchiʼuk ta uni jayib pan. La xpoxta jchameletik xchiʼuk la xchaʼkuxes animaetik noxtok. Ta slajebal xa ne, ta jchantik ti kʼusitik kʼot ta pasel ta stojolal ti kʼalal jaʼo xa ta xchame, ta jchantik noxtok kʼuxi la smilik. Jutuk mu oxibuk jabil xchiʼuk oʼlol la xchol mantal li Jesuse, jech oxal skotol li loʼiletik ta SVAKVOKʼALE jalij 34 jabil.