CHANUBTASO AVALAB ANICHʼNABIK
Jesucristo, ¿kʼu yelan skʼan jvules ta joltik?
Li ta disiembree ta spʼejel Balumil buyuk xuʼ xichʼ tael lokʼoletik ti chakʼ ta ilel ti jaʼ jun neneʼ li Jesuse. Te puchʼul li ta stikʼobil sveʼel chonbolometik ti xkoʼolaj kʼuchaʼal jun kaxae xchiʼuk ti oy sjobelale. Pe, ¿mi jech-o van neneʼ ta melel skʼan jvules ta joltik li Jesuse?...a Oy jtos tsots skʼoplal ti kʼu yelan skʼan jvules ta joltike. Taje xuʼ te jchantik kʼalal oy kʼusi kʼot ta stojolalik jun akʼobal li jchabichijetik ti jaʼo te oyik ta yaxaltik ti te nopol xil Belene.
Ta anil noʼox tal jun anjel ta stojolalik li jchabichijetike, xi albatike: «Nax ivocʼ [...] jun Jcoltavanej avuʼunic. Jaʼ Cristo, jaʼ Cajvaltic». Li anjel xtoke laj yal ti bu xuʼ staik li Jesuse, xi laj yalanbee: «Pixbil ta pocʼ chataic, te puchʼul ta yavil sveʼum vacax». Ta ora noʼox vinaj epal anjeletik ti lik «yalic slequilal Dios[e]».
¿Kʼu van yelan laj avaʼi aba ti teuk achikintaoj ti laj yalbeik slekilal Dios li anjeletike?... ¡Li jchabichijetike muyubajik tajek! Xi laj yalike: «Batic ta Belén chaʼe, bat jqʼueltic li cʼusi icʼot ta pasel[e]». Vaʼun, «te la staic li María xchiʼuc Josee, xchiʼuc li olol te puchʼul ta yavil sveʼum vacaxe».
Ta anil noʼoxe kʼot yan krixchanoetik li bu oyik li María xchiʼuk Josee. Kʼalal och xchapik kʼusi kʼot ta pasel li jchabichijetike, labal tajek sba laj yaʼiik skotolik. ¿Mi xamuyubaj yuʼun ti chavaʼibe skʼoplal li kʼusitik labalik sba taje?... Jkotoltik ti jkʼanojtik Diose chijmuyubaj yuʼun. Ti vokʼ li Jesuse chakʼ tajek muyubajel, jkʼeltik batel ti kʼu yuʼun jech chkaltike. Sventa jnaʼtike skʼan jvules ta joltik kʼusi kʼot ta pasel kʼalal muʼyuk toʼox nupunem li Mariae.
Oy jun kʼakʼal li anjel ti Gabriel sbie, bat svulaʼan María xchiʼuk laj yalbe ti chil yole, xi albate: «Ta to xʼichʼat ta mucʼ. Jaʼ Xnichʼon Dios ta vinajel, xi sbi chcʼot». Li anjel Gabriele laj yal xtok ti ta xkʼot ta Ajvalile xchiʼuk ti «muʼyuc slajeb li yabtel chichʼe».
Li Mariae tsjakʼbe sba kʼuxi ti chchiʼin yole, yuʼun muʼyuk bu xchiʼinoj ta vayel mi junuk vinik. Li anjel Gabriele xi laj yalbe smelolale: «Jaʼ ta xtal ta atojol li Chʼul Espiritue. Ta sventa stsatsal Dios. Li olol ta xvocʼ avuʼune jaʼ Xchʼulnichʼon Dios ta xcʼot sbi». Ta tsʼakale, li Diose la sjelubtasbe xkuxlejal Jesús ta yalajeb María sventa te xchʼi tal kʼuchaʼal jun neneʼ, ¡toj labal sba ti vaʼ yelan kʼot ta pasele!
¿Mi oy aviloj junuk velta slokʼol ti kʼu yelan ch-ayan ta alel Jesús ti chakʼik ta ilel ti chvulaʼanat yilel yuʼun oxvoʼ reyes magos xchiʼuk jchabichijetik kʼalal neneʼ toʼoxe?... Taje buyuk noʼox chakʼik ta ilel li ta yorail skʼinal Svokʼel Ninyoe, pe mu jechuk kʼot ta pasel ta melel. Li reyes magos taje jaʼ yabtelik skʼelel kʼanaletik ti tspasik li kʼusi mu lekuk chil li Diose. Jkʼeltik kʼusi kʼot ta pasel kʼalal kʼotike. Li Vivliae xi chale: «Cʼalal iʼochic ta nae, te laj yilic li olole, xchiʼuc li smeʼe, jaʼ li Mariae». Jaʼ yuʼun, kʼalal kʼot li jvulaʼaletike, li Jesuse olol xaʼox, maʼuk jun neneʼ ti te oy ta sveʼeb chonbolome, te nakal ta jpʼej na ti te oyik ek li José xchiʼuk Mariae.
¿Kʼuxi la snaʼik bu oy Jesús li jkʼelkʼanaletike?... Oy kʼusi ti xkoʼolaj ta pʼej kʼanal yilele beiltasatik-o batel ta stojolal ajvalil Herodes ti te oy ta Jerusalene, mu tukʼuk kʼotik ta Belén. Li Vivliae chal ti tskʼan tsnaʼ Herodes bu oy li Jesuse, yuʼun ta smil yaʼi. Jnopbetik skʼoplal liʼe. ¿Buchʼu xanaʼ laj yakʼ li kʼanal sventa sbeiltas batel ta stojolal Herodes li jkʼelkʼanaletike?... Maʼuk li Diose, jaʼ li yajkontra Satanase, jaʼ li Diabloe.
Li Satanase tskʼan ti akʼo snopik krixchanoetik avi kʼakʼal ti jaʼ to uni neneʼ li Jesuse, ti mu snaʼ spoj sbae. Pe li anjel Gabriele laj yalbe María ti chkʼot ta ajvalile, «muʼyuc slajeb li yabtel chichʼe». Li avie yakal xa ta x-ajvalilaj te ta vinajel li Jesuse xchiʼuk jutuk xa tajek skʼan slajes skotol li yajkontratak Diose. Taje jaʼ li kʼusi skʼan jvules ta joltike xchiʼuk skʼan xkalbetik li yan krixchanoetike.
Ti bu xuʼ jkʼeltik ta Vivliae
a Mi yakal chakʼelbe jun olol li loʼil liʼe, pajan jlikeluk li bu oy oxib puntoetike xchiʼuk tijbo yoʼonton akʼo yal ta skʼop stuk li sloʼile.