Chvokʼ ta snail vakax li Jesuse

¿MI XA naʼ buchʼu li uni neneʼ liʼe? Jaʼ, jaʼ li Jesuse. Naka to te vokʼ ta snail vakax. Li ta snail vakaxe te tslapik yan chonetik xtok. Li Mariae yakal ta xpuchʼan Jesús te ta sveʼeb vakax, jaʼ ti bu chichʼ akʼbel sveʼel buroetik xchiʼuk yan chonetike. Pe ¿kʼu yuʼun liʼ oyik ta snail vakax li María xchiʼuk Josee? Liʼe maʼuk yavil sventa chvokʼ jun neneʼ, ¿mu jechuk?

Maʼuk, maʼuk te maʼ ti jechuke. Pe li María xchiʼuk Josee liʼ oyik ta skoj smantal Augusto César, li ajvalil ta Romae, yuʼun la jyal mantal ti akʼo sutikuk batel ti bu vokʼik li krixchanoetik sventa akʼo xakʼ sbiik ta jlik livro. Yuʼun liʼ vokʼem ta Belén li Josee jech oxal talik. Pe kʼalaluk vulike muʼyuk bu la sta svayebik. Jaʼ yuʼun te talik ti bu oy li chonetike. ¡Pe, jaʼo vokʼ li Jesuse! Pe kʼuchaʼal cha vile lek oy.

¿Mi xa vil li jchabi chijetik ti te xa xtalik sventa tskʼelik li Jesuse? Te oyik toʼox ta osiltik ta akʼobaltik, vaʼun jun lus la jyakʼ xojobal ta stojolalik. ¡Jaʼ jun anjel! Xiʼik ta jyalel li jchabi chijetike. Pe xi albatik yuʼun li anjele: ¡Mu xa xiʼik! Oy kʼusi lek ta xkalboxuk. Nax, li Kajvaltik Cristoe vokʼ xa ta Belén. ¡Jaʼ ta skolta li jteklume! Te pixil ta pokʼ xchiʼuk te puchʼul cha taik ta sveʼeb vakax. Ta jech noʼox, epal anjeletik vulik ta lokʼel vaʼun lik slekil kʼoptaik li Diose. Li jchabi chijetike ta anil bat saʼik li Jesuse, vaʼun la xa staik.

¿Mi xa naʼ kʼu yuʼun stuk noʼox jech li Jesuse? ¿Mi xa naʼ buchʼu jaʼ ta melel? Vuleso ta ajol, li baʼyel loʼil liʼ ta livroe la jchanbetik skʼoplal li sba Nichʼon Diose. Liʼe abtej xchiʼuk Jeova ta spasel li vinajeletike, li Balumile xchiʼuk spasel yan kʼusitik. Jaʼ, liʼe jaʼ li Jesuse.

Jech, li Jeovae la jyakʼ talel li xNichʼon ti te toʼox oy ta vinajele, te la jyakʼ ta yalajeb María. Vaʼun, li neneʼe lik chʼiuk jech kʼuchaʼal chchʼi ta yalajeb smeʼik li yan neneʼetike. Pe li neneʼ taje jaʼ xNichʼon Dios. Vaʼun kʼot skʼakʼalil vokʼ liʼ ta snail vakax ta Belene. ¿Mi xa vil ti kʼu yuʼun xmuyubajik li anjeletik ta yalbel krixchanoetik ti vokʼ xa li Jesuse?