Li anjeletike chalik ti vokʼ xa li Jesuse

Li ajvalil ta Roma ti Sesar Augusto sbie laj yalbe mantal judaetik ti akʼo xbat stsak sbiik li ta slumal ti bu vokʼike. Ta skoj ti likemik ta Belen li yutsʼ yalal Josee, jaʼ te bat stsak sbiik, li vaʼ orae jutuk xa ox skʼan xvokʼ li Jesuse.

Kʼalal kʼotik ta Belen li Jose xchiʼuk Mariae, muʼyuk bu la staik junuk na ti bu xuʼ xkomike, jaʼ yuʼun jaʼ te komik ta snail vakax, vaʼun jaʼ te vokʼ li Jesuse. Li Mariae la xpix ta jun kʼunil pokʼ li Jesuse xchiʼuk te la xpuchʼan ta sveʼeb vakax.

Oy junantik jkʼelchijetik ti te chchabi xchijik ta osiltik ti te nopol xkom ta Belene. Vaʼun, ta ora noʼox vinaj tal yaj-anjel Jeova ta stojolalik, joyobtabil kʼotik ta xojobal Jeova xchiʼuk xiʼik tajek. Xi albatik yuʼun li anjele: «Mu xaxiʼik, yuʼun tal kalboxuk lekil aʼyejetik, yuʼun vokʼ xa ta Belen li Mesiase». Ta ora noʼox te vinaj tal epal anjeletik ta vinajel ti xi chalike: «Akʼo junuk yutsil slekilal li Dios ti te oy ta toyole xchiʼuk junuk yoʼontonik li krixchanoetik ta sba balumile». Ta tsʼakale, sakchʼayik batel li anjeletike. ¿Kʼusi van ta spasik li jkʼelchijetike?

Jaʼ yuʼun, xi laj yalbe sbaik li jkʼelchijetike: «Skʼan tukʼ xijbat ta ora li ta Belene». Vaʼun, batik ta ora xchiʼuk te la staik li Jose xchiʼuk Maria xchiʼuk te puchʼul ta staik ta sveʼeb vakax li uni neneʼe.

Kʼalal laj yaʼiik yan krixchanoetik li kʼusi kʼot ta stojolal li jkʼelchijetike, toj labal sba laj yaʼiik. Li Mariae la snopbe skʼoplal li kʼusi laj yal li anjeletike xchiʼuk muʼyuk bu xchʼay-o ta sjol. Li jkʼelchijetike sut skʼel li xchijike xchiʼuk la stojbeik ta vokol Jeova li kʼusi akʼbat yilike xchiʼuk li kʼusi laj yaʼiike.