¿Bakʼin xchiʼuk bu chvokʼ li Jesuse?

Li ajvalil ta Roma ti Sesar Augusto sbie laj yal mantal ti akʼo xakʼ ta tsakel sbiik li krixchanoetike. Jaʼ yuʼun skʼan xbat ta jteklum Belen ta sural Jerusalen li Jose xchiʼuk Mariae, yuʼun jaʼ te vokʼ li Josee.

Ep buchʼutik te oy ta Belen sventa chakʼ ta tsakel sbiik. Jaʼ yuʼun muʼyuk xa bu la sta svayebik li Josee, jech oxal te bat vayikuk ta nail vakax, ti jaʼ te chvayik li vuroetik xchiʼuk yan chonbolometike. Vaʼun jaʼ te vokʼ li Jesuse. Te une la xpix ta jlik pokʼ yuni neneʼ li Mariae, te la xmochan ta veʼeb vakax.

Jaʼ stuk Dios la stijbe yoʼonton Sesar Augusto ti akʼo xakʼ li mantal taje. ¿Kʼu yuʼun? Jaʼ sventa te xvokʼ ta Belen li Jesuse, ti jaʼ te vokʼ li ajvalil Davide, li smoltot Jesuse. Voʼne xa onoʼox yaloj tal Vivlia ti jaʼ te chvokʼ li Ajvalil ti albil onoʼox skʼoplale (Miqueas 5:2).

¡Toj tsots skʼoplal li vaʼ akʼobale! Kʼalal jaʼo te chchabi xchijik li jchabichijetike oy kʼusi xojobaj sakil kʼot ta stojolalik. ¡Jaʼ xojobal li Jeovae! Xi laj yalbe jchabichijetik jun yaj-anjel Diose: «Mu xaxiʼik, yuʼun ¡kʼelo avilik!, tal kalboxuk lekil aʼyejetik, tsta jun mukʼta kuxetel oʼontonal skotol li krixchanoetike. Yuʼun vokʼ xa jun jkoltavanej avuʼunik li avie, jaʼ li Kajvaltik Kristoe, te vokʼ ta steklumal David. Jaʼ chtun ta senyail liʼe: pixil ta pokʼ chataik jun olol xchiʼuk te puchʼul chataik ta veʼeb vakax». Vaʼun ta ora noʼox te vinaj tal ep anjeletik xchiʼuk xi laj yalike: «Akʼo junuk yutsil slekilal li Dios ti te oy ta toyole xchiʼuk junuk yoʼontonik li krixchanoetik ta sba balumil ti lek ilbilike» (Lukas 2:10-14).

Kʼalal batik li anjeletike, xi laj yalbe sbaik li jchabichijetike: «Skʼan tukʼ xijbat ta ora li ta Belene, bat jkʼeltik li kʼusi kʼot ta pasel ti laj yakʼ jnaʼtik Jeovae» (Lukas 2:15). Vaʼun batik ta anil, kʼalal kʼotike te la staik li Jesus jech kʼuchaʼal albatik yuʼun li anjele. Kʼalal laj yalik jchabichijetik li kʼusi albatik yuʼun anjele, labal to sba laj yaʼi skotolik li buchʼutik te oyike. La snakʼ ta yoʼonton Maria skotol li kʼusitik taje xchiʼuk te tsnopilan-o ta yoʼonton kʼusi smelolal.

Ep buchʼutik xchʼunojik avi ti ta 25 la yuʼun disiembre vokʼ li Jesuse. Pe jaʼo chakʼ tajek voʼ li ta yuilal disiembre ta Belene xchiʼuk jaʼo yorail siktik. Maʼuk noʼox, yuʼun chakʼ taiv bakʼintik xtok. Ta skoj ti vaʼ yelan siktike, mu stakʼ xlokʼ xchabi xchijik ta osiltik ta akʼobaltik li jchabichijetike. Jech xtok, mu sta-o yaʼel ti xal mantal ajvalil ta Roma ti akʼo xanavik jayibuk kʼakʼal sventa xbat stsak sbiik kʼalal jaʼo yorail siktike. ¿Kʼu yuʼun? Yuʼun kontrainbil xa onoʼox yuʼun li krixchanoetike. Jaʼ yuʼun chaʼa, te van bu kʼakʼal ta oktuvre vokʼ li Jesuse.